Daꞌahö na rowahutudzéb u hã datsiꞌabaꞌréi õ di oto rowẽ hã da te tsõpẽtẽ dzaꞌra õ wa duré ĩtsadaꞌöbödzé ĩbö tinhimidzadanharĩ da hã. Tane nherẽ, e niha bö te aré aimo Jeová Watsuꞌuꞌwa norĩ tsiꞌrãꞌõtõdzéb u hã. E marĩ te dza tame ĩtsõpẽ.

Rowẽ hã dadzawi wẽ ꞌwa norĩ me. Jesus döꞌö parimhã, cristão norĩ hã ma tô ꞌre tsiꞌrãꞌõtõ dzaꞌra Höimanaꞌuꞌö ãma wata dzaꞌra da, Bíblia na te te romnhoré dzaꞌra da duré tinhimidzadze na natsi tsiptete dzaꞌra da. (Hebreus 10:24, 25) Ro datsitsawi uptabi dzém na hã, tãma waihuꞌu petse dzaꞌra di aré ĩtsitsãnawã norĩ hã danhimidzadze na ĩtsiwaihuꞌu uptabi dzaꞌra na. (2 Tessalonicenses 1:3; 3 João 14) Wa natsi tsidzutsi dzaꞌra ni. Taha wa, wama rowẽ uptabi dzaꞌra di.

Rowẽ hã Bíblia nhimirowahutu dzarina dahöimana na. Duréi ne hã, aibö, piꞌõ duré aiꞌuté tsimitsutu te natsi tsiꞌrãꞌõtõ dzaꞌra. Aibö rowahutu waihuꞌu petse ꞌwa norĩ te dama ãma rowatsuꞌu dzaꞌra Bíblia nhimiroti dzarina dahöimanadzé. (Deuteronômio 31:12; Lucas 4:16) Tame, aihĩni danhoꞌre na duré ĩte ĩtsadaꞌöbödzém norĩ na te dza Höimanaꞌuꞌö ãma tiwata dzaꞌra. — Hebreus 10:23.

Atsimidzadze nhiptetedzé Höimanaꞌuꞌö na. Apóstolo Paulo duréihã cristão ubumroi ma Roma ãma te tinha: ‘Te atsabu tsuꞌu dzaꞌra waꞌaba da tsi, wa tô ĩ̱tsima rowẽ tsiꞌabaꞌré aihĩni watsipawaptob dzaꞌra da, Jesus wa te ꞌre ĩtsadzei petse dzaꞌra mono dzém na, wanhiptete na ãma ꞌre wanomro mono da.’ (Romanos 1:11, 12) Watsitsãnawã norĩ me ꞌre watsiꞌrãꞌõtõ uꞌötsi dzaꞌra mono wa, wa dza wanhimidzadze na wanhiptete dzaꞌra ni Bíblia dzarina ꞌre wahöimana dzaꞌra mono da.

Wa atsô wahörö dzaꞌra ni watsiꞌrãꞌõtõdzéb u hã aimorĩ da ã hã romhuri na. A hã, te dza atsiꞌuihö na ĩꞌmadö ã hã romnhoré na ĩwaihuꞌudzé hã. Rowẽ na te dza aiwi! Tame robꞌuipradzé dawi ĩwaptẽrẽꞌõ.

• E ꞌwam norĩ, wa tsidzutsi dzaꞌra ni ꞌre watsiꞌrãꞌõtõ dzaꞌra mono wamhã.

• E niha datsiꞌrãꞌõtõ norĩ te dza wapawaptob dzaꞌra.

Romhö na watsitsaꞌrei mono da nherẽ duré tãiꞌahö nherẽ, wa natsi aiꞌabaꞌré ni watsiꞌrãꞌõtõdzéb u hã. Dahöimanadzéb ꞌremhã ropire nherẽ duré dawatsutu nherẽ romhuri dzaꞌẽtẽ parimhã, e marĩ wa Jeová Watsuꞌuꞌwa norĩ hã te tsada ꞌre tsiptete dzaꞌra titsitsãnawã norĩ me tsiꞌrãꞌõtõ dzaꞌra da.

Wama rowẽdzé. Datsiꞌrãꞌõno hã ĩpire na te te ãma rowatsuꞌu wamhã, apóstolo Paulo te tinha ‘watsiꞌãma ꞌre ĩwapoꞌre puꞌu uꞌötsi mono da tsi.’ (Hebreus 10:24) Taha dzarina, tsada ꞌre ĩwanhiptete dzaꞌra mono da tsi watsitsãnawã norĩ hã wa te waihuꞌu petse dzaꞌra mono da duré watsina ꞌre wahötöꞌö dzaꞌra mono da. Watsitsãnawã norĩ wa te waihuꞌu petse dzaꞌra wamhã, wa dza ꞌmadöꞌö dzaꞌra ni te te ãma ĩꞌaiꞌuté dzaꞌra na ropire hã watsine duré ta hã te natsi wapawaptob dzaꞌra, wa te ꞌre tsidzutsi dzaꞌra mono da.

