ROMNHORÉ 28
Höiꞌré na atsima ĩrowẽ na hã Jeová duré Jesus te te aima ĩꞌmanharĩ dzahuré dzém na
E niha te aihöiba atsiwaihu aima tsõpru wamhã. Tô tsena aima robdzei uptabi di dza duré te dza atsima ĩwẽ tãma höiꞌré da ĩtsõprubdzém na atsima ĩrowẽ na hã. Jeová duré Jesus ma tô wama tinhoprub dzaꞌra marĩ danhipai u ĩwẽ na hã: dawaꞌöbödzém na. E niha wa dza höiꞌré dzaꞌra ni wa te watsima ĩrowẽ dzaꞌra na hã dawaꞌöbödzém na hã.
1. E niha wa dza höiꞌré dzaꞌra ni Jeová duré Jesus te te wama ĩꞌmanharĩ dzahuré dzé hã wama ĩpire na hã.
Ropotoꞌwai mreme te ropitsutu ‘uburé te te ꞌre ĩtsadze dzaꞌra mono hã Jesus’ dza ꞌre ĩhöimana uꞌötsi dzaꞌra mono na hã. (João 3:16) E niha tahã wa dza ꞌmanharĩ dzaꞌra ni. Taré wa te watsina umnhatsi dzaꞌra õ di dza Jesus. Wa te ĩhöiꞌré dzaꞌra da tsi wanhimidzadze wanhimipitsutudzém na duré wanhimiꞌmanharĩ na. (Tiago 2:17) Wa te höiꞌré dzaꞌra wamhã wanhimidzadze wamreme na duré wanhimiꞌmanharĩ na wa dza tsiptete dzaꞌra ni watsiwaihuꞌudzé Jesus ãma duré Ĩmama ãma, Jeová ãma. — Tsõré na João 14:21.
2. E mahã datsiꞌrãꞌõno ĩpire uptabi na wa dza höiꞌré dzaꞌra ni Jeová duré Jesus nhimiꞌmanharĩdzém na wa te ãma watsima ĩrowẽ dzaꞌra na hã.
Barana döꞌö wana ré Jesus ma tô ãma atsanho tidzadawa dzamarĩꞌwa norĩ ma e niha te te ĩhöiꞌré dzaꞌra da hã ĩdöꞌödzé tãma ĩpire dzaꞌra na hã. Te tinha ꞌre tsiꞌrãꞌõtõ mono da mara ĩpire uptabi na. Ãhã datsiꞌrãꞌõtõ nhitsi hã Datsipoꞌre puꞌudzé Jesus döꞌödzém na. (1 Coríntios 11:20) Jesus te tsima wẽ apóstolo norĩ duré aihĩni tidzadawa dzamarĩꞌwa norĩ hã ĩtsaꞌu ꞌre tsipoꞌre puꞌu dzaꞌra mono da wadzada ĩdöꞌö dzaꞌra na hã. Taha wa, te tiꞌru: ‘Manharĩ dzaꞌra waꞌaba mono, ãhã ĩ̱ꞌãma rotsaꞌrata tsina hã.’ (Lucas 22:19 RTN) Datsipoꞌre puꞌudzéb u Jesus döꞌödzém na aimorĩ wamhã te dza ĩhöiꞌré atsima ĩrowẽ na hã Jeová duré Jesus nhimidzawi dzaꞌẽtẽ dzém na waꞌãma.
WAIHUꞌU DURÉ
Te dza ĩwaihu e niha te dza ĩhöiꞌré aima ĩpire na hã Jeová duré Jesus nhimidzawi dzaꞌẽtẽ dzé waꞌãma hã. Te dza ĩꞌmadö duré e marĩ wa, Datsipoꞌre puꞌudzé Jesus döꞌödzém na ĩpire uptabi.
3. Höiꞌré na Jesus döꞌödzé aima ĩpire na hã
Ãma rotsaꞌrata öi ba ĩꞌaiwaptãꞌã na. Tadzahã airibi waihuꞌu õ di. Tawamhã niꞌwa te te atsõꞌreptu da te dza atẽme waptãrã. E marĩ te dza ĩꞌmanha te te atsõꞌreptu parimhã. E taré te dza ãma aipoꞌre tsiꞌö te te aima ĩꞌmanharĩdzém na hã. E te dza tsada atsipte tãma höiꞌré da atsima ĩrowẽ na te te aima ĩꞌmanharĩdzém na hã.
Jeová te te ĩꞌmanharĩdzéb uꞌöbö tsada hã ꞌre wahöimana uꞌötsi dzaꞌra mono da. Atsiré tsõré aba 1 João 4:8-10. Taha parimhã, atsima robdzanhamri aba ãhã dadzadanharĩ norĩ ãma piꞌrebamhã:
E marĩ wa Jesus döꞌödzé wama ĩpire uptabi.
E niha te ĩrotsaꞌra Jeová duré Jesus te te aima ĩꞌmanharĩ dzahuré dzém na hã.
E niha wa dza höiꞌré dzaꞌra ni Jeová duré Jesus te te wama ĩꞌmanharĩ dzaꞌra dzé hã wama ĩpire uptabi na hã. Atsiré tsõré aba 2 Coríntios 5:15 duré 1 João 4:11; 5:3, 4. Taha parimhã atsima robdzanhamri aba ãhã dadzadanharĩ ãma piꞌrebamhã:
Romnhihötö norĩ dzarina e niha wa dza höiꞌré dzaꞌra ni Jeová duré Jesus te te wama ĩꞌmanharĩ dzaꞌra dzém na wa te watsima ĩrowẽ dzaꞌra na hã.
