Zuã

Zezusi hã, aibâ ihiꞌré te te ipesezé

5 Ronomro parimhã, Zudeu norĩ te, dato isaꞌẽne hã ma tô tihâiba. Tahawa Zezusi hã ma tô mo, Zeruzalẽ u. 2 Tame â ubumrozé hã te ꞌre hâimana, Poneꞌẽrebâ na ꞌridawa zaꞌẽtẽ nhisi ꞌratamhã, imrotõ na ꞌridawa itẽme dazasizé hã. Ta hã Ebreu norĩ mreme na hã “Betezata” na isisi hã. 3 Dazasizéb ꞌratamhã, te ahâ na ꞌre simiꞌwara, ihâzé ré norĩ hã: Itobꞌa norĩ, iꞌrãtẽire norĩ, duré ihiꞌré norĩ zama. [Ta norĩ hã te te ꞌre sapari zaꞌra, â hã ꞌre sirési mono da. 4 E marĩ wa. Nimahã bâtâ na hã Uburé Danhibꞌapito ma hâiwa hawi romhuriꞌwa hã te te ꞌre siꞌra, â hã te te ꞌre rési mono da. Tawamhã imorĩꞌrata na ihâzé ré niꞌwa te te siꞌrai wamhã, te ꞌre pese zaꞌra, siwaꞌru dahâzé ãma ꞌre ihâimana zaꞌra mono hã.] 5 Tawamhã dawazarimhã te aibâ ihâzé ré hã ꞌre saꞌwari, 38 na ãma iwahu, tihâzé te te ꞌre sépata mono ré hã. 6 Tawamhã Zezusi hã aibâ nomro ré, te te ꞌmadâꞌâ wamhã, duré tihâzé te te ꞌre sépata mono ré, ãma iwahub zaꞌẽtẽ na te te waihuꞌu pese wa, ma tô ãne sadanha:

— E aipese da hã te asima iwẽ.

7 Tawamhã aibâ ihiꞌré hã te tãma siwasuꞌu, ãne:

— Apito, niꞌwai õ di, â ꞌre sisasisi mono wa, ĩꞌãma isiꞌraiꞌwa da hã, â ubumrozéb u. Ĩzébré da ĩsiꞌwapéi ré hã, ihâiba amo norĩ hã te za niꞌwa hã ãzé, ĩwana.

8 Tawamhã Zezusi hã te tãma tinha, ãne:

— Maꞌãpé, aiwahutu. Asaꞌwarizé hã âri, aimorĩ da oto!

9 Tawamhã awaꞌawi pesere ma tô aibâ hã tipese. Tizaꞌwarizé hã ma tô tiꞌâ. Timorĩ na ma tô duré oto sãnaꞌrata. Ãne hã sabadu na ma tô tiromhâiba. 10 Tahawa, Zudeu norĩ ma rotiꞌwa norĩ hã ma tô tãma nharĩ zaꞌra, ãne:

— Ãhã na hã sabadu. Tawamhã ꞌRe ihâimana uꞌâsi mono nhimiroti zahi na robꞌuiꞌéré hã te te ꞌrui õ di, ã bâtâ na asaꞌwarizé iꞌâri da hã.

11 Tane nherẽ aibâ hã ma sadaꞌâbâ zaꞌra, ãne:

— Aibâ ĩpeseꞌwa hã te ãne ĩma tinha: “Asaꞌwarizé hã âri, aimorĩ da oto.”

12 Tahawa te siwi sadanha, ãne:

— E ꞌwa hã aibâ, ma tô aima tiꞌru, asaꞌwarizé hã âri da, duré oto aimorĩ da hã.

13 Tane nherẽ, te te waihuꞌu õ di, niꞌwa te te ipese na hã. E marĩ wa. Daꞌahâ uptabi na idahâimana zaꞌra waꞌwa u sébré wa, Zezusi hã.

