-
E marĩ Ropotoꞌwa nhimirobꞌrudzé.Rowẽ tsina ꞌre aihöimana uꞌötsi mono! — Bíblia na romnhoré te dza aima rowẽ
-
-
ROMNHORÉ 31
E marĩ Ropotoꞌwa nhimirobꞌrudzé.
Bíblia ꞌremhã rowatsuꞌu danhipai u ĩpire hã Ropotoꞌwa nhimirobꞌrudzé watsuꞌu. Tinhimirobꞌrudzém na hã Jeová te dza ãma adzaprĩ Tiꞌa hã Ro ĩwẽ na hã. E marĩ bété ĩtsimirobꞌrudzé. E marĩ dzarina wama waihuꞌu petse dzaꞌra di oto te te ãma ꞌre ĩroti mono na hã. E marĩ tinhimirobꞌrudzém na hã ma tô oto ãma uwaimra. Duré e marĩ te dza ãma uwaimra aptoꞌoré. Ãhã romnhoré duré maparane ĩhöiba amo norĩ hã te dza tsadaꞌöbö dzaꞌra.
1. E marĩ Ropotoꞌwa nhimirobꞌrudzé hã duré e ꞌwa ma tô pitsutu ni ãma Rotiꞌwa da hã.
Ropotoꞌwa nhimirobꞌrudzé hã Jeová nhimiꞌmanharĩ. Õ hã ma tô pitsutu Jesus ãma Rotiꞌwa da höiwa hawi we te te ꞌre ĩroti mono hã. (Salmo 103:19; João 18:36) Ropotoꞌwai mreme te tinha Jesus ‘Apito na dza ꞌre ĩhöimana uꞌötsi mono na.’ (Lucas 1:32, 33) Ropotoꞌwa nhimirobꞌrudzéb ãma Rotiꞌwa na, Jesus te dza te te ꞌre roti aihĩni Tiꞌai ãma ꞌre ĩdahöimana dzaꞌra mono norĩ ãma.
2. E ꞌwam norĩ Jesus tsiré te dza te te ꞌre roti dzaꞌra.
Jesus tsiwaprotsi te te ꞌre roti mono õ di dza. ‘Dapoto mono bö, damreme tsipoꞌo mono bö ꞌre ĩdahöimana dzaꞌra mono hã . . . te dza tiꞌai ãma pire na dama ꞌre höimana dzaꞌra’ Jesus tsiré. (Apocalipse 5:9, 10) E niha uburé ĩhöiba Cristo tsiré te dza te te ꞌre roti dzaꞌra. Jesus Tiꞌai u we ĩmorĩdzém hawi daꞌahö uptabi na te da te ꞌre tsadawa dzamarĩ dzaꞌra. E aihĩni norĩ hã te dza ĩtsiré te te ꞌre roti dzaꞌra. Mare di. 144 mil norĩ tsi uburé ĩhöiba te dza aiꞌabaꞌré höiwa u Jesus tsiré te te ꞌre roti dzaꞌra mono da. (Tsõré na Apocalipse 14:1-4.) Uburé Cristo dzadawa dzamarĩꞌwa ĩhöiba amo norĩ te dza te te ꞌre romhuri dzaꞌra Ropotoꞌwai ma hã ãmemhã Tiꞌai ꞌre. — Provérbios 2:21.
3. E marĩ wa, Ropotoꞌwa nhimirobꞌrudzé uburé danhimirobꞌrudzém nhipai u ĩwẽ.
Dama ĩpire norĩ te te ꞌwapé dzaꞌra nherẽ marĩ ĩwẽ te te ꞌmanharĩ dzaꞌra da, te te uwaimrami waihuꞌu dzaꞌra õ di uburé te te tsima ĩwẽ dzaꞌra dzé hã. Duré ta norĩ dzaꞌu te te ꞌre ĩroti dzaꞌra mono norĩ hã ãté te dza daꞌãma poꞌre tsiꞌöri dze dzaꞌra. Tane nherẽ niꞌwa Jesus upana te te ꞌre roti mono õ di dza Ropotoꞌwa nhimirobꞌrudzéb ꞌremhã. Ropotoꞌwa ‘te dza danhibꞌihöꞌa nhimiꞌmadöꞌödzé niwa dza da te ĩpru waihuꞌuꞌõ hã pitsutu.’ (Daniel 2:44) Jesus te dza te te ꞌre roti Tiꞌai ãma wahuré. Ãne wamhã ꞌre höimana wẽ mono õ di dza niꞌwam norĩ ma tsi. Õ hã tsimidzawi petse di, höimana wẽ di duré ĩbö dzarina te ꞌre höimana. Taha wa, aihĩni norĩ ma te dza ꞌre höimana wẽ. Te dza duré dama ãma atsanho titsine datsima ꞌre dahöimana dzaꞌra mono da: danhimidzawi dzarina, dahöimana wẽ dzarina duré ĩbö dzarina. — Tsõré na Salmo 72:12-14.
WAIHUꞌU DURÉ
Te dza ĩꞌmadö e marĩ wa Ropotoꞌwa nhimirobꞌrudzé uburé danhimirobꞌrudzém nhipai u ĩwẽ.
