Isahluko 31

Imisebenzi KaYehova—Mikhulu Yaye Iyamangalisa

Umbono 10—ISityhilelo 15:1–16:21

Umbandela: UYehova kwingcwele yakhe; ukuphalazelwa emhlabeni kwezitya ezisixhenxe zengqumbo yakhe

Ixesha lokuzaliseka: Ngowe-1919 ukusa kwiArmagedon

1, 2. (a) Nguwuphi umqondiso wesithathu ochazwa nguYohane? (b) Yiyiphi indima yeengelosi ekudala isaziwa ngabakhonzi bakaYehova?

UMFAZI uzala umntwana oyinkwenkwe! Inamba enkulu ifuna ukuqwenga loo mntwana! Loo miqondiso mibini yasezulwini, echazwe ngokucace gqitha kwiSityhilelo isahluko 12, isikhumbuza ukuba impikiswano endala ebandakanya iMbewu yomfazi kaThixo noSathana nembewu yakhe eziidemon ifikelela incopho yayo. Xa ebalaselisa le mifuziselo, uYohane uthi: “Kwabonakala umqondiso omkhulu ezulwini . . . Kwabonakala omnye umqondiso.” (ISityhilelo 12:1, 3, 7-12) Ngoku uYohane uchaza ngomqondiso wesithathu: “Ndabona ezulwini omnye umqondiso, omkhulu nomangalisayo, iingelosi ezisixhenxe zinezibetho ezisixhenxe. Ezi zezokugqibela, ngenxa yokuba ngazo umsindo kaThixo uphelelisiwe.” (ISityhilelo 15:1) Lo mqondiso wesithathu ukwanentsingiselo ebalulekileyo kubakhonzi bakaYehova.

² Phawula indima ebalulekileyo ezinayo kwakhona iingelosi ekuphumezeni ukuthanda kukaThixo. Esi sibakala kudala sisaziwa ngabakhonzi bakaYehova. Ewe, phantsi kokuphefumlelwa umdumisi wamandulo wade wathetha ebhekisa kwezo ngelosi, ezibongoza esithi: “Mbongeni uYehova, nina zingelosi zakhe, zomeleleyo ngamandla, zenza ilizwi lakhe, ngokuphulaphula isandi selizwi lakhe”! (INdumiso 103:20) Ngoku, kulo mbono mtsha, iingelosi zabelwa ukuba zithobe izibetho ezisixhenxe zokugqibela.

3. Ziyintoni izibetho ezisixhenxe, yaye kuthetha ntoni ukuthotywa kwazo?

³ Ziyintoni ezi zibetho? Njengokuvuthelwa kwamaxilongo asixhenxe, zingamazwi ayimigwebo eqatha avakalisa imbono kaYehova ngeenkalo ezahlukahlukeneyo zeli hlabathi nalumkisa ngomphumo wokugqibela wezigqibo zakhe zomgwebo. (ISityhilelo 8:1–9:21) Ukuthotywa kwazo kwalatha ekuphunyezweni kwaloo migwebo, xa abantu uYehova anengqumbo kubo betshatyalaliswa ngemini yokuvutha komsindo wakhe. (Isaya 13:9-13; ISityhilelo 6:16, 17) Ngaloo ndlela, ngokusetyenziswa kwazo ‘umsindo kaThixo uyapheleliswa.’ Kodwa ngaphambi kokuchaza ngokuthotywa kwezibetho, uYohane usixelela ngabantu abathile abangayi kuchatshazelwa ngokuqatha zizo. Ekubeni bengaluvumanga uphawu lwerhamncwa, aba banyanisekileyo bavuma iindumiso eziya kuYehova njengoko bevakalisa umhla wakhe wempindezelo.—ISityhilelo 13:15-17.

Ingoma KaMoses NeyeMvana

4. Ngoku yintoni ebonwa nguYohane?

⁴ Ngoku uYohane ubona umbono ophawulekayo: “Ndaza ndabona oko kwakubonakala ngathi lulwandle olubuglasi luphithikezwe nomlilo, kunye nabo baphumelela boyisile kwirhamncwa nakumfanekiso walo nakwinani legama lalo bemi ngakulwandle olubuglasi, beneehadi zikaThixo.”—ISityhilelo 15:2.

