Mateus

7 “Daꞌãma ꞌre rowairébé dzaꞌra waꞌaba mono tõ da te aiꞌãma ꞌre rowairébé dzaꞌra waꞌaba mono tõ da. 2 E marĩ wa. Daꞌãma ꞌre ĩrowairébé dzaꞌra waꞌaba mono dzéb dzarina, te dza da te aiꞌãma ꞌre rowairébé dzaꞌra waꞌaba mono duré dama ꞌre ĩꞌaihöimana dzaꞌra waꞌaba mono dzéb dzarina, te dza aima ꞌre dahöimana dzaꞌra waꞌaba mono. 3 E niha bö wede dzapru hã atsitsãnawã tõmo na ꞌre ĩꞌmadöꞌö mo. E atsina ꞌmadöꞌö ã bö wede waꞌõno atõmo na ĩhöimana na hã. 4 Niwamhã, e niha te dza ĩnha atsitsãnawãi ma: ‘Ĩ̱ma tsaꞌré na wede dzapru atõmo na te wadzere da’, wede waꞌõno atõmo na höimana nherẽ. 5 Aihöimana nhipe! Ĩmorĩꞌrata na wadzere wede waꞌõno atõmo hawi. Tawaptsi ꞌmadöꞌö waihuꞌu petse di dza tsõꞌawi wede dzapru hã atsitsãnawã tõmo hawi wadzere da. 6 “ꞌRe tsõmri dzaꞌra waꞌaba mono tõ, marĩ norĩ hã Ropotoꞌwa te hã, waptsã norĩ ma duré ꞌre tsãmra aba mono tõ atsimarĩ ĩwaꞌöbö dzaꞌẽtẽ norĩ uhöbö norĩ ma. Ãne ꞌmanharĩ dzaꞌra waꞌaba wamhã, taré te dza te te ꞌre watiꞌi dzaꞌra duré te dza atsada aipidzari dzaꞌra te te aihödzu dzaꞌra waꞌaba da. 7 “Marĩ aiwi ꞌre ĩrowaptöꞌö dzaꞌra waꞌaba mono dzéb dzô, Ropotoꞌwai wi ꞌre waptẽrẽ uꞌötsi dzaꞌra waꞌaba mono, tawamhã te dza te te aima ꞌre anhomri ꞌwa. Tsô ꞌre atsõpré uꞌötsi aba mono, tawamhã te dza ꞌre ĩtsõpẽtẽ dzaꞌra waꞌaba mo aiwi tsô ꞌre ĩrowaptöꞌö dzaꞌra waꞌaba mono dzé hã. Ropotoꞌwai wi ꞌre waptẽrẽ uꞌötsi dzaꞌra waꞌaba mono atsitsitsi aba da, tawamhã te dza te te aima ꞌre aꞌridawa waꞌwa. 8 Aihĩni te te ꞌre ĩwaptẽrẽ uꞌötsi dzaꞌra mono ma hã te dza te te ꞌre anhomri, duré aihĩni ꞌre ĩtsõpré mono hã te dza te te ꞌre tsõpẽtẽ dzaꞌra, duré aihĩni te te ꞌre ĩꞌridawa taꞌa dzaꞌra mono ma hã, te dza te te ꞌre aꞌridawa. 9 Tô tsena aiꞌra datsa te te aiwi ꞌmaiwaptẽrẽ wamhã, ẽne tãma tsõmri õ di dza. 10 Niwamhã, peꞌa te te ꞌrẽne da te te aiwi ꞌmaiwaptẽrẽ wamhã, wahi tãma tsõmri õ di dza. 11 Aiwatsédé hã aima ꞌre höimana dzaꞌra waꞌaba mono nherẽ, ꞌre tsõmri waihuꞌu petse dzaꞌra waꞌaba mono di marĩ ĩwẽ aiꞌra norĩ ma hã. Tawamhã, ꞌre umnhatsi petse dzaꞌra waꞌaba mono Aimama ꞌwa hã höiwa ãma dza te te ꞌre ĩꞌanhomri mono na hã marĩ ĩwẽ te te tiwi ꞌre ĩwaptẽrẽ dzaꞌra mono norĩ ma. 12 “Dama ꞌre aihöimana dzaꞌra waꞌaba mono atsima ĩwẽ dzaꞌra waꞌaba dzéb dzarina aima ꞌre dahöimana dzaꞌra waꞌaba mono da. Tahã rowahutu uparidzé Roti na hã duré Ropotoꞌwa dzadawa ꞌmahörö ꞌrata ꞌwa norĩ nhimirowatsuꞌu na hã. 13 “ꞌRidawa ĩtsuru na ꞌre atsitsitsi aba mono. E marĩ wa. Bödödi te te ꞌre ĩdadzaprõni mono dadöꞌödzéb u tsaꞌẽtẽ wa, duré ĩte ꞌridawa tsaꞌẽtẽ di. Taha wa, daꞌahö na te da te ãma ꞌre roꞌrahöri dzaꞌra. 