4. Ropotoꞌwa nhimirobꞌrudzé Tiꞌai ãma wahuré te dza tiromhöiba
Jesus nhiptetedzé te te roti da tsaꞌẽtẽ di uburé Rotiꞌwa ĩhöiba amo norĩ nhipai u. Atsiré tsõré aba Mateus 28:18. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha Jesus nhiptetedzé hã te te roti da Rotiꞌwa ĩhöiba amo norĩ nhipai u Tiꞌai ãma.
Dama ĩpire norĩ bötö ꞌrutu ꞌrep tsi duré Tiꞌai waꞌõtõ ꞌrep tsi te te ꞌre roti dzaꞌra. Ropotoꞌwa nhimirobꞌrudzé bété. Atsiré tsõré aba Daniel 7:14. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E marĩ wa, wama rowẽ dzaꞌra di dza Ropotoꞌwa nhimirobꞌrudzé ‘dza tsiꞌutõrĩ waihuꞌu õ wa’.
Aima hã, e marĩ wa, wama rowẽ dzaꞌra di dza Ropotoꞌwa nhimirobꞌrudzé Tiꞌai ãma wahuré romhöimana wa.
5. Robꞌrudzé ĩté ĩhöimana da tsi danhimirobꞌrudzéb upana
E marĩ wa Ropotoꞌwa nhimirobꞌrudzé ĩhöimana da tsi danhimirobꞌrudzéb upana. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.
E niha danhimirobꞌrudzé te te dawi ꞌre roꞌwaꞌrutu.
Atsiré tsõré aba Êxodo 1:13, 14. Taha parimhã atsima robdzanhamri aba ãhã dadzadanharĩ ãma piꞌrebamhã
Aima hã, e wẽ di Ropotoꞌwa nhimirobꞌrudzé uburé danhimirobꞌrudzéb upana höimana da. E marĩ wa.
6. Rotiꞌwa norĩ Ropotoꞌwa nhimirobꞌrudzéb ꞌremhã te wadzadaihuꞌu dzaꞌra
Wate Rotiꞌwa Jesus Tiꞌai ãma ‘tsitsãnawã norĩ me aiwa uptabi aꞌö ma tô ꞌre höimana’. Taha wa ‘te dza te te ꞌre romhuri daꞌãma pẽꞌẽdzé uptabi tsina.’ (Hebreus 2:17) Jeová ma tô duré dapitsutu ‘dapoto mono bö damreme tsipoꞌo mono bö ꞌre ĩdahöimana dzaꞌra mono hã’, 144 mil na dahöiba uburé hã, aibö duré piꞌõ ĩtsimidzadzei petse norĩ, Jesus tsiré da te ꞌre roti dzaꞌra mono da. — Apocalipse 5:9.
E aima rowẽ di Jesus titsiré norĩ me dza te te waꞌãma ꞌre ĩroti dzaꞌra mono norĩ hã, wa te ꞌre ĩrobdzépata dzaꞌra mono dzé te te tsadaihuꞌu dzaꞌra wa. E marĩ wa.
Jeová te te ꞌre dapitsutu mono dapoto mono bö aibö duré piꞌõ Jesus tsiré da te ꞌre roti dzaꞌra mono da.
7. Ropotoꞌwa nhimirobꞌrudzé nhimiroti uburé danhimirobꞌrudzé nhimiroti nhipai u ĩwẽ
Dama ĩpire norĩ nhimiroti hã te dapawapto duré te daꞌwawi aimapa. Ropotoꞌwa nhimirobꞌrudzéb ꞌremhã ꞌre ĩdahöimana dzaꞌra mono da tsi Ropotoꞌwa nhimiroti dzarina. Atsiré tsõré aba 1 Coríntios 6:9-11. Taha parimhã atsima robdzanhamri aba ãhã dadzadanharĩ norĩ ãma piꞌrebamhã.
Aima hã, e niha dza dahöimanadzé aptoꞌoré aihĩni da te tsadawa dzamarĩ dzaꞌra wamhã Ropotoꞌwa nhimiroti.a
Aima hã, e ĩbö Jeová te te ꞌrui wamhã tinhibꞌaꞌuwẽ norĩ ma tinhimirobꞌrudzéb ꞌremhã tinhimiroti hã te te tsadawa dzamarĩ dzaꞌra da. E marĩ wa.
Aima hã, e tsada hã te te ĩtsadawa dzamarĩ dzaꞌra õ norĩ tihöimanadzém na tsitsaprĩ dzaꞌra da. E marĩ dzarina te ãne ĩrotsaꞌra. — ꞌMadöꞌö aba ĩtsihötö ꞌrare 11.
Dama ĩpire norĩ nhimiroti te dapawapto duré te daꞌwawi aimapa. Ropotoꞌwa nhimirobꞌrudzéb ꞌremhã roti ĩré hã ta norĩ nhipai u ĩwẽ dapawaptobdzéb da duré daꞌwawi datsimapadzéb da.
NIꞌWA TE TE ATSADANHARĨ WAMHÃ BÉTÉ: “E marĩ hã Ropotoꞌwa nhimirobꞌrudzé.”