5. Yintoni efanekiselwa ‘lulwandle olubuglasi oluphithikezwe nomlilo’?

⁵ ‘Ulwandle olubuglasi’ luyafana nolo lwabonwa nguYohane ngaphambilana luphambi kwetrone kaThixo. (ISityhilelo 4:6) Luyafana ‘nolwandle olutyhidiweyo’ (isikhongozelo samanzi) lwetempile kaSolomon, apho ababingeleli babefumana khona amanzi ukuze bazicoce. (1 Kumkani 7:23) Ngaloo ndlela lukufuzisela kakuhle ‘ukuhlamba kwamanzi,’ oko kukuthi, iLizwi likaThixo, athi ngalo uYesu acoce ibandla lamaKristu athanjisiweyo elingababingeleli. (Efese 5:25, 26; Hebhere 10:22) Olu lwandle lubuglasi “luphithikezwe nomlilo,” nto leyo ebonisa ukuba aba bathanjiswa bavavanyiwe baza bacocwa njengoko bethobela umlinganiselo ophakamileyo abawumiselweyo. Ngokungakumbi, lusikhumbuza ukuba iLizwi likaThixo likwanamazwi emigwebo eyoyikekayo kwiintshaba zakhe. (Duteronomi 9:3; Zefaniya 3:8) Yimbi yale migwebo yoyikekayo ibonakaliswa kwizibetho ezisixhenxe zokugqibela eziseza kuthotywa.

6. (a) Zingoobani iimvumi ezimi phambi kolwandle olubuglasi lwasezulwini, yaye sazi njani? (b) ‘Zoyise’ ngayiphi indlela?

⁶ Isibakala sokuba ulwandle olutyhidiweyo olwalukwitempile kaSolomon lube lwalusetyenziswa ngababingeleli sibonisa ukuba iimvumi ezimi phambi kolwandle olubuglasi lwasezulwini ludidi lwababingeleli. ‘Zineehadi zikaThixo,’ ibe ke ngoko sizinxulumanisa namadoda amakhulu angama-24 ne-144 000, ekubeni la maqela nawo evuma ephelekwa ziihadi. (ISityhilelo 5:8; 14:2) Iimvumi ezibonwa nguYohane ‘ziloyisile irhamncwa nomfanekiso walo nenani legama lalo.’ Ngoko zimele ukuba zezo ziphuma kwi-144 000 eliphila emhlabeni ebudeni bemihla yokugqibela. Njengeqela, ngenene ziyoyisa. Kwiminyaka enokuba ngama-90 ukususela ngowe-1919, ziye azavuma ukwamkela uphawu lwerhamncwa okanye ukukhangela kumfanekiso walo njengokuphela kwethemba loluntu lokuziswa koxolo. Uninzi lwazo sele lunyamezele ngokuthembeka kwada kwasekufeni, yaye ngoku ezulwini, ngokungathandabuzekiyo nangovuyo olukhethekileyo ziyancedisa ekuvumeni nabazalwana bazo abasesemhlabeni.—ISityhilelo 14:11-13.

7. Uhadi lwalusetyenziswa njani kuSirayeli wamandulo, yaye ubukho beehadi zikaThixo kumbono kaYohane bumele busichaphazele njani?

⁷ Aba boyisi banyanisekileyo baneehadi zikaThixo. Ngale ndlela, bafana nabaLevi bamandulo ababesetempileni, ababenqula uYehova ngokuvuma iingoma bephelekwa ziihadi. Bambi babekwaprofeta nangeehadi. (1 Kronike 15:16; 25:1-3) Iihadi zazizenza zivakale kamnandi iingoma zovuyo ezazivunywa nguSirayeli kwanemithandazo yendumiso nemibulelo eyayisiya kuYehova. (1 Kronike 13:8; INdumiso 33:2; 43:4; 57:7, 8) Ngexesha lengcinezelo okanye lokuthinjwa, uhadi lwalungeviwa. (INdumiso 137:2) Ubukho beehadi zikaThixo kulo mbono kumele kusenze siyilangazelele kakhulu ingoma yendumiso neyombulelo yemincili noloyiso eya kuThixo wethu.a

8. Yiyiphi ingoma evunywayo, yaye athini amazwi ayo?

⁸ Naku okuchazwa nguYohane: “Bavuma ingoma kaMoses ikhoboka likaThixo nengoma yeMvana, besithi: ‘Mikhulu kwaye iyamangalisa imisebenzi yakho, Yehova, Thixo Somandla. Zibubulungisa yaye ziyinyaniso iindlela zakho, Kumkani kanaphakade. Ngubani na ongayi kukoyika ngokwenene wena, Yehova, aze azukise igama lakho, ngenxa yokuba inguwe wedwa onyanisekileyo? Kuba zonke iintlanga ziya kuza zinqule phambi kwakho, ngenxa yokuba imimiselo yakho yobulungisa ibonakalisiwe.’”—ISityhilelo 15:3, 4.

9. Kutheni le nto le ngoma ngokuyinxenye, ibizwa ngokuba ‘yingoma kaMoses’?

⁹ Aba boyisi bavuma “ingoma kaMoses,” oko kukuthi, ingoma efana naleyo yavunywa nguMoses kwiimeko ezifana nezi. Emva kokuba amaSirayeli ebone izibetho ezilishumi eYiputa nokutshatyalaliswa kwemikhosi yamaYiputa kuLwandle Olubomvu, uMoses wawakhokelela ekuvumeni ingoma enjalo yendumiso yoloyiso eya kuYehova, ethi: “UYehova uya kulawula njengokumkani ixesha elingenammiselo, kude kube ngonaphakade.” (Eksodus 15:1-19) Ifaneleke ngokwenene into yokuba ezi mvumi zikumbono kaYohane, ezoyisa irhamncwa zize zibe nenxaxheba ekuvakaliseni izibetho ezisixhenxe zokugqibela, zivumele “uKumkani kanaphakade”!—1 Timoti 1:17.

