Bakaleho ba Yehova Bakatepe Binaanga Indi Bakabilingisa Bilikwatasane?

Yetu Bakaleho ba Yehova tukeseka mwoshe mutukasela mangana tulingise binaanga byetu na binaanga bya bakwetu bilikwatasane. Tukasingimika Njambi uje wabwahesele ngwendi kukale naanga. (Kushangumuka 2:21-24; Efeso 3:14, 15) Yehova nabwahesa binangulo bije bili na kukwasa banu babangi mu kaye koshe bapwe ba kubwahelela mu malo abo na kuwakanyamesa.

Bakaleho ba Yehova Bali na Kulingisa Bati Binaanga Bilikwatasane?

Tukakabangeya binangulo bya mu Mbimbiliya mwafwa bikatukwasa tupwe banalume bababwa, banakazi bababwa na bisemi bababwa. (Visimo 31:10-31; Efeso 5:22–6:4; 1 Timateo 5:8) Binangulo bili mu Mbimbiliya bili na kukwasa nameme binaanga bije byakala na banu ba bulombelo bwa kuliseza. (1 Petulu 3:1, 2) Zibeni bibendekele banu baje kubapwile Bakaleho mubalyambatele omwo umo wabo wakupwile Mukaleho:

• “Ha myaka 6 ya kulibanga itwalyambatele, twakele na kulilubalesa na kulicokota kushwa kumo. Oloni omwo Ivete wapwile Mukaleho wa Yehova, wakele oni na kumwesa manene cizemo na mbunge ya kubandamena. Kutengulula yoyesi yendi kwobwele bulo bwetu.”—Clauir, wa ku Brazil.

• “Munalume wange Chansa mwashangumukile kulilongesa Mbimbiliya na Bakaleho ba Yehova, kunjalitombwele na biyongola byendi mwafwa njasinganyekele ngwange Bakaleho ba Yehova bakatepe binaanga. Oloni kushwa bene haje, njalimwena ngwange kumani Mbimbiliya yatukwasa mu bulo bwetu.”—Agness, wa mu Zambia

Mutukai mu lihya, tukakwasa bakwetu bazibuke omwo kupangesa binangulo bili mu Mbimbiliya kubakwasela

• Bangule mwamubwa munu wa kulyambata nendi

• Bayoye mwamubwa mu mwaka wa kulibanga ubalyambata

• Bayoye mwamubwa na baka-bulo bwabo

• Bapangese mwamubwa bimbongo

• Bayoye mu kwoloka

• Balikonekele umo na mukwabo

• Balongese bana babo

Kuma kutengulula bulombelo bwa munu kunasa kunena bukalu mu bulo ndi?

Eyo, bisimbu bimo kukanene bukalu. Cakumwenako, mu 1998 kampani ya Sofres yawanene ngwayo banalume na banakazi bamo baje banambata nambe kushomboka ku Mukaleho bakaliwana na bukalu mu bulo bwabo.

Yesu wapolofwetele ngwendi bisimbu bimo baje bononoka bilongesa byendi baliwana na bukalu mu binaanga byabo. (Mateo 10:32-36) Muka-kutondesesa mizimbu ya kusañulu wa lizina lya Will Durant wendekele ngwendi mu Bumwene bwa Baloma, “baka-Kilistu babanene mulonga wa kutepa binaanga,”a co Bakaleho ba Yehova bamo nabo bali kubana mulonga wa kulifwa. Kuma Bakaleho ba Yehova bakebo bene bali na kunena obu bukalu ndi?

Nkuta Yakama ya mu Europe Ije Ikatala bya Lisesa lya Banu (European Court of Human Rights) muyatalele ñanda ya kubangeya Bakaleho ba Yehova ngwabo bali na kutepa binaanga, yayulile ngwayo baka-naanga ya Bakaleho baje kubapwile Bakaleho bakebo bakanene bukalu mwafwa kubesi “kutabesa babushoko bwabo baje bapwa Bakaleho balemese Njambi mu kuzituka na kulinga byuma bibakulahela.” Ei nkuta yendekele lalo ngwayo: “Obu bukalu bunalisala mu binaanga muje muli banu ba bulombelo bwa kuliseza, kwambateselela na binaanga muje muli Bakaleho ba Yehova.”b Nameme Bakaleho ba Yehova bakababindika kulemesa Njambi mubashakela, oloni bakalingi mwoshe mubakasela kukabangeya cinangulo ca mu Mbimbiliya cije cendeka ngwaco: ‘Keti mwilwisile munu bubi. . . . Nga citaba, lingeni mwoshe mumwasela mangana mukale mu kwoloka na banu boshe.’—Loma 12:17, 18.

Mwafwa bika Bakaleho ba Yehova bakulahela ngwabo banapande lika kulyambata na munu wa mu bulombelo bwabo?

Bakaleho bakakabangeya cinangulo ca mu Mbimbiliya ca kushombokela nambe kwambatela ‘muli Mwata lika.’ (1 Kolinte 7:39) Eci cinangulo citunda mu Mbimbiliya, co banu banalimwena bubwa bwaco. Cakumwenako, libulu limo likendeka bya bulo na naanga mu 2010 lyendekele ngwalyo “baka-kulyambata baje bali mu bulombelo bumo na kukulahela byuma bya kulifwa hamolika na kukala na bilinga bya kulifwa” kakangi bakakala mwamubwa mu bulo bwabo.c

Nameme ngoco, Bakaleho kubashongangeya baje banalyambata laja na munu uje kapwile Mukaleho ngwabo batsiye bulo bwabo. Mbimbiliya ngwayo: ‘Nga munalume uje wapwa muka-kukulahela ali na munakazi kesi muka-kukulahela, co munakazi ataba kukala nendi hamo, munalume kapandele kumukondola. Co nga munakazi nashomboka kuli munalume uje kesi muka-kukulahela, co munalume ataba kukala nendi hamo, co munakazi kapandele kumubyana.’ (1 Kolinte 7:12, 13) Bakaleho ba Yehova bakakabangeya eci cinangulo.