E niha te dza ĩtsadaꞌö.
ĨWAIHUꞌUDZÉ HÃ
Ropotoꞌwa nhimirobꞌrudzé hã ĩꞌuptabi duré höiwa ãma te tihöiba. Õ hawimhã Tiꞌai ãma wahuré te dza te te ꞌre roti.
Ãma aipoꞌre puꞌu
E ꞌwam norĩ te dza te te ꞌre roti dzaꞌra Ropotoꞌwa nhimirobꞌrudzéb ꞌremhã.
E marĩ wa Ropotoꞌwa nhimirobꞌrudzé uburé danhimirobꞌrudzém nhipai u ĩwẽ.
E marĩ Jeová te tsima wẽ da te ꞌmanharĩ dzaꞌra da tinhimirobꞌrudzéb ꞌremhã ꞌre dahöimana dzaꞌra mono da.
TSÔ AIRĨTĨ DURÉ
E mame te ꞌre höimana Ropotoꞌwa nhimirobꞌrudzé. ꞌMadöꞌö Jesus te te ãma ĩrowahutudzé.
“Ropotoꞌwa nhimirobꞌrudzé e wapẽꞌẽ ꞌremhã te tihöiba.” (Ĩtsihötödzé jw.org na)
E marĩ wa, Jeová Watsuꞌuꞌwa norĩ te tsadawa dzamarĩ dzaꞌra Ropotoꞌwa nhimirobꞌrudzé ĩmorĩꞌrata uptabi na danhimirobꞌrudzéb upana.
Õ norĩ hã ma tô tsina ropitsutu dzaꞌra Ropotoꞌwa nhimirobꞌrudzé ma hã (1:43)
ꞌMadöꞌö Ropotoꞌwai mreme te te ĩnharĩdzé 144 mil norĩ na Jeová te te ꞌre ĩpitsutu dzaꞌra mono hã Jesus tsiré te te ꞌre roti dzaꞌra mono da.
“E ꞌwam norĩ höiwa u te dza aiꞌabaꞌré.” (Ĩtsihötödzé jw.org na)
E marĩ wa piꞌõ dadzadzéb ꞌremhã ma tô tsadze Ropotoꞌwa tsi te te ĩꞌuprotsi waihuꞌu petse na hã marĩ watsété norĩ dama ĩhöimana dzaꞌra.
“Wa tô uptsibi me e niha marĩ watsédé te dza uprotsi ni.” (Atsimidzaꞌretse!, novembro 2011 na)
-
-
Ropotoꞌwa nhimirobꞌrudzé ma tô tinhanaꞌrata!Rowẽ tsina ꞌre aihöimana uꞌötsi mono! — Bíblia na romnhoré te dza aima rowẽ
-
-
ROMNHORÉ 32
Ropotoꞌwa nhimirobꞌrudzé ma tô tinhanaꞌrata!
Ropotoꞌwa nhimirobꞌrudzé ma tô tinhanaꞌrata höiwa ãma wahum na 1914 na. Tô õhõ wahum na hã ma tô tinhanaꞌrata bötö ꞌrãtsutu norĩ hã danhimirobꞌrudzéb ꞌremhã. E marĩ dzarina tahã wama waihuꞌu petse dzaꞌra di. Wa dza ꞌmadöꞌö dzaꞌra ni Ropotoꞌwai mreme te te ãma ĩrowatsuꞌu tsirõmo dzé taha na duré we ꞌre ĩromhöimana mono dzé hã tiꞌai mono bö 1914 hawimhã.
1. E marĩ Ropotoꞌwai mreme ma tô rowatsuꞌu tsiro.
Daniel nhimirowatsuꞌu Ropotoꞌwai mreme ꞌremhã te wama waihuꞌu dzaꞌra Ropotoꞌwa nhimirobꞌrudzé hã dza ãma ĩtsãnaꞌrata na hã ‘7 na ãma wahu’ pariptsi. (Daniel 4:16, 17) Wahub ahö parimhã Jesus ma tô ꞌmahö ãhã 7 wahum norĩ ‘Judeuꞌõ norĩ hã, bödö tãma ĩwitsi dzaꞌra dzé hã te te tsina ĩꞌuwaimrami dzaꞌra dzém’ na duré ma tô rowahutu ãhã bödö dzahadu aré ĩtsiꞌutõrĩ õ na hã. (Lucas 21:24) Dza wa te ĩwaihuꞌu dzaꞌra dzéb dzarina ãhã bödö ma tô tiꞌrãtsutu 1914 na.
