Waꞌremhã, baba di dapawaꞌö rowahutuꞌwa norĩ ma hã. Cristão ĩmorĩꞌrata norĩ ne, aibö rowaihuꞌu petse ꞌwa norĩ te da te ꞌre pitsutu dzaꞌra ‘te te ꞌre ꞌmadöꞌö dzaꞌra mono da Höimanaꞌuꞌö nhibꞌaꞌuwẽ norĩ hã.’ (Atos 20:28) Ta norĩ hã, aibö ĩtsiptete dzaꞌra hã danhimidzadze na te te ꞌre dadzaprõni dzaꞌra duré te te ꞌre daꞌmadöꞌö dzaꞌra datsiꞌrãꞌõtõ ꞌremhã, robdze na, ‘waꞌa dzaꞌra ãna, mare di robꞌuipradzéb dzô tadzahã te te tsima ĩwẽ dzaꞌra dzéb dzarina tsi.’ (1 Pedro 5:1-3) E niha te natsi wapawaptob dzaꞌra bété.

Te waꞌmadöꞌö dzaꞌra marĩ watsété wi. Daꞌmadöꞌwa norĩ te natsi wama roti dzaꞌra duré te natsi waꞌmadöꞌö dzaꞌra wanhimidzadze wamnarĩdzé wi. Tãma waihuꞌu petse dzaꞌra di Höimanaꞌuꞌö te te ĩpitsutu dzaꞌra na ã hã romhuri da hã. Taha wa, te te wama ꞌre robꞌmanharĩ watsété dzaꞌra mono õ di datsiꞌrãꞌõtõ ꞌremhã, taha upana, te natsi wapawaptob dzaꞌra wama rowẽ dzaꞌra da. (2 Coríntios 1:24) Poneꞌẽ ꞌmadöꞌöꞌwa, tinhimizama mono bö tinhimiꞌmadöꞌö ꞌremhã te te ꞌre ĩwaihuꞌu petse mono ne, daꞌmadöꞌöꞌwa norĩ te tsada ꞌre tsiptete dzaꞌra dahöiba mono bö te te dawaihuꞌu dzaꞌra da datsiꞌrãꞌõtõdzéb ꞌremhã. — João 21:15.

Te wama waihuꞌu dzaꞌra Höimanaꞌuꞌö nhimiroti dzarina dahöimanadzéb da hã. Romhuri mono bö, daꞌmadöꞌöꞌwa norĩ te natsi wama rowahutu dzaꞌra datsiꞌrãꞌõtõdzéb ꞌremhã wanhimidzadze hã tsiptete da. (Atos 15:32) Te natsi watsiré romhuri dzaꞌra dama rowahutu na, te te wapawaptob dzaꞌra ré wa te rowahutu wẽ dzaꞌra da hã.

Te wanhiptete dzaꞌra wahöiba mono bö. Daꞌmadöꞌöꞌwa norĩ te natsi wadzabu dzaꞌra wanhorõwa u niwamhã Datsiꞌrãꞌõtõdzéb u hã te te wapawaptob dzaꞌra da wanhimidzadze na duré te te wanhiptete dzaꞌra da Bíblia na. — Tiago 5:14, 15.

Daꞌmadöꞌöꞌwa ĩꞌahö norĩ te te ꞌre romhuri dzaꞌra mono nherẽ tite família te te upari dzaꞌra da, te duré natsi dapawaptob dzaꞌra datsiꞌrãꞌõtõdzéb ꞌremhã. Taha wa, wa dza wadzé petse dzaꞌra ni. — 1 Tessalonicenses 5:12, 13.

• E niha daꞌmadöꞌöꞌwa nhimiromhuri datsiꞌrãꞌõtõdzéb ꞌremhã.

• E niha daꞌmadöꞌöꞌwa norĩ te natsi wapawaptob dzaꞌra.

Bíblia dzarina, te tihöimana dzahuré maparane aibö ubumro te te natsi ĩromhuri dzahuré Datsiꞌrãꞌõtõdzém ãma hã: ‘daꞌmadöꞌöꞌwa norĩ hã duré dapawaptoꞌwa norĩ hã.’ (Filipenses 1:1) Õne uꞌö, datsiꞌrãꞌõtõdzé mono bö, ĩré hã daꞌmadöꞌöꞌwa duré dapawaptoꞌwa. E niha dapawaptoꞌwa norĩ te natsi wapawaptob dzaꞌra.

Te natsi ãma aime dzaꞌra daꞌmadöꞌöꞌwa norĩ ãma. Dapawaptoꞌwa norĩ hã tsimidzadze nhiptete dzaꞌra di duré wama umnhatsi dzaꞌra di. Tsimiꞌẽ na te te ꞌre romhuri nhiptete dzaꞌra mono ré Datsiꞌrãꞌõtõdzém ãma hã, daꞌmadöꞌöꞌwa norĩ hã te dza romhuri dzaꞌra rowahutu na duré daꞌmadöꞌö na.

Ĩtsimiromhuri dzaꞌra hã dapawaptobdzé. Niꞌwam norĩ te dza pitsutu dzaꞌra ni te te pawaptob dzaꞌra da datsiꞌrãꞌõtõ mono u hã ĩtsihutu norĩ. Niꞌwam norĩ te natsi romhuri dzaꞌra romhörödzém na, Bíblia na romnhorédzé ãma ĩropédzém na Datsiꞌrãꞌõtõdzéb ꞌremhã, rowaꞌöbödzém na datsiꞌrãꞌõtõdzép te hã duré ro dama rowahutudzé pitsutu na. Te duré romhuri dzaꞌra Datsiꞌrãꞌõtõdzé ꞌmadöꞌö na duré ĩpetse na. Nimahã na, daꞌmadöꞌöꞌwa norĩ te dza tiwi waptẽrẽ dzaꞌra, ĩhi norĩ te te pawaptob dzaꞌra da. Te dza ꞌmanharĩ dzaꞌra robdze na, tsiwaꞌru romhuri da te tãma ĩpitsutu dzaꞌra hã. Taha wa, aihĩni te natsi wadzéb dzaꞌra. — 1 Timóteo 3:13.

