Salmu
ꞌRe ihâimana uꞌâsi mono nhimizawi pese zé wasuꞌu
Apito Abimelequihi nhoꞌre, Davi hã ma tô ꞌrã nhipese sina iꞌrãsiwamnarĩ ne tihâiba. Tahawa, Abimelequi ma tô oto satõ. Tawamhã apito wi siwazere pari, ma tô Davi hã ã tinhoꞌre na ãma robꞌuiꞌéré.
34 Uburé Danhibꞌapito ãma, õne uꞌâ wa za bâtâ sidâpâ ãma ꞌre ĩwata uꞌâsi.
Ĩzaihâ na wa za tô te sazâri ãna ãma ꞌre ĩwata uꞌâsi.
2 Marĩ iwẽ te te ꞌre iꞌaꞌmanharĩ mono zé uꞌâbâ wa za ãma ꞌre ĩwata.
Da te ꞌre iwatiꞌi zaꞌra mono norĩ, ãne hã te te ꞌre wapari zaꞌra mono wamhã, te za tipẽꞌẽ na te te sima ꞌre rowẽ zaꞌra.
3 Maꞌãpé ĩsiré Uburé Danhibꞌapito iwaihuꞌu pese na dama ꞌre wasuꞌu wẽ zaꞌra waꞌaba mono, sõꞌawi.
Simisutu Uburé Danhibꞌapito nhisi ãma wa za ꞌre wawata zaꞌra.
4 Wa hã, Uburé Danhibꞌapito nhimipawaptobzé te tiwi waptẽrẽ wamhã, ma tô ãma ĩzadaꞌâ.
Ĩpahi wamhã, ma tô ĩnhoꞌreptu.
5 Da te ꞌre iwati zaꞌra mono norĩ hã, ta hã te te siwi ꞌre ꞌmadâꞌâ mono wamhã, te te ãma sima ꞌre rowẽ zaꞌra.
Ãhã wa, niwa te te ꞌre iꞌumnhasi baba zaꞌra mono da hã mare di.
6 Wa hã, ĩnhimarĩꞌõ robzépataꞌwa, wa tô ĩhârâ ꞌrãihâ na hâ.
Tahawa, Uburé Danhibꞌapito ma tô ĩwapa.
Taha zarina, ma tô ĩma ropire hawimhã ĩnhoꞌreptu.
7 Hâiwa ãma Uburé Danhibꞌapito ma, Romhuriꞌwa te uburé te te ꞌre iwazéb zaꞌra mono norĩ ꞌwawimhã ꞌre hâimana, marĩ isimimnhasi wi, te te ꞌre aꞌmadâꞌâ mono da.
8 Maꞌãpé niha zô tẽꞌẽ zaꞌra waꞌaba, Uburé Danhibꞌapito wẽ na ꞌre ihâimana mono na waihuꞌu zaꞌra waꞌaba da.
Niꞌwam norĩ hã ꞌRe ihâimana uꞌâsi mono, iꞌwawi ꞌre isimapa zaꞌra mono zéb zô ꞌre isõpré mono norĩ si, te za to sina hã ꞌre hâimana uꞌâsi zaꞌra.
9 Uburé Danhibꞌapito nhibꞌaꞌuwẽ norĩ, maꞌãpé ꞌre wazé pese zaꞌra waꞌaba mono. E marĩ wa. Marĩ zô tiwi ꞌre rowaptâꞌâ waihuꞌu zaꞌra mono õ wa, ꞌRe ihâimana uꞌâsi mono te te ꞌre iwazé pese zaꞌra mono norĩ wi hã.
10 Huꞌu zérépa norĩ wi, isa zô tiwi ꞌre roꞌwanhiꞌriti zaꞌra mono wamhã, te za mra hã te te ꞌre sépata zaꞌra.
Tanei õ di, Uburé Danhibꞌapito nhimipawaptobzéb zô sima ꞌre isõpré mono norĩ wi hã, tiwi sô ꞌre robaba zaꞌra mono õ di, marĩ zô.
