Lucas
Zuwã Batista hã te te dama ꞌre irobꞌmahârâ mono zé
3 Tawamhã Tibériu Cézaha ãma 15 na ma tô ãma tiwahu, Roma te, danhibꞌapito na ꞌre ihâimana mono zém na hã. Taha bâtâ mono na hã, Põsiu Pilatu hã Zudéa ãma rotiꞌwa na te duré ꞌre hâimana. Erodi hã te duré Galiléia ãma rotiꞌwa na ꞌre hâimana. Duré isisãnawã Filipi hã te duré rotiꞌwa na ꞌre hâimana, Ituréia na danhiptiꞌa nhisi ãma duré Traconiti ãma. Duré rotiꞌwa Lizãnia hã, Abileni na danhiptiꞌa nhoꞌõmo nhisi te hã. 2 Tawamhã Anasi duré Caifasihi me, sasedoti dama ipire na te ꞌre hâimana zahuré. Taha wahum na hã ꞌRe ihâimana uꞌâsi mono ma tô tinhimiroti tisõ, Zuwãhã ma, Zacariaha ꞌra ma, rop si ꞌre irosaꞌwari mono ãma hâimana ré. 3 Tahawa, Zuwã hã daro mono bâ, ma tô datẽme ꞌre mo, Zodã pa ꞌrata ꞌre idasiꞌubumroi mono norĩ u. Ma tô te te dama ꞌre robꞌmahârâ, â dawabzuri hã da te ꞌre ꞌmanharĩ zaꞌra mono da, dawasété na ꞌre dasisãmri zaꞌra mono wa, ꞌRe ihâimana uꞌâsi mono ma, ꞌre idasiwẽꞌõ zaꞌra mono zéb zarina, dawasédé hã te te daꞌãma ꞌre abꞌmadâꞌâ mono tõ da.
4 Ãne hã ma tô tiromhâiba, ꞌRe ihâimana uꞌâsi mono zadawa ꞌmahârâꞌwa Izaias hã te te ãma irobꞌuiꞌérézéb zarina, ãne:
“Niꞌwa hã te hârâ ꞌrãihâ na dama robꞌmahâ, rop si ꞌre irosaꞌwari mono ãma:
Saꞌra pese aba mono bâdâdi hã, Uburé Danhibꞌapito ma. Imana ꞌrãmi bâdâdi hã awaꞌawi sô saꞌra aba mono!
5 Uburé saꞌa waꞌwa robꞌrehâ norĩ hã, te za asiwi iꞌmasisi aba mo, tiꞌa na. Duré uburé saꞌa norĩ hã, duré ẽtẽ ꞌrãihâ norĩ hã te za aiwapsi asiwi iromhâpâ aba mo.
Bâdâdi nhiꞌoto norĩ hã imanaꞌrãmi te za awaꞌawi da, isaꞌra waꞌaba mo. Duré bâdâdi na abꞌre norĩ hã te za isitob zaꞌra waꞌaba mo.
6 Tawamhã uburé te za ꞌmadâꞌâ zaꞌra ni, ꞌRe ihâimana uꞌâsi mono hawi Danhoꞌreptuzé hã.”
7 Tawamhã Zuwã hã ma tô te te dama ꞌre anharĩ, â dawabzuri da te ꞌre ꞌmanharĩ zaꞌra mono da, itẽme ꞌre idanomro mono norĩ ma, ãne:
— Wahi isé uptabi norĩ! E ꞌwa hã te te aima rowasuꞌu zaꞌra waꞌaba bâ, za iꞌasisõꞌreptu zaꞌra waꞌaba na hã, ꞌRe ihâimana uꞌâsi mono nhimihâzé za iwisi wi hã. 8 Maꞌãpé, marĩ hã ꞌmanharĩ zaꞌra waꞌaba, asihâiꞌré zaꞌra waꞌaba da, aiwasété na asisãmri zaꞌra waꞌaba wa, iꞌasiꞌruiwapari zaꞌra waꞌaba na hã. Duré asima ꞌre nharĩ zaꞌra waꞌaba mono tõ, ãne hã: “Wa norĩ hã Abraꞌãhã nhihudu.” E marĩ wa. Tô sena wa za ãne hã aima waihuꞌu zaꞌra waꞌwa. ꞌRe ihâimana uꞌâsi mono hã, ã hã ẽtẽ nherẽ, te te ãma saprĩ waihuꞌu pese zaꞌra di, Abraꞌãhã nhihudu na ꞌre hâimana zaꞌra mono da hã. 9 Hâtâra hã te oto mapa, wede norĩ hã te te anhihâri da, isari hawi. Uburé rowede, ꞌre iꞌrãi wẽ zaꞌra mono õ norĩ hã te za da te ꞌre sihâri zaꞌra, unhama u da te ꞌre sãmra mono da.