14 Taha waꞌrãmimhã, bödödi te te ꞌre ĩdadzaprõni mono dahöimanadzé ĩtsiꞌutõrĩꞌõ u tsurure di duré ĩte ꞌridawa tsurure di. Taha wa, daꞌumro na te da te ꞌre tsõpẽtẽ dzaꞌra. 15 “ꞌRe atsipibui petse dzaꞌra waꞌaba mono ĩtsadawa nhipetse dzaꞌra norĩ wi, aima ꞌre ĩtsiwatsuꞌu dzaꞌra mono hã Ropotoꞌwai ma romhuriꞌwa na. Te ꞌre höimana dzaꞌra tsimidzawi petse dzaꞌra ne da poneꞌẽrebö ne. Tadzahã tsena na, abadze ĩtsahi uptabi ĩmrab uptabi ne te ꞌre höimana dzaꞌra te te aima ꞌre robꞌmanharĩ watsété dzaꞌra waꞌaba mono da. 16 Te te ꞌre ĩꞌmanharĩ dzaꞌra mono dzéb dzarina te dza ꞌre ĩwaihuꞌu dzaꞌra waꞌaba mo. Da te ꞌre dzuri waihuꞌu dzaꞌra mono õ di uva ꞌwabdzéré hawi, niwamhã figu warõtõ hawi. 17 Tô tsena, robꞌrã ĩwẽ wede ĩwẽ hawip tsi. Tadzahã, wede ĩwatsété hawimhã, robꞌrã ĩwatsété tsi te dza tiꞌrã. 18 Wede wẽ wamhã ꞌrãi watsété na ꞌrãi waihuꞌu õ di. Duré wede watsété wamhã, ꞌrãi wẽ na ꞌrãi waihuꞌu õ di. 19 Wede ꞌrãi wẽ na ꞌrãi õ wamhã, te dza da te ꞌre tsidzöri dzaꞌra duré unhama u te dza da te ꞌre tsãmra. 20 Ãne duré, ãhã aibö norĩ te dza ꞌre ĩwaihuꞌu dzaꞌra waꞌaba mo, te te ꞌre ĩꞌmanharĩ dzaꞌra mono dzéb dzarina. 21 “Niꞌwam norĩ hã dama tsiwatsuꞌu dzaꞌra nherẽ ĩ̱dzadzeiꞌwa na, uburé ꞌre tsitsitsi mono õ di dza Rotidzéb u höiwa ãma. Ĩ̱mama höiwa ãma ꞌre ĩhöimana mono hã te te tsima ꞌre ĩwẽ mono dzéb dzarina ꞌre ĩhöimana dzaꞌra mono norĩ tsi te dza ꞌre tsitsitsi. 22 Bödö te dza ĩwa waptãrã duré daꞌahö na te dza ĩ̱ma nharĩ dzaꞌra ni: ‘Ĩ̱nhibꞌapito, ĩ̱nhibꞌapito, aiꞌãma wa tô dama ꞌre wamreme dzaꞌra. Atsitsi na, waꞌuburé norĩ ma wa tô te ꞌre tsãmra. Dama ĩꞌmanharĩ waihuꞌuꞌõ atsiptetedzém na wa tô te ꞌre ꞌmanharĩ dzaꞌra. E taha na aipoꞌre puꞌu ã bö.’ 23 Tawamhã, wa dza aima nharĩ dzaꞌra waꞌwa ãne: ‘Niwa te aiwaihuꞌu dzaꞌra waꞌaba õ di! Mo oto ĩ̱nhiti aiꞌabaꞌréi waꞌaba, aihöimana watsété dzaꞌra waꞌaba norĩ!’ 24 “Tawamhã, niꞌwa te te ĩ̱wapari wamhã, duré te ĩnharĩdzé hã te te ꞌmanharĩ wamhã, te dza ꞌre höimana aibö ĩtsimidzaꞌretse ne, tinhorõwa te te tsima ĩꞌri hã ẽtẽ tõmo nhitsiwi. 25 Tã taꞌa wamhã, ma tô tiꞌöpré duré rowaꞌu ĩtsaꞌẽne ma tô rowapõ duré ꞌri ma tô adzö. Tane nherẽ, tsimei õ di ꞌri hã, ẽtẽ tõmo nhitsiwi da te ꞌri wa. 26 Tadzahã, niꞌwa ĩ̱mreme te te wapari wamhã te te ãma uwaimrami ãna, te dza ꞌre höimana aibö ĩtsimidzaꞌretseꞌõ ne, tinhorõwa te te tsima ĩꞌri hã tsupara nhitsiwi. 27 Tã taꞌa wamhã, ma tô tiꞌöpré duré rowaꞌu ĩtsaꞌẽne ma tô rowapõ duré ꞌri ma tô adzö. Tawamhã, ꞌri ma tô waptãrã duré tsiprum haré te ꞌre nomro.” 28 Jesus mreme ꞌrãtsutu wamhã, daꞌahö uptabi ma tô tatobꞌudzu dzaꞌra ni ĩtsimirowahutudzém na hã, 29 te te rowahutu wa Ropotoꞌwa nhiptetedzém na hã, mare di Roti na rowahutuꞌwa norĩ ne.