14 Tawamhã ronomro pari, Zezusi hã ma tô aibâ sõpẽtẽ, ꞌRe ihâimana uꞌâsi mono nhorõwa ꞌri ꞌrãihâ ãma ꞌri ꞌwawi waꞌra ꞌre. Ãne te tãma tinha:

— Maꞌãpé, ĩwapari! Ãhã na hã ma tô oto aipe. Tahawa, ꞌre aiwasété mono tõ oto, ãhã nhipai u marĩ ipipa uptabi hã oto aiꞌãma hâimana tõ da.

15 Tawamhã aibâ hã ma tô mo, Zudeu norĩ ma rotiꞌwa norĩ u. Zezusi te te ipese na ma tô tãma siwasuꞌu zaꞌra. 16 Tahawa, ta hawim haré Zudeu norĩ hã te oto Zezusi hã siwi sarẽ, sabadu na aibâ hã te te pese wa.

17 Tawamhã te Zezusi hã tãma nharĩ zaꞌra, ãne:

— Ĩmama hã te zahadu ãwa bâtâ u hã te te ꞌre romhuri. Tane, wa zahadu ĩzama te ꞌre romhuri.

18 Ãne wa, Zudeu norĩ hã te te oto siwi iwĩrĩ da si, sabadu hã te te wazéb õ wapsi õ di oto. Tazahã ꞌRe ihâimana uꞌâsi mono hã Timama uptabi na te te wasuꞌu wa, isine ihâimana na siwasuꞌu wab zama.

Zezusi hã, Timama zadawa para, pire na ꞌre ihâimana mono zé

19 Tawamhã Zezusi hã te tãma rowasuꞌu zaꞌra, ãne:

— Tô sena, wa za aima waihuꞌu zaꞌra waꞌwa, ãne: Iꞌra hã, sihawimhã marĩ te te ꞌmanharĩ waihuꞌu õ di. Imama hã marĩ te te ꞌre abꞌmanharĩ mono ré, te te ꞌre iꞌmadâꞌâ mono zéb zarina si te za te te ꞌre abꞌmanharĩ. Uburé marĩ, Imama te te ꞌre iꞌabꞌmanharĩ mono hã, te za Iꞌra zama te te ꞌre abꞌmanharĩ. 20 E marĩ wa. Imama ma, Iꞌra hã sawi uptabi wa. Tahawa, te za uburé marĩ hã te te tãma ꞌre ahâiꞌré, te te ꞌre iꞌabꞌmanharĩ mono hã. Ã norĩ nhipai u marĩ isaꞌẽtẽ uptabi hã te za duré tãma hâiꞌré za. Tawamhã te za ãma atobꞌuzu zaꞌra waꞌwa za. 21 Imama hã, ꞌre idadâꞌâ zaꞌra mono apâ te te ꞌre idaꞌahâiwaꞌutu mono ne, duré dahâimanazé te te dama ꞌre iꞌanhomri mono ne, tane te za duré Iꞌra hã dahâimanazé te te dama ꞌre anhomri, te te sima ꞌre idaꞌawẽ mono norĩ ma hã. 22 Imama hã te te daꞌãma ꞌre arowairébé mono õ di. Tiꞌra ma si, ma tô tisõ, te te daꞌãma ꞌre arowairébé mono da hã, 23 Iꞌra hã uburé da te dasiwi ꞌre wazé pese mono da, Imama hã da te dasiwi ꞌre iwazé pese mono ne. Niꞌwa hã Iꞌra te te wazéb õ wamhã, Imama zama te te duré wazéb õ di, we isatõrĩꞌwa hã.

