E niꞌwa Jeová Watsuꞌuꞌwa aima waihuꞌu petse di. Ãté nimahã atsiwaihu, atsiré romhuriꞌwa niwamhã romnhoréꞌwa. Ãté ma tô wama Bíblia na ĩrobdzanha. Tadzahã, e ꞌwam norĩ hã tô wa norĩ hã. E marĩ wa, wanhimidzadze na wa natsi dama rowatsuꞌu dzaꞌra ni.

Wa norĩ hã datsine hã. Waꞌubumroi ꞌremhã, te ꞌre dahöimana dzaꞌra dapoto mono bö. Niꞌwam norĩ ĩtsibro petse dzaꞌra, ĩhöiba amo norĩ ĩtsimarĩꞌõ dzaꞌra. Niꞌwam norĩ duré danhimidzadzedzé aimawi hawi ma wairé, niwamhã Höimanaꞌuꞌö na ꞌre tsimidzadze dzaꞌra mono õ di aré. Tane nherẽ, wa norĩ hã aihĩni Bíblia nhimirowahutu na wa tô romnhoré petse dzaꞌra ni. (Atos 17:11) Wa ãma tsadze dzaꞌra ni ĩtsimirowahutu na, taha waptsi, wa pitsutu dzaꞌra ni Jeová Watsuꞌuꞌwa da.

Wa ãma watsima rowẽ dzaꞌra ni Bíblia na. Aihĩni datsine, ropire duré wawatsédé te wama ꞌre höimana dzaꞌra. Tane nherẽ, wa waihuꞌu dzaꞌra ni Bíblia nhimirowahutu dzarina bötö böre ꞌre wahöimana dzaꞌra mono wamhã, wama ꞌre ĩrowẽ dzaꞌra mono na. (Lucas 11:28) Taha wa, marĩ ĩwẽ norĩ Bíblia na wa te ĩwaihuꞌu dzaꞌra hã, wa dama rowatsuꞌu dzaꞌra ni.

Wa ꞌre wahöimana dzaꞌra Höimanaꞌuꞌö nhimiroti dzarina. Höimanaꞌuꞌö nhimiroti hã dama rowẽdzé, datsiwadzébdzé duré dahöimanadzé hiri wẽ dzé, duré ĩwẽ na datsima dahöimanadzé. Duré ta hã danhimirotsaꞌrata wẽ dzé, dapawaptobdzé romhuriꞌwai wẽ da duré família na romharé na dahöimanadzé duré dahöimana prédu wẽ dzé. Wama waihuꞌu petse dzaꞌra di ‘Höimanaꞌuꞌö dawi ꞌre ĩtsitsawi mono õ na dapoto mono nherẽ’, taha wa, waꞌubumroi ꞌremhã, watsitsawi petse dzaꞌra di datsitsãnawã na, wanhiptiꞌa hã duré wapoto mono aimawi nherẽ duré wanhimidzadzedzé hã aiwaptsi. Wahöiba mono bö wawapu dzaꞌra nherẽ, waꞌubumro dzaꞌra hã ĩpire uptabi. — Atos 4:13; 10:34, 35.

• E marĩ na Jeová Watsuꞌuꞌwa norĩ hã aiwa datsine.

• E ꞌwa nhimiroti dzarina Jeová Watsuꞌuꞌwa norĩ te ꞌre höimana dzaꞌra. E niha ta hã ĩpawaptob dzaꞌra dzé.

Daꞌahö na te rotsaꞌrata dzaꞌra ni Jeová Watsuꞌuꞌwa norĩ hã nimahã danhimidzadzedzé ĩtém nhitsi na hã. Tane nherẽ, 2.700 nhipai u wahu wana ré, Höimanaꞌuꞌö ĩꞌuptabi ma romhuriꞌwa norĩ hã ma tsitsi dzaꞌra ni “ĩwatsuꞌuꞌwa norĩ na”. (Isaías 43:10-12) Wahub u 1931 na, wanhitsi dzaꞌra aré Bíblia na Romnhoréꞌwa norĩ na. E niha bö, wa ãma tsaprĩ dzaꞌra ni Jeová Watsuꞌuꞌwa norĩ na.

