E oto aihöimana dzei õ di

“Ĩ̱ma robdzeiꞌõ tsiꞌutõrĩꞌõ. Tawamhã, wa tô rotsaꞌrata ĩ̱tsiwĩrĩ da.” — Adriana, Brasil hawi.

E AIWI robdzeiꞌõ tõ aipẽꞌẽ ꞌremhã ĩtsiꞌutõrĩꞌõ. E oto aihöimana dzei õ di. Tawamhã, aima waihuꞌu petse di Adriana nhimirobdzépada. Ĩhötöꞌö uꞌö duré tãma robdzei õ di tsiꞌutõrĩꞌõ. Te rotsaꞌrata rowẽ hã ꞌre höimana mono õ di dza. Adriana ĩhöibadzeiꞌõ.

Aibö Japão hawimhã, Kaoru na ĩtsitsi. Ĩmama duré ĩna ĩhire duré ĩhödzéré norĩ, õ hã te tãma pibui dzahuré. Te tinha: “Õhõ bötö ré ĩ̱nhimiromhuri pire uptabi di. Ĩ̱tsa ĩ̱tsima wẽ õ di, duré wa nhono tsyry na. Ropire ahö uptabi wa, wa tô rotsaꞌrata ĩ̱tsiwĩrĩ da.”

Aibö Ojebode na ĩtsitsi, Nigéria hawimhã, te watsuꞌu: “Ĩ̱ma robdzeiꞌõ tsiꞌutõrĩꞌõ duré wa natsi ĩ̱wawa bötö bö. Tahawa, wa ĩ̱tsima wẽ ĩ̱tsiwĩrĩ da.” Ojebode, Kaoru duré Adriana tsiwĩrĩ dzaꞌra õ di. Ĩwẽ uptabi! Tadzahã, wahu nhidöpötsi daꞌahö uptabi na te tsiwĩrĩ dzaꞌra.

E ꞌWAM NORĨ TE DZA AIPAWAPTO

Aibö norĩ te natsi tsiwĩrĩ dzaꞌra piꞌõ nhipai u. Niꞌwam norĩ hã aibö norĩ hã tsitséb dzaꞌra di dapawaptobdzéb dzô te te waptẽrẽ dzaꞌra da. Ĩhödzéré norĩ dawedeꞌwa dzô te dza ꞌre tsõpré. (Lucas 5:31) E te ĩrotsaꞌra atsiwĩrĩ da. Maꞌãpé tsô airĩtĩ dawedeꞌwa dzô. Dawedeꞌwa norĩ ma tô pawaptob dzaꞌra ĩhöibadzeiꞌõ ré norĩ hã te ꞌre höimana dze ti apö. Dawedeꞌwa norĩ te pawaptob dzaꞌra Ojebode, Kaoru duré Adriana. Duré ãhã bötö na rowẽ na te ꞌre höimana dzaꞌra.

Dahöibadzeiꞌõ tsiꞌutõrĩ da, ãté dawedeꞌwa te dza aima robdzanha aima rowẽ da, niwamhã, ãté te dza aima titsõ dawededzé. Duré tãma wẽ uptabi di dza ĩtsitsãnawã norĩ hã duré ĩtsiwaihuꞌu norĩ hã nhimipawaptobdzé hã. Tadzahã, e ꞌwa hã atsiwaihuꞌu danhipai u ĩwẽ. Jeová Höimanaꞌuꞌö. Õ hã te dza aipawapto petse ĩmreme hawi, Bíblia hã.

E DAHÖIBADZEIꞌÕ TE DZA AIꞌUTÕ

Ãté bötö ahö na te dza aimo dawedeꞌwa u. Duré te dza ĩꞌmanha marĩ ĩté ꞌre aihöimana wẽ mono da. Aihöibadzeiꞌõ nherẽ, ãma atsimidzadze romhutu na rowẽ na te dza ꞌre aihöimana mo Ojebode ne hã. Te tinha: “Wanhimipari petse ropitsudu hã Isaías 33:24 ãma. Niꞌwa te te nharĩ õ di dza: ‘Wa hã ĩ̱hödzé di.’” Ojebode dzarina ãma rotsaꞌrata Höimanaꞌuꞌö nhimiropitsudu hã tiꞌa ĩtéb dzô. Õwa, ‘dahödzé, duré da te ꞌre tsépata dzaꞌra mono õ di dza oto.’ (Apocalipse 21:1, 4) Ãne watobro wamhã, robdzépada hã dahöibadzeiꞌõ wi hã ꞌre höimana mono õ di dza. Atsimirobdzépada te dza aiꞌutõ õne uꞌötsi. ‘Te dza ãma poꞌre haꞌö, duré aipẽꞌẽ ꞌre, ꞌre höimana mono õ di dza oto.’ — Isaías 65:17.

Bíblia te dza aipawapto

Höimanaꞌuꞌö te ꞌmadö atsimirobdzépada.

‘Ta hã ĩtsimarĩꞌõ norĩ hã te te ꞌre arẽme waihuꞌu mono õ di. Duré, ꞌre poꞌre tsimrami mono õ di, te te ꞌre ĩrobdzépata dzaꞌra mono ãma hã.’ — Salmo 22:24.

Jeová tãma waihuꞌu petse di wanhimirobdzépada hã, duré te dza wapawaptob dzaꞌra ni.

Rotsaꞌrata petse Höimanaꞌuꞌö mreme na.

“[Elias] ma tô waptẽ döꞌö da. Te tinha: ‘ . . . Jeová, ĩ̱wĩrĩ.’” — 1 Reis 19:4.

Ojebode te tinha: “Rotsaꞌrata petse Höimanaꞌuꞌö mreme na hã ma tô ĩ̱pawapto. Elias ma tô tihöiba ĩ̱tsine.”

Waihuꞌu petse datsitsanhodzém norĩ hã Bíblia ꞌremhã.

Jesus te tinha Pedro ma: ‘Simão, tane nherẽ, Ĩ̱mama wi, wa tô te ꞌre rowaptẽrẽ aima, te te ꞌre aipawaptob uꞌötsi mono da, ĩ̱ꞌãma ꞌre aimorĩ uꞌötsi da. Apö ĩtẽme aipiꞌrai waptsi, te dza atsitsãnawã norĩ hã ꞌre ĩ̱pawaptob dzaꞌra mo, höimana nhiptete na ꞌre nomro mono da. – Ãne te Pedrohu ma tinha.’ — Lucas 22:32.

Pedro tsiꞌubdatõ ma tô dawi ĩꞌudö, Jesus da te ĩꞌöri dzéb da hã oto. Taha pariptsi ma tô aiwaꞌõ tsina, pẽꞌẽdzé uptabi wa. Kaoru te tinha: “Pedro, tiwatsété nherẽ, Jeová duré Jesus dzahadu te rotsaꞌrata petse dzahuré ĩpẽꞌẽdzém na hã. Te rotsaꞌrata wamhã taha na, wa tô ĩ̱nhiptete.”

Atsimirobdzépada niwa ‘aipoꞌre puꞌu õ di dza, duré aipẽꞌẽ ꞌre, ꞌre höimana mono õ di dza.’ — Isaías 65:17