Salmu
Daꞌãma aiꞌutézém na, ꞌRe ihâimana uꞌâsi mono ãma dawatazé wasuꞌu
118 Uburé Danhibꞌapito ãma si te za ꞌre aiwata uꞌâsi zaꞌra waꞌaba mo, õhõ si wẽ wa, duré isimizawizé hã õne uꞌâ ꞌre hâimana mono wa.
2 Izaraéu nhihudu norĩ, maꞌãpé ãne ꞌre nharĩ zaꞌra waꞌaba mono: “Asimizawizé hã te õne uꞌâ ꞌre hâimana!”
3 Sasedoti norĩ, maꞌãpé duré a norĩ waꞌaba zama ãne ꞌre nharĩ zaꞌra waꞌaba mono: “Asimizawizé hã te õne uꞌâ ꞌre hâimana!”
4 Uburé Danhibꞌapito, uburé asiwi ꞌre iwazéb zaꞌra waꞌaba mono norĩ, maꞌãpé a norĩ waꞌaba zama ꞌre nharĩ zaꞌra waꞌaba mono, ãne: “Asimizawizé hã te õne uꞌâ ꞌre hâimana!”
5 Te irobzépata ꞌremhã, wa tô Uburé Danhibꞌapito wi hã rowaptẽ. Tahawa, ma tô ãma ĩzadaꞌâ. Ma tô duré te irobzépata zaꞌẽtẽ hawimhã ĩwaze.
6 Uburé Danhibꞌapito ĩsiré ꞌre hâimana mono wa, wa hã ꞌre ĩpahi waihuꞌu mono õ di. E marĩ, da te ĩꞌãma ꞌre ꞌmanharĩ mono da bâ.
7 Uburé Danhibꞌapito te ĩsiré ꞌre hâimana. Ta hã te te ꞌre ĩpawapto. Tahawa, wa za ĩnhitobꞌru norĩ ãma aptoꞌo ré, te ꞌre iꞌaiꞌuté mono zé hã te ꞌre ꞌmadâꞌâ.
8 Tahawa tô iwẽ, Uburé Danhibꞌapito da te ꞌre iꞌumnhasi zaꞌra mono zé hã, ꞌrâwi dasiré hã da te dasina ꞌre iꞌumnhasi zaꞌra mono zém nhipai u.
9 Wẽ uptabi di, Uburé Danhibꞌapito da te dasina ꞌre iꞌumnhasi zaꞌra mono zé hã, dama ipire, da te dasina ꞌre iꞌumnhasi zaꞌra mono zém nhipai u hã.
10 Dapoto wamri mono bâ daꞌahâ uptabi na da te dasiwi ꞌre ĩꞌuirĩ mono nherẽ, wa tô Uburé Danhibꞌapito nhisi na te ãma ꞌre aiꞌuté zaꞌra.
11 Õ norĩ ma tô aré uburé siwi te ꞌre ĩꞌuirĩ. Tane nherẽ, Uburé Danhibꞌapito nhisi na hã wa tô te ꞌre aꞌuprosi.
12 Õ norĩ, mohõnire iꞌahâ uptabi ne, ma tô te te siwi ꞌre ĩꞌuirĩ. Tane nherẽ, ꞌwabzéré panhipti ꞌré unhama na awaꞌawi ꞌre izata suꞌu zaꞌra mono ne, ma tô awaꞌawi ꞌre siꞌutõrĩ suꞌu.
Uburé Danhibꞌapito nhisi na wa tô ãma aiꞌuté zaꞌra.
13 Õ norĩ siptete sina te te siwi ĩmei wamhã, ma tô aré ĩꞌãma aiꞌuté zaꞌra. Tane nherẽ, Uburé Danhibꞌapito ma tô ĩpawapto.
14 Uburé Danhibꞌapito, apâ ꞌre ĩnhiptete mono ꞌwa.
Ta hã ma tô ĩnhoꞌreptu.
15 Maꞌãpé te te daꞌãma aiꞌuté zaꞌra wẽ te, sadari sina te te sima iromhuꞌu zaꞌra zé wapari zaꞌra waꞌaba, ꞌRe ihâimana uꞌâsi mono nhibꞌaꞌuwẽ romhâ ꞌmanharĩ na ꞌri nhoré ãma isiꞌubumro norĩ zadari hã, ãne:
“Uburé Danhibꞌapito nhiptetezé, ma tô daꞌãma aiꞌutézé hã wama sõmri zaꞌra.
