ROMNHORÉ 36
Tsena na aihöimana
Aihĩni norĩ te tsima wẽ dzaꞌra titsiwaihuꞌu norĩ tsena ꞌre höimana dzaꞌra mono da. Jeová duré te tsima wẽ titsiwaihuꞌu norĩ tsena ꞌre höimana dzaꞌra mono da. Tadzahã, pire di tsena dahöimana da hã daꞌahö uptabi na dahöimana nhipetse na ꞌre dahöimana dzaꞌra mono wa. Tane nherẽ, e marĩ wa wama rowẽ dzaꞌra di dza tsena ꞌre wahöimana dzaꞌra mono wamhã.
1. E marĩ wa, tsena wa dza ꞌre wahöimana dzaꞌra.
Tsena ꞌre wahöimana dzaꞌra mono wamhã, wa dza höiꞌré dzaꞌra ni Jeová wa te ĩtsawi petse dzaꞌra na hã duré wa te ĩwadzéb dzaꞌra na hã. Ãma rotsaꞌrata aꞌö: Jeová ma waihuꞌu petse di uburé petse wanhimirotsaꞌrada duré wa te ĩꞌmanharĩ dzaꞌra dzé. (Hebreus 4:13) Te te ꞌmadöꞌö waihuꞌu petse di wa te pitsutu dzaꞌra wamhã tsena ꞌre wahöimana dzaꞌra mono da, duré tãma ĩrowẽ. Ĩmreme te tinha: ‘Uburé Danhibꞌapito ma hã, ĩhöimana nhipetse norĩ hã tãma ꞌrui wa. Tane nherẽ, ĩꞌuwaibaba na tsi ꞌre ĩhöimana wẽ dzaꞌra mono norĩ tsi te ĩtsiwaihu hã tãma ꞌre höimana dzaꞌra.’ — Provérbios 3:32.
2. E niha tsena wa dza ꞌre wahöimana dzaꞌra uburé na.
Jeová te tsima wẽ ‘wahöiba mono bö tô tsena na tsi wa te watsima ꞌre rowatsuꞌu dzaꞌra mono da.’ (Efésios 4:25) E marĩ te ãma tinha. Wa te robdzanhamri dzaꞌra wamhã, wate família norĩ ma, watsiré romhuriꞌwa norĩ ma, watsitsãnawã norĩ ma danhimidzadze na, niwamhã dama ĩpire norĩ ma, tãma wadzadawa nhipetse dzaꞌra õ di dza, duré wa te tãma robꞌrãmi dzaꞌra õ di dza. Tsena ꞌre ĩhöimana dzaꞌra mono norĩ dawi tsiptsaihuri dzaꞌra õ di dza, duré te te ꞌre dawi marĩ udö dzaꞌra mono õ di dza. (Tsõré na Provérbios 24:28 duré Efésios 4:28.) Rowaꞌöbö arĩ dama ĩpire norĩ ma te duré tãma tsõmri dzaꞌra. (Romanos 13:5-7) ‘Ãne ãma ꞌre ĩwanomro mono dzé hã tô ĩbö na tsi’ wa dza uburé na ꞌre wahöimana dzaꞌra. — 1 Tessalonicenses 2:10.
3. E marĩ wa, wama rowẽ dzaꞌra di dza tsena ꞌre wahöimana dzaꞌra mono wamhã.
Da te wawaihuꞌu dzaꞌra wamhã tsena ꞌre ĩwahöimana dzaꞌra mono na hã, te dza da te ꞌre waꞌumnhatsi dzaꞌra. Wa dapawaptob dzaꞌra ni ꞌre datsiꞌumnhatsi dzaꞌra mono da datsiꞌrãꞌõtõ ꞌremhã datsitsãnawãi uptabi ne. Duré wa dza watsima rowẽ dzaꞌra ni watsitsãmridzé wẽ na. Wahöimanadzé tô tsena na uꞌöbö ‘te dza Wanhoꞌreptuiꞌwa nhimiroti hã da te datsima ꞌre watsuꞌu wẽ dzaꞌra’, duré te dza da te datsina rotété dzaꞌra ãma dawatadzé ĩꞌuptabi u. — Tito 2:10.
WAIHUꞌU DURÉ
Te dza ĩꞌmadö e niha Jeová te tihöiba tsena ꞌre aihöimana mono wamhã, duré e marĩ wa, aima rowẽ di dza ãne wamhã. Te dza duré ĩwaihu e niha tsena te dza ꞌre aihöimana aimawi romhöimanadzé mono na.