2. E marĩ te ꞌre romhöimana tiꞌai mono bö 1914 hawimhã.
Jesus tsiré ꞌre ĩnomro mono norĩ hã ma tô tsiwi tsadanha: ‘E marĩ te dza tsihöiꞌré, wa te ãma ĩwaihuꞌu dzaꞌra dzéb da hã, bödö ĩwitsi na apö dza we ĩꞌaimorĩdzé hã duré uburé ĩroptsiꞌutõrĩdzé hã.’ (Mateus 24:3) Jesus ma tô atsa tãma rowatsuꞌu tsirõmo dzaꞌra marĩ ahö na dza ꞌre ĩromhöimana dzaꞌra mono na te te ãma tsãnaꞌrata parimhã Rotiꞌwa na höiwa ãma. Ãma ĩtsimiré, ma tô ãma rowatsuꞌu tsiro datsiꞌwapé, datsa dzô dawi ĩrowaptöꞌödzé duré tiꞌai popo dza ĩromhöimana mono na hã. (Tsõré na Mateus 24:7.) Ropotoꞌwai mreme ma tô duré rowatsuꞌu tsiro ‘robꞌrãtsutu u hã oto roꞌrutu wamhã, dama mono hã ropire di dza.’ (2 Timóteo 3:1-5) Wahu 1914 hawimhã, ãne tsõꞌawi te we ꞌre romhöimana mono.
3. E marĩ wa, dama ropire di Ropotoꞌwa nhimirobꞌrudzé ãma ĩtsãnaꞌratadzém hawimhã.
Jesus te te ãma tsãnaꞌrata wi Rotiꞌwa na Ropotoꞌwa nhimirobꞌrudzéb ꞌremhã höiwa ãma, õ hã ma tô ꞌwapé Satanás duré waꞌuburé norĩ hã. Jesus ma tô ãma aiꞌuté dzaꞌra. Taha wa Ropotoꞌwai mreme te tinha Satanás duré waꞌuburé norĩ ‘te te tsiwi ĩtsãmra na tiꞌai u apö tsiꞌabaꞌré tõ da.’ (Apocalipse 12:9, 10, 12) Satanás te dza uprotsi ni duré tãma waihuꞌu petse di. Tawamhã tsahi uptabi di. Taha wa, te te ꞌre ꞌmanharĩ mono tiꞌai mono bö da te ꞌre robdzépata dzaꞌra mono da. Tahã te wama waihuꞌu dzaꞌra e marĩ wa, dama ropire uptabi di tiꞌai mono bö! Tadzahã Ropotoꞌwa nhimirobꞌrudzé te dza uprotsi uburé ropire norĩ hã.
WAIHUꞌU DURÉ
Te dza ĩwaihu e marĩ dzarina wama waihuꞌu petse dzaꞌra di Ropotoꞌwa nhimirobꞌrudzé ãma ĩtsãnaꞌrata na hã wahum na 1914 na. Te dza ĩꞌmadö duré e marĩ da tahã te warétsi dzaꞌra.
4. Ropotoꞌwai mreme nhimirowatsuꞌu ꞌrata dzarina Robꞌrudzé ma tô tinhanaꞌrata 1914 na
Duréihã Ropotoꞌwa ma tô rotsawẽrẽ titsõ Nabucodonosor ma Rotiꞌwa hã Babilônia ãma. Rotsawẽrẽ na Jeová ma tô tãma höiꞌré aptoꞌoré hã dza ĩwatobrodzé hã. Daniel ma tô ãma rowatsuꞌu rotsawẽrẽ waihuꞌudzé. Taha dzarina, rotsawẽrẽ hã te ãma tihöiba Nabucodonosor nhimirobꞌrudzém na hã duré Ropotoꞌwa nhimirobꞌrudzém na hã. — Atsiré tsõré aba Daniel 4:17.a
Atsiré tsõré aba Daniel 4:20-26. Taha parimhã ĩwaꞌõtõ dzarina ĩtsu 133 ãma, tsadaꞌöbö aba dadzadanharĩ norĩ piꞌrebamhã:
(A) E marĩ Nabucodonosor ma tô ꞌmadö tinhimirotsawẽrẽ na hã. — ꞌMadöꞌö aba ĩtsihötö ꞌrare 20 duré 21.
(B) E marĩ ma watobro wede dzô. — ꞌMadöꞌö aba ĩtsihötö ꞌrare 23.
(C) E marĩ ĩwatobrodzé ‘7 na ãma wahu’ parimhã. — ꞌMadöꞌö aba ĩtsihötö ꞌrare 26.
Wede rotsawẽrẽ na hã duré Ropotoꞌwa nhimirobꞌrudzé.
Roꞌmahörö ꞌrada (Daniel 4:20-36)
Ĩtsimirotidzé
(A) Wede ĩtsaꞌẽtẽ uptabi
Ĩtsimirotidzé te dza tsadzö
(B) ‘Maꞌãpé wede hã atsiwi mei waꞌaba tawamhã ãne na ꞌre höimana mono ré hã te dza 7 na ãma tiwahu’
Ĩtsimirotidzé te dza apö tinhanaꞌrata
(C) ‘Te dza apö tsiꞌapito’ robꞌrudzéb ãma
Roꞌmahörö ꞌrada hã ĩmorĩꞌrata na te te ãma uwaimrami wamhã . . .
(D) E ꞌwa wede hã te watsuꞌu. — ꞌMadöꞌö aba ĩtsihötö ꞌrare 22.
(E) E niwa ĩtsimirotidzé ma tô tsadzö. — Atsiré tsõré aba Daniel 4:29-33.
(F) E marĩ ma watobro Nabucodonosor dzô hã ‘7 ãma wahu’ parimhã. — Atsiré tsõré aba Daniel 4:34-36.
