Relatóriu kona-ba haklaken-naʼin sira-nia atividade
Nia hetan objetivu ba ninia moris
JESUS dehan katak nia hatene ninia bibi-malae sira. (João 10:14) Se ema ida iha laran neʼebé moos, hadomi dame no hahalok loos, fasil ba nia atu hakbesik ba Jesus nia dixípulu sira. Ema sira hanesan neʼe nia moris mak iha objetivu duni, hanesan ho feto ida iha rai-Béljika. Ninia esperiénsia mak tuirmai neʼe:
“Iha tempu neʼebé Testemuña ba Jeová sira dere haʼu-nia odamatan, haʼu hasoru hela depresaun makaʼas, no hanoin atu oho an. Haʼu gosta informasaun neʼebé sira fó sai kona-ba solusaun ba problema sira iha mundu neʼe, maibé haʼu la gosta ideia katak Maromak sei hadiʼa problema sira. Haʼu odi igreja tanba hatudu laran-makerek, no tan neʼe mak ba tinan ualu ona haʼu para atu tuir misa. Maibé haʼu nota katak Testemuña sira koʼalia lia-loos, no haʼu rekoñese katak susar atu moris ketak husi Maromak.
“Buat neʼebé triste mak depois sira vizita tiha haʼu ba dala balu, haʼu lakon kontaktu ho Testemuña sira. Haʼu sente la kontente. Loroloron, haʼu fuma sigarru masu rua, no haʼu mós uza droga. Tanba hakarak komunika ho avó-mane neʼebé mate ona, haʼu koko espiritizmu. Rezultadu mak anju aat ataka haʼu iha kalan bainhira mesamesak no neʼe halo haʼu taʼuk! Ida-neʼe kontinua durante fulan barak. Kalan-kalan haʼu taʼuk atu mesak deʼit.
“Loron ida haʼu bá laʼo halimar, maibé haʼu hili fali dalan neʼebé la hanesan baibain, no haʼu toʼo iha área ida neʼebé ema halo hela konstrusaun. Haʼu hakfodak atu haree grupu neʼebé boot loos iha neʼebá. Kuandu haʼu laʼo besik uitoan ba fatin neʼe, haʼu haree katak sira mak Testemuña ba Jeová neʼebé harii hela Reuniaun-Fatin. Haʼu hanoin-hetan fila fali tempu neʼebé Testemuña sira vizita haʼu, no haʼu komesa hanoin katak mundu neʼe sei furak loos se ema hotu halaʼo moris iha dalan neʼebé hanesan ho ema sira-neʼe.
“Haʼu hakarak tebes Testemuña sira atu vizita fali haʼu, entaun haʼu koʼalia ho ema balu iha fatin konstrusaun neʼe. Haʼu halo orasaun ba Maromak, no liutiha loron sanulu, mane neʼebé uluk hasoru haʼu, mai fali haʼu-nia uma. Nia fó sujestaun ba haʼu atu kontinua estuda Bíblia, no ho kontente haʼu konkorda. Nia konvida kedas haʼu atu tuir reuniaun sira iha Reuniaun-Fatin. Haʼu simu konvite neʼe. Neʼe mak tempu primeiru neʼebé haʼu haree ema hotu hadomi malu no sente kontente! Ba tempu kleur loos haʼu buka hela ema sira hanesan neʼe. Ikusmai, haʼu hetan sira!
“Husi tempu neʼebá kedas, haʼu tuir reuniaun hotu. Liutiha semana tolu, haʼu hapara toman atu fuma. Haʼu soe hotu haʼu-nia livru sira kona-ba astrolojia, no mós múzika neʼebé liga ho anju aat sira. Neineik-neineik, haʼu bele sente katak anju aat sira la book ona haʼu. Haʼu troka haʼu-nia moris hodi tuir Jeová nia matadalan sira husi Bíblia, no liutiha fulan tolu haʼu komesa haklaken liafuan diʼak. Liutiha fulan-neen tan, haʼu hetan batizmu. Tuirmai, liutiha loron rua deʼit husi tempu neʼebé haʼu batizmu, haʼu foti pioneiru estra.
“Haʼu hatoʼo agradese ba Jeová tanba buat diʼak hotu neʼebé nia halo ona ba haʼu. Ikusmai, haʼu-nia moris iha duni objetivu. Loos duni, Jeová nia naran mak hanesan uma aas neʼebé seguru, no iha neʼebá mak haʼu hetan protesaun. (Provérbios 18:10) Haʼu sente hanesan ho ema neʼebé hakerek Salmo 84:10: ‘Tanba loron ida iha Ita-nia pátiu mak diʼak liu fali loron rihun ida iha fatin seluk! Haʼu hili atu hamriik iha odamatan iha haʼu-nia Maromak nia uma duké hela iha ema aat sira-nia tenda.’ ”
Feto neʼe mak ema neʼebé haraik an no nia hetan objetivu ba ninia moris. Entaun, ema naran deʼit neʼebé buka Jeová ho laran-moos bele hetan duni objetivu ba sira-nia moris.