Datsiwaihuꞌu uptabi nhopẽtẽdzé. Watsiꞌrãꞌõtõdzém ãma hã, watsiwaihuꞌu uptabi norĩ me wa dza aiꞌubumro ni. Duré, bödö ĩhöiba amo norĩ na, wa natsi watsiꞌrãꞌõtõ dzaꞌra ni ĩwẽ dzarina wato dzaꞌra da. E marĩ wa ta hã wẽ di. Te te wapawaptob dzaꞌra wa wa te watsina ꞌre rotsaꞌrada dzaꞌra mono da duré watsiꞌãma wanhimidzawidzé hã tsaꞌẽtẽ da. Taha wa, awaꞌawi wa dza watsitsãnawã norĩ pawaptob dzaꞌra ni ropire tãma höimana dzaꞌra wamhã. (1 Tessalonicenses 5:11) Watsitsãnawã norĩ me ꞌre wahöimana dzaꞌra mono wa, wa natsi höiꞌré dzaꞌra ni ꞌre ĩwatsitsawi uptabi dzaꞌra mono na. — 1 Coríntios 12:25, 26.

Höimanaꞌuꞌö tsiwaihuꞌu norĩ ãma atsiwaihuꞌu. Watsiré atsiꞌrãꞌõtõ uꞌötsi marĩ te te aiwi roꞌwaꞌrutu da nherẽ.

• E marĩ wa ĩwẽ aimorĩ da datsiꞌrãꞌõtõdzéb u hã.

• E niwa watsiꞌrãꞌõtõdzé hã waihuꞌu dze ti dza.

Cristão ĩmorĩꞌrata norĩ ꞌre tsiꞌrãꞌõtõ dzaꞌra mono wamhã, ma tô ꞌre tsõꞌre dzaꞌra, te te ꞌre rowaptẽrẽ dzaꞌra, te te ꞌre tsõré dzaꞌra duré Dapotoꞌwai Mreme na te te ꞌre romnhoré dzaꞌra. (1 Coríntios 14:26) Ãne duré wa natsi ꞌmanharĩ dzaꞌra ni.

Bíblia nhimirowahudu dapawaptobdzé. Romhuri mono ꞌrãtsutu na, Jeová Watsuꞌuꞌwai ubumroi mono bö te dza tsiꞌrãꞌõtõ dzaꞌra Bíblia na Rowatsuꞌu 30 minutos na te te wapari dzaꞌra da. Ta hã rowatsuꞌu na, wa waihuꞌu dzaꞌra ni e niha Bíblia nhimirowahudu wapawaptobdzé ã hã bötö mono na hã. Rowahutuꞌwai mreme ré hã, wahöiba mono bö romnhihötö norĩ hã wate Bíblia na wa dza ꞌmadöꞌö dzaꞌra ni. Taha parimhã, te dza tihöiba, 1 hora na, A Sentinela na Romnhoré, ĩtsõrédzé hã natsi wa te ĩromnhoré dzaꞌra dzém nhitsi hã. Rowahutuꞌwa te dza ãma adzadanha, duré da te datsima wẽ wamhã te dza tsadaꞌöbö ni. Ĩtsõrédzé waꞌõno wa te ĩromnhoré dzaꞌra dzém na te dza wapawaptob dzaꞌra Bíblia nhimiroti dzarina ꞌre wahöimana dzaꞌra mono da. Tô ã hã romnhoré te tihöiba 110 mil nhipai u Jeová Watsuꞌuꞌwa norĩ ubumroi ãma hã Tiꞌai mono bö.

