ROMNHORÉ 19
E Jeová Watsuꞌuꞌwa norĩ tô tsena Cristo dzadawa dzamarĩꞌwa ĩꞌuptabi.
Wa norĩ hã, Jeová Watsuꞌuꞌwa, wa tsadze dzaꞌra ni Cristo dzadawa dzamarĩꞌwa ĩꞌuptabi na ꞌre ĩwahöimana dzaꞌra mono na. E marĩ wa. Ãhã romnhoré na hã wa dza ꞌmadöꞌö dzaꞌra ni e marĩ dzarina wanhimidzadze te tihöiba, e marĩ wa, wanhitsi dzaꞌra Jeová Watsuꞌuꞌwa na duré e niha wa höiꞌré dzaꞌra ni ꞌre ĩwatsitsawi petse dzaꞌra mono na hã.
1. E marĩ dzarina Jeová Watsuꞌuꞌwa norĩ nhimidzadze te tihöiba.
Jesus te tinha Ropotoꞌwai ma: ‘Atsimiroti hã tô tsena uptabi.’ (João 17:17) Jesus ne, wanhimidzadze Ropotoꞌwai mreme dzarina te tihöiba. ꞌMadöꞌö wawatsuꞌu hã wahu 1870 hawim haré. Õhõ bötö na, niꞌwam norĩ ma tô ãma tsãnaꞌrata dzaꞌra Ropotoꞌwai mreme na tsimiꞌẽ na te te romnhoré dzaꞌra da rowahutu uptabi dzô. Ropotoꞌwai mreme nhimirowahudu te te tsiwi waihuꞌu wamhã, taha na te dza tsadze dzaꞌra, ãhã höimana õ nherẽ rowahutudzé ĩhöiba amo norĩ nhimirowahutu ne. Taha parimhã, rowahutu uptabi te te ĩꞌuptsibi me dzaꞌra hã te dza dama waihuꞌu dzaꞌra.a
2. E marĩ wa, wanhitsi dzaꞌra Jeová Watsuꞌuꞌwa na.
Jeová te ꞌmahö ãma ꞌre ĩdawata dzaꞌra mono norĩ hã ĩwatsuꞌuꞌwa na ĩwatsuꞌu uptabi hã te te dama watsuꞌu dzaꞌra wa. (Hebreus 11:4–12:1) Ãma ĩtsimiré, duréihã Ropotoꞌwa te tinha tinhibꞌaꞌuwẽ norĩ ma: “A norĩ waꞌwa hã ĩ̱watsuꞌuꞌwa norĩ hã.” (Tsõré na Isaías 43:10 TNM.) Ropotoꞌwai mreme dzarina, Jesus ‘ꞌRe ĩhöimana uꞌötsi mono dzadawa watsuꞌu wẽ ꞌwa.’ (Apocalipse 1:5) Taha wa, 1931 na wa tô watsitsitsi dzaꞌra ni Jeová Watsuꞌuꞌwa na. Wama rowẽ uptabi dzaꞌra di wanhitsi na hã.
3. E niha Jeová Watsuꞌuꞌwa norĩ te tsidzutsi dzaꞌra Jesus nhimidzawidzé.
Jesus ma tsawi petse uptabi di tidzadawa dzamarĩꞌwa norĩ. Tãma hã, õ norĩ hã ĩno duré ĩhidiba norĩ ne te ꞌre höimana dzaꞌra. (Tsõré na Marcos 3:35.) Ãne duré, Jeová Watsuꞌuꞌwa norĩ tsimitsutu na datsitsãnawã norĩ na te ꞌre höimana dzaꞌra tiꞌai mono bö. Taha wa, te tsiꞌmahörö dzaꞌra datsitsãnawã na duré dahidiba na. (Filêmon 1,2) Wa duré tsadawa dzamarĩ dzaꞌra ni roti hã: ‘Atsitsãnawã norĩ ĩtsadzeiꞌwa norĩ hã ꞌre tsawi petse dzaꞌra waꞌaba mono.’ (1 Pedro 2:17) Wanhimidzawidzé niha na ahö na wa höiꞌré dzaꞌra ni, danhipai u ĩpire na watsitsãnawã norĩ dzô ropire tsô watobro dzaꞌra wamhã.
