Ezodu

Ẽtẽpo itém na ꞌRe ihâimana uꞌâsi mono tinhimiroti na te te duré ãma irobꞌuiꞌéré zahu zé wasuꞌu

34 Tawamhã Uburé Danhibꞌapito, Mozésihi ma hã te tinha ãne:

— Maꞌãpé iprub zahuré sine hã, ẽtẽpo maparane waꞌõtõ zahuré na. Tawamhã wa hã, ta norĩ na wa za duré tô ĩmreme na hã apâ ãma robꞌuiꞌéré zahu zahuré, imorĩꞌrata na ẽtẽpo ihâimana zahuré na te ãma irobꞌuiꞌéré na hã. 2 Te za asisaꞌra wẽ, awẽmhã mararé Sinaꞌi na ẽtẽ nhisi na saiꞌuri da, tame isisi ĩnhopẽtẽ da. 3 Niꞌwa asiré te te saꞌuri õ di za. Duré niꞌwa siwaꞌru ẽtẽ na hã asiré hâimana õ di za. Duré poneꞌẽrebâ hã, poneꞌẽrebâ zéré uzé norĩ hã, powawẽ norĩ hã, Sinaꞌi na ẽtẽ ꞌratamhã du hã te te ꞌre ihuri mono da hã mare di za.

4 Tawamhã Mozési, maparane ẽtẽpo hã imorĩꞌrata na ihâimana zahuré ne ma tô waꞌõtõ zahuré. Tahawa, awẽ wi Uburé Danhibꞌapito te te tãma iwaihuꞌuzéb zarina, ma tô Sinaꞌi ẽtẽ na saiꞌu, ẽtẽpo te te siré mrami sina.

5 Tawamhã Uburé Danhibꞌapito hâiwaꞌa zarobꞌa na ma tô siꞌra. Te te siꞌrai wamhã, ma tô Mozésihi siré tame tihâiba. Ma tô duré tãma sisisi, Uburé Danhibꞌapito na. 6 Tawamhã Mozésihi nhoꞌre te te oto roꞌrazâri wamhã, ma tô mreme ꞌrãihâ na tinha ãne:

— Wa hã Uburé Danhibꞌapito, ꞌRe ihâimana uꞌâsi mono! Wa hã daꞌãma ꞌre ĩsiwãrĩ wẽ mono ꞌwa, duré daꞌãma ꞌre ĩpẽꞌẽzé mono ꞌwa. Dazada hã ꞌre ĩnhitiꞌru suꞌu mono õ di. Duré dama ĩꞌumnhasizé, ĩnhimizawizé me hã saꞌẽtẽ uptabi zahuré di. 7 Tahawa, danhihudu dasitébré mono sidâpâsi wa õne uꞌâ ĩnhimiropisutuzém na hã te tãma ãma ꞌre aꞌuwaimrami. Duré marĩ iwasédé da te ꞌre iꞌmanharĩ zaꞌra mono zém na hã, duré ꞌre idawasété zaꞌra mono zém na hã te daꞌãma ꞌre aꞌmadâꞌâ mono õ di, nima norĩ ãma hã. Tane nherẽ, damama tiwasédé te te ꞌre iꞌmanharĩ zaꞌra mono uꞌâbâmhã iꞌra norĩ ma hã, isihudu norĩ ma hã, isihudu ꞌra norĩ ma hã, duré isihudu ꞌra ꞌra norĩ ma hã, ĩnhimihâzé hã te tãma ꞌre baꞌa waihuꞌu zaꞌra mono õ di.

8 Tawamhã Mozési hiꞌrãtitõ ma tô nhamra. Sãmra wamhã, ma tô tiꞌubu na tiꞌai u hã ropto. Tawamhã ma tô ꞌRe ihâimana uꞌâsi mono ãma hã tiwata. 9 Tahawa, te ãne tinha:

— Ĩnhibꞌapito, sena na ĩzabâdâ aima rowẽ wamhã, wa za aiwi waptẽ, ãma wasiré aimorĩ zaꞌra da hã. Ã hã aꞌuwẽ norĩ hã pẽꞌẽ tete siroptub zaꞌra nherẽ, wawasédé hã, duré marĩ wa te ꞌre iꞌmanharĩ wasété zaꞌra mono zé hã waꞌãma ꞌmadâꞌâ zaꞌra õ di za. Duré asibꞌaꞌuwẽ na aima ꞌre wahâimana zaꞌra mono da, asima wawẽ zaꞌra na.