24 — Tô sena wa za ãne hã aima waihuꞌu zaꞌra waꞌwa: Niꞌwa hã ĩnhimiroti te te wapari wamhã, duré we ĩzatõrĩꞌwa hã te te sazei wamhã, dahâimanazé isiꞌutõrĩꞌõ hã te za tãma ꞌre hâimana. Duré ãma rowairébé hã hâimana õ di za. Tazahã, ma tô saprĩ dadâꞌâ hawi, dahâimanazé isiꞌutõrĩꞌõ u. 25 Tô sena wa za duré ãne hã aima waihuꞌu zaꞌra waꞌwa: Bâdâ hã te za oto wi. Ta hã ma tô wi, idâꞌâ zaꞌra norĩ hã ꞌRe ihâimana uꞌâsi mono ꞌRa mreme za te te iwapari zaꞌra zé hã. Tawamhã imreme te te iwapari zaꞌra norĩ hã, dâꞌâ ãna te za oto ꞌre hâimana zaꞌra. 26 Imama hã dahâimanazém naꞌrata nhomriꞌwa na te ꞌre hâimana. Tane ma tô duré Tiꞌra ma pisutu, dahâimanazém naꞌrata nhomriꞌwa na ꞌre hâimana mono da. 27 Tawamhã Tiꞌra ma, ma tô pisutu, isadawa para te te daꞌãma ꞌre arowairébé mono da, ta hã Tiꞌai ãma Dasiré Ipoto wa.

28 — Tahawa, ãma atobꞌuzu zaꞌra waꞌaba tõ, te aima irowasuꞌu zaꞌra waꞌaba zém na hã. E marĩ wa. Bâdâ hã te za oto wi, uburé idâꞌâ zaꞌra norĩ hã Tiꞌai ãma Dasiré Ipoto mreme te te iwapari zaꞌra da hã. 29 Ta norĩ hã te za wairé, tiꞌru hawimhã. Tawamhã niꞌwam norĩ hã marĩ te te ꞌre iꞌmanharĩ wẽ zaꞌra mono hã te za tihâiwaꞌutu zaꞌra, ꞌre hâimana uꞌâsi zaꞌra mono da oto, dâꞌâ ãna. Tazahã, marĩ te te ꞌre iꞌmanharĩ wasété zaꞌra mono hã hâiwaꞌutu zaꞌra pari, te za ꞌRe ihâimana uꞌâsi mono ta norĩ ma, tinhimihâzé hã pisutu zaꞌra.

Zezusi hã, Timama zadawa para datẽme ꞌre imorĩ na isiwasuꞌuzé

30 — Ĩsihawimhã, marĩ te ꞌre abꞌmanharĩ waihuꞌu mono õ di. Ĩmama te te ĩma ꞌre iꞌrui mono zéb zarina si, wa te tô te dama ꞌre arowairébé. Dahâimanazéb zarina te daꞌãma ꞌre iꞌarowairébé mono zé hã, iꞌuwaibaba na wa te te ꞌre ꞌmanharĩ. E marĩ wa. Te ĩsima iwẽzéb zarina, ĩsima sô ꞌre ĩrĩtĩ mono õ di, marĩ te ꞌre abꞌmanharĩ mono da hã. We ĩzatõrĩꞌwa te te sima ꞌre iwẽ mono zéb zarina si, wa marĩ hã te ꞌre abꞌmanharĩ.

31 — ꞌRâwi te dama ĩsina ꞌre rowasuꞌu mono wamhã, marĩ dai õ di za, te ꞌre irowasuꞌu mono zé hã. 32 Tane nherẽ, daré hã niꞌwa te te dama ꞌre ĩwasuꞌu mono hã. Ta hã, tô sena te te ꞌre ĩwasuꞌu mono na hã ĩma waihuꞌu pese di.