Dapawapto rowahutu wẽ da hã. Romhuri waꞌwamhã, datsiꞌrãꞌõno te tihöiba ĩtsitsi na, Wahöimanadzé duré Wanhimiromhuri Cristo na. Ã hã datsiꞌrãꞌõtõ na, wa natsi romnhoré dzaꞌra ni ĩtsõrédzém na Ĩhöiwarobo Datsiꞌrãꞌõtõ da hã Wahöimanadzé duré Wanhimiromhuri, da te wama ꞌre ĩme dzaꞌra mono hã aꞌamo tsidöpötsi. Datsiꞌrãꞌõno hã tsiꞌubdatõ ĩwaꞌõno ĩré hã. Ĩmorĩꞌrata nhitsi hã Ĩwaꞌöbö Dzaꞌẽne Höimanaꞌuꞌö Mreme Hawi. Taha na, wa natsi romnhoré petse dzaꞌra ni nimahã Bíblia waꞌõno wa te ĩtsõré dzaꞌra na hã ĩwana wanhorõwa ãma. Ĩwaꞌõno ĩtsãnaꞌrem nhitsi hã Dama Rowahutu Wẽ Na. Taha na, datsihöiꞌrédzém norĩ hawi te dza wama rowahutu dzaꞌra ni, wa te dama robdzanhamri dzaꞌra da Bíblia na. Taha parimhã, nimahã daꞌmadöꞌöꞌwa te dza wama roti dzaꞌra marĩ na wa norĩ hã ĩtsõréꞌwai wẽ da duré rowahutuꞌwai wẽ da. (1 Timóteo 4:13) Ĩꞌrãtsutu nhitsi hã Wahöimanadzé Cristo na. Taha na, te dza wapawaptob dzaꞌra ni wa te tsadawa dzamarĩ dzaꞌra da Bíblia nhimirowahudu hã bötö tsidöpötsi. Taha ꞌremhã duré te dza tihöiba romnhoré dadzadanharĩ duré ĩtsadaꞌöbödzéb ré hã wanhimirowaihu hã Bíblia na tsaꞌẽtẽ da hã.

Watsiꞌrãꞌõtõdzéb u aimorĩ wamhã, tô tsena te dza atobꞌudzu Bíblia nhimirowahutu wẽ uptabi na. — João 6:45.

• E marĩ te dza Jeová Watsuꞌuꞌwa norĩ tsiꞌrãꞌõtõdzém ãma hã ĩwapa.

• E ma hã datsiꞌrãꞌõno wapari dze ti dza.

Madöꞌö dapoto norĩ hã ã hã ĩtsõrédzém na. Jeová Watsuꞌuꞌwa norĩ tsiꞌudza wẽ dzaꞌra di tsiꞌrãꞌõtõ dzaꞌra da hã. E marĩ wa.

Höimanaꞌuꞌö wadzé wa. Ropotoꞌwai ma hã, wanhimirotsaꞌrada wapẽꞌẽ ꞌremhã danhipai u ĩpire. (Atos 15:8) Tane nherẽ, ꞌre watsiꞌrãꞌõtõ dzaꞌra mono wamhã ãma wawata dzaꞌra da, wa watsima wẽ petse dzaꞌra ni wa te wadzéb dzaꞌra da, õ hã duré watsitsãnawã norĩ hã. Ãma ĩtsimiré: dama ĩpire u aimorĩ da wamhã tãma robdzanhamri da, tô tsena te dza atsiꞌudza wẽ õhõ niꞌwa ĩpire wa. Ãne duré, watsiꞌudza wẽ dzaꞌra wa watsiꞌrãꞌõtõ norĩ da hã, wanhimiwadzé hã wa dza höiꞌré dzaꞌra ni ‘Apito uꞌötsi’ ãma, Jeová, duré ro ãma ꞌre ĩwawata dzaꞌra mono dzém ãma hã. — 1 Timóteo 1:17.

Rowahudu te te ĩwadzaprõni dzarina dahöimana da. Bíblia te cristão norĩ ma roti ꞌre tsiꞌudza dzaꞌra mono da “romnawawim na” duré “daꞌrãi petse na”. (1 Timóteo 2:9, 10, TNM) “Romnawawim na” ꞌre ĩtsiꞌudza dzaꞌra mono norĩ hã te dza wẽꞌõ dzaꞌra dzadzahö ĩwaꞌöbö dzaꞌẽne, dahöimana nhitsébꞌõ duré dahöiba höiꞌréꞌwa. Duré “daꞌrãi petse na”, te dza ꞌre tsiꞌudza dzaꞌra dzadzahö ĩwẽ na, mare di ĩtsatsibi na hã duré ĩꞌuꞌre na hã. Tsada hã daꞌudza wama ĩwẽ wa te pitsutu dzaꞌra da Bíblia nhimiroti dzadawa dzamarĩ tsina. ꞌRe watsiꞌudza wẽ dzaꞌra mono wamhã watsiꞌrãꞌõtõ norĩ da hã Bíblia nhimiroti dzarina, Höimanaꞌuꞌö ãma wa dza ꞌre wawata dzaꞌra. (Tito 2:10; 1 Pedro 2:12) Duré, wa dza dapawaptob dzaꞌra ni Jeová ãma dawatadzém na hã danhimirotsaꞌrata wẽ dzaꞌra da.

Daꞌudza ã hã dapoto norĩ ne baba nherẽ, aimorĩ Watsiꞌrãꞌõtõdzéb u hã. Waꞌudza ĩwaꞌöbö dzaꞌẽtẽ tõ da tsi, tane nherẽ ĩꞌuꞌreꞌõ duré ĩtsatsibiꞌõ.

• E marĩ wa datsiꞌudza wẽ ĩpire Höimanaꞌuꞌö ãma ꞌre dawata dzaꞌra mono da wamhã.

