Robdzépada niꞌwa aima ĩtsawi pe döꞌö wamhã e marĩ tsada hã ꞌmanharĩ da ãhãna.

Danhimirotsaꞌrada ahö di robdzépata ꞌwapé na niꞌwa ĩtsawi pe döꞌö wamhã. Tadzahã nima norĩ wẽ õ di. E marĩ wa. Wa te ĩꞌmadöꞌödzéb dzarina, dahöiba mono bö aimawi na te dza ꞌre dahöimana dzaꞌra niꞌwa dama ĩtsawi pe dawi tsiꞌutõrĩ wamhã. Tawamhã, danhimirotsaꞌrada ãté niꞌwai ma ĩwẽ, wẽ õ di ĩhöiba amoi ma hã.

Tadzahã, roti ĩwẽ norĩ ĩré hã oto daꞌahö na te te ĩdapawaptob dzaꞌra. Rowaihuꞌu petse ꞌwa norĩ, te natsi dama waihuꞌu dzaꞌra ãhã roti norĩ dzarina wa te ĩtsõpẽtẽ waihuꞌu petse dzaꞌra ĩhöiwarobo ĩꞌrata na rowaihuꞌu ré hã, Ropotoꞌwai mreme hã.

1 ATSIMA WẼ NA ATSITSÃNAWÃ DURÉ ATSIWAIHUꞌU NORĨ NHIMIPAWAPTOBDZÉ

• 

  Niꞌwa rowaihuꞌu petse ꞌwa norĩ ma hã ãhã roti danhipai u ĩpire da te ꞌwapé da dapẽꞌẽdzé dadöꞌö uꞌöbö. Nimahã na, te atsima ĩwẽ atsiwaprotsi aihöimana da, duré ãté te atsiꞌrãi waꞌro niꞌwa te te aipawapto wamhã. Daꞌahö na ãne te tahöimana dzaꞌra ni duré.

• Aima ꞌrudzahi õ di datsiré aihöimana uꞌötsi da. Tadzahã danhiti aihöimana uꞌötsi tõ duré. Nimahã na, ãté danhimipawaptobdzéb dzô te dza aiwi tsô rowaptö. Dama watsuꞌu na aiwi tsô ĩrowaptöꞌödzé duré aiwi tsô ĩrowaptöꞌö õ dzé. Ãne wamhã, atsimidzawi na dama aihöimana.

• Aima ĩrowẽdzéb dzarina, atsimidzaꞌretse na te dza ĩpitsu e niwaptsi atsiwaprotsi te dza aihöiba duré e niwaptsi datsiré te dza aihöiba.

ROPOTOꞌWAI MREME NHIMIROTI: “Maparane mitsi nhipai u ĩwẽ . . . E marĩ wa. Niꞌwa waptãꞌã wamhã ĩhöiba amo te dza pawapto ĩtsiré hã te te wahutu da.” — Eclesiastes 4:9, 10 TNM.

2 Atsa Na Datsa Aihöiba Ma Ĩwẽ Na Duré Atsiwairo Na

• Datsa ĩwẽ aihöiba ma hã te dza aipawapto ꞌwapé da dahötöꞌödzé ĩhöimana hã dadöꞌö uꞌöbö. Tsada wamhã, atsa na robꞌrã, wetsuirã duré romnhi rowa ĩtsuru ré.

• Ö hötsi uꞌötsi duré marĩ waꞌu dahöiba ma ĩwẽ.

• Mrab õ nherẽ, tsuru na atsai uꞌötsi bötö bö. Te dza duré ĩwaptẽ dawedeꞌwa nhimiroti datsa ĩwẽ ãma.a

• Waptu na dane duré datsiwairo ĩhöiba amo norĩ te te wapu waihuꞌu petse dzaꞌra di dapẽꞌẽdzé ĩwatsédé. Atsiwairob ré tsada hã rotsaꞌrata da ĩwatobrodzém na niwamhã atsimirotsaꞌrada tsadzöri da aꞌö.

ROPOTOꞌWAI MREME NHIMIROTI: ‘Niꞌwam norĩ hã tsima ꞌre tsipetse uꞌötsi dzaꞌra mono wamhã, ꞌre tsaihuri mono ãna ꞌre tsiꞌubumroi uꞌötsi mono õ di dza. Te dza ꞌre tsaihuri uꞌötsi. Te dza duré ꞌre tsiꞌmadöꞌö petse dzaꞌra.’ — Efésios 5:29.