ꞌRe ihâimana uꞌâsi mono me, apâ idasisaze zaꞌra zé wasuꞌu

10 Tawamhã Uburé Danhibꞌapito, Mozésihi ma te tinha ãne:

— Asibꞌaꞌuwẽ norĩ me, wa za oto wasisaze zaꞌra zé hã wasiwi ꞌmanharĩ ni. Isõꞌa zaꞌra hã niwa uburé daro mono bâ ꞌre idahâimana zaꞌra mono norĩ ma, te iꞌmanharĩꞌõ, wa za marĩ ipire iwaihuꞌuꞌõ hã tãma ꞌmanharĩ zaꞌra. Tawamhã uburé te za wa hã Uburé Danhibꞌapito ĩnhimirobꞌmanharĩzé dama iwaihuꞌuꞌõ hã ꞌmadâꞌâ zaꞌra. 11 Maꞌãpé ĩnhimiroti ãhã na te aima isõmri zaꞌra waꞌwa hã ꞌre wapari pese zaꞌra waꞌaba mono. Tahawa, aiwana waꞌaba wa za amoreu norĩ hã, cananeu norĩ hã, hitita norĩ hã, perizeu norĩ hã, heveu norĩ hã, duré zebuzeu norĩ hã te wanoꞌõ zaꞌra za, tiꞌai hawimhã. 12 Itẽme iꞌaiꞌabaꞌréi waꞌwa tiꞌai ꞌre, ꞌre ihâimana zaꞌra mono norĩ me hã marĩ na ꞌre asisaze zaꞌra waꞌaba mono õ di za. E marĩ wa. Ta norĩ hã asisitob zaꞌra waꞌaba zém ne hã za aima ꞌre hâimana zaꞌra waꞌaba mono õꞌumnhasite. 13 Tahawa, te za ihâibaꞌõ norĩ ma, isimizama zatazéb zaꞌra hã asiwi ipru waꞌwa, duré ta norĩ te romhâiba tete uparizé hã, ẽtẽ pisutu pese ꞌmanharĩ zama. Duré ta norĩ uparizé wede ꞌmanharĩ zama te za asiwi ina waꞌaba mo za.

14 — Ihâibaꞌõ ãma hã ꞌre aiwata zaꞌra waꞌaba mono õ di za. E marĩ wa. Wa hã Uburé Danhibꞌapito ꞌrâwi ꞌre ĩsisisi mono hã ãne: Aimawi ihâibaꞌõ norĩ ãma dawatazéb zarina ꞌre ĩnhitiꞌrui pusi mono. Tahawa wa aima ĩsiꞌru zaꞌra waꞌwa, ĩꞌãma si ꞌre aiwata zaꞌra waꞌaba mono da. 15 Tiꞌai ꞌre, ꞌre ihâimana siromo zaꞌra mono norĩ me hã marĩ na ꞌre asisaze zaꞌra waꞌaba mono õ di za. Ta norĩ hã te tite ihâibaꞌõ norĩ ãma ꞌre wata zaꞌra mono da, ꞌre siꞌrãꞌõtõ. Te duré tinhimizama zata na hã ãma tãma ꞌre sõprub zaꞌra. Tawamhã ihâibaꞌõ norĩ ma, ꞌre isiꞌrãꞌõtõ mono zéb u ꞌre anomro aba mono da hã te za asô ꞌre hãsi ꞌwa. Tawamhã tite ihâibaꞌõ norĩ ma tinhoprubzé te te ꞌre isõmri zaꞌra mono ꞌre huri aba mono da hã ãté te za asima ꞌre iwẽ zaꞌra waꞌaba mo, ꞌre tẽꞌẽ zaꞌra waꞌaba mono da. 16 Aiꞌra norĩ waꞌwa hã asiré aꞌuwẽꞌõ norĩ sipiꞌõ na ꞌre mro zaꞌra mono wamhã, tawamhã te aré ta norĩ hã ĩꞌãma ꞌre ihâimana zaꞌra mono zém hawimhã ãma tipahâ zaꞌra, ĩꞌupana ihâibaꞌõ norĩ ãma ꞌre iwata zaꞌra mono na ãma ꞌre wata zaꞌra mono da isiré.

