Mateus

6 “Marĩ ĩwẽ hã danhoꞌa ꞌre ꞌmanharĩ dzaꞌra waꞌaba mono tõ, taré dama aiꞌmadöꞌö dze dzaꞌra waꞌaba da. Ãne ꞌmanharĩ dzaꞌra waꞌaba wamhã, Aimama ꞌwa hã höiwa ãma ĩhöimana hã aima tsõprub dzaꞌra waꞌaba õ di dza. 2 Marĩ ĩtsimarĩꞌõ ma tsõmri wamhã danhoꞌa roꞌmahörö tõ niꞌwa mreme ꞌrãihö na ĩtsiꞌmahörö ne. Ãne ĩhöimana nhipetse norĩ te te ꞌre ꞌmanharĩ dzaꞌra ĩte dzaꞌra ãma dawatadzém na duré bödödi na ãma dawata dzaꞌra da. Tô tsena wa aima watsuꞌu dzaꞌra waꞌwa: taha tsi hã te dza tãma ꞌre höimana dzaꞌra. 3 Tadzahã, marĩ ĩwẽ dama ꞌmanharĩ wamhã, ĩhöiba amo norĩ ma watsuꞌu tõ ĩꞌmanharĩdzé hã. 4 Marĩ ĩwẽ ꞌmanharĩ mono ré hã waihuꞌu ãna höimana da. Tawamhã Aimama ꞌwa hã uburé aiꞌuréiwi tãma ĩhöimana hã te dza aima tinhopru. 5 “Duré, ꞌre rowaptẽrẽ dzaꞌra waꞌaba mono wamhã aihöimana dzaꞌra waꞌaba mono tõ ĩhöimana nhipetse norĩ ne. Õ norĩ hã tsap tsina te natsi rowaptẽrẽ dzaꞌra da te ꞌre ꞌmadöꞌö dzaꞌra mono da ĩte dzaꞌra ãma dawatadzém na duré bödödi na. Tô tsena wa aima waihuꞌu dzaꞌra waꞌwa: õhõ tsi hã te tãma ꞌre höimana dzaꞌra. 6 Tadzahã rowaptẽrẽ wamhã atsimiwaptöꞌö u atsébré. Atsiwaprotsi atsiré tsito na. Tawamhã Aimama ma rowaptẽrẽ. Niꞌwa te te aiꞌmadöꞌö õ di dza. Aimama tsi hã te te ꞌre aiꞌmadöꞌö. Õ hã te dza aima tinhopru. 7 Rowaptẽrẽ wamhã aimreme dzahu mono tõ õhõ uꞌötsi na. Ãne te te ꞌre ꞌmanharĩ dzaꞌra Ropotoꞌwai ãma ĩwata waihuꞌu dzaꞌra õ norĩ hã, Ropotoꞌwa te te wapari dzaꞌra newa te te rowaptẽrẽ hö dzaꞌra wa. 8 Ãne ꞌre aihöimana dzaꞌra waꞌaba mono tõ. Aimama waꞌaba ma hã waihuꞌu petse wa marĩ aiwi tsô ĩrowaptöꞌö dzaꞌra waꞌaba na tiwi rowaptẽrẽ dzaꞌra waꞌaba wana ré. 9 “Ãhã dzarina te dza ꞌre ĩrowaptẽrẽ dzaꞌra waꞌaba mo: “‘Wamama hã höiwa ãma ꞌre ahöimana mono hã, wa awi rowaptẽrẽ dzaꞌra ni anhitsi na da te ꞌre wadzé petse dzaꞌra mono da. 10 Duré anhimirobꞌrudzé hã te te ꞌre roti mono da Tiꞌai ãma, duré ate atsima ĩwẽdzéb dzarina ꞌre romhöimana mono da Tiꞌai ãma, ꞌre ĩromhöimana mono ne höiwa ãma ate atsima ĩwẽdzéb dzarina. 