E ma hawimhã robꞌuipradzé Jeová Watsuꞌuꞌwa norĩ te te romhuri dzaꞌra da.

Jeová watsuꞌuꞌwa norĩ tsiꞌuihö na te natsi upari dzaꞌra wanhimiromhuri hã danhibdzaridzéb ãma hã.a Watsiꞌrãꞌõtõdzém ãma wedehöꞌre danhibdzari te hã, te tihöimana dzaꞌra, tsada hã duré danhibdzari da te tsõmri da hã wate site na, página Danhibdzari na. Ãhã página na, tsada hã da te pitsutu da danhibdzari te te ꞌmanharĩ da wanhimiromhuri dzô Tiꞌai mono bö niwamhã datsiꞌrãꞌõtõ dzô niwamhã dzahuré dzô.

Jeová Watsuꞌuꞌwa norĩ dízimo te te pawaꞌöbö dzaꞌra õ di duré aꞌamo tsidöpötsi ĩpawaꞌö ꞌwaꞌõno te te tsõmri dzaꞌra da te te tãma tinhimiꞌru dzaꞌra õ di. (2 Coríntios 9:7) Watsiꞌrãꞌõtõdzéb ãma hã, robꞌruipradzé ubumro wa te dawi öri dzaꞌra õ di duré waꞌöbö õ di dadzébré da hã duré waꞌmadöꞌöꞌwa norĩ hã te te dawi ꞌre waptẽrẽ dzaꞌra mono õ di tinhimiromhuri waꞌöbö da hã, ãma ĩtsimiré ö dawabdzuri, dahöibahöi u hã duré datsina damro. Wanhimiromhuri ma hã wa te upari dzaꞌra da, marĩ norĩ hã wa te dama ĩwaꞌöbö dzaꞌra õ di, ãma ĩtsimiré daꞌudza, bingo, datsa, duré ꞌre watsihutu dzaꞌra mono õ di danhorõwa u hã wate dawi ĩwaptẽrẽ dzaꞌra da hã danhibdzaridzé hã. Danhibdzaridzé datsima ĩwẽ dzarina niꞌwa te te tsõmri wamhã, niꞌwa norĩ te te waihuꞌu dzaꞌra õ di dza e ꞌwa hã ma tô titsõ danhibdzaridzé hã. (Mateus 6:2-4) Wate site norĩ dzaꞌra na duré wate ĩtsõrédzém norĩ dzaꞌra na marĩ norĩ hã dama te te ĩwaꞌöbö da höimana dzaꞌra õ di.

Aꞌamo tsidöpötsi watsiꞌrãꞌõtõdzéb ꞌremhã rowaꞌöbödzé hã rowatsuꞌu ꞌré hã aihĩni norĩ ma te te waihuꞌu dzaꞌra da e niha uburé hã danhibdzari norĩ ma tiꞌö, duré e ma norĩ hã marĩ norĩ hã ma uipra dzaꞌra ni robꞌuipradzém na. Datsiꞌrãꞌõtõdzé mono bö te natsi ꞌmadöꞌö uꞌötsi dzaꞌra ni te te natsi ĩwaꞌöbö dzaꞌra norĩ hã tô tsena te te waihuꞌu dzaꞌra da e niha danhibdzari norĩ hã te dza uprotsi dzaꞌra ni ĩbö dzarina. (2 Coríntios 8:20-22)

Danhibdzari ꞌmanharĩdzé:

• Wedehöꞌre danhibdzari te hã: Watsiꞌrãꞌõtõdzéb ãma hã duré watsiꞌrãꞌõtõ dzaꞌẽtẽ norĩ ãma hã wedehöꞌre danhibdzaridzéb da hã te tihöimana dzaꞌra ĩwa tsẽrẽ da robꞌuipradzé niwamhã cheque atsima ĩwẽ dzarina.

• Danhibdzaridzé internet uꞌöbö: Tiꞌai waꞌõtõ norĩ ahö na, te dza ĩꞌmanha danhibdzaridzé atsima ĩwẽ wamhã cartão de crédito uꞌöbö, cartão de débito uꞌöbö niwamhã transferência bancária uꞌöbö, niwamhã ꞌmanharĩdzé amo na ãhã página wate site ãma hã “Atsibdzari ꞌmanharĩ Jeová Watsuꞌuꞌwa norĩ ma”.b Niꞌwam norĩ te tsina pitsutu dzaꞌra ‘robꞌuipradzé hã ꞌre ĩpoꞌo uꞌösi dzaꞌra mo’ te te tsõmri dzaꞌra da aꞌamo tsidopotsi internet uꞌöbö. — 1 Coríntios 16:2.

  

• Danhibdzari darowaꞌõtõdzéb te hã: Tahã danhibdzari norĩ hã wẽ di dza tsô airĩtĩ da hã danhimiroti waihuꞌu petse ꞌwa atsibdzari ꞌmanharĩ wana ré. Taha na te dza ĩtsõpẽ danhimiroti norĩ ate Tiꞌai waꞌõtõ ꞌremhã aipibuma. Niꞌwam norĩ ma tãma rowẽ dzaꞌra di te te waihuꞌu dzaꞌra da danhibdzari norĩ ãma tsada hã te ĩꞌmanharĩ dzaꞌra na hã ꞌre höimana dzaꞌra mono ré niwamhã dadö tsô watobro da wamhã, testamento newa. Mahörö na niwamhã tsihötö na Betel u hã atsima ĩwẽ wamhã waihuꞌu da duré e niha te dza ĩꞌmanha danhibdzari norĩ hã ta norĩ na hã:

  • conta uꞌöbö banco na

  • seguro duré plano previdência privada te hã

  • ꞌri norĩ hã

  • empresa waꞌõno

  • testamento uꞌöbö

Waihuꞌu da duré e niha te dza ĩꞌmanha danhibdzari norĩ amo na hã airo ãma hã, ꞌmadöꞌö ãhã página wate site na hã “Atsibdzari ꞌmanharĩ Jeová Watsuꞌuꞌwa norĩ ma”.