Ĩꞌmadöꞌö dze dzaꞌra datsiꞌrãꞌõtõdzéb ꞌremhã. Dapawaptoꞌwa norĩ te dza pitsutu dzaꞌra ni ĩtsimidzadzei petse dzaꞌra dzarina duré ĩtsimiromhuri petse dzaꞌra dzarina. Datsiꞌrãꞌõtõ ꞌremhã, rowahutu na tsihöiꞌré dzaꞌra wamhã, wanhimidzadze na te dza wanhiptete dzaꞌra. Wa natsi tsidzutsi dzaꞌra ni dama rowahutu nhimiꞌẽ na. Ta norĩ nhimiromhuri uꞌöbö, Datsiꞌrãꞌõtõdzém ãma hã rowẽ na wa watsiré ꞌre wahöimana dzaꞌra. (Efésios 4:16) Nimahã na, niꞌwa dapawaptoꞌwa niwamhã te dza pitsutu ni daꞌmadöꞌöꞌwa da hã.

• E niha dapawaptoꞌwa norĩ höimanadzéb uptabi.

• E niha te natsi pawaptob dzaꞌra Datsiꞌrãꞌõtõdzém ãma hã rowẽ da.

Bíblia te tinha Barnabé duré apóstolo Paulo te te ꞌre ĩromhuri dzahuré mono na datsiꞌrãꞌõtõ ꞌmadöꞌöꞌwa na, duréihã, Jesus döꞌö parimhã. Ma tô ꞌre hötöꞌö uptabi dzahuré titsitsãnawã norĩ ãma danhimidzadze na. Paulo te tsina tinha te te tsima ĩwẽ na apö morĩ da titsitsãnawã norĩ u te te adzabu da, te te waihuꞌu da rowẽ na ꞌre höimana dzaꞌra mono dzô. Te natsi neb uꞌötsi romhö na te te tsiptete dzaꞌra da. (Atos 15:36) Ĩtsine, datsiꞌrãꞌõtõ ꞌmadöꞌöꞌwa norĩ te natsi romhuri dzaꞌra.

Te wanhiptete dzaꞌra. Datsiꞌrãꞌõtõ ꞌmadöꞌöꞌwa te dza natsi tsabu ãté 20 na datsiꞌrãꞌõno maparane na mitsi wahub ꞌremhã duré tame te dza nhamra mitsi romhuri na. Wa ãma watsima rowẽ dzaꞌra ni õ hõ duré ĩmro nhimirowaihuꞌu na, ĩmro ĩré wamhã. Te dza tsima wẽ dzahuré te te waihuꞌu dzahuré da ĩhöibaté duré ĩhöibaprédum norĩ datsiꞌrãꞌõtõ ãma, duré te dza watsiré romhuri dzahuré dama romnhoré na Bíblia na. Datsiꞌrãꞌõtõ ꞌmadöꞌöꞌwa hã te dza duré dadzabu daꞌmadöꞌöꞌwa norĩ tsiré, te te dapawaptob dzaꞌra da. Taha nhipai u, te dza wama rowatsuꞌu dzaꞌra datsiꞌrãꞌõtõ ãma duré datsiꞌrãꞌõtõ dzaꞌẽtẽ ãma te te wanhiptete dzaꞌra da. — Atos 15:35.

Aihĩni daꞌãma hötöꞌö dzaꞌra di. Datsiꞌrãꞌõtõ ꞌmadöꞌöꞌwa hã hötöꞌö di titsitsãnawã norĩ nhimidzadzei ãma. Te dza tsiꞌrãꞌõtõ daꞌmadöꞌöꞌwa duré dapawaptoꞌwa norĩ tsiré, te te waihuꞌu da datsiꞌrãꞌõno hã ꞌre tsiptete mono dzô duré te te tãma roti dzaꞌra da ĩtsimiromhuri dzaꞌra hã danhipai u wẽ na te te ꞌre ꞌmanharĩ dzaꞌra mono da. Te natsi pawaptob dzaꞌra ĩtsãnaꞌrataꞌwa norĩ tinhimiromhuri te te natsi petse dzaꞌra da. Duré tãma wẽ dzaꞌra di te te waihuꞌu dzaꞌra wamhã ĩtém norĩ Datsiꞌrãꞌõtõdzém ãma, duré ĩtsimidzadze na ꞌre ĩtsiptete dzaꞌra mono na. Ta norĩ datsitsãnawã tinhimidzawi na te natsi romhuri dzaꞌra ‘watsiré norĩ na hã’. (2 Coríntios 8:23) Wa te ĩtsidzutsi dzaꞌra da tsi ĩtsimidzadze duré ĩtsimidzawi dzaꞌra dzé Höimanaꞌuꞌö ãma. — Hebreus 13:7.

• E niha bö datsiꞌrãꞌõtõ ꞌmadöꞌöꞌwa te natsi tsabu datsiꞌrãꞌõtõ norĩ.

• E niha õ hã te dza aipawapto.

Ropipa dzaꞌẽne titsitsãnawã norĩ dzô tsô watobro dzaꞌra wamhã, Jeová Watsuꞌuꞌwa norĩ te dza oto pawaptob dzaꞌra awaꞌawi. Ta hã te watsuꞌu ꞌre ĩwatsitsawi uptabi dzaꞌra mono na. (João 13:34; 1 João 3:17, 18) E niha wa natsi pawaptob dzaꞌra ni.

Robꞌuipradzém na. Judeia ãma mrab dzaꞌẽne höimana wamhã Jesus döꞌö parimhã, cristão norĩ Antioquia hawimhã titsitsãnawã norĩ ma, ma tô tãma me dzaꞌra robꞌuipradzé. (Atos 11:27-30) Ãne duré, watsitsãnawã norĩ dzô ropipa dzaꞌẽne tsô watobro dzaꞌra wamhã, robꞌuipradzé wa dza me dzaꞌra ni watsiꞌrãꞌõtõ hawi marĩ na te te pawaptob dzaꞌra da. — 2 Coríntios 8:13-15.

Wanhiptetedzém na. Daꞌmadöꞌöꞌwa norĩ ꞌre ĩhöimana dzaꞌra mono hã ro ropipa dzaꞌẽne hã ĩwatobrodzém ãma te dza tsô tirĩtĩ dzaꞌra watsitsãnawã norĩ dzô te te waihuꞌu dzaꞌra da rowẽ na tsiꞌubumro dzô. Datsitsãnawã Dapawaptoꞌwai Ubumro te dza pitsutu ni te te rowairébé da ãma ĩropédzé hã datsa na, ö na, daꞌudza na, dawede na duré ro ãma ꞌre ĩnomro mono dzéb da hã aꞌö. Jeová Watsuꞌuꞌwa höiba amo norĩ te te tsima ĩwẽ dzaꞌra dzarina te dza tsitsaꞌre, te te romhuri dzaꞌra da dapawaptom na duré Datsiꞌrãꞌõtõdzé niwamhã ꞌri ĩtsiprub dzaꞌra na. ꞌRe watsitsawi uptabi dzaꞌra mono wa duré watsiré wa te romhuri dzaꞌra wa, wa te dapawapto waihuꞌu petse dzaꞌra di waptu na. Watsitsãnawã norĩ wa te ꞌre pawaptob dzaꞌra mono nherẽ, wa duré ĩhöiba amo norĩ pawaptob dzaꞌra ni ĩtsimidzadze dzaꞌra dzé hã aimawi nherẽ. — Gálatas 6:10.

