Ezodu
10 na ꞌRe ihâimana uꞌâsi mono tinhimiroti te te iꞌmanharĩzé wasuꞌu
20 Tawamhã ꞌRe ihâimana uꞌâsi mono ma tô tinha ãne:
2 — Wa hã Uburé Danhibꞌapito, ate ꞌRe ihâimana uꞌâsi mono ꞌwa. Wa hã wa tô Ezitu tiꞌai hawimhã, aipawaꞌâbâ ãna ꞌre iromhuri zaꞌra waꞌaba mono zém hawimhã aiꞌawazere ꞌwa.
3 — Aimawi ihâibaꞌõ ãma ꞌre aiwata zaꞌra waꞌaba mono õ di za. Ĩꞌãma si te za ꞌre aiwata zaꞌra waꞌaba mo.
4 — Romhâiba ãma ꞌre aiwata zaꞌra waꞌaba mono da, asima ꞌre ꞌmanharĩ zaꞌra waꞌaba mono tõ, siwaꞌru hâiwa na marĩ ꞌre ihâimana zaꞌra mono na, tiꞌai ãmam na, duré â ꞌre tiꞌai ꞌrowi uptabi ꞌre ihâimana zaꞌra mono na hã. 5 Romhâiba nhoꞌre aihiꞌrãtitõ tãma ꞌre asimroi waꞌaba mono tõ. Ãma ꞌre aiwata zaꞌra waꞌaba mono tõ. E marĩ wa. Wa hã Uburé Danhibꞌapito, ate waꞌwa ꞌRe ihâimana uꞌâsi mono. Ĩꞌupana aimawi ihâibaꞌõ norĩ ãma dawata da hã ĩma ꞌru ti. Ĩzada ꞌre isitiꞌrui wairébé zaꞌra mono norĩ hã, wa te te ꞌre hâ zaꞌra, isihudu ꞌra norĩ hã, duré isihudu ꞌra iꞌra norĩ u zama, maparane siꞌuiwa na dapodo ihâimana u hã. 6 Tane nherẽ, wa hã te te ꞌre ĩzawi pese zaꞌra mono norĩ ma hã, duré ĩnhimiroti te te ꞌre iwapari pese zaꞌra mono norĩ ma hã, wa iwẽ na hã tãma ꞌre ĩhâimana zaꞌra. Duré ta norĩ uꞌâbâ isihudu mono sidâpâsi, wa iwẽ hã te tãma ꞌre ꞌmanharĩ uꞌâsi zaꞌra.
7 — Ĩnhisi na asiwi ꞌre ĩwazé waꞌaba mono ãna taré ãma ꞌre nharĩ zaꞌra waꞌaba mono tõ. E marĩ wa. Wa hã Uburé Danhibꞌapito, ate waꞌwa ꞌRe ihâimana uꞌâsi mono, wa ĩnhisi te te ꞌre iwazéb zaꞌra mono õ norĩ ma te tãma ꞌre arobꞌmanharĩ.
8 — Sabadu dawaꞌutuzé iwazéb zahi hã ꞌre ꞌmadâꞌâ pese zaꞌra waꞌaba mono, taha bâtâ na ĩma si ꞌre aihâimana zaꞌra waꞌaba mono da. 9 6 bâtâ ꞌrep si te za asimiromhuri ré hã ꞌre aihâimana zaꞌra waꞌaba mo. 10 Tane nherẽ, sabadu 7 bâtâ ãma hã dawaꞌutuzéb da si hã, Uburé Danhibꞌapito, ate zaꞌra waꞌwa ꞌRe ihâimana uꞌâsi mono te wa. Taha bâtâ na ꞌre romhuri zaꞌra waꞌaba mono õ di za, aiꞌra siꞌaibâ norĩ, aiꞌra sipiꞌõ norĩ, pawaꞌâbâ ãna aima romhuriꞌwa norĩ zama, duré asimizama aba norĩ zama. Asiré aꞌuwẽꞌõ norĩ asiptiꞌai ꞌre, ꞌre ihâimana zaꞌra mono norĩ zama te te ꞌre romhuri zaꞌra mono õ di za. 11 Wa hã, Uburé Danhibꞌapito, 6 bâtâ ꞌre, wa tô hâiwa hã, tiꞌa hã, duré â wa ꞌre ihâimana zaꞌra mono da hã abꞌmanha. Tawamhã 7 bâtâ ãma wa tô oto waꞌudu. Tahawa wa tô sabadu bâdâ iwazéb zahi na aimawi ꞌre ihâimana mono da hã pisutu.
12 — Aimama hã, duré ana te za ꞌre iwazé pese zaꞌra waꞌaba mo, tiꞌa te aima isõmri zaꞌra waꞌaba ꞌre, ꞌre aihâimana hâ zaꞌra waꞌaba mono da.
13 — ꞌRe danhimroi waꞌaba mono tõ.
14 — Aimro na asiwi ꞌre asimisaihuri zaꞌra waꞌaba mono tõ.