17 — Isiꞌuwazi na romhâiba hã ãma ꞌre aiwata zaꞌra waꞌaba mono da, ꞌre ꞌmanharĩ zaꞌra waꞌaba mono tõ, tôꞌã!

18 — Iꞌuꞌẽtẽ wapu mapu õ na dato isaꞌẽtẽ nhisi na hã te za asima ꞌre iromhuꞌu uꞌâsi zaꞌra waꞌaba mo. Te aima iwaihuꞌu zaꞌra waꞌaba zéb zarina, te za iꞌuꞌẽtẽ wapu mapu õ na asa hã ꞌre ihuri aba mo, Abibe na aꞌamo nhisi ꞌre 7 bâtâ ꞌrem na, taha aꞌamo na tô Ezitu hawi we aiwairébé aba dâꞌâsina.

19 — Uburé daꞌra ipotoꞌrata norĩ ĩte, duré danhimizama ꞌra potoꞌrata norĩ zama hã ĩte. 20 Awaru poꞌre pore iꞌrare siꞌaibâ ipoto ꞌrada dâꞌâ ãna ꞌre ꞌmaza mono da, asima ꞌre wẽ zaꞌra waꞌaba mono wamhã, te za ꞌRe ihâimana uꞌâsi mono ma, iꞌupana poneꞌẽrebâ zéré mapure iꞌrare na hã ãma tãma ꞌre asõprub zaꞌra waꞌaba mo. Tane nherẽ, asima ꞌre wẽ zaꞌra waꞌaba mono õ wamhã, te za awaru poꞌre pore ꞌra hã ibutu nhiꞌẽ zaꞌra waꞌwa. Tawamhã te za uburé aiꞌra siꞌaibâ norĩ aima ꞌre ipoto ꞌrata zaꞌra waꞌaba mono hã Uburé Danhibꞌapito wi asima ꞌre iwaꞌâbâ zaꞌra waꞌaba mo, apâ aima ꞌre hâimana zaꞌra waꞌaba mono da.

— Niꞌwa hã tinhoprubzé te te ĩma ꞌre aꞌwapéi mono õ nherẽ, ĩnhoꞌre u ꞌre isihâiꞌré mono da hã mare di za.

21 — 6 si bâtâ ꞌrep si te za asimiromhuri ré hã ꞌre aihâimana zaꞌra waꞌaba mo. Tane nherẽ, 7 bâtâ ãma ꞌre romhuri zaꞌra waꞌaba mono õ di za, da te ꞌre itiꞌa hâipoꞌo mono zép te aꞌamo na nherẽ, duré da te ꞌre iroptehâri mono zé aꞌamo na nherẽ.

22 — Imorĩꞌrata na amnho trigu tehâri na isãnaꞌrata zaꞌra waꞌaba zém na te za asima ꞌre iromhuꞌu zaꞌra waꞌaba mo. Duré wahub ꞌrãsutu u robꞌrã norĩ da te ꞌre isinarĩ zaꞌra mono zém na te za asima ꞌre iromhuꞌu zaꞌra waꞌaba mo.

23 — Siꞌubdatõ wahub ꞌremhã te za uburé Izaraéu nhihudu norĩ siꞌaibâ, Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono ãma ĩꞌãma ꞌre wata zaꞌra mono da, ĩtẽme ꞌre isihâiꞌré zaꞌra mono na hã te te ꞌre sahu zaꞌra. 24 Wa za wa hã aiwana zaꞌra waꞌaba aimawi aꞌuwẽ norĩ hã te ꞌre azani. Ãne wamhã, te za asiptiꞌa hã aima tizaꞌẽtẽ zaꞌra waꞌwa. Tawamhã siꞌubdatõ dato isaꞌẽne ihâimana siwaprã, ĩꞌãma ꞌre aiwata zaꞌra waꞌaba mono da, we ĩtẽme ꞌre anomro aba mono wamhã, niꞌwam norĩ asiptiꞌai aba zô te te sima ꞌre irobꞌruiwapari zaꞌra mono da hã mare di za.

25 — Asimizama pãrĩ na ĩma ꞌre asõprub zaꞌra waꞌaba mono wamhã, iꞌuꞌẽtẽ wapu mapuzém na iꞌmanharĩ hã we ꞌre ꞌwasari aba mono õ di za. Duré dato isaꞌẽne Pascoa na isisi na asimizama pãrĩ na ꞌre iꞌasõprub zaꞌra waꞌaba mono siꞌazazâri hã asisa ꞌre saꞌra waꞌaba mono õ di za, awẽb da hã.