4. Jeová te tsima rowẽ tsena ꞌre ĩhöimana dzaꞌra mono norĩ na
Atsiré tsõré aba Salmo 44:21 duré Hebreus 4:13. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Aima hã, e tsada hã marĩ Jeová wi wa te tiwi udö dzaꞌra da. E marĩ wa.
Aima hã, e niha Jeová te tihöiba tsena hã wa te nharĩ dzaꞌra wamhã, wama pire nherẽ.
Aiꞌuté norĩ tsena te te nharĩ dzaꞌra wamhã, ĩmama duré ĩna ma rowẽ di dza. Tsena hã wa te nharĩ dzaꞌra wamhã, Jeová ma rowẽ di dza.
5. Tsena ꞌre aihöimana uꞌötsi mono uburé na
Daꞌahö na te rotsaꞌrata dzaꞌra ni ĩtsadai õ na hã tsena ꞌre dahöimana uꞌötsi dzaꞌra mono da. Tadzahã ꞌmadöꞌö e marĩ wa, wa watsima wẽ dzaꞌra ni tsena ꞌre wahöimana uꞌötsi dzaꞌra mono da. ꞌMadöꞌö aba ĨROPODO.
Atsiré tsõré aba Hebreus 13:18. Taha parimhã atsima robdzanhamri aba, e niha tsena wa dza ꞌre wahöimana dzaꞌra . . .
wanhorõwa ãma.
romhuridzéb ãma, niwamhã romnhorédzéb ãma.
romhöimanadzé ĩhöiba amo norĩ ãma.
6. Tsena dahöimana hã wama rowẽdzéb da
Ãté tsena wahöimana dzaꞌra wamhã te dza wawi roꞌwaꞌrutu dzaꞌra ni. Tadzahã bödö ãma morĩ tsidöpötsi, tahã te dza wama rowẽ ãwitsi dzaꞌra. Atsiré tsõré aba Salmo 34:12-16. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha na aima rowẽ di dza tsena ꞌre aihöimana mono wamhã.
Ĩmro ré norĩ tsena ꞌre höimana dzahuré mono wamhã, te dza tinhiptete dzahuré datsina damro ꞌremhã
Romhuriꞌwa norĩ tsena ꞌre höimana dzaꞌra mono wamhã ĩtsibꞌapito norĩ te dza umnhatsi dzaꞌra
Tsena ꞌre dahöimana dzaꞌra mono wamhã, dama ĩpire norĩ te dza daꞌãma rotsaꞌrata wẽ dzaꞌra
NIꞌWAM NORĨ TE NHARĨ DZAꞌRA ÃNE: “Marĩ õ di marĩ ĩtsuru na dadzadawa nhipetse wamhã.”
Aima hã, e marĩ wa, Jeová ma ꞌru ti uburé dadzadawa nhipetse norĩ hã.
ĨWAIHUꞌUDZÉ HÃ
Jeová te tsima wẽ titsiwaihuꞌu norĩ tsena ꞌre höimana dzaꞌra mono da, uburé te te ĩnharĩ dzaꞌra dzém na duré te te ĩꞌmanharĩ dzaꞌra dzém na.
Ãma aipoꞌre puꞌu
E marĩ na tsena wa dza ꞌre wahöimana dzaꞌra.
Aima hã, e tsada hã marĩ Jeová wi wa te tiwi udö dzaꞌra da. E marĩ wa.
E marĩ wa, te atsima ĩwẽ uburé na tsena ꞌre aihöimana mono da.
TSÔ AIRĨTĨ DURÉ
E niha damama duré dana te dza rowahutu dzahuré tiꞌra norĩ ma hã tsena ꞌre höimana dzaꞌra mono da.
E marĩ wa, wẽ di wa te ãma uwaimrami dzaꞌra da wanhimiropitsutu norĩ hã.
Atsimiropitsutu norĩ hã ãma uwaimrami Ropotoꞌwa aima tsõprub da (9:09)
ꞌMadöꞌö e marĩ wa, rowaꞌöbö arĩ norĩ wa dza waꞌöbö dzaꞌra ni dama ĩpire norĩ ma ãma höimana watsété dzaꞌra nherẽ.
“Rowaꞌöbö arĩ — E te dza dama ĩpire norĩ ma ĩwaꞌö.” (Roꞌmadöꞌöꞌwa, 1.° setembro na, 2011 na)
E marĩ ma tô rétsi aibö ĩhöimana nhipe, tihöimanadzém na te te ãma tsaprĩ da.