Ĩmorĩꞌrada te te ãma ĩꞌuwaimramidzé hã
Ĩtsimirotidzé
(D) Nabucodonosor Rotiꞌwa Babilônia ãma
Ĩtsimirotidzé te dza tsadzö
(E) Wahu 606 parimhã Jesus wana ré, Nabucodonosor ꞌrãi watsété wa te te roti waihuꞌu õ di 7 wahu uptabi ré hã.
Ĩtsimirotidzé te dza apö tinhanaꞌrata
(F) Nabucodonosor ꞌrãi petse di oto duré te dza apö daꞌãma roti
Roꞌmahörö ꞌrada hã maparane ãma na te te ãma uwaimrami wamhã . . .
(G) E ꞌwam norĩ hã wede hã te watsuꞌu. — Atsiré tsõré aba 1 Samuel 16:1.
(H) E niwa ĩtsimiroti dzaꞌra dzé hã ma tô tsadzö. E marĩ dzarina wama waihuꞌu petse dzaꞌra di te te ꞌre ĩroti dzaꞌra mono õ na hã Jesus Tiꞌai ãma ꞌre morĩ ré. — Atsiré tsõré aba Lucas 21:24.
(I) E niwa duré e mame ĩtsimirotidzé ma tô apö tinhanaꞌrata.
Maparane ãma te te ãma ĩꞌuwaimramidzé
Ĩtsimirotidzé
(G) Rotiꞌwa Israel nhihudu norĩ Ropotoꞌwa dzadawa para te te ꞌre ĩroti dzaꞌra mono hã
Ĩtsimirotidzé te dza tsadzö
(H) Jerusalém ma tô uprotsi ni duré Rotiꞌwa Israel nhihudu norĩ nhimirotidzé ma tô tsadzö 2.520 wahub ré hã
Ĩtsimirotidzé te dza apö tinhanaꞌrata
(I) Jesus ma tô ãma tsãnaꞌrata Rotiꞌwa na höiwa ãma Ropotoꞌwa nhimirobꞌrudzéb ãma
E niha bödö uburé hã ãhã ‘7 wahu’.
Nimahã romnhihötö norĩ Ropotoꞌwai mreme ꞌremhã te wama waihuꞌu dzaꞌra romnhihödö ĩhöiba amo norĩ hã ĩꞌremhã. Ãma ĩtsimiré, ĩhöiwarobo Apocalipse te tinha tsiꞌubdatõ wahum nhipai u ãma tsipoꞌo na 1.260 bötö na. (Apocalipse 12:6, 14) Taha dzarina mitsi wahu roꞌmahörö ꞌrata ꞌremhã te watsuꞌu 360 bödö, tawamhã 7 wahu te watsuꞌu 2.520 bödö. Nimahã na hã Ropotoꞌwai mreme ꞌremhã damreme bödö te watsuꞌu wahu. (Ezequiel 4:6 TNM) Tawamhã 7 wahu Daniel nhimirowatsuꞌu ꞌremhã te watsuꞌu 2.520 wahu.
5. Wahu 1914 hawimhã romhöimanadzé hã tiꞌai mono bö ma tô ãma tsaprĩ
Jesus ma tô rowatsuꞌu tsiro niha na romhöimanadzé hã Rotiꞌwa na te te ãma tsãnaꞌrata parimhã. Atsiré tsõré aba Lucas 21:9-11. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ te ꞌre ĩꞌmadöꞌö mo Jesus te te ꞌre ĩrowatsuꞌu mono dzém na hã.
Apóstolo Paulo ma tô rowatsuꞌu niha na dahöimanadzé hã danhimirobꞌrudzéb ꞌrãtsutu u romhutu wamhã. Atsiré tsõré aba 2 Timóteo 3:1-5. Taha parimhã atsima robdzanhamri aba ãhã dadzadanharĩ ãma piꞌrebamhã:
Aima hã, e te ꞌre dahöimana dzaꞌra ã bötö na Paulo te te ĩrowatsuꞌudzéb dzarina.
6. Höiꞌré na atsimidzadze Ropotoꞌwa nhimirobꞌrudzé oto te te ꞌre ĩroti mono na hã
Atsiré tsõré aba Mateus 24:3, 14. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E ma hã romhuri ĩpire te höiꞌré Ropotoꞌwa nhimirobꞌrudzé oto te te ĩroti mono na hã.
E niha te dza dame aihöiba ãhã romhuri na hã.
Ropotoꞌwa nhimirobꞌrudzé te te ꞌre roti oto höiwa ãma duré romhutu na Tiꞌai ãma wahuré te dza tiromhöiba. Atsiré tsõré aba Hebreus 10:24, 25. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ wahöiba mono bö wa te ĩꞌmanharĩ dzaꞌra da tsi ‘bödö hã romhutu na wama waihuꞌu petse dzaꞌra wa.’
Aima waihuꞌu petse ꞌwaꞌöhã marĩ dapawaptobdzéb da hã duré danhoꞌreptudzéb da hã, e marĩ te aré ĩꞌmanha.