3 ATSÕTÕ WẼ NA

• 

  Danhono ĩpire uptabi aihĩni ma duré danhipai u ĩpire tiwi datsiꞌutõrĩ norĩ ma. E marĩ wa. Aima robdzeiꞌõ wamhã danhipai u aptöꞌö di dza.

• Ãma pibui petse hötsi uꞌötsi tõ da ödzé duré marĩ cafeína ré, ãma ĩtsimiré wedepro duré ödzeire. Ta norĩ hã te te roꞌwaꞌrutu waihuꞌu petse dzaꞌra di atsõtõdzé wi.

ROPOTOꞌWAI MREME NHIMIROTI: ‘We ĩ̱tsiré aiꞌabaꞌréi waꞌaba aꞌubuni u wawaꞌutu dzaꞌra da aꞌö.’ — Marcos 6:31.

4 ATSITSAPRĨ NA AIMA ĨROWẼ DZARINA

• 

  Dahöiba mono bö aimawi na te dza ꞌwapé dzaꞌra ni robdzeiꞌõdzé. Tawamhã te dza ĩꞌuptsibi me e niha te dza ĩꞌwapé apö atsima rowẽ da.

• Ĩꞌahö norĩ ma rowẽ di dama tsiwatsuꞌu dzaꞌra wamhã dapẽꞌẽdzédzém na. Ĩhöiba amo norĩ dama tsiwatsuꞌu dze dzaꞌra õ di ĩpẽꞌẽdzédzém na. Rowaihuꞌu petse ꞌwa norĩ ãma tsitsadze dzaꞌra õ di danhipai u ĩwẽ na. Atsima wẽ wamhã dama robdzanhamri da aipẽꞌẽdzédzém na tadzahã aihötöꞌö di taha na, ãma tsãnaꞌrata tsuru na aimreme na niꞌwa atsiwaihuꞌu ma.

• Niꞌwam norĩ ma rowẽ di tsiwaꞌõ dzaꞌra parimhã dapẽꞌẽdzédzé te te ꞌwapé dzaꞌra da. Tadzahã niꞌwam norĩ ma rowẽ di tsuru na tsi tsiwaꞌõ dzaꞌra nherẽ.

ROPOTOꞌWAI MREME NHIMIROTI: ‘Dapẽꞌẽ ꞌre marĩ dzépata pire hã datsiꞌrep tsi dama waihuꞌu petse di. Tane duré date robdze hã niꞌwai ma da te ĩpoꞌo da hã waihuꞌu õ di.’ — Provérbios 14:10.

5 WẼꞌÕ NA DAHÖIMANADZÉ ATSIWAMNARĨDZÉ

• 

  Robdzé te te tsima wapu dzaꞌra da niꞌwam norĩ te ãma tsipa dzaꞌra ödzé hötsi na, dawededzé nhomri na niwamhã darĩtsipãri na te tihöimana dzaꞌra. Tadzahã ãne na taré te dza tsiwamnarĩ dzaꞌra. Aꞌö robdzé te te tsima wapu dzaꞌra nherẽ, taré te dza tsima rowatsété dzaꞌra. Danhipai u rowẽ di aihötöꞌödzé ꞌwapéi wamhã atsiwamnarĩ ãna.

ROPOTOꞌWAI MREME NHIMIROTI: ‘Uburé marĩ ĩwatsété wi, wa dza ꞌre watsiꞌmadöꞌö petse dzaꞌra, ãma ꞌre watsihöiba watsété dzaꞌra mono tõ da, duré ꞌröwi wapẽꞌẽ ꞌre, ãma ꞌre watsiwatsété dzaꞌra mono tõ da.’ — 2 Coríntios 7:1.

6 ATSIBÖDÖ ATSIMIDZAꞌRETSE NA UPROTSI WẼ NA

• Atsina waihuꞌu nimahã bötö norĩ na dza aima ĩrobdzeiꞌõ na hã. Tane nherẽ, bödö duré atsima pitsutu marĩ ꞌmanharĩ da ĩrobdzépatadzé atsima wapu da. Daꞌahö na ma tô datsina waihuꞌu dzaꞌra ni tahã ĩwẽ uptabi na.