Wanhitsi hã Höimanaꞌuꞌöꞌuptabi höiꞌrédzé. Bíblia nhihötö ꞌrata norĩ na, Höimanaꞌuꞌö nhitsi hã, Jeová, te tihöiba nimahã 7 mil na. Bíblia ĩꞌahö ꞌremhã, ĩtsitsi ma ãma tsaprĩ ni ĩwamridzém na ꞌRe ĩhöimana uꞌötsi mono niwamhã Ropotoꞌwa. Tadzahã, Höimanaꞌuꞌö ĩꞌuptabi hã ma tô watsuꞌu Moisésihi ma tinhitsi na Jeová na. Te tãma tsina tinha Jeová na ‘tinhitsi na hã, õne uꞌö.’ (Êxodo 3:15, TNM) Ãne, õ hã te tsina ãma rowatsuꞌu aiwam õ na höimanaꞌuꞌö ĩꞌuptabiꞌõ norĩ ne. Wama rowẽ uptabi dzaꞌra di Höimanaꞌuꞌö nhitsi ĩpire hã wa te dama ꞌre watsuꞌu dzaꞌra mono wa.

Wanhitsi hã wanhimiromhuri waihuꞌudzé. Duréihã, daꞌahö na ma tô tinhimidzadze na Jeová na dama rowatsuꞌu dzaꞌra ni. Abel, ĩmorĩꞌrada hã duré õhõ parimhã, Noé, Abraão, Sara, Moisés duré Davi. (Hebreus 11:4–12:1) Niꞌwa Rowairébéꞌwa nhoꞌa te te ĩrowatsuꞌu ne ĩtsimiꞌupaiꞌõ pibuma, tô tsena hã Jeová ãma hã, wanhibꞌru na wa natsi dama rowatsuꞌu dzaꞌra ni.

Jesus wa tsidzutsi dzaꞌra ni. Jesus ‘ma tô Höimanaꞌuꞌö tsadawa watsuꞌu wẽ’. (Apocalipse 3:14) Jesus tsiꞌuihö na ma tô te te ꞌre rowaptẽrẽ Höimanaꞌuꞌö nhitsi hã uburé da te ꞌre waihuꞌu dzaꞌra mono da, duré Höimanaꞌuꞌö na ‘roti tô tsena uptabi hã te te dama ꞌre watsuꞌu’. (Mateus 6:9; João 18:37) Taha wa, Jesus dzadawa dzamarĩ uptabi ꞌwa norĩ hã te te dama ꞌre watsuꞌu dzaꞌra Jeová nhitsi hã da te ꞌre waihuꞌu dzaꞌra mono da. Ta hã Jeová Watsuꞌuꞌwa norĩ nhimiromhuri hã.

• E marĩ wa Bíblia na Romnhoréꞌwa norĩ hã, tinhitsi na ma ãma tsaprĩ dzaꞌra Jeová Watsuꞌuꞌwa norĩ na.

• E niwa ma tô ãma tsãnaꞌrata dzaꞌra Jeová Watsuꞌuꞌwa norĩ hã Tiꞌai ãma.

• E ꞌwa Jeová Watsuꞌuꞌwa hã danhipai u ĩpire hã.