10 Tahawa, daꞌahâ uptabi na idahâimana zaꞌra norĩ hã ma tô da te dasiwi ꞌre sadanharĩ, ãne:
— E marĩ, wa za tawamhã ꞌmanharĩ zaꞌra ni.
11 Tawamhã Zuwã hã ma tô te te ꞌre daꞌazadaꞌâbâ, ãne:
— Niꞌwai ma, daꞌuza ihâpa hã maparane hâimana wamhã, te te sõmri, niꞌwai ma ihâimana õ ma. Duré niꞌwa te dasa iré wamhã, tô õne te te ꞌmanharĩ.
12 Tawamhã nima norĩ danhibꞌapito ma robꞌuiprazé arĩ ubumroiꞌwa norĩ hã ma tô duré aihutu Zuwã hã u, â dawabzuri hã te te tãma ꞌmanharĩ zaꞌra da. Ãne te duré ta norĩ hã siwi sadanha:
— Rowahutuꞌwa, e marĩ, wa za bété ꞌmanharĩ zaꞌra ni, wa norĩ hã.
13 Tawamhã Zuwã hã ma ãma sadaꞌâbâ zaꞌra, ãne:
— Ãma dawi ꞌre sipa zaꞌra waꞌaba mono tõ, robꞌuiprazé arĩ ubumro na hã, roti zahi te te iꞌruzém nhipai u hã.
14 Tawamhã nima norĩ dasiꞌwapéi ꞌmanharĩꞌwa norĩ hã te duré siwi sadanha, ãne:
— Wa norĩ hã bété, e marĩ, wa za ꞌmanharĩ zaꞌra ni.
Zuwã hã ma duré ãma sadaꞌâbâ zaꞌra, ãne:
— Robꞌuiprazé hã dawi ꞌre waibui waꞌaba mono tõ, asiptete sina hã, duré daꞌãma rowairébézéb ãma, senai õ na ꞌre idawasuꞌu wasété zaꞌra waꞌaba mono zarina hã. Duré aipawaꞌâ, ꞌre iwaibui waꞌaba mono na ãma asima ꞌre rowẽ zaꞌra waꞌaba mono.
15 Tawamhã da te irobꞌumnhasi zaꞌra zé hã ma tô tizaꞌẽtẽ oto. Tahawa ma tô rosaꞌrata zaꞌra ni, niwamhã Zuwã hã Cristuhu õꞌumnhasite.
16 Tane nherẽ, Zuwã hã ma tô ãne dama siwasuꞌu:
— Wa hã, â dawabzuri hã wa tô â na si te aima ꞌre abꞌmanharĩ ꞌwa. Tane nherẽ, te za wei wi za oto, niꞌwa hã ĩnhipai u ipire uptabi hã. Tahawa wa hã e ĩwẽ bâ, iparaꞌuza wasisizé te tãma iwasihu da hã. Ta hã te za te te ꞌre aiꞌahâiba upsõi waꞌwa ꞌRe ihâimana uꞌâsi mono Pẽꞌẽzani na, duré unhama na. 17 Isibꞌratamhã iparahi wawẽ amnho trigu ꞌrãi upõrĩzé, tãma ꞌre ihâimana mono na, te za amnho trigu hã ãma aipoꞌo, iteihi nhiti. Amnho trigu si te za sé, tite dasai ubumrozéb ãma hã. Tanei õ di, iteihi hã te za ãma roꞌo unhama na, niwa za idâꞌâ waihuꞌu õ na.
18 Ãne ma tô Zuwã hã rowasuꞌu sipuꞌu pese na te te dama ãma ꞌre robꞌmahârâ, Rowasuꞌuwẽ Itém na. Ma tô duré te te dama ꞌre roti pese, ꞌre danomro wẽ mono da. 19 Tane nherẽ, zahadu wapsi, apito Erodihi ma, te za tinha, hâimana wasété wa, Erodiaha ãma mro wa, tisiséme uptabi mro ãma, duré marĩ iwasédé te te ꞌre abꞌmanharĩ mono wab zama. 20 Tahawa Erodi hã te za oto ꞌmanha, marĩ iwasété uptabi hã. Te za tiꞌru, Zuwã hã da te sẽrẽ da, dazazéb ꞌre.
