E marĩ Höimanaꞌuꞌö te tsima wẽ.

Te tsima wẽ ꞌre wahöimana uꞌötsi dzaꞌra mono da romharé na duré robdze na Tiꞌai ãma.

Ãté ma tô atsitsadanha: ‘E ta hã watobro waihuꞌu petse di.’ Bíblia dzarina, Höimanaꞌuꞌö Nhimiꞌmadö te dza ꞌmanha ta hã. Te duré tinha Höimanaꞌuꞌö te te tsima ĩwẽ na, aihĩni da te waihuꞌu dzaꞌra da Ĩtsimiꞌmadöꞌö na hã duré ĩtsimirotsaꞌrata na waꞌãma. — Apocalipse 21:3, 4; 11:15.

Höimanaꞌuꞌö te tsima wẽ wama ꞌre rowẽ dzaꞌra mono da.

Damama ĩwẽ te te tsima ĩwẽ ne hã tiꞌra ma rowẽ da, Wapotoꞌwa te tsima wẽ wama ꞌre rowẽ uꞌötsi dzaꞌra mono da. (Lucas 11:28) Höimanaꞌuꞌö ma tô ropitsutu ‘tinhimipitsutudzém na tsi ꞌre ĩhöimana dzaꞌra mono norĩ hã, dza ꞌre ĩhöimana uꞌötsi dzaꞌra mono na, tsiꞌutõrĩ ãna.’ — 1 João 2:17.

Höimanaꞌuꞌö te tsima wẽ ꞌre wanomro mono da ĩte bödödi na.

Bíblia te tinha Wapotoꞌwa ‘te te tsima ꞌre ĩdaꞌawẽ mono na, aihĩni petse ĩtsimiroti hã da te ꞌre waihuꞌu dzaꞌra mono da, ãma ꞌre danomro wẽ mono da.’ (1 Timóteo 2:3, 4) Õ hã, ma tô daꞌapitsutu “tinhibꞌaꞌuwẽ da, [tinhitsi na, TNM]” te te dama ropé dzaꞌra da ĩtsimirotsaꞌrada hã Tiꞌai mono bö. — Atos 15:14.

Höimanaꞌuꞌö te tsima wẽ watsiré ãma ꞌre wawata dzaꞌra mono da.

Jeová ãma dawatadzé uptabi ãma hã, te dza rowẽ na tsi, datsiré ꞌre dahöimana dzaꞌra, datsitsawi uptabi tsina, datsima ꞌre datsipoꞌo dzaꞌra mono ãna. (João 13:34) E ꞌwam norĩ ã hã bötö mono na hã, te te dama ꞌre rowahutu dzaꞌra daro mono bö Höimanaꞌuꞌö ma, tsiré da te ꞌre romhuri dzaꞌra mono da. Ã hã ĩtsõrédzéb ꞌremhã ĩtsadaꞌöbödzé hã te dza ĩtsõpẽ.