4. Tsidzutsi Jesus
Wa dza duré höiꞌré dzaꞌra ni atsa wanhimidzawi Jesus nhidzutsi na. Atsiré tsõré aba 1 Pedro 2:21. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha Jesus höimanadzéb dzarina te dza ꞌre aihöimana mo.
Jesus ma tsawi di Ropotoꞌwai mreme, ma tô dama roꞌmahö roꞌmahörö wẽ na duré ma tô dapawapto.
5. Datsipoꞌre puꞌudzéb u Jesus döꞌödzém na dame aihöimana
Waihuꞌu aba da Jesus tsitsanhodzé tidöꞌödzém na datsipoꞌre puꞌudzéb da, atsiré tsõré aba Lucas 22:14, 19, 20. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E niha Jesus ma tô ãma atsanho tidöꞌödzém na datsipoꞌre puꞌudzéb da.
E marĩ ĩꞌuꞌẽne hã duré robꞌrãi waꞌu hã te watsuꞌu dzahuré. — ꞌMadöꞌö aba ĩtsihötö ꞌrare 19 duré 20.
Jesus te tsima wẽ tidzadawa dzamarĩꞌwa norĩ hã datsiré ꞌre tsiꞌrãꞌõtõ mono da bödö ĩdöꞌödzém na wahup tsidöpötsi ãma ꞌre tsipoꞌre puꞌu dzaꞌra mono da. Taha wa, Jeová Watsuꞌuꞌwa norĩ te natsi datsiré tsiꞌrãꞌõtõ wahup tsidöpötsi Jesus döꞌödzém na ꞌre tsipoꞌre puꞌu dzaꞌra mono da ãma ĩtsitsanho dzarina. Waihuꞌu petse aba da ãhã datsiꞌrãꞌõno ĩpire ĩꞌuptabi na, atsiré ꞌmadöꞌö aba ĨROPODO hã. Ãhã ĩropodo te ãma rowatsuꞌu petse ãhã datsiꞌrãꞌõno ĩpire uptabi na. Atsiré ꞌmadöꞌö aba parimhã, atsima robdzanhamri aba ãhã dadzadanharĩ ãma piꞌrebamhã:
E marĩ te tihöiba Datsipoꞌre puꞌudzém na Jesus döꞌödzém na.
Datsipoꞌre puꞌudzém na Jesus döꞌödzém na ĩꞌuꞌẽtẽ wapu hã te watsuꞌu ĩhöiba watsété ãna te te wadzada ĩtsõmri dzaꞌra. Robꞌrãi waꞌu hã te watsuꞌu ĩwapru hã.
NIꞌWAM NORĨ TE NHARĨ DZAꞌRA ÃNE: “Jesus tsadzei wamhã te dza atsitsõꞌreptu oto.”
E niha te dza ãma ĩrowatsuꞌu João 3:16 duré Tiago 2:17 dzarina datsitsõꞌreptudzéb da hã taha tsi õ na hã.
ĨWAIHUꞌUDZÉ HÃ
Wa te ĩhöiꞌré dzaꞌra da tsi Jesus nhimiꞌmanharĩdzé wama ĩpire dzaꞌra na hã. Taha da wanhimipitsutudzém na duré wanhimiꞌmanharĩ na wa dza höiꞌré dzaꞌra ni wanhimidzadze õhõ ãma. Wa dza duré dame wahöimana dzaꞌra ni Datsipoꞌre puꞌudzéb u ĩdöꞌödzém na hã.
Ãma aipoꞌre puꞌu
E niha te dza ĩhöiꞌré atsimidzadze Jesus ãma.
E niha te dza ĩhöiꞌré atsima ĩrowẽ na hã Jeová duré Jesus te te aima ĩꞌmanharĩ dzahuré dzém na.
E marĩ wa, ĩpire uptabi Datsipoꞌre puꞌudzéb u Jesus döꞌödzém na dame wahöimana dzaꞌra da.
TSÔ AIRĨTĨ DURÉ
E marĩ da Jesus döꞌödzé te warétsi dzaꞌra.
Waihuꞌu petse danhimidzadze höiꞌrédzém na hã.
“Höiꞌré na atsimidzadze Jeová nhimiropitsutu norĩ na” (Roꞌmadöꞌöꞌwa, outubro 2016 na)
Tsõré na ĩtsihötödzé “Ĩ̱höiba petse na duré robdze na wa ꞌre ĩ̱höimana”, waihuꞌu da e niha piꞌõ ma tô tihöimanadzém na tsaprĩ Jesus nhimiwaꞌöbödzé te te waihuꞌu parimhã.
“Ropotoꞌwai mreme te te daꞌadzaprĩ waihuꞌu petse di” (Roꞌmadöꞌöꞌwa, 1.º agosto na, 2011 na)
Tsadaihuꞌu petse e marĩ wa, daꞌumro na tsi te dza ꞌrẽne dzaꞌra ni ĩꞌuꞌẽtẽ wapu hã duré te dza höꞌrẽne dzaꞌra ni robꞌrãi waꞌu hã Datsipoꞌre puꞌudzém na Jesus döꞌödzém na.