NIꞌWA TE TE ATSADANHARĨ WAMHÃ BÉTÉ: “E marĩ wa, wahu 1914 ĩpire uptabi Jeová Watsuꞌuꞌwa norĩ ma hã.”
E niha te dza ĩtsadaꞌö.
ĨWAIHUꞌUDZÉ HÃ
Ropotoꞌwai mreme nhimiroꞌmahörö ꞌrata norĩ hã duré romhöimanadzé hã tiꞌai mono bö te wama höiꞌré dzaꞌra Ropotoꞌwa nhimirobꞌrudzé oto te te ꞌre ĩroti mono na hã. Wa te dama roꞌmahörö dzaꞌra wamhã duré datsiꞌrãꞌõtõ norĩ hã wa te ꞌmadöꞌö dzaꞌra wamhã wa höiꞌré dzaꞌra ni taha na wa te ĩtsadze dzaꞌra na hã.
Ãma aipoꞌre puꞌu
E marĩ ma watobro 7 wahu Daniel te te ĩwatsuꞌudzé tsiꞌutõrĩ parimhã.
E marĩ dzarina te ãma atsimidzadze Ropotoꞌwa nhimirobꞌrudzé ãma ĩtsãnaꞌrata na hã wahum na 1914 na.
E niha te dza ĩhöiꞌré atsimidzadze Ropotoꞌwa nhimirobꞌrudzé oto te te ꞌre ĩroti mono na hã.
TSÔ AIRĨTĨ DURÉ
ꞌMadöꞌö romnhoré petse ꞌwa norĩ duré ĩhöiba amo norĩ te te ĩnharĩ dzaꞌra dzé we ꞌre ĩromhöimana dzaꞌra mono dzém na hã 1914 hawimhã.
“Dahöimana nhitsé ꞌre ĩtsiwamnarĩ petse mono dzé hã” (Atsimidzaꞌretse!, abril 2007 na)
ꞌMadöꞌö e niha roꞌmahörö ꞌrada hã Mateus 24:14 ãma ma tô tsaprĩ aibö höimanadzé hã.
“Dato beisebol na ĩ̱ma tsawi di aré uburé nhipai u!” (Roꞌmadöꞌöꞌwa, nº. 3 2017 na)
E marĩ dzarina wama waihuꞌu petse dzaꞌra di roꞌmahörö ꞌrada hã Daniel ĩtsihötö wawẽ 4 ãma te te ĩwatsuꞌu na hã Ropotoꞌwa nhimirobꞌrudzém na hã.
E marĩ dzarina wama waihuꞌu petse dzaꞌra di “7 wahu” Daniel ĩtsihötö wawẽ 4 ꞌremhã ĩtsiꞌutõrĩ na hã 1914 na.
a ꞌMadöꞌö aba maparane ĩtsihötödzé ĩꞌrãtsutu norĩ ĩwaꞌõtõ ꞌremhã ‘Tsô airĩtĩ duré’, ãhã romnhoré na hã.
-
-
E marĩ Ropotoꞌwa nhimirobꞌrudzé te dza ãma uwaimra.Rowẽ tsina ꞌre aihöimana uꞌötsi mono! — Bíblia na romnhoré te dza aima rowẽ
-
-
ROMNHORÉ 33
E marĩ Ropotoꞌwa nhimirobꞌrudzé te dza ãma uwaimra.
Ropotoꞌwa nhimirobꞌrudzé oto te te ꞌre roti höiwa ãma. Romhutu na marĩ ahö na te dza ãma tsaprĩ Tiꞌai ãma. Wa dza ꞌmadöꞌö dzaꞌra ni nimahã marĩ ĩwẽ norĩ Ropotoꞌwa nhimirobꞌrudzé dza te te ĩꞌmanharĩdzé.
1. E niha Ropotoꞌwa nhimirobꞌrudzé te dza ãma uwaimra rowẽ na ĩbö dzarina datsima ꞌre dahöimana dzaꞌra mono da Tiꞌai ãma.
Jesus, Rotiꞌwa na Ropotoꞌwa nhimirobꞌrudzéb ꞌremhã te dza daꞌuprotsi ꞌre ĩdahöimana watsété dzaꞌra mono norĩ hã dama ĩpire norĩ me datsiꞌwapéi ãma hã Armagedom na ĩtsitsi. (Apocalipse 16:14, 16) Ãhã watobro wamhã Ropotoꞌwai mreme nhimiropitsudu hã te dza duré ãma uwaimra: ‘Tiwatsédé te te ꞌre ĩꞌmanharĩ dzaꞌra mono norĩ hã te dza te te ꞌre adzani tiꞌai hawi.’ (Provérbios 2:22) Ropotoꞌwa nhimirobꞌrudzém hawimhã Jesus te dza ãma uwaimra rowẽ na ĩbö dzarina datsima ꞌre dahöimana dzaꞌra mono da tiꞌai mono bö. — Tsõré na Salmo 72:12-14.