26 — Wahup sidâpâsi te za Uburé Danhibꞌapito, ate zaꞌra waꞌwa ꞌRe ihâimana uꞌâsi mono nhorõwa u imorĩꞌrata na amnho ꞌre itehâri zaꞌra waꞌaba mono hã we ꞌre iꞌwasari aba mo.

— Tahawa poneꞌẽrebâ zéré mapure ꞌra na hã, duré poneꞌẽrebâ zéré uzé ꞌra na hã, ina hâiwaꞌu zu inhi na hã ãma ꞌre asipi zaꞌra waꞌaba mono õ di za.

27 Tawamhã Uburé Danhibꞌapito te Mozésihi ma zahadu tãma tinha ãne:

— Ã hã ĩmreme hã anhihâtâ mono. E marĩ wa. Ãhã zarina wasisazezé hã te aima ꞌmanharĩ wa, duré Izaraéu nhihudu norĩ ma hã.

28 Tawamhã Mozési, Uburé Danhibꞌapito siré ma tô tamemhã tihâiba, 40 bâtâ na, 40 mara na sai ãna duré te te hâꞌrẽne ãna. Tawamhã ma tô ẽtẽpoꞌo na 10 sina ꞌRe ihâimana uꞌâsi mono nhimirotizém na hã ãma robꞌuiꞌéré zahuré.

Mozési Sinaꞌi hawi te te isiꞌrazé wasuꞌu

29 Tawamhã Mozési, roti na robꞌuiꞌérézéb ré ẽtẽpo tinhibꞌrata te te mrami sina, Sinaꞌi hawi te te siꞌrai wamhã, ma tô iꞌubu na rowaꞌa hã tihâiba, ꞌRe ihâimana uꞌâsi mono ma, te te irobzanhamri zéb zarina. Tane nherẽ, ãne na we tihâimanazé hã te te õ hã sina waihuꞌu õ di. 30 Tawamhã iꞌubu na rowaꞌa, Arã norĩ Izaraéu nhihudu norĩ me te te ꞌmadâꞌâ zaꞌra wamhã, ma tô Mozésihi tẽme ꞌrâwi te te sina irotété zaꞌra da hã tãma tipahi zaꞌra. 31 Tane nherẽ, Mozési, Arãhã zô ma tô hâ. Duré uburé dama iꞌrãnhoꞌõmo norĩ zô hã ma tô tihârâ zaꞌra. Tahawa, ma tô uburé norĩ ma hã dama siwasuꞌu. 32 Taha pari ma tô uburé Izaraéu nhihudu norĩ hã Mozésihi u hã sina rotété zaꞌra. Tawamhã ma tô Uburé Danhibꞌapito nhimiroti hã tãma sõré zaꞌra imono bâ, Sinaꞌi ẽtẽ nhisi ãma tinhimiroti te te tãma isõmri hã. 33 Tawamhã Mozési te te dama rowasuꞌu parimhã, ma tô zazahâ ihâihâ zaꞌé na hã siꞌubu ubu. 34 Tawamhã Mozési hã Uburé Danhibꞌapito nhoꞌre ꞌre hâimana mono da, romhâ ꞌmanharĩ na ꞌri iwazéb zahi u, ꞌre zasi mono sidâpâsi, ma tô zazahâ ihâihâ zaꞌé hã te te ꞌre sani. Duré apâ ꞌre pusi mono sidâpâsi, ma tô uburé Izaraéu nhihudu norĩ ma, te te ꞌre awasuꞌu, ꞌRe ihâimana uꞌâsi mono te te tãma ꞌre iꞌrui mono, te te dama ꞌre iꞌawasuꞌu mono da hã. 35 Taha sidâpâsi ma tô iꞌubu na rowaꞌa hã da te ꞌre ꞌmadâꞌâ zaꞌra. Tawamhã taha sidâpâsi ma tô duré Mozési apâ zazahâ ihâihâ zaꞌé na hã ãma ꞌre siꞌubu ubu, ꞌRe ihâimana uꞌâsi mono ma, te te ꞌre robzanhamri mono da, romhâ ꞌmanharĩ na ꞌri u apâ ꞌre izasi mono zéb u.