Dapawapto dapẽꞌẽ na duré danhimidzadze na. Da te ꞌre ĩrobdzépata dzaꞌra mono norĩ wi te tsô tiwi tirowaptöꞌö dzaꞌra rowẽ dzô dapẽꞌẽ na. Ãne wa, Jeová, te te ꞌre ĩwaꞌapawaptob uꞌötsi, wapẽ hã ĩꞌre wama ꞌre tsimiꞌwara uꞌötsi mono da, te dza tsiptete dzaꞌra. (2 Coríntios 1:3, 4) Robdze na, wa watsuꞌu dzaꞌra ni Bíblia nhimiropitsudu hã ĩrobdzeiꞌõ norĩ ma duré Höimanaꞌuꞌö Nhimiꞌmadö hã dza te te ĩꞌuprotsi na tô, romhutu na, uburé ropire hã duré robdzépada hã. — Apocalipse 21:4.

• E marĩ wa Jeová Watsuꞌuꞌwa norĩ te te dapawapto waihuꞌu petse dzaꞌra di awaꞌawi ropipa dzaꞌẽne watobro wamhã.

• E niha wa natsi pawaptob dzaꞌra ni dapẽꞌẽ na duré danhimidzadze na ĩtsitsõꞌreptu dzaꞌra norĩ hã.

Tsyry na döꞌö wana ré, Jesus ma tô robdzanha maparane tsiꞌuiwa na tinhimiꞌubumro norĩ ma: Pedro, Tiago, João duré André. Ma tãma watsuꞌu dzaꞌra marĩ dza ĩwatobro da hã robꞌrãtsutu u romhutu wamhã. (Mateus 24:3; Marcos 13:3, 4) Te duré tãma nharĩ dzaꞌra marĩ na te te ãma rotsaꞌrata petse dzaꞌra da: “E ꞌwa hã dama romhuriꞌwa hã ĩꞌumha duré ĩtsimidzaꞌre ĩtsibꞌapito te te ĩpitsudu hã uburé tãma romhuriꞌwa norĩ ãma, datsa te te tãma ꞌre anhomri dzaꞌra mono da bödö ĩbö ãma.” (Mateus 24:45, TNM) Jesus te te watsuꞌu õ di datsa na dahöiba ma hã. Õ hã ma tô ãma tsimiréꞌé datsa hã Höimanaꞌuꞌö na rowaihuꞌu na. Ãne, ‘ĩtsibꞌapito dzaꞌra’ na, Jesus ma tô ropitsutu tinhimiꞌubumro norĩ ma, dza te te ĩpitsutu na niꞌwam norĩ ĩtsadawa dzamarĩꞌwa norĩ ma rowaihu hã Höimanaꞌuꞌö na te te tãma ꞌre ropé dzaꞌra mono da robꞌrãtsutu u romhutu wamhã. E ꞌwa hã ta hã romhuriꞌwa.

Ta hã Jesus dzadawa dzamarĩꞌwa umro ubumro ĩpitsutu norĩ höiwa u da hã. Ta hã “romhuriꞌwa hã” Rowairébéꞌwai Ubumro hã Jeová Watsuꞌuꞌwa norĩ ꞌremhã. Ta norĩ te te ꞌre romhuri dzaꞌẽtẽ dzaꞌra rowaihu Jeová na te te ropé dzaꞌra da tãma romhuriꞌwa ĩhöiba amo norĩ ma. Te wawi tsô tirowaptöꞌö dzaꞌra ta hã romhuriꞌwa dzô ‘watsadzéb da’ bödö ĩbö ãma. — Lucas 12:42.

Te ꞌmadö Höimanaꞌuꞌö nhibꞌaꞌuwẽ norĩ. Jesus ma pitsutu romhuriꞌwa hã te te ꞌmadöꞌö da Jeová nhibꞌaꞌuwẽ norĩ nhimiromhuri Tiꞌai ãma: te natsi ꞌmadö ĩtsimarĩ mono, romhuri hã dama rowahutu na duré te natsi wama rowahutu dzaꞌra watsiꞌrãꞌõtõ norĩ hawi. Wawi tsô ĩrowaptöꞌödzé te te wama ꞌre tsõmri dzaꞌra mono da bödö ĩbö ãma, “romhuriꞌwa hã ĩꞌumnha duré ĩtsimidzaꞌre” te te ropé rowaihu hã Jeová na wanhimiromnhorédzé mono hawi duré rowahutu hawi ꞌre watsiꞌrãꞌõtõ dzaꞌra mono wamhã.

Romhuriꞌwa hã ĩꞌumnha tãma tsitari õ wa Bíblia nhimirowahutu na duré romhuri na dama rowahutu na rowatsuꞌuwẽ na hã. Duré õ hã ĩtsimidzaꞌre höimana nhimidzaꞌretse na te te ꞌre romhuri mono wa Jesus te na hã Tiꞌai ãma. (Atos 10:42) Jeová te te ꞌre tsibꞌrata ã hã romhuri ãma, taha wa Jeová Watsuꞌuꞌwa norĩ dzaꞌratadzé te te tsina höimo mono wanhimidzadze nhiptetedzéb dzama. — Atos 9:31.

• E ꞌwa Jesus ma pitsutu tidzadawa dzamarĩꞌwa norĩ ma rowaihu hã Jeová na, te te tãma ꞌre ropé dzaꞌra mono da.

• E niha romhuriꞌwa hã ĩꞌumnha duré ĩtsimidzaꞌre.

Jesus döꞌö parimhã, daꞌumro ubumro ‘daꞌmadöꞌöꞌwa norĩ duré Jesus dzadawa watsuꞌuꞌwa norĩ ré hã Jerusalém ãma’ ma tô te te ꞌre romhuri dzaꞌra rowairébéꞌwai ubumro na te te ꞌre rowairébé dzaꞌra mono da aihĩni cristão norĩ tsiꞌrãꞌõtõ nhitsi na. (Atos 15:2) Te ãma ꞌre tsitsadze dzaꞌra tinhimirowairébé na te te ꞌre tsadawa dzamarĩ dzaꞌra mono tsina Dapotoꞌwai Mreme hã duré Ĩpẽꞌẽdzani hã. (Atos 15:25) Taha dzarina, Rowairébéꞌwai Ubumro te natsi romhuri dzaꞌra ã hã bötö na hã.