• E ma hã roti norĩ te dza wadzaprõni dzaꞌra ꞌre watsiꞌudza wẽ dzaꞌra mono da.

E Bíblia na te ꞌre ĩromnhoré Jeová Watsuꞌuꞌwa norĩ tsiré. Tawamhã, tô tsena te natsi tsada ĩromnhoré romnhoré mono da hã. Ãne tsada ꞌre romnhoré mono wamhã datsiꞌrãꞌõtõ norĩ da dzama, te dza ĩwaihuꞌu pe. Atsimirowaihu hã te dza tidzaꞌẽtẽ petse ãne natsi ꞌmanharĩ uꞌötsi wamhã datsiꞌrãꞌõtõ mono wana ré.

Bödö hã duré ro hã pitsutu romnhoré da. E niwa aima danhipai u ĩwẽ romnhoré da. E mararé romhuri wana ré, e höiwahö, e niwamhã barana aiꞌra norĩ tsõtõ dzaꞌra parimhã. Nimahã na, ãté bödö tsyryre di romnhoré da. Tane nherẽ, pitsutu e niha bötö na dza ĩromnhoré, tawamhã ĩroꞌopodo duré dahörödzé wĩrĩ. Ãne, marĩ te te aiwi roꞌwaꞌrutu õ di dza romnhoré da wamhã. Romnhoré wana ré, te dza ĩrowaptẽ. Ãne, marĩ na aihötöꞌö õ di dza duré te dza Höimanaꞌuꞌö Mreme na ĩrotsaꞌrata pe. — Filipenses 4:6, 7.

Ĩtsadaꞌöbödzé wawi na duré atsitsanho na tsadaꞌöbö da. Ĩmorĩꞌrada, ãma rotsaꞌrata dza ĩromnhorédzém na hã. Tawamhã, romnhoré nhitsi hã ꞌmadöꞌö. Ãma rotsaꞌrata e niha romnhoré nhitsi dzahöpö mono te dza ãma tsitsadze dzaꞌra romnhoré nhitsi na. ꞌMadöꞌö dapoto norĩ hã duré dadzadanharĩ norĩ dapoꞌre puꞌudzé. Tawamhã, romnhihötö waꞌõtõ mono tsõré na duré ĩtsadaꞌöbödzé dadzadanharĩdzéb da hã tsõpẽtẽ. Tsô airĩtĩ Bíblia na romnhihötö norĩ dzô duré tsõré dzaꞌra na. Ãma rotsaꞌrata e niha te dza romnhoré upari dzaꞌra. (Atos 17:11) Ĩtsadaꞌöbödzé tsõpẽtẽ wamhã, te dza ĩwawi, datsiꞌrãꞌõtõ ré ãma aipoꞌre puꞌu da hã. Õwa, tsadaꞌöbö dzei wamhã, atsibrada wẽ na. Tawamhã te dza ĩtsadaꞌö ĩromnhorédzéb dzarina.

Marĩ aimawi na romnhoré wamhã romhuri tsidöpötsi datsiꞌrãꞌõtõ na, te dza rotsaꞌrada ĩtém norĩ ĩwapto atsimirowaihuꞌu u hã Bíblia na. — Mateus 13:51, 52.

• E marĩ te dza romhuri tsidöpötsi ĩꞌmanha tsada romnhoré da hã datsiꞌrãꞌõtõ norĩ da hã.

• E niha te dza atsitsaꞌra wẽ datsiꞌrãꞌõtõ na tsadaꞌöbö da.

Duréi nherẽ, Jeová te tsima wẽ família norĩ hã natsi tsiꞌubumro da tinhimidzadze duré tinhimidzawidzé te te tsiptete dzaꞌra da. (Efésios 6:4) Taha wa, Jeová Watsuꞌuꞌwa norĩ hã te natsi tsiꞌrãꞌõtõ dzaꞌra romhuri tsidöpötsi, tite família tsiré Jeová ãma wata dzaꞌra da. Robdze na, te dza tsima robdzanhamri dzaꞌra tiwi tsô ĩrowaptöꞌödzém na hã tsimidzadze nhiptete dzaꞌra da. Atsiwaprotsi aihöimana nherẽ, bödö atsima pitsutu Höimanaꞌuꞌö u aiwitsi da Bíblia na romnhoré na hã.