11 Ate we tsõmri datsa hã ãhã bötö u hã. 12 Ate ꞌre waꞌruiwapari dzaꞌra mono tõ wawatsété dzaꞌra na hã wa te ꞌre ĩdaꞌruiwapari dzaꞌra mono õ ne wadzada ꞌre ĩdawatsété dzaꞌra mono norĩ. 13 Duré ate ꞌre wapawaptob dzaꞌra mono wawatsété u ꞌre warereꞌe mono tõ da, duré Waꞌuburé wi ate wanhoꞌreptu dzaꞌra na.’ 14 “ꞌRe daꞌruiwapari dzaꞌra waꞌaba mono õ wamhã atsada dawatsété dzaꞌra wamhã, Aimama waꞌaba dzéma höiwa ãma te te ꞌre aiꞌruiwapari dzaꞌra waꞌaba mono õ di dza. 15 Taha waꞌrãmimhã, dawatsédé hã dama ꞌre ꞌmadöꞌö uꞌötsi dzaꞌra waꞌaba mono wamhã atsada dawatsété dzaꞌra waꞌaba wamhã, Aimama waꞌaba dzéma te dza te te ꞌre ꞌmadöꞌö uꞌötsi aiwatsété dzaꞌra waꞌwa. 16 “Atsima pitsutu dzaꞌra waꞌaba wamhã atsai ãna aihöimana dzaꞌra waꞌaba da aꞌö, aiꞌubudzei ãna ꞌre aihöimana dzaꞌra waꞌaba mono tõ ĩhöimana nhipetse norĩ tsine. Õ norĩ hã ubu dzei ãna te ꞌre höimana dzaꞌra da te ꞌre ꞌmadöꞌö dzaꞌra mono da te te tsima ĩpitsutu dzaꞌra na tsai ãna höimana dzaꞌra da aꞌö. Tô tsena wama waihuꞌu dzaꞌra waꞌwa: õhõ tsi hã te tãma ꞌre höimana dzaꞌra. 17 Taha waꞌrãmimhã, atsima pitsutu wamhã atsai ãna aihöimana da aꞌö, atsitséré petse duré atsiꞌubu uptsõ na. 18 Ãne wamhã da te waihuꞌu dzaꞌra õ di dza atsima ĩpitsutu na hã atsai ãna aꞌö aihöimana da. Aimama tsi te dza ꞌmadö atsiwaprotsi ĩꞌmanharĩdzé hã. Tawamhã Aimama uburé aiꞌuréiwi tãma ĩhöimana hã te dza aima tinhopru. 19 “Atsima ubumro dzaꞌra waꞌaba tõ danhibro Tiꞌai ãma hã. Ãmemhã marĩ mono hã tsiꞌutõrĩ waihuꞌu petse di duré aiwi danhiptsaihuri waihuꞌu petse di. 20 ꞌRe romhuri petse dzaꞌra waꞌaba mono marĩ mono hã Ropotoꞌwa höiwa ãma ĩhöimana hã te te ĩwẽtsãmri dzarina ꞌre ꞌmanharĩ dzaꞌra waꞌaba mono da. Ã hã marĩ mono hã tsiꞌutõrĩ waihuꞌu õ di duré aiwi danhiptsaihuri waihuꞌu õ di. 21 E marĩ wa. Marĩ aima waꞌöbö dzaꞌẽtẽ wamhã, taha na tsi te dza ꞌre ĩrotsaꞌrata uꞌötsi mo. 22 “Ato hã robꞌuiwẽdzé te te ĩꞌaiꞌuiwẽ ne hã atõmo na tsõꞌawi tsãmri waihuꞌu petse wamhã aihöiba wahuré hã te dza robꞌuiwẽ. 23 Tadzahã roꞌmadöꞌö wamhã rotsaꞌrata watsété tsina aima robra uptabi di dza. Rowaꞌa aima ĩhöimana hã tsena na robra wamhã aima robra dzaꞌẽtẽ di dza! 24 “Niꞌwa te te romhuri waihuꞌu õ di maparane danhibꞌihöꞌa ma. Mitsi tãma tsawi wamhã tãma ꞌru ti dza ĩhöiba amo. Mitsi ma tsimirẽme õ tãma höimana wamhã te te wadzéb õ di dza ĩhöiba amo. Tawamhã robꞌuipradzé ĩmorĩꞌrata na aihöimanadzém na aima höimana wamhã, romhuri waihuꞌu õ di dza Ropotoꞌwai