Te te ꞌre romhuri dzaꞌra Höimanaꞌuꞌö te te tsima ĩwẽdzéb da hã. Watsitsãnawã norĩ hã, te te ꞌre ĩromhuri dzaꞌra mono norĩ hã Rowairébéꞌwai Ubumroi ãma, te ꞌre tsimipari dzaꞌra dahöimana uꞌötsi dzéb dzô höiwa ãma. Ta norĩ hã, te te ꞌre tsawi petse dzaꞌra Dapotoꞌwai Mreme hã duré ĩtsimirowaihuꞌu dzaꞌra ahö di wanhimiromhuri na duré wanhimidzadze na. Te natsi tsiꞌrãꞌõtõ dzaꞌra romhuri tsidöpötsi te te waihuꞌu dzaꞌra da e niha watsitsãnawã norĩ pawaptobdzé daro mono bö. Duréi ne hã, Jesus döꞌö parimhã, te natsi wama roti dzaꞌra romnhihötö ꞌmanharĩ hawim na, datsiꞌrãꞌõtõ ꞌmadöꞌöꞌwa norĩ hawi duré ĩhöiba amo norĩ hawi. Taha wa, wanhimirotsaꞌrata dzaꞌra aiwaptsi duré romharé na wa ꞌre wahöimana dzaꞌra. (Atos 16:4, 5) Rowairébéꞌwai Ubumro hã te te ꞌre madöꞌö dzaꞌra rowahudu hã wama ĩhöimana dzaꞌra hã, te ꞌre tsiptete dzaꞌra romhuri hã dama rowahutu na, duré watsitsãnawã norĩ pitsudu te te ꞌre ĩromhuri dzaꞌra mono da dama ĩpire na datsiꞌrãꞌõtõdzém ãma hã.

Te te ꞌre tsadawa dzamarĩ dzaꞌra Höimanaꞌuꞌö pẽꞌẽdzani hã. Rowairébéꞌwai Ubumro hã te tsô ꞌre rĩtĩ dzaꞌra Wanhipaiꞌwai uptabi nhimiroti dzô, Jeová, duré Wanhibꞌapito nhimiroti dzô, Jesus. (1 Coríntios 11:3; Efésios 5:23) Te te tsina ꞌre rotsaꞌrata dzaꞌra mono õ di Höimanaꞌuꞌö nhibꞌaꞌuwẽ norĩ nhibꞌapito newa. Aihĩni cristão ĩpitsutu dzaꞌra ne höiwa u da hã, ‘Poneꞌẽrẽbö nhirã dzarina tsi te ꞌre nomro’. (Apocalipse 14:4) Tãma wẽ uptabi dzaꞌra di wa te ãma ꞌre rowaptẽrẽ dzaꞌra mono da.

• E ꞌwam norĩ ma tô te te ꞌre romhuri dzaꞌra rowairébéꞌwai ubumroi ãma hã Jesus döꞌö parimhã.

• E niha Rowairébéꞌwai Ubumro hã te tsô ꞌre rĩtĩ dzaꞌra Höimanaꞌuꞌö nhimiroti dzô ã hã bötö mono na hã.

Hebraico mreme na, Betel te watsuꞌu ‘Höimanaꞌuꞌö Nhorõwa’. (Gênesis 28:17, 19-21) Ãne Jeová Watsuꞌuꞌwa norĩ nhimiromhuridzém nhitsi hã da te ꞌre ĩꞌmadöꞌö dzaꞌra mono dzé duré da te ꞌre ĩꞌupari dzaꞌra mono dzé romhuri hã dama rowahutu na Tiꞌai mono bö. Rowairébéꞌwai Ubumro hã te ꞌre höimana dzaꞌra Betel ãma hã Estados Unidos ãma. Õ hawimhã, te te ꞌre ꞌmadöꞌö dzaꞌra Betel höiba amo norĩ nhimiromhuri daro mono bö. Tame ꞌre ĩhöimana dzaꞌra mono norĩ hã família ne: tsiré te ꞌre tsõrõwa dzaꞌra duré te te ꞌre romhuri dzaꞌra, tsiré te ꞌre tsaihuri duré Bíblia na te te ꞌre romnhoré dzaꞌra. Taha wa, waihuꞌu petse dzaꞌra di “família Betel na hã”. — Hebreus 13:1.

Da te ꞌre ĩromhuri dzaꞌẽtẽ dzaꞌra mono dzé. Watsitsãnawã norĩ Betel ãma romhuriꞌwa norĩ Tiꞌai mono bö te te ꞌre romhuri dzaꞌra tsimiꞌẽ na bötö wahuré na Höimanaꞌuꞌö te te tsima ĩwẽdzéb dzarina, duré te natsi upari dzaꞌra tsiwaꞌru romhuri Ĩtsimiꞌmadöꞌö dzarina. (Mateus 6:33) Aihĩni ma, te da te tãma tsõmri dzaꞌra danomrodzé, datsa duré ĩpawaptobdzé ĩtsyry robꞌuipradzém na ĩtsimarĩ dzaꞌra norĩ da hã. Ĩhöiba mono bö te natsi romhu marĩ aimawi na: dama rowahutu dzaꞌra wẽ, Betel ãma romhuri dzaꞌra wẽ, danhipidzé, datsadzé, robꞌuptsõ duré marĩ ĩhöiba amo na.

Ro romhuriꞌahö ré hã dama rowatsuꞌudzéb da hã Höimanaꞌuꞌö Nhimiꞌmadöꞌö na hã. Betel ãma romhuri hã Bíblia nhimirowahutu uptabi ropédzé dama hã Tiꞌai mono bö. Ã hã ĩtsõrédzé hã te ãma tsimiréꞌé ta hã. Ta hã ma tô tsihötö ni Rowairébéꞌwai Ubumro nhimiroꞌmadöꞌö dzarina, taha parimhã ma tô me ni internet na ãma ĩtsaprĩꞌwa norĩ ma Tiꞌai mono bö, duré ma tô wadzere ni romnhihötö wadzeredzé ĩtsaꞌẽtẽ norĩ na Betel ĩꞌahö norĩ ãma duré ma tô dama ãma ropé ni 110 mil nhipai u datsiꞌrãꞌõtõ u. Uburé Betel ãma ꞌre ĩhöimana dzaꞌra mono norĩ nhimiromhuri hã te dza ãma aime romhuri danhipai u ĩpire ãma: dama rowahudu hã rowatsuꞌu wẽ na hã. — Marcos 13:10.