WAIHUꞌU DURÉ
Te dza ĩwaihuꞌu pe Jeová Watsuꞌuꞌwa norĩ watsuꞌu duré marĩ ĩhöiba amo norĩ te te ĩhöiꞌré dzaꞌra õ norĩ hã tô Cristo dzadawa dzamarĩꞌwa ĩꞌuptabi na hã.
Cristo dzadawa dzamarĩꞌwa ĩꞌuptabi norĩ nhimidzadze Ropotoꞌwai mreme dzarina te tihöiba duré te dama ãma rowahutu dzaꞌra
4. Ropotoꞌwai mreme dzarina wanhimidzadze te tihöiba
Jeová ma tô rowatsuꞌu tsiro bödö ãma morĩ tsidöpötsi Ropotoꞌwai mreme nhimirowahudu tsõꞌawi dza wa te ĩtsadaihuꞌu dzaꞌra na hã. Atsiré tsõré aba Daniel 12:4. Taha parimhã atsima robdzanhamri aba ãhã dadzadanharĩ ãma piꞌrebamhã:
Ropotoꞌwa nhibꞌaꞌuwẽ norĩ Ĩmreme na te te ꞌre romnhoré dzaꞌra mono tsidöpötsi, e marĩ ‘te dza tsima tsaꞌẽtẽ dzaꞌra’.
ꞌMadöꞌö e niha aibö Charles Russell na ĩtsitsi titsiré norĩ me ma tô romnhoré dzaꞌra Ropotoꞌwai mreme na. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.
Ĩropoto dzarina, e niha Charles Russel titsiré norĩ me ma tô romnhoré dzaꞌra Ropotoꞌwai mreme na.
E ma tô ĩwaihu.
Nimahã na hã, wa norĩ hã wa tsaprĩ dzaꞌra ni wanhimirowaihuꞌu na hã Ropotoꞌwai mreme na. E marĩ wa. Bötö ro te te ꞌre ĩrowapré mono wim ne, te te ꞌre ĩrowaꞌa petse mono dzéb u, Ropotoꞌwa tsuru tsidöpötsi te wama höiꞌré dzaꞌra ĩmreme ꞌremhã ĩhöimana na hã. (Tsõré na Provérbios 4:18.) Ropotoꞌwai mreme tsitsaprĩ õ nherẽ, wa tsaprĩ dzaꞌra ni wanhimirowaihuꞌu na hã danhipai u wẽ na wa te ĩtsadaihuꞌu dzaꞌra mono dzarina.
5. Jeová Watsuꞌuꞌwa norĩ: wanhitsi dzarina wa ꞌre wahöimana dzaꞌra
E marĩ wa, wa tô watsitsitsi dzaꞌra ni Jeová Watsuꞌuꞌwa na. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ wa, ĩtsarina danhitsi hã Jeová Watsuꞌuꞌwa.
E marĩ wa, Jeová ma tô dapitsutu ĩwatsuꞌuꞌwa da hã. Dadzadawa nhipe ahö di Jeová ãma. Taha wa, ma tô dapitsutu ĩwatsuꞌu uptabi da te dama waihuꞌu dzaꞌra da. ꞌMadöꞌö maparane dadzadawa nhipe da te ãma ĩnharĩ dzaꞌra hã.
Nimahã danhimidzadze norĩ te dama rowahutu dzaꞌra Ropotoꞌwa te te tsima ĩwẽ na hã ãma dawata dzaꞌra da romhöiba ꞌmanharĩ hawi. E ãhã ĩbö. Atsiré tsõré aba Êxodo 20:4. Taha parimhã atsima robdzanhamri aba ãhã dadzadanharĩ ãma piꞌrebamhã:
E Ropotoꞌwa tô tsena te tsima wẽ ãma wawata dzaꞌra da romhöiba ꞌmanharĩ hawi. E niha Jeová te rotsaꞌrata romhöiba ꞌmanharĩ norĩ ãma.
Nimahã danhimidzadze norĩ te dama rowahutu dzaꞌra Jesus Ropotoꞌwa na. E ãhã ĩbö. Atsiré tsõré aba João 20:17. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Jesus duré Ropotoꞌwa e tô tsena mitsi haré.
Ropotoꞌwa ma tô pitsutu tinhibꞌaꞌuwẽ norĩ te te dama watsuꞌu dzaꞌra da rowahutu uptabi hã õhõ ãma duré ĩꞌra ãma. E niha te ĩrotsaꞌra taha na.