ma. 25 “Taha wa, wa aima nharĩ dzaꞌra waꞌwa: atsina aihötöꞌö petse dzaꞌra waꞌaba tõ, duré atsa na hã duré ĩꞌöhuri aba dzém na hã, duré aihöiba na dza ĩꞌatsiꞌudza aba dzém na hã. E aihöimanadzé datsa nhipai u ĩpire ã bö duré aihöiba daꞌudza nhipai u ĩpire ã bö. 26 Atsima ꞌmadöꞌö dzaꞌra waꞌaba tsi norĩ hã höiwa na hã. Te te robꞌre dzaꞌra õ di, titsa da hã te te roptehöri dzaꞌra õ di duré te te ubumro dzaꞌra õ di. Tane nherẽ, Aimama ꞌwa hã höiwa ãma ꞌre ĩhöimana mono hã ĩtsa hã te te tãma ꞌre anhomri dzaꞌra. E tsi norĩ nhipai u aipire dzaꞌra waꞌaba ã bö. 27 E mitsi bödö atsima ãma wapto waihuꞌu petse dzaꞌra waꞌaba bö aihöimanadzém na ꞌre aihötöꞌö dzaꞌra waꞌaba mono wa. 28 Duré e marĩ wa, te ꞌre aihötöꞌö dzaꞌra waꞌaba mo atsiꞌudza aba dzém na. Atsima ꞌmadöꞌö petse dzaꞌra waꞌaba ĩtsirãrã norĩ rom na ꞌre ĩprédub dzaꞌra mono hã. Te te romhuri dzaꞌẽtẽ dzaꞌra õ di duré tiꞌudza te te tsima ꞌmanharĩ dzaꞌra õ di. 29 Tadzahã wa aima nharĩ dzaꞌra waꞌwa: rotiꞌwa Salomão dama pire uptabi na ꞌre höimana mono nherẽ ĩtsirãrã dzaꞌra norĩ ne ꞌmadöꞌö dzei uptabi na ꞌre tsiꞌudza mono õ di. 30 Ĩtsirãrã norĩ hã te dza tiprédub dzaꞌra mitsi bötö na rom na duré awẽm na te dza tiꞌré dzaꞌra duré te dza ãma roꞌo dzaꞌra ni. Tane nherẽ, Ropotoꞌwa ĩꞌmadöꞌö dzei uptabi na te te ꞌre ꞌmanharĩ dzaꞌra. Tawamhã e taha nhipai u te te aima ꞌmanharĩ dzaꞌra waꞌaba ã bö atsimidzadze nhiptete dzaꞌra waꞌaba õ nherẽ. 31 Tawamhã niwa aihötöꞌö dzaꞌra waꞌaba tõ nharĩ dzaꞌra waꞌaba tsina: ‘E marĩ na wa dza watsaihuri ni’ niwamhã, ‘E marĩ wa dza öhuri ni’ niwamhã, ‘E marĩ na wa dza watsiꞌudza dzaꞌra ni.’ 32 Ta norĩ ãma ꞌre ĩhötöꞌö dzaꞌra mono norĩ hã Ropotoꞌwa te te waihuꞌu dzaꞌra õ di. Aimama ꞌwa hã höiwa ãma ꞌre ĩhöimana mono waihuꞌu petse di oto ta norĩ dzô ꞌre ĩꞌatsiminhatsi dzaꞌra waꞌaba mono na hã. 33 “Ropotoꞌwa nhimirobꞌrudzéb dzô ĩmorĩꞌrata na aihöimanadzém na ꞌre atsõpré aba mono. Duré ꞌre wapari uꞌötsi dzaꞌra waꞌaba mono. Tawamhã Ropotoꞌwa te dza te te aima ꞌre anhomri ꞌwa uburé marĩ norĩ tsô ꞌre ĩꞌatsiminhatsi dzaꞌra waꞌaba mono hã. 34 Tawamhã niwa aihötöꞌö dzaꞌra waꞌaba tõ dza ĩꞌawẽdzém na hã. Awẽ tsidöpötsi te tô ropire hã ꞌre höimana dzaꞌra bötö mono te hã aihötöꞌö dzaꞌra waꞌaba da hã.