Ngaba Ubomi Bakho Buyakruqula? Ungabutshintsha!
NGUMBHALELI KAVUKANI! ESPEYIN
UMARGARET noBrian babephakathi kwiminyaka yabo yama-50 xa bawelwa ngumqa esandleni: umhlalaphantsi wangaphambi kwexesha nentywenka yemali. Kwakungoko abathi bagqiba kwelokuba baye emazantsi ukuze bafumane ilanga nonxweme lweMeditera. Kwakungekho nto ababeza kuphinda bayixhalabele, kungekho nababeza kuphinda bazikhathaze ngayo—babekhangele phambili ekuphileni ubomi obulula kwindlu yabo yokuchithela ikhefu engaselwandle.
Emva kweminyaka emibini, amabhongo abo aba yincindi yekhala. UBrian wathi: “Konke kwabonakala kungenanjongo—suku ngalunye ndandingenanto yokwenza. Kakade ke ndandidla ngokuqubha, ndidlale kancinane igalufa okanye intenetya, ndize ndithethe into engenasiphelo naye nabani na ophulaphulayo. Ndithethe ngantoni? Ngemfitshimfitshi.”
UGisela, umama okwiminyaka yakhe yokuqala yama-20, unentombazana encinane eyinzwakazi. Emva kwemini umama nentombazana yakhe, njengesiqhelo, baya epakini, apho intombazana idlala entlabathini, ixakeke kakhulu, izonwabele isenza iimfumba zentlabathi neenqaba zentlabathi. Ngeloo xesha, unina uhleli kwisitulo esikufutshane epakini yaye ubukele umntwana wakhe. Okanye ngaba umbukele ngokwenene? Nanko ehleli, uphulaphule ngenyameko unomathotholo wakhe omncinane. Esithwe lilifu lomsi womdiza wakhe, akasamboni nakakuhle umntwana wakhe omncinane. Ukruquke ngokungathi angasitsho esofelweyo.
UPeter, ofunda kwisikolo samabanga aphakamileyo oneminyaka eli-17 ubudala, uhleli egumbini lakhe, ungqongwe zizinto zakutshanje ze-elektroniki. Udlala omnye wemidlalo yakhe yevideo, aze afumanise ukuba akasenamdla kuyo. Sele eyidlale izihlandlo ezingamakhulu, yaye ngoku sele eyazi indlela yokuphumelela. Ngaba bethu ufanele aphulaphule umculo? Sekunjalo, wonke umculo anawo sele ewuphulaphule amaxesha amaninzi. Ekruquke ngathi angafa, ukhalaza ngelithi: “Andiyazi into emandiyenze.”
Ngaba Ulichitha Ngokungenanjongo Ixesha?
Ngokuqinisekileyo, asinguye wonke ubani oba nosuku olukruqulayo. Abaninzi basaphila ubomi obonwabisayo nobunentsingiselo, besaneliseka ngokufunda izinto ezintsha, ngokwenza izinto abanobuchule bokuziyila, nangokuhlakulela ulwalamano oluhle nabanye abantu—yaye okubaluleke kwanangaphezulu, noThixo.
Noko ke, ukukruquka kuchaphazela abantu abaneemvelaphi ezahlukeneyo—ngokutsho kohlolisiso lwakutshanje, eJamani kuchaphazeleka umntu omnye kwabathathu. AmaYuppie anamabhongo aquqa kuzo zonke iindawo zokuzonwabisa ezithandwayo edolophini, ulutsha olungaphangeliyo oluchitha ixesha ngomculo odlalelwa phezulu nebhiya exabiso liphantsi, umsebenzi owenza imisebenzi yezandla okwiminyaka ephakathi ochitha impelaveki ebukele umabonwakude, umalathisi oziva engonwabanga xa eshiya iofisi—bonke aba banesikhalazo esinye: ukukruquka.
Izithandi-bulumko zamandulo zakuchaza oku ngokuthi taedium vitae (igama lesiLatini elithetha ukudinwa ebomini). NgesiJamani kubizwa ngokuthi Langeweile (ithuba elide). Ixesha elicothayo, umsebenzi obonakala ungenantsingiselo, ukulangazelela “ukuyibaleka imeko okuyo” kuyimiqondiso eqhelekileyo yokukruquka.
Kwanabazizityebi bayachaphazeleka. Emva kokuchaza ubomi bezinhanha ezichitha imali eninzi, uRoger Rosenblatt wephephancwadi iTime waphawula: “Emva kokufumana ipomakazi lendlu nesitiya esikhulu nezilwanyana ezikhulu, amatheko amakhulu nabantu abaziwayo, yintoni edla ngokuthethwa zizinhanha ezichitha imali eninzi ehlabathini? Bathi bakruqukile. Bakruqukile.”
Kwakha kwacingwa ukuba ukuzonwabisa okungakumbi kwakuya kuba sisicombululo sokukruquka. Kwakuqikelelwa ukuba ukusebenza kamnandi kwabantu, ukuphelisa indlela yakudala yokusebenza edikayo, nokuba nexesha elininzi lokuzonwabisa kwakuya kwenza ubomi banelise kumntu oqhelekileyo. Noko ke, ngelishwa akulula kangako. Ukugqiba ngonokukwenza ngalo lonke eli xesha lokungenzi nto kuye kwangqineka kunzima ngakumbi kunokuba bekulindelwe. Ngolangazelelo abaninzi balindela impelaveki emyoli iveki yonke, baze bafumanise ukuba xa ifika ayibi yile nto bebeyilindele.
Imiphumo Emibi Yokukruquka
Abanye bafuna ukuphepha ukukruquka ngokuzixakekisa ngokugqithiseleyo. Abanye baba ngamakhoboka omsebenzi ngenxa yokuba babengayazi into abamele bayenze ngexesha labo xa bengekho seofisini. Abanye bacima ukukruquka kwabo ngotywala okanye bazame ukuzichulumancisa ngeziyobisi. Amaqhawe amaninzi ezolonwabo aphila ubomi obuxakekileyo achitha isithukuthezi ngeziyobisi ezifana necocaine xa umnyhadala udlulile. Ukukruquka kuye kwachazwa njengesinye sezizathu zokwanda kwenani loomama abangatshatanga abakwishumi elivisayo, abaninzi babo abebecinga ukuba usana lwaluya kwenza ubomi babo bube nentsingiselo.
Ukukruquka kukwanxulunyaniswa nolwaphulo-mthetho olwandayo. Iphephancwadi iTime laphawula ukuba abaselula abaninzi bayeka isikolo xa beneminyaka eli-16 baze bangabi nanto yokwenza yaye abo bangasebenziyo eNtshona Yurophu, xa bethelekiswa noontanga babo abasebenzayo, “ngokunokwenzeka bayazibulala, kulula ngakumbi ukuba basebenzise kakubi iziyobisi, basemngciphekweni ongakumbi wokumitha bengatshatanga yaye okungakumbi batyekele ngakumbi ekwaphuleni umthetho.” Oku kubonakala kuphinda kuqinisekisa isaci samandulo sesiNgesi sokuba “uSathana uzifumanela intlondi emaziyenze izandla ezingenanto yokwenza.”—Thelekisa eyabase-Efese 4:28.