Zezusi hã, â dawabzuri te te iꞌmanharĩzé
21 Tawamhã Zuwã Batista hã, â dawabzuri, da te ꞌmanharĩ zaꞌra ré, ma tô Zezusihi ma duré ꞌmanha. Zezusi hã te te rowaptẽrẽ ré, ma tô hâiwa hã siꞌridawa. 22 Duré ꞌRe ihâimana uꞌâsi mono Pẽꞌẽzani hã ma tô we itẽme siꞌra isõꞌõmoi baba, utuꞌu ne. Tawamhã hâiwa hawi damreme hã te we tinha, ãne:
— A hã ĩꞌra, ĩma iꞌasawi uptabi. Rowẽ zaꞌẽne hã te ĩma ꞌre isõmri mo.
Zezusihi hiꞌrata norĩ zaꞌrada
23 Zezusihi ãma niwamhã 30 na iwahub ꞌre, ma tô romhuri na dama sãnaꞌrata. Zuzéhé ꞌra na, ma tô da te ãma ꞌre rosaꞌrata zaꞌra. Zuzé hã Elihi ꞌra. 24 Eli hã Matatihi ꞌra, Matati hã Levihi ꞌra, Levi hã Méuquihi ꞌra, Méuqui hã Zanaihi ꞌra, Zanai hã Zuzéhé ꞌra, 25 Zuzé hã Matatiasihi ꞌra, Matatias hã Amosihi ꞌra, Amosi hã Nauhu ꞌra, Nau hã Eslihi ꞌra, Esli hã Nagaihi ꞌra, 26 Nagai hã Maatihi ꞌra, Maati hã Matatiasihi ꞌra, Matatias hã Simeihi ꞌra, Simei hã Zuzéhé ꞌra, Zuzé hã Zodaha ꞌra, 27 Zoda hã Zoãnahã ꞌra, Zoãna hã Rezaha ꞌra, Reza hã Zorobabéu ꞌra, Zorobabéu hã Salatiéu ꞌra, Salatiéu hã Nerihi ꞌra, 28 Neri hã Méuquihi ꞌra, Méuqui hã Adihi ꞌra, Adi hã Cozãhã ꞌra, Cozã hã Eumadãhã ꞌra, Eumadã hã Er ꞌra, 29 Er hã Zozuéhé ꞌra, Zozué hã Eliézéhé ꞌra, Eliézé hã Zorĩhĩ ꞌra, Zorĩ hã Matatihi ꞌra, Matati hã Levihi ꞌra, 30 Levi hã Simiãhã ꞌra, Simiã hã Zudaha ꞌra, Zuda hã Zuzéhé ꞌra, Zuzé hã Zonahã ꞌra, Zona hã Eliaquĩhĩ ꞌra, 31 Eliaquĩ hã Meleaha ꞌra, Melea hã Menahã ꞌra, Mena hã Matataha ꞌra, Matata hã Natãhã ꞌra, Natã hã Davihi ꞌra, 32 Davi hã Zésséhé ꞌra, Zésé hã Obedihi ꞌra, Obedi hã Boazihi ꞌra, Boaz hã Salaha ꞌra, Sala hã Nasõhõ ꞌra, 33 Nasõ hã Aminadabihi ꞌra, Aminadabi hã Adimihi ꞌra, Adimi hã Arnihi ꞌra, Arni hã Esrõhõ ꞌra, Esrõ hã Perizihi ꞌra, Periz hã Zudaha ꞌra, 34 Zuda hã Zacoho ꞌra, Zaco hã Izaquihi ꞌra, Izaqui hã Abraꞌãhã ꞌra, Abraꞌã hã Teraha ꞌra, Tera hã Naoho ꞌra, 35 Naor hã Seruguihi ꞌra, Serugui hã Reuhu ꞌra, Reu hã Peleguihi ꞌra, Pelegui hã Ébéhé ꞌra, Ébé hã Selaha ꞌra, 36 Sela hã Cainahã ꞌra, Caina hã Arpasadihi ꞌra, Arpasadi hã Sẽhẽ ꞌra, Sẽ hã Noéhé ꞌra, Noé hã Lamequihi ꞌra, 37 Lamequi hã Metuzalẽhẽ ꞌra, Metuzalẽ hã Enoquihi ꞌra, Enoqui hã Zaredihi ꞌra, Zaredi hã Maalaléuhu ꞌra, Maalaléu hã Cainahã ꞌra, 38 Caina hã Enosihi ꞌra, Enosi hã Setihi ꞌra, Seti hã Adãhã ꞌra, Adã hã ꞌRe ihâimana uꞌâsi mono ꞌra*.