• E ꞌwam norĩ te natsi romhuri dzaꞌra Betel ãma. E marĩ te da te tãma tsõmri dzaꞌra.

• E ma hã romhuri ĩpire uptabi Betel te te ĩꞌupari hã.

Betel ãma romhuriꞌwa norĩ te te ꞌre ꞌupari dzaꞌra tinhimiromhuri dama rowatsuꞌu hã Bíblia na mitsi Tiꞌai waꞌõtõ ꞌremhã niwamhã duré. Ĩtsimiromhuri dzaꞌra ahö di: ãma ĩtsaprĩdzé, ĩtsõrédzé wadzere, ĩhöiwarobo tébrédzé, romnhorédzé mono ubumrodzé, damreme duré ĩropoto tédé duré marĩ ĩhöiba amo norĩ ꞌmadöꞌö na.

Danhibꞌapito ubumro te te ꞌre ꞌmadöꞌö dzaꞌra romhuri hã. Aibö ubumro Rowairébéꞌwai Ubumro nhimipitsudu te te ꞌre ꞌmadöꞌö dzaꞌra romhuri hã Betel ãma. Ã hã aibö ubumroi nhitsi hã Betel Nhibꞌapito Ubumro na, tsiꞌubdatõ niwamhã duré daꞌmadöꞌöꞌwa ré. Ta norĩ hã te te ꞌre watsuꞌu dzaꞌra Rowairébéꞌwai Ubumroi ma hã romhuri petsedzém na duré ropire hã ꞌre ĩhöimana dzaꞌra mono na Tiꞌai waꞌõno te te ꞌre ĩꞌmadöꞌö dzaꞌra mono dzéb ꞌremhã. Ĩtsimiwatsuꞌu dzaꞌra dzarina, Rowairébéꞌwai Ubumro te dza pitsutu dzaꞌra, dza wa te ĩromnhoré dzaꞌra dzé hã wanhimiromnhorédzé mono na duré watsiꞌrãꞌõtõ norĩ na. Rowairébéꞌwai Ubumro hã te natsi duré tsatõrĩ dzaꞌra nimahã daꞌmadöꞌöꞌwa norĩ Betel norĩ u, te te roti dzaꞌra da Betel Nhibꞌapito Ubumroi ma ĩtsimiromhuri dzaꞌra na. (Atos 11:22, 23) Ãne wamhã, te dza tihöiba datsiꞌrãꞌõno ĩpire uptabi daꞌmadöꞌöꞌwa da te ĩtsatõrĩ nhimirowatsuꞌu ré hã watsitsãnawã norĩ õhõ tiꞌai waꞌõtõ ãma hã tsiptete dzaꞌra da danhimidzadze na.

Datsiꞌrãꞌõtõ norĩ upari. Betel nhibꞌapito norĩ dzadawa para, datsiꞌrãꞌõtõ norĩ ĩté te dza ãma tsãnaꞌrata dzaꞌra. Õ hawimhã, te te duré ꞌre ꞌmadöꞌö dzaꞌra ĩtsãnaꞌrataꞌwa, missionário duré datsiꞌrãꞌõtõ ꞌmadöꞌöꞌwa norĩ nhimiromhuri hã dadzaꞌrui mono bö. Te natsi robꞌdzaꞌra wẽ dzaꞌra datsiꞌrãꞌõtõ dzaꞌẽtẽ norĩ hã, Datsiꞌrãꞌõtõdzém norĩ ꞌmanharĩ duré romnhorédzém na dama ãma ropédzé datsiꞌrãꞌõtõ mono bö. Uburé romhuri Betel ãma dama rowahutu uparidzé Bíblia ĩpibui petse dzarina tsi watobro da. — 1 Coríntios 14:32, 33, 40.

• E niha Betel Nhibꞌapito Ubumroi mono te te ꞌre pawaptob dzaꞌra Rowairébéꞌwai Ubumro hã.

• E marĩ te te ꞌre ꞌmadöꞌö dzaꞌra Betel ãma.

Wa te dama watsuꞌu wẽ dzaꞌra da rowatsuꞌuwẽ hã ‘dapoto mono bö damreme tsipoꞌo mono bö’, wa natsi ꞌmanharĩ dzaꞌra ni romnhorédzé nimahã 750 damreme na. (Apocalipse 14:6) E niha ã hã romhuri dzaꞌẽne watobro waihuꞌu petse di. Jeová Watsuꞌuꞌwa norĩ ꞌremhã, Robꞌuiꞌéréꞌwa duré ãma ĩtsaprĩꞌwa norĩ ahö na, tsimiꞌẽ na te te ꞌre romhuri dzaꞌra mono wa.

Romnhihödö ĩmorĩꞌrada te dza ꞌmanharĩ ni ĩtséréꞌa mreme na. Rowairébéꞌwai Ubumro hã te te ꞌre ꞌmadöꞌö dzaꞌra Romnhihötö na Romhuridzé hã ĩhöimana hã Betel ꞌremhã, Estados Unidos ãma. Ã hã romhuridzé robꞌuiꞌéréꞌwa norĩ nhimiromhuri uptsãtãdzé, ꞌre ĩhöimana dzaꞌra mono hã Betel danhipai u ĩpire ãma niwamhã Betel höiba amo norĩ ãma. Robꞌuiꞌéréꞌwa norĩ dapoto mono bö ꞌre höimana dzaꞌra mono wa, wanhimiromnhorédzé mono hã te natsi watsuꞌu dzaꞌra dahöimanadzé mono na. Taha wa, dama tsõré dze ti.

Romnhihödö te dza me ni ãma ĩtsaprĩꞌwa norĩ ma. Romnhihödö hã da te tsihötö parimhã duré da te wẽtsãmri parimhã, te dza me ni ãma ĩtsaprĩꞌwai ubumro norĩ ma daro mono bö. Tawamhã, ta norĩ hã te dza ãma tsaprĩ dzaꞌra. Te tsada ꞌre tsiptete dzaꞌra te te pitsutu dzaꞌra da “damreme ĩbö norĩ tô tsena dzarina”, te te ãma tsaprĩ dzaꞌra da romnhihötö waihuꞌudzé ĩtséréꞌa mreme hawi damreme ĩhöiba amoi u. — Eclesiastes 12:10, TNM.