15 — Dawi ꞌre romnhimiꞌuri zaꞌra waꞌaba mono tõ.
16 — Asadawa nhipese na dama ꞌre dawasuꞌu wasété zaꞌra waꞌaba mono tõ.
17 — Asiré nhorõwa hã ꞌre ꞌruiwapari zaꞌra waꞌaba mono tõ. Duré asiré mro hã ꞌre ꞌruiwapari zaꞌra waꞌaba mono tõ, pawaꞌâbâ ãna tãma romhuriꞌwa norĩ zama, ite powawẽ hã, duré ite awaru poꞌre pore hã. Siwaꞌru uburé marĩ tãma ꞌre ihâimana zaꞌra mono hã ꞌre ꞌruiwapari zaꞌra waꞌaba mono tõ.
Dapahi na idahâimana zaꞌra zé wasuꞌu
18 Tawamhã tãirãrã, duré danhimnhihârâzé hârâ hã ma tô wapari zaꞌra ni. Ma tô tã siꞌubuzi hã, duré romnhizé ẽtẽ hawi iwatobro hã ꞌmadâꞌâ zaꞌra ni. Tawamhã tãma darẽrẽꞌẽ zaꞌra wa, ma tô romhâ na tahâimana zaꞌra ni. 19 Tahawa, Mozésihi ma, te ãne tãma nharĩ zaꞌra ni:
— A hã wama nharĩ zaꞌra wamhã, wa za wasiwi aiwapari ni, iwẽ na hã. Tane nherẽ, ꞌRe ihâimana uꞌâsi mono si te te wama nharĩ zaꞌra õ di za, wasiꞌutõrĩ tõ da.
20 Tawamhã Mozési, ma ãma daꞌazadaꞌâ ãne:
— Aipahi zaꞌra waꞌaba tõ. E marĩ wa. ꞌRe ihâimana uꞌâsi mono hã te sima wẽ, te te aipibu zaꞌra waꞌaba da, tãma ꞌre iꞌaipahi zaꞌra waꞌaba mono zéb ré ꞌre aihâimana uꞌâsi zaꞌra waꞌaba mono wa, aiwasété wi ꞌre aipizari zaꞌra waꞌaba mono da.
21 Tawamhã romhâ na te aimasam ni. Mozésihi si te hâiwa ꞌrãdâꞌâ ãma ꞌRe ihâimana uꞌâsi mono ihâimanazéb u ꞌrâwi itẽmemhã sina rotété.
Sisiwipsi ẽtẽ zaꞌra na rotizé wasuꞌu
22 Uburé Danhibꞌapito, Izaraéu nhihudu norĩ ma, te te tãma nharĩ zaꞌra da, ma tô Mozésihi ma waihuꞌu ãne:
— Hâiwa hawi te inharĩzé hã, ma tô a norĩ waꞌwa hã iꞌmadâꞌâ zaꞌra waꞌwa. 23 Romhâiba hã ẽtẽ waipo prã prata na duré ẽtẽ waipo pré oru na asima ꞌre ꞌmanharĩ zaꞌra waꞌaba mono tõ, ĩꞌãma ꞌre iꞌaiwata zaꞌra waꞌaba mono siré hã, ãma ꞌre aiwata zaꞌra waꞌaba mono da hã. 24 Maꞌãpé tiꞌa na ĩma danhimizama zatazéb da hã asiwi ꞌre ꞌmanharĩ aba mono, taha nhisiwi ate poneꞌẽrebâ zéré mapure hã, duré powawẽ hã ꞌre zata zaꞌra waꞌaba mono da hã, danhoprubzé ãma irowẽ zanizé hã. Ro ĩꞌãma ꞌre aiwata zaꞌra waꞌaba mono da, te aima ꞌre iꞌapisutu aba mono zéb sidâpâsi, wa za ãma atẽme waꞌaba hã ꞌre ĩne, iwẽ na hã te ꞌre aipawaptob zaꞌra waꞌaba mono da. 25 Ĩma danhimizama zatazéb da, ẽtẽ zaꞌra na asiwi ꞌre ꞌmanharĩ aba mono da wamhã, ẽtẽ nhizâri siromo na asiwi ꞌre ꞌmanharĩ aba mono õ di za. E marĩ wa. Isiꞌuwazi na ꞌre sihâri zaꞌra waꞌaba mono wamhã, ibâi õ di za ĩma hã. Te za wamna za. 26 Ĩma danhimizama zatazém na ãma ꞌre idazaiꞌuri zaꞌra mono zéb da hã asiwi ꞌre ꞌmanharĩ aba mono õ di za, taha na asahâpâi baba tiꞌai hawi asimarĩ zaꞌra waꞌwa aiꞌuza zaroma aiwi ꞌre isihâiꞌré zaꞌra waꞌaba mono hã sõꞌawi da te aiwi ꞌre ꞌmadâꞌâ zaꞌra waꞌaba mono tõ da.