Dapotowaꞌwai Mreme ma tô watsuꞌu, Jesus döꞌö parimhã, rowahutu uptabiꞌõꞌwa norĩ dza ĩtsihöiꞌré dzaꞌra na Jesus dzadawa dzamarĩꞌwa ĩmorĩꞌrata norĩ ꞌremhã. Ta norĩ hã, te aré ꞌwaꞌrutu dzaꞌra Bíblia nhimirowahutu uptabi hã. (Atos 20:29, 30) Nimahã bötö parimhã, ãne tsi ma tô watobro. Ma wadzari dzaꞌra Jesus nhimirowahudu hã, danhimidzadzedzé ĩꞌuptabiꞌõ nhimirowahutu na, duré ãne ma tsãnaꞌrata Cristo dzadawa dzamarĩ uptabiꞌõꞌwai ubumro. (2 Timóteo 4:3, 4) E niha bété wama waihuꞌu petse dzaꞌra di wanhimirowaihu hã Bíblia na ĩbö na ãhãna hã.

Bödö hã Jeová tô tsena hã te te höiꞌré da ma tô wi. Jeová ma tô duréihã watsuꞌu, robꞌrãtsutu u hã romhutu wamhã, rowaihu ĩꞌuptabi hã dza ahö na hã. (Daniel 12:4) Wahum na 1870 na, daꞌumro ubumro tô tsena dzô ꞌre ĩdanhopré dzaꞌra mono norĩ, ma tô uptsibi me dzaꞌra danhimidzadzedzém norĩ nhimirowahudu hã ahö na Bíblia dzarina ĩhöimana dzaꞌra õ na. Tawamhã, ma ãma tsãnaꞌrata dzaꞌra tinhimiromnhoré na hã Bíblia nhimirowahutu uptabi dzô, duré Jeová ma pawaptob dzaꞌra.

Ĩtsiri wẽ norĩ hã tsimiꞌẽ na Bíblia na ma tô romnhoré petse dzaꞌra. Bíblia na Romnhoréꞌwa norĩ hã (Jeová Watsuꞌuꞌwa norĩ nhitsi duréihã), ma tô te te ꞌre romnhoré dzaꞌra Bíblia na ĩwaꞌõtõ tsidöpötsi. Dzahadu, ãne wa natsi ãma romnhoré dzaꞌra ni. Marĩ Bíblia na te te ꞌre waihuꞌu dzaꞌra mono õ wamhã , ãma ĩrowatsuꞌudzéb dzô te ꞌre rĩtĩ dzaꞌra Bíblia waꞌõtõ höiba amo ãma. Te te tsadaihuꞌu petse dzaꞌra parimhã, te dza tsihötö dzaꞌra. Bíblia ãma tsi tsô rĩtĩ dzaꞌra wa, ma tô apö uptsibi me dzaꞌra tô tsena hã Höimanaꞌuꞌö nhitsi na hã duré Ĩtsimiꞌmadöꞌö na hã, daꞌãma duré Tiꞌai ãma ĩtsimirotsaꞌrada hã, adöꞌö norĩ dzô ĩwatobrodzé duré rowahudu hã dahöiwaꞌutudzém na hã. Ĩtsimiromnhoré dzaꞌra uꞌöbö, ma tô tsani dzaꞌra ni dahöimanadzé duré rowahudu ĩꞌuptabiꞌõ norĩ wi. — João 8:31, 32.

Wahum na 1879 na, Bíblia na Romnhoréꞌwa norĩ ma waihuꞌu petse dzaꞌra di oto bödö hã tô tsena Bíblia na te te dama ropé dzaꞌra da ĩwaptãꞌã na hã. Taha wa, tô õhõ wahum na hã, ma ãma tsãnaꞌrata dzaꞌra ĩtsõrédzé hã A Sentinela Anunciando o Reino de Jeová te te ĩꞌmanharĩ dzaꞌra na, dzahadu wa te ꞌre ĩꞌmanharĩ dzaꞌra mono hã ã hã bötö mono na hã. Awaꞌawi mono na hã, wa te dama ꞌre ropé dzaꞌra oto tô tsena hã Bíblia na 240 na Tiꞌai waꞌõtõ ãma hã duré nimahã 750 damreme na hã. Tô tsena, ‘rowaihu ĩꞌuptabi ahö uptabi di’!