Jeová tẽme watsihutu da. ‘Maꞌãpé Wamama u atsimirotsaꞌrata na ꞌre aihutu aba mono. Tawamhã õ hã te dza duré ꞌröwi atẽme ꞌre tsimatsitsi ꞌwa.’ (Tiago 4:8) Jeová höimanadzém na duré ĩtsimiꞌmanharĩ na wa te romnhoré petse dzaꞌra wamhã Ĩmreme na, Bíblia hã, wa dza wa te ꞌre waihuꞌu petse dzaꞌra. E niha te dza ãma ĩtsãnaꞌra ã hã romnhoré na hã ate família tsiré. Aimreme ꞌraihö na, atsiré tsõré dzaꞌra waꞌaba Bíblia waꞌõno ĩpitsudu hã datsiꞌrãꞌõtõ da hã Wahöimanadzé duré Wanhimiromhuri. Dahöiba mono bö te dza ĩwaꞌõno aimawi tsõré. Taha parimhã, te dza ĩwaihuꞌu dzaꞌra waꞌaba dzém na atsima ĩrobdzanhamri dzaꞌra waꞌwa.

Dadzawi família ꞌremhã tsaꞌẽtẽ da. Aibö timro me, duré damama norĩ tiꞌra norĩ me te dza tsiptete dzaꞌra tinhimidzawidzé, Bíblia na romnhoré hawi, tsimitsutu. Ta hã bödö ĩrobdze da tsi — marĩ aihĩni família ꞌremhã dza tsô ꞌre ĩtsimipari petse dzaꞌra romhuri tsidöpötsi. Damama norĩ hã te dza pitsutu dzaꞌra marĩ te te romnhoré dzaꞌra da tiꞌra norĩ ãma ĩwahu dzarina. Te dza duré robdzanhamri dzaꞌra tiꞌra norĩ te te ĩrobdzépata dzaꞌra dzém na hã romnhorédzéb ꞌremhã. Taha da, te dza tsô tirĩtĩ dzaꞌra wanhimiromnhorédzém na hã, ãma ĩtsimiré A Sentinela duré Despertai!, duré wate site na jw.org. Atsima wẽ wamhã te dza ĩropodo ĩꞌmadö site na JW Broadcasting (tv.jw.org). Taha pari, te dza ãma atsima ĩrobdzanhamri dzaꞌra waꞌwa. Wẽ di dza duré atsitsanho dzaꞌra waꞌaba wamhã danhoꞌre norĩ na datsiꞌrãꞌõtõ norĩ da hã duré romnhoré parimhã, atsiré marĩ na atsaihuri waꞌaba wamhã.

Família na romnhoré romhuri tsidöpötsi, te dza wapawaptob dzaꞌra Dapotoꞌwai Mreme na wa te watsima robdze dzaꞌra da danhipai u. Ãne, Jeová duré te dza pawaptob uꞌötsi dzaꞌra. — Lucas 11:28.

• E marĩ wa wate família tsiré Bíblia na wa dza romnhoré dzaꞌra ni romhuri tsidöpötsi.

• E marĩ damama norĩ te dza ꞌmanharĩ dzaꞌra ta hã bödö robdzedzéb da hã aihĩni norĩ ma.

ꞌMadöꞌö dapodo hã. E marĩ wa ta norĩ ma robdze ti. Tsiꞌubumroi wa watsiꞌrãꞌõtõ dzaꞌẽtẽ ãma. Duréihã, Höimanaꞌuꞌö ma tô tinhibꞌaꞌuwẽ norĩ ma roti ꞌre tsiꞌubumroi mono da datsiꞌrãꞌõtõ dzaꞌẽtẽ ãma, tsiꞌubdatõ na wahup tsidöpötsi. Ĩtsine dzaꞌra, robdze na wa natsi wanhimipari dzaꞌra ni watsiꞌrãꞌõtõ dzaꞌẽtẽ dzô. (Deuteronômio 16:16) Wahu mono bö, tsiꞌubdatõ datsiꞌrãꞌõtõ dzaꞌẽne ĩré hã: maparane datsiꞌrãꞌõtõ dzaꞌẽne mitsi bötö na, ĩhöiba mono bö, duré mitsi datsiꞌrãꞌõtõ dzaꞌẽne tsiꞌubdatõ bötö na. E niha ta norĩ hã wama ĩwẽdzé.

Wanhiptete dzaꞌra da datsitsãnawã na. Duréihã Höimanaꞌuꞌö nhibꞌaꞌuwẽ norĩ te te tsima ꞌre ĩrowẽ dzaꞌra mono ne ꞌre tsiꞌrãꞌõtõ dzaꞌra mono wamhã, wama rowẽ dzaꞌra di ꞌre watsiꞌubumroi mono wamhã datsiꞌrãꞌõno ĩpire norĩ ãma õhõꞌãma wawata dzaꞌra da. (Hebreus 10: 25) Ta norĩ datsiꞌrãꞌõtõ dzaꞌẽtẽ ãma, wa natsi waihuꞌu dzaꞌra ni Jeová Watsuꞌuꞌwa norĩ ꞌriꞌahö aimawi hawimhã duré ro ĩhöiba amo norĩ hawimhã. Abdzuma, ĩwatsiꞌrãꞌõtõdzém ãma hã wa dza watsaihuri ni datsa na wa te watsima ĩꞌöri dzaꞌra hã wanhorõwa hawi. Tô õhõ bötö na, wẽ di watsiwaihuꞌu norĩ ma wa te robdzanhamri dzaꞌra da. (Atos 2:46) Ta norĩ datsiꞌrãꞌõtõ dzaꞌẽtẽ ãma, wa natsi ꞌmadöꞌö dzaꞌra ni wanhimidzawidzé hã watsiꞌãma ĩꞌuptabi na hã Tiꞌai mono bö. — Hebreus 10:24.

