Roꞌmahörö ꞌrada 5. Tiꞌa uprotsidzé hã
‘[Höimanaꞌuꞌö te dza uprotsi dzaꞌra] Tiꞌai ãma da te ꞌre ĩrowatsété dzaꞌra mono norĩ hã.’ — APOCALIPSE 11:18.
● Aibö Pirri ma tô te te ꞌre romhuri Kpor ꞌremhã Nigéria ãma. Õ hã te natsi ꞌmanha robꞌrãi waꞌu uiwede na hã. Te te romhuri waihuꞌu õ di oto Tiꞌai waꞌu tsaꞌẽtẽ na da te tsaꞌwari wa darom ãma panhoꞌõmo duré öporé ĩtsiwadzari dzahuré hã Níger ãma. Pirri te tinha: “Tahã ma tô wamnarĩ dzaꞌra panhoꞌõmo norĩ, taha wa peꞌa norĩ ma tô tidöꞌö dzaꞌra duré wahö dzépuꞌu dzaꞌra di. Ĩ̱nhimiromhuri robꞌuipradzéb dzô töibö oto.”
E MARĨ ĨROMHÖIMANADZÉ HÃ TE HÖIꞌRÉ. Romnhoré petse ꞌwa norĩ dzarina, wahu mono bö, ropru ahö na te natsi me dzaꞌra ni öporé u. Ãté tahã ropru ĩpoꞌo plástico te te ö mana wawi ĩtsaꞌwari hã 100 na wahum nhipai u tsiꞌutõrĩ wana ré. Te roꞌwaꞌrutu dzaꞌra ni Tiꞌa hã duré te uprotsi dzaꞌra ni Tiꞌai ãma abadze duré rowede norĩ hã. Romnhoré petse ꞌwa norĩ dzarina, Tiꞌa te ãma ronomro 1 wahu duré 5 aꞌamo norĩ te te apö poto da, mitsi wahum na da te ĩꞌuprotsi dzaꞌra dzé hã. Rowatsuꞌu nhihödö Austrália hawi Sydney Morning Herald na ĩtsitsi te tinha: “Daꞌubumro te te ãma udzutsi wamhã tsaꞌẽtẽ na tsina höꞌö da duré Tiꞌa te te ãma uprotsi da, tawamhã wahu 2035 na Tiꞌa ĩhöiba amo dzô te dza wawi tsô tirowaptöꞌö dzaꞌra.
E MARĨ NIꞌWAM NORĨ TE NATSI NHARĨ DZAꞌRA. Danhimidzaꞌretse dzaꞌra di. Ropire Tiꞌai ãma wa te petse waihuꞌu petse dzaꞌra di.
E TÔ TSENA TE TE ĨNHARĨ DZAꞌRA DZÉ HÃ. Daꞌahö na te tsada danhiptete dzaꞌra ni da te tsadzöri dzaꞌra da Tiꞌai ãma da te ꞌre ĩrowatsété dzaꞌra mono norĩ hã. Tane nherẽ romhöimana ꞌwaꞌrutu te tsina höꞌö.
E NIHA ATSIMIROTSAꞌRADA HÃ. E ãté te wawi tsô tirowaptöꞌö dzaꞌra Höimanaꞌuꞌö nhimipawaptobdzéb dzô Tiꞌa da te petse da.
Höimanaꞌuꞌö ma tô duré ropitsutu marĩ ĩwẽ na watobro da robꞌrãtsutu u wamhã. Ĩtsãnaꞌremhã te dza ĩꞌmadö roꞌmahörö ꞌrada ĩhöiba amo Ropotoꞌwai mreme hawi.
[Ĩwatsuꞌudzé hã]
“Ĩ̱ro aré ro ĩwẽ ne hã, tadzahã ãhã na hã ma tô tsaprĩ ni darom na ropru ĩpipa da te me da.” — ERIN TAMBER, ꞌRE ĨHÖIMANA MONO HÃ COSTA DO GOLFO ꞌREMHÃ, ESTADOS UNIDOS ÃMA, TE ROWATSUꞌU MONO ĨWATOBRODZÉM NA TIꞌAI WAꞌU DA TE TSAꞌWARI WAMHÃ GOLFO DO MÉXICO ꞌREMHÃ, 2010 ÃMA.
[Ĩtsihötö waꞌõno]
E Höimanaꞌuꞌö nhimiꞌmanharĩdzé.
Duréi hawi Bíblia te rowatsuꞌu ĩromhöimanadzém na ã bötö mono na hã, tadzahã robdzépada hã Höimanaꞌuꞌö nhimiꞌupai õ di. E niha bö, wa robdzépata dzaꞌra ni bété. Te dza ĩwaihu, romnhoré 26 na ĩhöiwarobo ãma Rowẽ tsina ꞌre aihöimana uꞌötsi mono! Jeová Watsuꞌuꞌwa norĩ te te ĩꞌmanharĩ dzaꞌra hã.
[Dapoto tedeꞌwa norĩ hã]
U.S. Coast Guard höibarĩ