Computador norĩ romhuri wapudzé. Computador tsiꞌuihö na te te ꞌmanharĩ waihuꞌu õ di robꞌuiꞌéréꞌwa duré ãma ĩtsaprĩꞌwa norĩ nhimiromhuri. Tane nherẽ, ãma ĩtsaprĩꞌwa norĩ te tinhimiromhuri ꞌmanharĩ dzaꞌra danhipai u waptu na romnhitsiꞌubumroi hawi duré marĩ ĩhöiba amo norĩ hawi computador na. Jeová Watsuꞌuꞌwa norĩ te ãma waptob dzaꞌra romnhihödö hã dapoto mono tsiré romhuridzém hawi computador da. Ta hã romhuridzé hã Jeová Watsuꞌuꞌwa norĩ nhimiꞌmanharĩ nhitsi hã MEPS, duré te romhu damreme mono bö.

E marĩ wa, wa tsada ꞌre wanhiptete dzaꞌra wa te ãma tsaprĩ dzaꞌra da damreme mono bö. Jeová te te tsima wẽ wa ‘aihĩni petse ĩtsimiroti hã da te ꞌre waihuꞌu dzaꞌra mono da, ĩtsimiroti hã tô tsena uptabi wa.’ — 1 Timóteo 2:3, 4.

• E niha wanhimiromnhorédzé mono te da te ꞌre tsihötö dzaꞌra.

• E marĩ wa, wa natsi ãma tsaprĩ dzaꞌra ni damreme mono bö.

Wahu mono bö, wa norĩ hã Jeová Watsuꞌuꞌwa norĩ wa natsi ꞌmanharĩ dzaꞌra ni duré wa natsi dama ropé dzaꞌra ni Bíblia ahö uptabi na duré romnhorédzé höiba amo norĩ waꞌöbö ãna. Wa natsi ꞌmanharĩ dzaꞌra ni Datsiꞌrãꞌõtõdzé duré Betel norĩ. Wa upari dzaꞌra ni robꞌuipradzém na betelita duré missionário ĩꞌahö uptabi norĩ, duré wa dapawaptob dzaꞌra ni ropipa dzaꞌẽne watobro wamhã. Ãté te ĩrotsaꞌra: ‘E ma hawimhã robꞌuipradzé hã uburé taha da.’

Robꞌuipradzé dawi ĩwaptẽrẽꞌõ wanhimiromhuri da hã. Wanhimiromhuri wi robꞌuipradzéꞌahö dzô tsô rowaptöꞌö nherẽ, wa te dawi waptẽrẽ dzaꞌra õ di. Wate ĩtsõrédzé A Sentinela nimahã na te te ĩwatsuꞌu dzarina, 100 nhipai u wahu wana ré, wa umnhatsi dzaꞌra ni Jeová Waꞌupariꞌwa na duré, ‘niwa wa te dawi waptẽrẽ dzaꞌra õ di dza da te waꞌöbö dzaꞌra da ã hã romhuri’. Ãne te we ꞌre höimana mono! — Mateus 10:8.

Danhibdzaridzé datsima ĩwẽ dzarina wanhimiromhuri uparidzé. Daꞌahö na te wapawaptob dzaꞌra robꞌuipradzém na wanhimiromhuri hã tãma wẽ dzaꞌra wa. Jeová Watsuꞌuꞌwa norĩ tsiꞌuihö na te natsi uprotsi dzaꞌra tite robꞌuipradzé hã, tite bödö, tinhiptetedzé hã duré marĩ ĩhöiba amo norĩ ĩte dzaꞌra te te pawaptob dzaꞌra da Jeová te te tsima ĩwẽdzé watobro da Tiꞌai mono bö. (Atos 20:35) Watsiꞌrãꞌõtõdzém ãma duré watsiꞌrãꞌõtõ dzaꞌẽtẽ norĩ ãma wede dzadadzöri te tihöimana dzaꞌra ĩwa da te tsẽrẽ dzaꞌra da robꞌuipradzé da te datsima wẽ wamhã. Tsada hã duré danhibdzari tsõmri da hã wate site na, jw.org. Daꞌahö na tsimarĩꞌõ dzaꞌra nherẽ, te ꞌre tsibdzari dzaꞌra robꞌuipradzém na hã wanhimiromhuri da hã. Te tsidzutsi dzaꞌra piꞌõi mrotõ Jesus te te ĩꞌudzei petse hã tsimarĩ õ nherẽ tinhoprum na te te tsõmri wa robꞌuipradzé ĩtsapotore maparane na. (Lucas 21:1-4) Ãne dahöiba mono bö te dza tinhopru robdze na, tsiꞌuihö na te te tsima wẽ wamhã. — 2 Coríntios 8: 12; 9:7.

Tô tsena, Jeová nhimipawaptom na, daꞌahö na te dza tinhoprum na te te ꞌre upari dzaꞌra romhuri Bíblia na Höimanaꞌuꞌö te te tsima ĩwẽdzé hã watobro da. — 2 Coríntios 8:6.

• E marĩ wa wanhimiromhuri danhimidzadzedzé höiba amo norĩ nhimiromhuri nei õ di.

• E marĩ ĩꞌmanharĩdzé hã robꞌuipradzém na da te ĩtsõmri dzaꞌra hã.

Watsiꞌrãꞌõtõdzém ãma, Höimanaꞌuꞌö Nhimiꞌmadö hã rowatsuꞌudzé hã Bíblia na danhipai u ĩpire, Jesus nhimirowatsuꞌu ne hã. — Lucas 8:1, TNM.

Höimanaꞌuꞌö ãma dawata uptabi dzé. Õme, romhuri dzaꞌra wẽ dzé hã romhuri dama rowahutu na Bíblia na. (Mateus 24:14) Watsiꞌrãꞌõtõdzé mono hã tsiwaptsi õ nherẽ, ĩꞌmanharĩ wẽ dzaꞌra, ꞌre ĩdatsiꞌrãꞌõtõ dzaꞌra mono dzé hã, mitsi Jeová Watsuꞌuꞌwai Ubumro niwamhã duré. Wahub ꞌrãtsutu mono u, wa tô te te ꞌre ꞌmanharĩ dzaꞌra Datsiꞌrãꞌõtõdzé ahö na (nimahã ĩmrotõ, bötö mono na) datsiꞌrãꞌõtõ norĩ hã te te tsina höimo dzaꞌra mono wa. E niha ta hã wama waihuꞌu petse dzaꞌra di. — Mateus 19:26.

Robꞌuipradzé te tihöiba Datsiꞌrãꞌõtõdzém norĩ ꞌmanharĩdzéb da. Ta hã robꞌuipradzé te dza me ni Betel u. Ãne datsiꞌrãꞌõtõ mono hã ĩré hã dza robꞌuipradzé datsiꞌrãꞌõtõdzé te te ꞌmanharĩ dzaꞌra da niwamhã te te petse dzaꞌra da.