Waprédub dzaꞌra da wanhimidzadze na. Israelita norĩ hã ma tô te te ꞌre awaihuꞌu uꞌötsi dzaꞌra Jeová Mreme hã ꞌre tsiꞌrãꞌõtõ dzaꞌra mono wamhã. (Lucas 4:15) Duré wama wẽ dzaꞌra di Bíblia nhimirowahudu hã watsiꞌrãꞌõtõ dzaꞌẽtẽ norĩ ãma hã. Ã hã rowahudu uburé te tihöiba Bíblia dzarina. Bíblia na rowatsuꞌu duré datsihöiꞌrém norĩ hawi, wa waihuꞌu dzaꞌra ni Jeová ma, wa te tãma rowẽ dzaꞌra da wahöimanadzém na. Wa wanhipetete dzaꞌra ni watsitsãnawã norĩ watsuꞌu na, ĩtsimidzadze na ꞌre ĩnomro mono hã ropire nherẽ. Datsiꞌrãꞌõtõ dzaꞌẽtẽ na tsiꞌubdatõ bötö na, ĩropoto mono hawi, wa dza waihuꞌu dzaꞌra ni Bíblia watsuꞌu hã duré roti wahöimanadzéb da hã. Duré datsiꞌrãꞌõtõ dzaꞌẽtẽ mono na, ö dawabdzuri ĩré hã.

• E marĩ wa, datsiꞌrãꞌõtõ dzaꞌẽtẽ norĩ ãma hã rowẽ di.

• E niha te dza aipawaptom ni datsiꞌrãꞌõtõ dzaꞌẽtẽ ãma aihöimana wa.

Tsyry na döꞌö wana ré, Jesus te tinha ‘rowatsuꞌu wẽ hã Höimanaꞌuꞌö Nhimiꞌmadöꞌö na hã dza da te dama ꞌre ĩwatsuꞌu dzaꞌra mono na daro mono bö tawamhã te dza tirobꞌrãtsutu.’ (Mateus 24:14) E niha bété ta hã romhuri Bíblia na wa natsi ãma uwaimrami dzaꞌra ni Tiꞌai mono bö. Jesus ãma ĩtsitsanho dzarina Tiꞌai ãma ꞌre morĩ ré. — Lucas 8:1.

Wa natsi datẽme aiꞌabaꞌré ni danhorõwa mono bö. Jesus ma tô roti ĩtsimiꞌubumro norĩ ma te te dama ꞌre rowahutu dzaꞌra mono da danhorõwa mono bö. (Mateus 10:11-13; Atos 5:42; 20:20) Õ norĩ hã, te te dama ꞌre rowahutu dzaꞌra ro Jesus te te tãma ĩpitsutu dzaꞌra dzém ãma tsi. Ãne duré, ã bötö na hã, Jeová Watsuꞌuꞌwa norĩ ĩꞌubumroi mono bö te dza dama rowahutu dzaꞌra ro da te tãma ĩpitsutu dzaꞌra dzém ãma tsi. Tane, wa natsi daꞌanhopẽtẽ dzaꞌra ni, wa te ꞌre tsadawa dzamarĩ dzaꞌra mono tsina Jesus nhimiroti dama rowatsuꞌu na. — Atos 10:42.

Wa natsi datẽme aiꞌabaꞌré ni tsiwaꞌru ro ꞌre ĩdahöimana dzaꞌra mono dzéb u hã. Jesus ma tô duré te te dama ꞌre rowahutu ro daꞌahö ꞌrém ãma hã, ãma ĩtsimiré, ö dzadaꞌré na, niha wamhã ö dzô abꞌre ꞌrata ãma hã. (Marcos 4:1; João 4:5-15) Jesus ne, wa natsi dama robdzanhamri dzaꞌra ni Bíblia na ropö: bödödi, ꞌri ãma, marĩ uipradzém ãma, ro ĩhöiba amo norĩ ãma hã duré dahörödzém hawi. Tsada wamhã, wa natsi duré rowahutu dzaꞌra ni wanhorõwa ꞌrata ꞌre ĩhöimana dzaꞌra mono norĩ ma, watsiré romhuriꞌwa norĩ ma, watsiré romnhoréꞌwa norĩ ma duré watsitsãnawã norĩ ma dzama. Ã hã romhuri uꞌöbö, daꞌahö uptabi na te da te ꞌre wapari dzaꞌra roti uptabi hã danhoꞌreptudzéb da hã. — 1 Timóteo 2:3, 4.