16 Tinhiptete na ma tô marĩ hã ꞌmanharĩ zaꞌẽtẽ. Uburé Danhibꞌapito nhiptede hã ma tô daꞌãma aiꞌutézé hã duré wama sõmri zaꞌra.”
17 Aꞌâ ĩdâꞌâ da hã mare di. Wa za aꞌâ tô ĩhâiba ré ꞌre ĩhâimana, Uburé Danhibꞌapito nhimiꞌmanharĩ wẽ zé wasuꞌu na te ãma ꞌre daꞌapoꞌre puꞌu mono da hã.
18 Uburé Danhibꞌapito isé na ma tô ĩꞌazâ. Tane nherẽ, ĩdâꞌâ ma hã te te ĩhâiba zaꞌréi õ di.
19 Maꞌãpé ꞌRe ihâimana uꞌâsi mono nhorõwa u ꞌridawa zaꞌẽtẽ na ꞌre idanhisisi mono zé hã asiwi ĩma ꞌridawa aba. Tawamhã wa hã ĩzébré wamhã, Uburé Danhibꞌapito ãma wa za ĩwata.
20 Ã hã, Uburé Danhibꞌapito te, ꞌridawa zaꞌẽne te ꞌre sa. Taha na te za isimiroti ꞌmadâꞌâ pese ꞌwa norĩ si ꞌre sisisi.
21 ꞌRe ihâimana uꞌâsi mono, wa aiꞌãma hã ĩwata, te ãma aiwi irowaptẽrẽzém na we ãma ĩzadaꞌâbâ wa, duré taha zarina ĩnhoꞌreptui wa.
22 Ẽtẽ tõmo waré hã wẽ nherẽ, ꞌriꞌwa norĩ wasété newa, te te siwi iwẽꞌõ hã, aré ꞌri naꞌratazéb da ihâiba hã te taré nherẽ, danhipai u pire uptabi na ꞌri naꞌrata sisasé ãma oto ꞌre saꞌwari uꞌâsi, wẽ nherẽ.
23 Ã hã Uburé Danhibꞌapito hawip si, isimiꞌmanharĩzé iwẽ uptabi te wama ꞌre hâimana zaꞌra.
24 Ã bâdâ hã Uburé Danhibꞌapito, te te daꞌãma iꞌaiꞌutézé bâdâ te wasuꞌu, ãma iwapẽꞌẽ to zaꞌra zé bâtâ da hã, duré wa te ãma wasima irowẽ zaꞌra zé bâtâ da hã!
25 Maꞌãpé waꞌanhoꞌreptu na, Uburé Danhibꞌapito, wanhoꞌreptu na!
Wa te wasima iwẽ zaꞌra zéb zarina, maꞌãpé ãma wama uwaimrami zaꞌra na, ꞌRe ihâimana uꞌâsi mono!
26 Uburé Danhibꞌapito nhisi na we imorĩ ma hã, te iwẽ si te te tãma ꞌre pisutu uꞌâsi.
Duré isõrõwa ꞌri ꞌrãihâ ꞌremhã wa iwẽ si wa te aima ꞌre pisutu zaꞌra waꞌwa.
27 Uburé Danhibꞌapito, ta hã ꞌRe ihâimana uꞌâsi mono. Ta hã te wama te te ꞌre robꞌuiwẽ uꞌâsi zaꞌra.
Wede panhipti asibꞌrata ꞌre ꞌwasari aba ré, maꞌãpé dato na asiwi ãma sãnaꞌrata zaꞌra waꞌaba. Te za duré danhimizama zatazé wedezane ꞌmanharĩ hã nasi asiwi isaꞌoto ꞌwa.
28 A hã, ĩte ꞌRe ihâimana uꞌâsi mono. Tahawa, wa za tô aiꞌãma ꞌre ĩwata.
A hã, Ĩte ꞌRe ihâimana uꞌâsi mono. Tahawa, aiwasuꞌu zaꞌẽtẽ na hã wa za te ꞌre daꞌapoꞌre puꞌu uꞌâsi.
29 Uburé Danhibꞌapito ãma si te za ꞌre aiwata uꞌâsi zaꞌra waꞌaba mo, õhõ si wẽ wa, duré isimizawizé hã õne uꞌâ ꞌre hâimana mono wa.