Romhuriꞌwa norĩ pawaꞌöbö ãna daro mono hawimhã. Daro mono bö, Datsiꞌrãꞌõtõdzé ꞌManharĩꞌwai Ubumro Norĩ te tihöimana dzaꞌra. Ta norĩ hã te natsi tsitsaꞌre tirom hawimhã datsiꞌrãꞌõtõ mono bö romhö uptabi nherẽ, te te wapawaptob dzaꞌra da Datsiꞌrãꞌõtõdzé ꞌmanharĩ na. Tiꞌai waꞌõtõ höiba amo norĩ ãma, nimahã Jeová Watsuꞌuꞌwa norĩ hã rowaihuꞌu ré hã datsiꞌrãꞌõtõdzé ꞌmanharĩ na te dza pitsutu dzaꞌra ni te te ꞌre robꞌmadöꞌö dzaꞌra mono da romhuri na daro pitsutu ãma hã. Datsiꞌrãꞌõtõdzé ꞌmanharĩ mono ré, romhuriꞌwa ahö na daro aimawi hawi te tihöimana dzaꞌra, tane nherẽ, datsitsãnawã norĩ ꞌriꞌahö Datsiꞌrãꞌõtõdzé da te ꞌre ĩꞌmanharĩ mono dzém hawi te dza ꞌmanharĩ dzaꞌra romhuri danhipai u ĩtsaꞌẽne, uburé pawaꞌöbö ãna. Jeová Pẽꞌẽdzani na duré ĩtsiptete uptabi dzém na, te te ãma uwaimrami waihuꞌu petse dzaꞌra di ta hã. — 1 Coríntios 3:9; Colossenses 3:23.

• E ma hã rowatsuꞌudzé danhipai u ĩpire Watsiꞌrãꞌõtõdzém ãma hã.

• E marĩ wa Datsiꞌrãꞌõtõdzém norĩ wa te ꞌmanharĩ waihuꞌu petse dzaꞌra di Tiꞌai mono bö.

Datsiꞌrãꞌõtõdzé mono bö Jeová Watsuꞌuꞌwa norĩ te hã ĩré Höimanaꞌuꞌö nhitsi ĩpe hã ĩtsihödö. Ãne, wa tsada ꞌre wanhiptete dzaꞌra Datsiꞌrãꞌõtõdzé hã wẽ da hã duré ĩrã da hã. Wama rowẽ dzaꞌra di ta hã wa te ꞌre uptsõ dzaꞌra mono wamhã, ãne Höimanaꞌuꞌö ãma ꞌre wawata dzaꞌra mono wa. Aihĩni te dza pawaptob dzaꞌra.

Pawapto na ĩꞌuptsõ na datsiꞌrãꞌõtõ parimhã. Datsiꞌrãꞌõtõ mono parimhã, datsitsãnawã norĩ hã te dza robdze na uptsõ dzaꞌra waptu na Datsiꞌrãꞌõtõdzé hã. Mitsi na romhuri mono bö, wa dza uptsõ petse dzaꞌra ni. Daꞌmadöꞌöꞌwa niwamhã dapawaptoꞌwa te dza wadaꞌu romhuri hã da te ĩꞌmanharĩdzéb da romnhihötö na hã, ãma ĩtsimiré: rowamro, robꞌuptsõ, robdzapru wadzere, danhamradzé uptsãna, datõrĩdzé uptsõ, ꞌridzadadzöri duré datsiꞌmadöꞌödzé uptsõ, ropru wabdzuri, Datsiꞌrãꞌõtõdzé uptsõ ꞌrowimhã duré robꞌre mono ꞌmadö. Mitsi na wahu mono bö, bötö pitsudu ĩré hã robꞌuptsõ dzaꞌẽne wa te ꞌmanharĩ dzaꞌra da. Aiꞌuté norĩ te te pawaptob dzaꞌra wamhã robꞌuptsõ na te dza waihuꞌu dzaꞌra te te ĩwadzéb dzaꞌra da tsi Jeová ãma ꞌre ĩwawata dzaꞌra mono dzém na hã. — Lucas 19:46.

Pawapto na Datsiꞌrãꞌõtõdzé petsedzém na. Wahup tsidöpötsi Datsiꞌrãꞌõtõdzé te dza pibui petse ni ĩꞌremhã duré ꞌrowimhã. Ĩpibudzé parimhã, marĩ ĩtsipru norĩ Datsiꞌrãꞌõtõdzém ãma hã te dza petse dzaꞌra ni robꞌuipradzé taré da te ãma uprotsi tõ da. (Colossenses 3:23) Datsiꞌrãꞌõtõdzé ĩwẽ duré ĩrã Höimanaꞌuꞌö ãma wawata dzaꞌra dzéb da hã. Ĩꞌuptsõ na wa te ꞌre pawaptob dzaꞌra mono wamhã, wa dza höiꞌré dzaꞌra ni wanhimidzawidzé hã Jeová ãma duré ãma ꞌre ĩwawata dzaꞌra mono dzém ãma hã. (Salmo 122:1) Ãne wamhã, danhimirotsaꞌrata wẽ di dza Datsiꞌrãꞌõtõdzém na. — 2 Coríntios 6:3.

• E marĩ wa, wa te ĩꞌmadöꞌö wẽ dzaꞌra da tsi Watsiꞌrãꞌõtõdzé hã.

• E marĩ, wa dza ꞌmanharĩ dzaꞌra ni Watsiꞌrãꞌõtõdzé hã ĩrã da hã.

E te atsima ĩwẽ atsimirowaihu hã Bíblia na tsaꞌẽtẽ da. E romnhoré dze ti aré duré nimahã romnhihödö, dahöiba mono hã, ro duré marĩ ĩhöiba amo norĩ na Bíblia ꞌremhã. E ma tô atsitsadanha Dapotoꞌwai Mreme hã te te aipawapto waihuꞌu petse dzô marĩ aihötöꞌödzém na. Ãne wamhã, romnhoré na ĩhöiwarobo ubumrodzém ãma Datsiꞌrãꞌõtõdzép te.