6. Wa ꞌre watsitsawi petse dzaꞌra mono
Ropotoꞌwai mreme te ãma tsimiréꞌé Cristo dzadawa dzamarĩꞌwa norĩ dahöiba waꞌõtõ mono ne hã. Atsiré tsõré aba 1 Coríntios 12:26. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E marĩ Cristo dzadawa dzamarĩꞌwa ĩꞌuptabi te te ĩꞌmanharĩ da tsi ĩtsitsãnawã danhimidzadze na te te robdzépata wamhã.
E marĩ ma tô ĩꞌmadö Jeová Watsuꞌuꞌwa norĩ ꞌre ĩtsitsawi petse dzaꞌra mono dzém na hã.
Jeová Watsuꞌuꞌwa norĩ nimame te te robdzépata dzaꞌra wamhã ĩtsitsãnawã norĩ tiꞌai mono bö te pawaptop tsuꞌu dzaꞌra. Atsiré ꞌmadöꞌö aba ĩropoto na ãhã ĩwatobro na hã. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha Jeová Watsuꞌuꞌwa norĩ ma tô tsipawaptob dzaꞌra tsiꞌubura ĩtsaꞌẽne watobro parimhã.
Cristo dzadawa dzamarĩꞌwa ĩꞌuptabi norĩ hã te höiꞌré dzaꞌra tinhimidzawidzé te te ĩrobdzépata dzaꞌra norĩ ãma hã.
NIꞌWAM NORĨ TE NHARĨ DZAꞌRA ÃNE: “Jeová Watsuꞌuꞌwa norĩ taré danhimidzadze ĩté.”
E niwa hawimhã Jeová te te ꞌre ꞌmahörö mono tinhibꞌaꞌuwẽ norĩ hã ĩwatsuꞌuꞌwa na.
ĨWAIHUꞌUDZÉ HÃ
Jeová Watsuꞌuꞌwa norĩ hã Cristo dzadawa dzamarĩꞌwa ĩꞌuptabi. Wa norĩ hã tsimitsutu na datsitsãnawã norĩ na tiꞌai mono bö wa ꞌre wahöimana dzaꞌra, Ropotoꞌwai mreme dzarina wanhimidzadze te tihöiba, duré wa dama waihuꞌu dzaꞌra ni rowahutu uptabi hã Jeová ãma.
Ãma aipoꞌre puꞌu
E marĩ wa, wa tô watsitsitsi dzaꞌra ni Jeová Watsuꞌuꞌwa na.
E niha wa höiꞌré dzaꞌra ni ꞌre ĩwatsitsawi petse dzaꞌra mono na hã.
Aima hã, Jeová Watsuꞌuꞌwa norĩ hã e tô tsena Cristo dzadawa dzamarĩꞌwa ĩꞌuptabi.
TSÔ AIRĨTĨ DURÉ
Waihuꞌu petse Jeová Watsuꞌuꞌwa norĩ watsuꞌu na hã.
Jeová Watsuꞌuꞌwa norĩ — Dahöimanadzé danhimidzadze dzarina, Ĩwaꞌõno 1: Robra hawi rowaꞌa u (1:00:53)
ꞌMadöꞌö, e niha Jeová Watsuꞌuꞌwa norĩ pahi ãna ma tô dama höiꞌré dzaꞌra rowahudu Ropotoꞌwa nhiꞌumdatõ na ĩꞌuptabiꞌõ na hã.
ꞌMadöꞌö ĩtsadaꞌöbödzé dadzadanharĩ norĩ da hã Jeová Watsuꞌuꞌwa norĩ ãma.
“Dadzadanharĩ norĩ Jeová Watsuꞌuꞌwa norĩ ãma hã” (Ĩtsihötödzé jw.org na)
Stephen ĩpoto aimawi norĩ ma, ma tô natsi tãma robꞌmanharĩ watsété dzaꞌra. ꞌMadöꞌö e marĩ wa tihöimanadzém na ma tô ãma tsaprĩ Jeová Watsuꞌuꞌwa norĩ hã te te waihuꞌu parimhã.
“Wa hã ꞌre ĩ̱höimana watsété uptabi mono di aré” Roꞌmadöꞌöꞌwa, 1.º julho na, 2015 na)
a Wa natsi dama ãma ropé dzaꞌra ni Ropotoꞌwai mreme nhimirowahutu uptabi norĩ hã, wate ĩtsõrédzém na hã Roꞌmadöꞌöꞌwa wa te tsadzöri ãna 1879 hawimhã.