Akatebe Akalemi ak’Abakaiso ba Yahwe Nuko Kaha?

Akatebe Akalemi eri guruupu entaito ey’Abakristaayo abakuzire omu by’omwoyo abarukuha Abakaiso ba Yahwe omu nsi yoona oburagirizi. Omulimo gwabu gutwarramu ebintu bibiri:

• Barolerra omulimo ogw’okutekaniza oburagirizi oburukusigikirra ha Baibuli kuraba omu bitabu, ensorrokano, hamu n’amasomero g’Abakaiso ba Yahwe.—Luka 12:42.

• Barolerra omulimo gw’Abakaiso ba Yahwe omu nsi yoona, obu nibaha oburagirizi oburukukwata ha kutebeza, n’okurolerra omulingo sente n’ebintu ebihebwayo birukukozesebwa.

Akatebe Akalemi kahondera eky’okurorraho ekyatairweho ‘abakwenda n’abakuru omu Yerusalemu’ omu kyasa eky’okubanza, abaakoraga encwamu ez’amaani habw’ekitebe Ekikristaayo. (Engeso Ezabakwenda 15:2) Kusisanaho n’abasaija abo abesigwa, abali h’Akatebe Akalemi tibali bakuru b’ekitebe. Baserra oburagirizi kuruga omu Baibuli, kandi baikiriza ngu Yahwe Ruhanga akomere Yesu Kristo kuba mutwe gw’ekitebe.—1 Abakolinso 11:3; Abefeso 5:23.

Nibaha abali h’Akatebe Akalemi?

Banu nubo ab’Oruganda abali h’Akatebe Akalemi: Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, na Jeffrey Winder. Nibaheereza ha kitebe kyaitu ekikuru eky’ensi yoona ekiri Warwick, omu New York, U.S.A.

Akatebe Akalemi katekaniziibwe kata?

Akatebe Akalemi kakataho obutebe mukaaga kurolerra ebicweka ebirukwahukana eby’omulimo gwaitu, kandi buli omu halibo naheereza ha kamu rundi bubiri ha butebe bunu.

• Akatebe Akabateraniza: Karolerra ensonga ez’eby’ebiragiro, kakonyera abahikirweho ebigwererezi, kakonyera Abakaiso ba Yahwe abarukuhiiganizibwa habw’enyikiriza zaabo, hamu n’ensonga ezindi ezirukukwataho Abakaiso ba Yahwe.

• Akatebe Akarolerra Ababbeseri: Karolerra entekaniza ezirukukwataho Ababbeseri.

• Akatebe Akarukujunanizibwa n’Okuteera Ebitabu: Karolerra omulimo gw’okuturukya n’okusindika ebitabu ebirukusigikirra ha Baibuli hamu n’omulimo gw’okwombeka ebyombeko by’ensorokano, ofiisi ez’okuhindurramu ebitabu, hamu na ofiisi z’amataagi.

• Akatebe ak’Obuheereza: Karolerra omulimo ogw’okutebeza amakuru amarungi ag’Obukama.—Matayo 24:14.

• Akatebe Akarukujunanizibwa n’Okwegesa: Nikajunanizibwa n’okurolerra omulimo ogw’okutekaniza ebintu ebirakozesebwa omu kwegesa kuraba omu nsorrokano, amasomero, hamu na puroguraamu ez’amaraka na vidiyo.

• Akatebe Akarukujunanizibwa n’Okuhandiika: Kajunanizibwa n’okutekaniza ebirateekwa omu bitabu byaitu na ha mukura gwaitu, kandi kongera karolerra omulimo ogw’okuhindura ebitabu.

Kwongerraho ha mulimo gwabo kuraba omu butebe bunu, Akatebe Akalemi kaba n’orukurato buli wiiki kubazaaho ebyetaago eby’ekitebe kyona. Omu nkurato zinu, Akatebe Akalemi kabazaaho Ebyahandiikirwe ekibirukugamba, kandi baikiriza omwoyo gwa Ruhanga kubebembera kusobora kukora encwamu enungi.—Engeso Ezabakwenda 15:25.

Nibaha abakonyera Akatebe Akalemi?

Bali Bakristaayo abesigwa abakonyera ha butebe obw’Akatebe Akalemi. (1 Abakolinso 4:2) Baine okumanya n’obusobozi omu kurolerra emirimo ey’akatebe akabarukuba baroho kandi babaho omu rukurato orwa buli wiiki orw’akatebe ako. N’obukiraaba ngu tibejumbira omu kukora encwamu, abakonyezi banu baha amagezi, bakonyera kurora ngu encwamu zinu ezikozerwe zateekwa omu nkora, kandi bekebiija nambere zahika n’ebirugiremu. Akatebe Akalemi nikasobora kubaha obujunanizibwa obw’okubungira ab’oruganda na banyaanya itwe omu biikaro ebirukwahukana omu nsi, rundi kuha embazo ha rusorrokano orw’omwaka rundi ha kuturuka kw’abeegi ba Gilead.