• Te dza atsima ĩrobdze atsiwaihuꞌu norĩ me aihöimana wamhã, atsiwaihu ĩté waihuꞌu wamhã, marĩ ĩté duré waihuꞌu wamhã niwamhã datodzém na dame aihöimana wamhã.

• Nimahã bötö pari romhöimanadzé ãté te dza ãma tsaprĩ. Ãté te dza ĩꞌmadö bödö aima ĩrobdzeiꞌõdzé hã dza ĩtsuru na duré bödö aima ĩrobdzedzé hã dza ĩtsaꞌẽtẽ na. Ãne wamhã te dza ꞌre aipẽꞌẽ dzaꞌwari mo.

ROPOTOꞌWAI MREME NHIMIROTI: “Bödö ĩpitsutu tsiro te ꞌre höimana uburé marĩ da hã; . . . bödö daꞌruꞌru da duré bödö datsihö da; bödö datsiwaꞌõ da duré bödö datsirẽne da.” — Eclesiastes 3:1, 4 TNM.

7 AIHÖIMANADZÉM NA ROWAꞌÕTÕ WẼ NA

• 

  Aima waihuꞌu petse wi, ãma tsãnaꞌrata apö marĩ norĩ na aihöimanadzém na.

• Atsiwatsutu atsõtõ wẽ da duré atsima ĩrowaꞌõtõdzéb dzarina romhuri da duré marĩ ĩhöiba amo norĩ ꞌmanharĩ da. Ãne te dza ĩꞌmadö aihöimanadzé wẽ na apö dza ĩwatobro na hã.

• Atsiꞌwaꞌrutu wamhã marĩ ĩꞌmanharĩ dze na robdzé hã te dza aiwi tinhibꞌuwa.

ROPOTOꞌWAI MREME NHIMIROTI: “E marĩ wa. Te te rotsaꞌrata uꞌötsi õ di dza bödö tihöimanadzé ãma ĩmorĩ na hã. Ropotoꞌwa ĩꞌuptabi hã te te tsiꞌwaꞌrutu wa robdze ĩpẽꞌẽ ꞌre ĩhöimana na hã.” — Eclesiastes 5:20 TNM.

8 MARĨ ĨPIRE NORĨ AIHÖIMANADZÉM NA ATÃMA NA PITSUTU

• Ĩꞌahö norĩ marĩ ĩpire na te te ĩpitsutu dzaꞌra hã niꞌwa tãma ĩtsawi petse dzaꞌra döꞌö wi, ma ãma tsiꞌruiwapari dzaꞌra.

• Tsada wamhã, tsapari aꞌö pitsutu wana ré daro ĩtéb u dza aiwatobro dzô, romhuri ĩtéb dzô dza airĩtĩ dzô niwamhã marĩ norĩ aima ĩtsawi pe ĩdöꞌö te hã dza uprotsi dzô.

ROPOTOꞌWAI MREME NHIMIROTI: ‘Niꞌwa atãma na marĩ na te te tsima ãma ꞌre ĩrowaꞌõtõ wẽ mono hã te dza marĩ tsiꞌutõrĩ ãna tsaꞌẽtẽ na tsa ꞌre tsimiꞌwara. Duré niꞌwa waptu na tsaꞌẽtẽ te te tsima ãma ꞌre ĩrowaꞌõtõ mono hã te dza marĩ dzô tiwi tsô ꞌre rowaptöꞌö.’ — Provérbios 21:5.

9 ÃMA AIPOꞌRE PUꞌU AIMA ĨTSAWI PETSE ÃMA

• 

  Ĩꞌahö norĩ ma hã wẽ di marĩ te te ꞌmanharĩ dzaꞌra wamhã tiwi ĩtsiꞌutõrĩ dzaꞌra ãma tsipoꞌre puꞌu dzaꞌra mono dzéb da hã.

• Ãté aima wẽ di dza ĩhöiwarobo na tsihötö wamhã ĩwatobrodzé duré rowatsuꞌu rotsaꞌrata dzawi na ãma aipoꞌre tsiꞌöri tõ da. Ãté duré aima wẽ di dza ubumroi wamhã dapodo duré marĩ ĩhöiba amo rotsaꞌratadzéb da.

• Ubumro na marĩ norĩ rotsaꞌrata wẽ dzéb da hã. Taha parimhã, aima wẽ wamhã, nimahã bötö na te dza ĩꞌmadöꞌö mo.