2. E niha dza wahöimanadzé hã Ropotoꞌwa te te tsima ĩwẽdzé hã Tiꞌai ãma watobro wamhã.
Ãma rotsaꞌrata e niha dza dahöimanadzé hã Ropotoꞌwa nhimirobꞌrudzéb ꞌremhã: ĩwẽ norĩ tsi te dza ꞌre höimana dzaꞌra. Aihĩni te dza da te ꞌre tsawi dzaꞌra Jeová duré te dza ꞌre datsitsawi petse dzaꞌra! Niꞌwa hödzé õ di dza oto duré aihĩni te dza õne uꞌö ꞌre dahöimana uꞌötsi dzaꞌra. Tahã tô tsena te dza watobro Ropotoꞌwai mreme te te ropitsutu wa: ‘Wẽ na ĩꞌuwaibaba na tsi ꞌre ĩhöimana dzaꞌra mono norĩ tsi te dza wanhiptiꞌai ꞌremhã ꞌre höimana dzaꞌra.’ — Provérbios 2:21.
3. E marĩ Ropotoꞌwa nhimirobꞌrudzé hã te dza ãma uwaimra ĩhöimana watsété norĩ hã tsiꞌutõrĩ dzaꞌra parimhã.
Ĩhöimana watsété norĩ hã tsiꞌutõrĩ dzaꞌra parimhã Jesus te dza te te ꞌre roti mil wahub ꞌre hã. Taha ré, õ hã 144 mil norĩ titsiré Rotiꞌwa norĩ me te dza te te ꞌre dapawaptob dzaꞌra Tiꞌai ãma ꞌre ĩdahöimana dzaꞌra mono norĩ hã dawatsété ãna duré danhimiꞌupaiꞌõ ꞌre dahöimana dzaꞌra mono da. Mil na ãma wahu parimhã, Tiꞌai wahuré hã dza ro ĩwẽ uptabi duré aihĩni te dza ꞌre dahöimana dzaꞌra robdzei uptabi na da te ꞌre tsadawa dzamarĩ dzaꞌra mono wa Ropotoꞌwa nhimiroti. Tawamhã Jesus te dza apö titsõ Robꞌrudzé hã Timama ma hã, Jeová ma. Ropö Jeová nhitsi te dza da te ꞌre wadzéb dzaꞌra ĩpetse na. (Mateus 6:9, 10) Te dza da te ꞌre waihuꞌu dzaꞌra tsõꞌawi Jeová tô Rotiꞌwa daꞌãma ĩpẽꞌẽdzé na. Tawamhã Jeová te dza uprotsi Satanás, waꞌuburé norĩ duré tsiwaꞌru ĩtsimirobꞌrudzéb dzada ꞌre ĩhöimana dzaꞌra mono norĩ. (Apocalipse 20:7-10) Uburé marĩ ĩwẽ Ropotoꞌwa nhimirobꞌrudzé te te ãma ĩꞌuwaimramidzé õne uꞌö te dza ꞌre höimana uꞌötsi.
WAIHUꞌU DURÉ
Te dza ĩꞌmadö e marĩ dzarina wa te umnhatsi waihuꞌu petse dzaꞌra di Ropotoꞌwa tinhimirobꞌrudzém hawimhã dza te te ãma ĩꞌuwaimrami na hã uburé tinhimiropitsutu norĩ ĩmreme ꞌremhã aptoꞌoré wab da.
4. Ropotoꞌwa nhimirobꞌrudzé te dza uprotsi uburé danhimirobꞌrudzé
Ropotoꞌwai mreme te tinha da te ꞌre ĩrobdzépata dzaꞌra mono na danhimiwadaꞌuri uꞌöbö. (Êxodo 1:13, 14) Jeová tinhimirobꞌrudzém hawimhã te dza uprotsi ãhã romhöimana watsédé.
Atsiré tsõré aba Daniel 2:44 duré 2 Tessalonicenses 1:6-8. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E marĩ Jeová duré Jesus te dza ꞌmanharĩ dzahuré ĩpire na dama ĩhöimana dzaꞌra ma hã duré te te tsiwi ĩꞌupariꞌwai ma hã.
Jeová ãma duré Jesus ãma ĩwaihuꞌudzéb dzarina e marĩ wa, tsadzei waihuꞌu petse di, dza te te ĩꞌmanharĩ dzahuré dzé hã tô ĩbö na hã.
5. Jesus Rotiꞌwa hã danhipai u ĩwẽ
Rotiꞌwa na Ropotoꞌwa nhimirobꞌrudzéb ꞌremhã Jesus te dza ꞌmanha marĩ ahö na te te dapawaptob da Tiꞌai ꞌre. Atsiré ꞌmadöꞌö aba ĨROPODO te te ĩhöiꞌré hã Jesus te te ĩdapawaptobdzém na hã duré Ropotoꞌwa ĩtsiptetedzé te te tãma ĩtsõmri na hã ãne te te ꞌmanharĩ da.
Te te ĩꞌmanharĩdzém na hã Tiꞌai ꞌre morĩ ré, Jesus ma tô ãma tsimiréꞌé dza te te ĩꞌmanharĩdzé Rotiꞌwa na Ropotoꞌwa nhimirobꞌrudzéb ãma. E mahã ropitsutu norĩ piꞌrebamhã ĩhöimana dzaꞌra te atsima ĩwẽ pe wairébé da. Atsiré tsõré aba romnhihötö norĩ Ropotoꞌwai mreme ꞌremhã ãhã ropitsutu norĩ na waihuꞌu petse aba da.