E ꞌwai ma te atsima ĩwẽ ãma rowatsuꞌu da rowatsuꞌu wẽ na Höimanaꞌuꞌö Nhimiꞌmadöꞌö na hã duré rowẽ na höimana uꞌötsi dzéb da hã aptoꞌoré hã. Atsima tsi tété tõ ã hã romahörö wẽ. Maꞌãpé, dama watsuꞌu na oto!

• E ma norĩ rowatsuꞌu wẽ te dza dama watsuꞌu dzaꞌra.

• E niha Jeová Watsuꞌuꞌwa norĩ te natsi tsidzutsi dzaꞌra Jesus nhimiromhuri.

Damreme “ĩtsãnaꞌrataꞌwa” hã te watsuꞌu niꞌwa te te marĩ ĩtsãnaꞌrada hã. Jesus aré ĩtsãnaꞌrataꞌwa, Tiꞌai u wei witsi wa te te dama rowahutu da duré bödödi te te ꞌridawa da danhoꞌreptudzéb da hã. (Mateus 20:28) Ã hã bötö na hã, ĩtsadawa dzamarĩꞌwa norĩ hã ĩtsine te natsi uprotsi dzaꞌra tite bödö te te dama rowahutu dzaꞌra da. (Mateus 28:19) Niꞌwam norĩ te te ꞌre romhuri dzaꞌra ĩtsãnaꞌrataꞌwa na.

Ĩtsãnaꞌrataꞌwa hã te natsi dama rowahutu Bíblia na danhipai u bötö na. Aihĩni Jeová Watsuꞌuꞌwa norĩ te natsi dama rowahutu dzaꞌra Bíblia na. Tadzahã, nima norĩ ma tô tsitsaꞌra wẽ dzaꞌra danhipai u te te romhuri dzaꞌra da dama rowahutu na. Ĩtsãnaꞌrataꞌwaiꞌuꞌö te dza te te ꞌre romhuri 70 horas aꞌamo tsidöpötsi te te dama rowahutu da hã. Taha da, ahö na te natsi romhuri dzaꞌra mitsi bötö waꞌõtõ na tsi tsiꞌupari dzaꞌra da. Ĩhöiba amo norĩ te da te ꞌre pitsutu dzaꞌra ĩtsãnaꞌrataꞌwai uptabi da hã nimame tsiꞌabaꞌré da hã Bíblia na rowahutuꞌwa ĩꞌumro u. Ta norĩ hã te dza romhuri dzaꞌra 130 horas aꞌamoi böre niwamhã taha nhipai u dama rowahutu na. Ĩtsãnaꞌrataꞌwa norĩ hã tsimarĩ dzaꞌra tsyryre nherẽ, te natsi umnhatsi dzaꞌra Jeová dza te te tãma ĩtsõmri dzaꞌra na hã tiwi tsô ĩrowaptöꞌö dzaꞌra dzé. (Mateus 6:31-33; 1 Timóteo 6:6-8) Ĩhöiba amo norĩ, tsada wamhã, te dza romhuri dzaꞌra ĩtsãnaꞌrataꞌwa pawaptoꞌwa na. Ta norĩ hã te dza romhuri dzaꞌra 30 niwamhã 50 horas aꞌamo na dama rowahutu na.

Ĩtsãnaꞌrataꞌwa hã te natsi romhu Höimanaꞌuꞌö dzawi na duré dadzawi na. Jesus ne, wama waihuꞌu petse dzaꞌra di dawi tsô ĩrowaptöꞌö uptabi dzaꞌra hã Höimanaꞌuꞌö dzô. (Marcos 6:34) Wanhimirowahudu Bíblia na hã te dza oto dapawapto ãhãna duré ropitsutu wẽ dzô tsô ꞌre ĩdanhimipari dzaꞌra mono dzéb da hã aptoꞌoré hã. Dadzawi wa, ĩtsãnaꞌrataꞌwa te natsi uprotsi tite bödö te te dama rowahutu da rowatsuꞌu ĩwẽ na. (Mateus 22:39; 1 Tessalonicenses 2:8) Ãne wamhã te dza tinhiptete tinhimidzadze na, te dza wi danhipai u Höimanaꞌuꞌö tẽme duré tãma robdze ti dza danhipai u. — Atos 20:35.

• Ãma rowatsuꞌu na e marĩ ĩtsãnaꞌrataꞌwa.

• E marĩ wa niꞌwam norĩ ma pitsutu dzaꞌra ĩtsãnaꞌrataꞌwa da hã.