• Jesus döꞌö parimhã, e marĩ Bíblia nhimirowahutu uptabi dzô ma watobro.

• E niha, wa apö uptsibi me dzaꞌra ni tô tsena hã Höimanaꞌuꞌö Mreme na.

Wahubꞌahö na, Jeová Watsuꞌuꞌwa norĩ hã Bíblia na ãma ĩtsaprĩdzé aimawi norĩ na ma tô romhuri dzaꞌra duré ma tô dama ropé dzaꞌra. Tadzahã, dzahadu ãma ĩtsaprĩdzé ĩtéb dzô te aré rowaptö, Höimanaꞌuꞌö nhimiroti wapu na ‘da te ꞌre waihuꞌu dzaꞌra mono da’, Höimanaꞌuꞌö aihĩni ma te te tsima ĩwẽdzéb dzarina. (1 Timóteo 2:3, 4) Tawamhã, 1950 na, wa ãma tsãnaꞌrata dzaꞌra ni dama ropé na wate Bíblia poꞌo norĩ, Tradução do Novo Mundo, ĩtséréꞌa mreme na. Ta hã ma tô ãma tsaprĩ ni ĩbö na 130 nhipai u damreme na, duré danhipai u wapu di da te ꞌre waihuꞌu dzaꞌra mono da.

Bíblia ĩwapu da te waihuꞌu da tsô rowaptöꞌö wa. Bödö ãma morĩ tsidöpötsi, damreme poꞌo mono bö ma tô te te ãma tsaprĩ dzaꞌra. Taha wa, Bíblia ĩꞌahö norĩ ꞌremhã ĩré hã damreme ĩꞌrata norĩ dama ĩwaihuꞌuꞌõ hã. Taha nhipai u, Bíblia nhihötö ꞌrata höiba amo norĩ ma tô tsõpẽtẽ dzaꞌra ni, duré ta hã ma wapawaptob dzaꞌra wa te waihuꞌu wẽ dzaꞌra da hebraico, aramaico duré grego mreme hã Bíblia na.

Ãma ĩtsaprĩdzé ĩbö dzô Höimanaꞌuꞌö watsuꞌu dzarina tsô rowaptöꞌö wa. Bíblia na ãma ĩtsaprĩꞌwa norĩ hã te te ãma ĩtsaprĩ dzaꞌra tõ da tsi tinhimirotsaꞌrata dzarina, tadzahã, Bíblia na ĩtsihötö dzarina tsi. Tane nherẽ, Höimanaꞌuꞌö nhitsi hã, Jeová, ma tô wadzere ni Bíblia ĩꞌahöꞌuptabi hawi.

Bíblia Ĩꞌmanharĩꞌwa hã te te ĩhöiꞌré da tsô rowaptöꞌö wa. (2 Pedro 1:20, 21) Tradução do Novo Mundo na, Jeová nhitsi hã ma tô apö tsẽrẽ ni nimahã 7 mil na, Bíblia nhihödö danhipai u ĩꞌrata norĩ dzarina. (ꞌMadöꞌö dapodo piꞌreba) Wahubꞌahö na romnhoré petse parimhã, wate Bíblia, tsõré dze ti Höimanaꞌuꞌö nhimirotsaꞌrada hã wapu na te te watsuꞌu wa. Tradução do Novo Mundo baba nherẽ aimreme na, Jeová Mreme hã natsi tsõré uꞌötsi, bötö tsidöpötsi. — 1 Timóteo 4:13.

• E marĩ wa Bíblia na ãma ĩtsaprĩdzé ĩtéb dzô te wawi tsô rowaptö, duréihã.

• E marĩ te dza ĩꞌmanha bötö tsidöpötsi atsima wẽ wamhã Höimanaꞌuꞌö nhimirotsaꞌrada hã waihuꞌu da.