TIꞌAI ÃMA MORĨ RÉ JESUS . . .
HÖIWA HAWIMHÃ JESUS . . .
ma tô ꞌmanha ö tsitsatsi duré rowaꞌu te te tsadzöri da. — Marcos 4:36-41.
te dza uprotsi rowamnarĩ mono dzé hã Tiꞌa dzô ĩwairébé mono hã. — Isaías 35:1, 2 (TNM).
datsa daꞌahö uptabi ma hã ma tô a. — Mateus 14:17-21.
te dza uprotsi mra tiꞌai mono bö. — Salmo 72:16.
ma tô daꞌapetse. — Lucas 18:35-43.
te dza ꞌmanha aihĩni dahödzé ãna ꞌre dahöimana dzaꞌra mono da. — Apocalipse 22:1, 2.
ma tô dahöiwaꞌutu. — Lucas 8:49-55.
te dza dahöiwaꞌutu duré te dza uprotsi dadö. — Apocalipse 21:3, 4.
6. Ropotoꞌwa nhimirobꞌrudzéb ꞌremhã wama ꞌre rowẽ dzaꞌra mono di dza
Ropotoꞌwa nhimirobꞌrudzéb ꞌremhã rowẽ uptabi na wa dza ꞌre wahöimana dzaꞌra Jeová te te tsima ĩwẽdzéb dzarina robnaꞌrata hawimhã. Wa dza ꞌre wahöimana uꞌötsi dzaꞌra Ro ĩwẽ ãma Tiꞌai ꞌre. Atsiré ꞌmadöꞌö aba ĨROPODO waihuꞌu aba da Jeová dza te te ĩꞌmanharĩdzé Jesus uꞌöbö te te tsima ĩwẽdzé hã Tiꞌai ꞌre watobro da.
Atsiré tsõré aba Salmo 34:9, 10. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha te aihöiba waihuꞌu wamhã ‘Jeová nhimipawaptobdzéb dzô tsima ꞌre ĩtsõpré mono norĩ wi hã, tiwi tsô ꞌre ĩrobaba dzaꞌra mono õ na hã, marĩ dzô.’
NIꞌWAM NORĨ TE NHARĨ DZAꞌRA ÃNE: “Tsimitsutu na wa te romhuri dzaꞌra wamhã wa te uprotsi waihuꞌu petse dzaꞌra di dza ropire ꞌre ĩhöimana dzaꞌra mono hã.”
E mahã ropire norĩ danhimirobꞌrudzé te te ĩꞌuprotsi waihuꞌu õ Ropotoꞌwa nhimirobꞌrudzé te dza uprotsi.
ĨWAIHUꞌUDZÉ HÃ
Ropotoꞌwa nhimirobꞌrudzé hã te dza ãma uwaimra uburé Jeová te te tsima ĩwẽdzé hã. Te dza ãma tsaprĩ Tiꞌa Ro ĩwẽ na hã duré ĩwa ĩhöimana wẽ norĩ hã te dza ꞌre höimana uꞌötsi dzaꞌra Jeová ãma ꞌre wata uꞌötsi dzaꞌra mono tsina.
Ãma aipoꞌre puꞌu
E niha Ropotoꞌwa nhimirobꞌrudzé te dza ꞌmanha da te ꞌre wadzéb dzaꞌra mono da Jeová nhitsi ĩpetse na.
E marĩ dzarina wa dza tsadze dzaꞌra ni Ropotoꞌwa nhimirobꞌrudzé dza te te ãma ĩꞌuwaimrami na hã Ropotoꞌwai mreme nhimiropitsutu norĩ hã.
E marĩ te atsima ĩwẽ pe Ropotoꞌwa nhimirobꞌrudzé te te ãma uwaimrami da.
TSÔ AIRĨTĨ DURÉ
Uptsibi me na e marĩ Armagedom.
“E marĩ datsiꞌwapé Armagedom na ĩtsitsi.” (Ĩtsihötödzé jw.org na)
ꞌMadöꞌö e niha dza robdzépada tsaꞌẽtẽ na Jesus te te ĩnharĩ hã watobro wamhã. — Mateus 24:21
“E marĩ robdzépada ĩtsaꞌẽne Jesus te te ĩnharĩ hã.” (îtsihötödzé jw.org)
ꞌMadöꞌö e niha tsada hã damama, dana, daꞌra norĩ me te te tsina rotsaꞌrata dzaꞌra da Ro ĩwẽ ãma.
Ĩtsihötödzém na hã “Ĩ̱nhimirotsaꞌrada pire di aré dadzadanharĩ ahö wa”, ꞌmadöꞌö e niha aibö dama ĩpire norĩ dzada aré ꞌre ĩhöimana mono hã ma tô uptsibi me tsô ꞌre ĩrĩtĩ mono dzé hã.
“Ropotoꞌwai mreme te te daꞌadzaprĩ waihuꞌu petse di” (Roꞌmadöꞌöꞌwa, 1.ºjaneiro na, 2012 na)
-