Bötöꞌahö na, Jeová Watsuꞌuꞌwa norĩ hã waihuꞌu petse dzaꞌra di oto Bíblia na tsimiꞌẽ na te te ꞌre romnhoré petse dzaꞌra mono wa. Datsitsanhodzé ĩpire uptabi ĩré hã ĩtsãnaꞌrataꞌwa norĩ ma, ‘te te ãma uwaimrami dzaꞌra da romhuri’ dama rowatsuꞌu na Höimanaꞌuꞌö Nhimiꞌmadöꞌö na. — 2 Timóteo 4:5.

Romnhorédzé Ĩtsãnaꞌrataꞌwa nhimiromhuri da hã. Wahu ĩmorĩꞌrata ꞌrãtsutu na ĩtsãnaꞌrataꞌwa na, ĩtsãnaꞌrataꞌwaiꞌuꞌö hã te dza tsô tahörö ni ta hã datsitsanhodzéb da hã 6 na bötö na. Taha na te pawaptom ni Jeová tẽme danhipai u witsi da, tinhimiromhuri na tsipetse dzaꞌra da duré tinhimiromhuri na duré tsimirẽmeꞌõ dzaꞌra da.

Romnhorédzé Höimanaꞌuꞌö Nhimiꞌmadöꞌö watsuꞌuꞌwa norĩ ma hã. àhã romnhorédzém ãma hã, ĩtsãnaꞌrataꞌwa norĩ, aibö duré piꞌõ ĩmroꞌõ norĩ niwamhã ĩmro rém norĩ, 23 hawi 65 ãma ĩwahu u te dza atsanho dzaꞌra maparane aꞌamo ré. Töibö parimhã, te dza wairé tirob hawi te te ꞌre romhuri dzaꞌra mono da Bíblia na rowahutuꞌwa norĩ dzô ĩrowaptöꞌödzém ãma hã. Jesus ne, rowahutuꞌwa danhipai u ĩpire hã Tiꞌai ãma ꞌre ĩmorĩ hã, ta norĩ hã te dza te te ꞌre romhuri dzaꞌra da tsiwaꞌru rom ãma dza da te ĩtsatõrĩ dzaꞌra dzéb u hã. (João 7:29) Wairébé pari, ãté ĩtsimarĩ norĩ tsyry di dza. Ãté te dza atsitsi dahöimanadzé aimawi ꞌremhã, danhiptiꞌa aimawi u, te dza natsi titsaihu datsa aimawi na duré ãté te dza waihuꞌu dzaꞌra damreme aimawi. Ta hã romnhorédzém na, te dza tinhiptete dzaꞌra tinhimidzadze na duré te dza tsipetse dzaꞌra tinhimirowahutu na danhipai u wẽ na te te ꞌre romhuri dzaꞌra mono da Jeová ma duré ĩtsibꞌaꞌuwẽ norĩ ma.

Romnhorédzé Bíblia na Gileade na. “Gileade” te watsuꞌu hebraico mreme na “Ẽtẽꞌubumro dama Rowatsuꞌudzé”. Ã hã romnhorédzé ma ãma tsãnaꞌrata 1943 na. Ta hawim haré, 8 mil nhipai u te te ãma ĩromnhoré dzaꞌra hã ma tô tsatõrĩ dzaꞌra ni missionário na ‘daro mono bö’ te te dama ꞌre rowatsuꞌu dzaꞌra mono da. (Atos 13:47) Ma tô oto daꞌapawaptob dzaꞌra Jeová da te waihuꞌu dzaꞌra da ta hã romhuri na. Ãma ĩtsimiré, missionário norĩ tsihutu wamhã Peru u, datsiꞌrãꞌõno baba di aré õwa. Ãhãna, datsiꞌrãꞌõtõ norĩ mil nhipai u ĩré hã. Te te ãma tsãnaꞌrata dzaꞌra wamhã dama rowatsuꞌu na Japão ãma, ĩré hã nimahã 10 na Jeová Watsuꞌuꞌwa norĩ hã. Ãhãna, ĩré hã 200 mil nhipai u. Gileade ãma, te dza romnhoré petse dzaꞌra Bíblia na 5 aꞌamo na. Ĩtsãnaꞌrataꞌwa ĩꞌuptabi, missionário, betelita duré datsiꞌrãꞌõtõ ꞌmadöꞌöꞌwa norĩ te dza tsô tahörö dzaꞌra ni ã hã romnhorédzéb da hã, taha parimhã, te te pawaptob dzaꞌra da duré te te tsiptete dzaꞌra da romhuri Bíblia na rowahutu na Tiꞌai mono bö.

• E marĩ da Romnhorédzé Ĩtsãnaꞌrataꞌwa Nhimiromhuri da hã.

• E ꞌwa te dza romnhoré Romnhorédzém ãma hã Höimanaꞌuꞌö Nhimiꞌmadöꞌö Watsuꞌuꞌwa norĩ ma hã.