11 Ĩsiwaihu ipréduptém norĩ, we aiꞌabaꞌréi waꞌaba. Maꞌãpé asiwi ĩwapari zaꞌra waꞌaba. Uburé Danhibꞌapito wazébzém na, wa za ãma aima rowahutu zaꞌra waꞌwa.
12 E asima wẽ zaꞌra waꞌaba õ di bété, ato sina ꞌre iꞌaihâimana zaꞌra waꞌaba mono zéb da hã.
E duré asima wẽ zaꞌra waꞌaba õ di, ꞌre aihâimana hâ zaꞌra waꞌaba mono da hã.
13 Tahawa, maꞌãpé asoto na aimreme iwasété na ꞌre nharĩ zaꞌra waꞌaba mono tõ.
Duré asadawa nhipese na dama ꞌre rowasuꞌu zaꞌra waꞌaba mono tõ da, ꞌre asiꞌmadâꞌâ pese zaꞌra waꞌaba mono.
14 Iwasété wi asaꞌo hâ zaꞌra waꞌaba, iwẽ si oto ꞌre ꞌmanharĩ zaꞌra waꞌaba mono da.
Duré rowẽ na ꞌre iꞌaihâimana zaꞌra waꞌaba mono zéb zô si, ꞌre iꞌasõpré waꞌaba mono zéb zarina, te za oto uburé marĩ iwẽ si hã ꞌre iꞌmanharĩ zaꞌra waꞌaba mo.
15 ꞌRe ihâimana uꞌâsi mono hã te sena na ꞌre ihâimana zaꞌra mono norĩ hã te te ꞌre aꞌmadâꞌâ pese.
Te duré te te tiwi ꞌre irowaptẽrẽ zaꞌra mono zé hã te te ꞌre awapari.
16 Tane nherẽ, marĩ iwasédé te te ꞌre iꞌmanharĩ zaꞌra mono da si, te ꞌre hâimana, ta norĩ oto ꞌre dâꞌâ zaꞌra mono wa, õne haré ãma ꞌre dapoꞌre simrami suꞌu zaꞌra mono da.
17 Sena na ꞌre ihâimana zaꞌra mono norĩ, Uburé Danhibꞌapito te te ꞌre ꞌmahârâ zaꞌra mono wamhã, te za imreme hã te te ꞌre awapari.
Duré taha zarina te za ropire hawimhã te te ꞌre anhoꞌreptu.
18 Robzei ãna ꞌre isiꞌubumroi mono norĩ ꞌratamhã, te ꞌrâwi ꞌre hâimana.
Te za duré te te ꞌre anhoꞌreptu, ipẽꞌẽ ꞌre rowẽ zô tiwi sô ꞌre irobaba zaꞌra mono norĩ hã.
19 Wẽ na ꞌre inomro mono norĩ hã, te tô ropire na te te ꞌre robzépata zaꞌra.
Tane nherẽ, Uburé Danhibꞌapito, te uburé ropire mono hawimhã te te ꞌre anhoꞌreptu.
20 Ta hã te duré ihâiba na ihi mono hã te te tãma ꞌre aꞌmadâꞌâ pese, ꞌmaihisihâri tõ da hã.
21 Iwasété norĩ hã, marĩ te te ꞌre iꞌmanharĩ wasété zaꞌra mono zarina te za ꞌre isiꞌutõrĩ mono zé hã te te sisô ꞌre sani zaꞌra.
Duré wẽ na ꞌre inomro mono norĩ ꞌruiꞌwa norĩ ma, te za ꞌRe ihâimana uꞌâsi mono hã te te tãma ꞌre arobꞌmanharĩ wasété.
22 Uburé Danhibꞌapito, te tinhibꞌaꞌuwẽ norĩ pẽꞌẽzani hã te te ꞌre anhoꞌreptu.
Duré iꞌwawi ꞌre isimapa zaꞌra mono zéb zô ꞌre isõpré mono norĩ si, te za tinhimihâzé hã te te tãma ꞌre abaꞌa.