Romnhorédzé ahö di. Ãté ate baba di uburé Jeová Watsuꞌuꞌwa nhimiromnhorédzé aimreme na. Tane nherẽ, ĩhöiwarobo ubumrodzém ãma Datsiꞌrãꞌõtõdzép te ĩré hã romnhorédzé ĩtém norĩ ahö na. Ãté ĩré hã Bíblia na ãma ĩtsaprĩdzé ahö na, romnhitsiꞌubumro ĩwẽ duré ĩhöiwarobo ĩhöiba amo norĩ. Atsima wẽ wamhã, te dza ãma ĩromnhoré ĩwana duré datsiꞌrãꞌõtõ parimhã. Ãté, ĩwa te tihöiba nimahã computador Watchtower Library ré hã (Ĩhöiwarobo Ubumrodzé Torre de Vigia te hã). Ta hã romhuridzéb ꞌremhã computador da hã ĩré hã wanhimiromnhorédzé mono hã ahö na, duré ãma pitsutu waihuꞌu petse di tsô airĩtĩ da ãma ĩrowatsuꞌudzéb dzô nimahã damreme da, romnhihötö da Bíblia na niwamhã marĩ ĩhöiba amo da.

Datsiꞌrãꞌõtõ na ĩtsihöiꞌré dzaꞌra norĩ pawaptobdzé. Atsihöiꞌré mono wamhã oto Datsiꞌrãꞌõtõdzéb ꞌremhã, ĩhöiwarobo ubumrodzé hã te dza aipawapto atsitsaꞌra wẽ da. Daꞌmadöꞌöꞌwa hã te te ĩꞌmadöꞌö hã Datsiꞌrãꞌõno hã Wahöimanadzé duré Wanhimiromhuri Cristo na te natsi ꞌmadö ĩhöiwarobo ubumrodzé. Te dza tiwi ĩwaptẽ niwamhã aima rowahutuꞌwai wi te te aima waihuꞌu da ãma tsô airĩtĩ da. Tadzahã öri õ di dza atsõrõwa u nimahã ĩhöiwarobo ĩꞌubumrodzém hawi. Duré te dza ãma ĩpibui pe romnhoré wamhã duré romnhihötö õ di dza ĩhöiwarobo norĩ na wamnarĩ dzaꞌra tõ da.

Bíblia te tinha ꞌre warĩtĩ dzaꞌra mono da ‘rowaihu ĩwẽ uptabi dzô Höimanaꞌuꞌö hawi.’ (Colossenses 1:9) Ĩhöiwarobo ubumrodzé Datsiꞌrãꞌõtõdzép te hã te dza aipawapto taha dzô tsô airĩtĩ da.

• E ma norĩ romnhorédzé ĩré hã ĩhöiwarobo ubumrodzéb ꞌremhã ate Datsiꞌrãꞌõtõdzém ãma hã.

• E ꞌwa te dza aima waihuꞌu romnhoré da ĩhöiwarobo ubumrodzém ãma.

Jesus te tinha tinhimiꞌubumro norĩ ma: ‘Te dza tsõꞌawi dama ꞌre aihöimana dzaꞌra waꞌaba mo, robꞌuiwẽdzé hã tsõꞌawi te te dama ꞌre ĩrobꞌuiwẽ dzaꞌra mono ne. Tawamhã, dama ꞌre ĩꞌmanharĩ wẽ dzaꞌra waꞌaba mono dzé hã da te ꞌre ĩꞌmadöꞌö dzaꞌra mono dzéb dzarina, Aimama dzaꞌra waꞌaba ãma te dza ꞌre dawata dzaꞌra mono.’ (Mateus 5:16) Taha da, wa natsi romhuri dzaꞌra ni marĩ danhipai u ĩtém norĩ na, ãma ĩtsimiré, internet. Wate site jw.org na rowatsuꞌu uptabi norĩ ĩré hã wanhimidzadze na duré wanhimiromhuri na. E marĩ te dza ãma ĩtsõpẽ.

Ĩtsadaꞌöbödzé Bíblia na dadzadanharĩ norĩ da hã. Te dza ĩtsõpẽ ĩtsadaꞌöbödzé nimahã dadzadanharĩ danhipai u ĩpire norĩ da hã. Ãma ĩtsimiré, ĩtsõrédzém norĩ hã E Robdzépada hã Te Dza Aiꞌutõ Nimahã Bötö Na Hã duré E Adöꞌö Norĩ Hã Apö Te Dza ꞌRe Höimana Dzaꞌra ĩré hã ĩtsõré da hã 600 nhipai u damreme na. Te dza duré ĩtsõré Tradução do Novo Mundo 130 nhipai u damreme na. Duré romnhorédzé ahö di Bíblia waihuꞌu petse da, ãma ĩtsimiré ĩtsõrédzé hã Romahörö Wẽ Höimanaꞌuꞌö Hawimhã! duré ĩhöiba amo norĩ. Tsada hã tsõré da duré wapari da romnhorédzé mono hã ahö na internet na. Atsima wẽ wamhã, te dza duré ĩꞌaꞌwani MP3, PDF niwamhã EPUB na. Te dza duré ĩwadze damreme aimawi na niꞌwa te te tsima ĩwẽ ma tsõmri da. Romnhorédzé ĩropoto na ĩré hã 20 nhipai u ĩmremeꞌõ mreme na. Ĩré hã Bíblia nhoredzé aꞌwani da, Bíblia watsuꞌu romhörö na duré romhörödzé ĩwẽ uptabi wapari da.

Jeová Watsuꞌuꞌwa norĩ dzô ĩwatobrodzé watsuꞌu. Wate site na duré te tihöiba romahörö duré ĩropodo wanhimiromhuri na Tiꞌai mono bö, wadzô ĩwatobrodzém na duré wanhimiromhuri na dapawaptob da ropipa dzaꞌẽne dadzô watobro wamhã. Te dza duré ĩtsõpẽ watsiꞌrãꞌõtõ dzaꞌẽtẽ norĩ dza ĩhöimana dzaꞌra dzé duré wanhimiromhuridzé watsuꞌu.

Ãne, wa tsõꞌawi dama ꞌre wahöimana dzaꞌra robꞌuiwẽdzém ne Tiꞌai mono bö. Daro mono bö, wa dapawaptob dzaꞌra ni, romhö nherẽ, ãma ĩtsimiré, Antártida ãma. Wa dza Jeová wi rowaptẽrẽ dzaꞌra ni ‘ĩtsadawa watsuꞌu hã, dahöiba mono bö da te ꞌre wapari tsuꞌu dzaꞌra mono da’ ãma ꞌre dawata dzaꞌra mono da. — 2 Tessalonicenses 3:1.

• E niha site jw.org dapawaptobdzé da te ꞌre waihuꞌu dzaꞌra mono da Bíblia nhimirowahutuꞌuptabi.

• E marĩ hã te atsima ĩwẽ wate site na ꞌmadöꞌö da.