33 — Aibâ norĩ hã Zuwãhã u ma tô isatõrĩ zaꞌra waꞌwa, te te siwi sadanharĩ da. Tawamhã ta hã te te irowasuꞌu hã, tô sena uptabi. 34 Ĩnhimnhasi õ di, niꞌwa te te dama ĩwasuꞌu wẽ da hã. Tane nherẽ, ãne hã wa tô aima rowasuꞌu zaꞌra waꞌwa, asõꞌreptuzé hã asina uwaimrami zaꞌra waꞌaba da. 35 Zuwã hã robꞌuiwẽzé, roꞌo haré isam ne, ma tô ꞌre hâimana. Tawamhã niha bâtâ na ma tô asima irowẽ zaꞌra waꞌwa, te te ꞌre irobꞌuiwẽ mono zém na hã. 36 Tane nherẽ, ĩwasuꞌu isiptete uptabi hã te tihâiba, Zuwã te te dama ꞌre ĩwasuꞌu mono nhipai u hã: Ta hã marĩ te ꞌre iꞌaꞌmanharĩ mono zé, Ĩmama te te ĩma iꞌruzéb zarina. Ta hã marĩ te ꞌre iꞌabꞌmanharĩ mono zé hã, te te ꞌre ĩwasuꞌu wẽ. Duré ta hã ĩwaihuꞌuzé, Ĩmama we te te ĩzatõrĩ na hã. 37 Duré Ĩmama we ĩzatõrĩꞌwa hã te te ꞌre ĩwasuꞌu wẽ. Taha mreme hã niwa wapari zaꞌra waꞌaba õ di aipoꞌre na hã. Duré niwa asiwi ubu ꞌmadâꞌâ aba õ di. 38 Isimiroti hã aipẽꞌẽ ꞌremhã aima hâimana zaꞌra waꞌaba õ di, we te te isatõrĩ hã saze zaꞌra waꞌaba õ wa. 39 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na, te ãma ꞌre iromnhoré pese zaꞌra waꞌaba mo, dahâimanazé isiꞌutõrĩꞌõ hã ãma aima ꞌre hâimana zaꞌra waꞌaba mono da newa. Ta hã ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te tô ĩwasuꞌu. 40 Tane nherẽ, asima wẽ zaꞌra waꞌaba õ di, we ĩtẽme iꞌaiꞌabaꞌréi waꞌaba da hã, dahâimanazé isiꞌutõrĩꞌõ hã aima ꞌre hâimana zaꞌra waꞌaba mono da.

41 — Tiꞌai ãma ꞌre idahâimana zaꞌra mono hã da te dasiwi ꞌre ĩꞌuzei wẽ mono da, sô ꞌre ĩnhimipari mono õ di. 42 Tazahã oto a norĩ waꞌwa hã ĩma aihâimanazé waihuꞌu pese zaꞌra waꞌaba di. Ĩma waihuꞌu pese di, ꞌRe ihâimana uꞌâsi mono, aima isawi zaꞌra waꞌaba õ na hã, tô sena. 43 Ĩmama zadawa para wa tô wei mo. Tane nherẽ, ĩzô atobꞌuzu zaꞌra waꞌaba õ di. Tazahã, oto niꞌwa hã sihawi wei morĩ wap si, te za sô atobꞌuzu zaꞌra waꞌwa. 44 E niha te za bété ĩzaze zaꞌra waꞌwa, da te ꞌre iꞌaiꞌuze zaꞌra waꞌaba mono zé hã aima wẽ zaꞌra waꞌaba nherẽ, duré asima sô ꞌre asõpré waꞌaba mono õ nherẽ, ꞌRe ihâimana uꞌâsi mono si te te ꞌre aiꞌuzei wẽ zaꞌra waꞌaba mono da hã. 45 Ĩꞌãma rosaꞌrata zaꞌra waꞌaba tõ, wa hã za te iꞌaiꞌawasuꞌu waꞌaba na hã Ĩmama nhoꞌremhã. Mozésihi si te za aiꞌawasuꞌu waꞌwa, ta hã asiwi ꞌre umnhasi aba mono wa. 46 Mozési hã asiwi sazei waꞌaba ꞌwaꞌâhã, te aré asiwi ĩzazei waꞌwa. E marĩ wa. Ta hã ĩwasuꞌu na ma tô robꞌuiꞌéré. 47 Tane nherẽ, te te irobꞌuiꞌérézé hã asiwi sazei waꞌaba õ wamhã, e niha te za bété asiwi ĩzazei waꞌwa, te ꞌre irowasuꞌu mono zém na hã.