ROPOTOꞌWAI MREME NHIMIROTI: “Ãma aipoꞌre puꞌu bödö ĩꞌrata norĩ na.” — Deuteronômio 32:7 TNM.

10 ATSIMIROWAꞌÕTÕDZÉM HAWI AIWATOBRO AꞌÖ

• Tsada wamhã pitsutu nimahã bötö norĩ aiwaꞌutudzéb da.

• Tsadai õ wamhã bödö ahö na aiwaꞌutudzéb da hã, ãté tsada hã marĩ aima ĩwẽ ꞌmanharĩ da mitsi niwamhã maparane bödö höimana ré. Ãma ĩtsimiré, atsiwaihuꞌu norĩ me aiwatobro da aꞌö, öi ba aimorĩ da, ꞌriꞌahö u aiwara da niwamhã darop té robdzabu da.

• Marĩ aimawi ꞌmanharĩ wamhã, tsuru na bötö nherẽ, te dza aipawapto atsima rowẽ da.

ROPOTOꞌWAI MREME NHIMIROTI: ‘We ĩ̱tsiré aiꞌabaꞌréi waꞌaba aꞌubuni u, wawaꞌutu dzaꞌra da aꞌö.’ — Marcos 6:31.

11 DAPAWAPTO NA

• 

  Bödö pitsutu wamhã dapawaptob da duré te dza atsipawapto.

• Ãté ĩmorĩꞌrata na te dza ĩpawapto te te ĩrobdzépata norĩ aima ĩtsawi pe ĩdöꞌödzém na. Ãma ĩtsimiré, ãté atsiwaihu duré atsitsãnawã norĩ wi te tsô tiwi tirowaptöꞌö dzaꞌra niꞌwa te te ĩtsadaihuꞌu dzaꞌra dzô te te ĩrobdzépatadzé tãma tsiwatsuꞌu dzaꞌra da.

• Dapawapto wamhã duré dapẽꞌẽ nomri wamhã te dza atsima ĩrobdze apö. Ãne duré te dza atsina ĩwaihu aihöimanadzé taréi õ na hã.

ROPOTOꞌWAI MREME NHIMIROTI: ‘Marĩ hã niꞌwai ma, da te tsõmri wamhã, ãma rowẽ uptabi di, niꞌwa marĩ te te dama ĩtsõmri, da te ĩꞌöri, rowẽ nhipai ãma hã.’ — Atos 20:35.

12 PIBU NA MARĨ HÃ ĨMORĨꞌRATA UPTABI DZÔ

• Niꞌwa aima ĩtsawi pe aiwi tsiꞌutõrĩ wamhã te dza ĩwaihu danhipai u ĩmorĩꞌrata uptabi dahöimanadzém na.

• Ãhã romhöimana höimana ré hã atsina rotsaꞌrata ꞌre aihöimana mono dzém na.

• Marĩ wamhã ãma tsaprĩ na aima danhipai u ĩmorĩꞌrata uptabi na.

ROPOTOꞌWAI MREME NHIMIROTI: “Danhorõwa dadöꞌö uꞌöbö datsiwaꞌõdzéb u dane ĩwẽ danhorõwa datoi réb u danei nhipai u. E marĩ wa. Dadö aihĩni daꞌrãtsutudzé duré ĩhöibarém norĩ taha na te dza ꞌröwi rotsaꞌrata dzaꞌra.” — Eclesiastes 7:2 TNM.

Tsena na, uprotsi waihuꞌu õ di dza uburé ĩrobdzépatadzé marĩ ꞌmanharĩ na. Tadzahã ĩꞌahö norĩ te te ĩrobdzépata dzaꞌra niꞌwa tãma ĩtsawi petse dzaꞌra döꞌödzém na ma tô tsadawa dzamarĩ dzaꞌra roti norĩ ĩwatsuꞌu dzaꞌra norĩ ne ãhã ĩtsõrédzém na duré te ropitsutu dzaꞌra ãhã roti norĩ tô tsena dapẽꞌẽ nomridzém na. Tô tsena ãhã romnhihötö ꞌremhã höimana õ di uburé roti ĩꞌmanharĩdzéb da hã atsima wapu da robdzépada niꞌwa aima ĩtsawi pe döꞌödzéb uꞌöbö. Tadzahã nima norĩ tsadawa dzamarĩ wamhã ãté te dza atsima ĩrowẽ.