10. Yiyiphi enye ingoma eyaqanjwa nguMoses, yaye umqolo wayo wokugqibela uhlobene njani nesihlwele esikhulu sanamhlanje?

¹⁰ Kwenye ingoma eyaqanjwa ngoxa uSirayeli wayelungiselela ukoyisa elakwaKanan, uMoses owalupheleyo waxelela olo hlanga oku: “Ndiya kuvakalisa igama likaYehova: Mnikeni ubukhulu uThixo wethu!” Umqolo wokugqibela wale ngoma wakwakhuthaza abantu abangengomaSirayeli, yaye amazwi aphefumlelweyo kaMoses afikelela nakwisihlwele esikhulu sanamhlanje: “Chulumancani, zintlanga, kunye nabantu bakhe.” Kutheni le nto zimele zibe nemihlali? Kungenxa yokuba ngoku uYehova ‘uza kuliphindezelela igazi labakhonzi bakhe, abuyisele impindezelo kwiintshaba zakhe.’ Oku kuphunyezwa komgwebo wobulungisa kuya kuzisa imincili kubo bonke abathembela ngoYehova.—Duteronomi 32:3, 43; Roma 15:10-13; ISityhilelo 7:9.

11. Ingoma eyeviwa nguYohane iqhubeka njani izaliseka?

¹¹ Hayi indlela ekumele ukuba ebeya kuvuya ngayo uMoses ukuba ebephila kwimini yeNkosi, evuma kunye neqela leemvumi zasezulwini ingoma ethi: “Zonke iintlanga ziya kuza zinqule phambi kwakho”! Loo ngoma igqwesileyo iyaqhubeka izaliseka ngendlela emangalisayo namhlanje njengoko sibona, kungekhona nje embonweni kodwa into yokwenene, izigidi eziphuma ‘kwiintlanga’ ngoku ezithontelana ngovuyo kwintlangano kaYehova yasemhlabeni.

12. Kutheni le nto ingoma yaboyisileyo ikwabizwa ngokuba ‘yingoma yeMvana’?

¹² Sekunjalo, le ngoma asiyokaMoses nje kuphela kodwa ‘ikwayeyeMvana.’ Sitsho njani? UMoses wayengumprofeti kaYehova owayemiselwe kuSirayeli, kodwa uMoses waprofeta esithi uYehova wayeza kuvelisa umprofeti onjengaye. Lowo wangqineka eyiMvana, uYesu Kristu. Ngoxa uMoses ‘wayelikhoboka likaThixo,’ uYesu wayenguNyana kaThixo, ngokungathi kunjalo, enguMoses Omkhulu. (Duteronomi 18:15-19; IZenzo 3:22, 23; Hebhere 3:5, 6) Ngenxa yoko, ezi mvumi zikwavuma ‘ingoma yeMvana.’

13. (a) Nangona uYesu emkhulu ngakumbi kunoMoses, kwenzeka njani ukuba afane naye? (b) Sinokumanyana njani neemvumi?

¹³ NjengoMoses, uYesu wavuma ekuhleni iindumiso zikaThixo waza waprofeta ngoloyiso Lwakhe kuzo zonke iintshaba zakhe. (Mateyu 24:21, 22; 26:30; Luka 19:41-44) KwanoYesu wayekhangele phambili kwixesha laxa iintlanga zaziya kuza zize zidumise uYehova, yaye ‘njengeMvana kaThixo’ ezincamayo, wanikela ngobomi bakhe bobuntu ukuze abangele oku kube nokwenzeka. (Yohane 1:29; ISityhilelo 7:9; thelekisa uIsaya 2:2-4; Zekariya 8:23.) Yaye kanye njengokuba uMoses wathi waliqonda igama likaThixo, elinguYehova, waza walizukisa elo gama, ngokunjalo uYesu walibonakalisa igama likaThixo. (Eksodus 6:2, 3; INdumiso 90:1, 17; Yohane 17:6) Ekubeni uYehova enyanisekile, izithembiso zakhe ezizukileyo ngokuqinisekileyo ziza kuzaliseka. Ngoko, ngokuqinisekileyo, simanyene nezi mvumi zinyanisekileyo, kunye neMvana, noMoses, ekuvumelaneni namazwi ale ngoma: “Ngubani na ongayi kukoyika ngokwenene wena, Yehova, aze azukise igama lakho?”

Iingelosi Nezitya

14. Ngoobani ababonwa nguYohane bephuma engcweleni, yaye banikwa ntoni?

¹⁴ Kufanelekile ukuba sive ingoma evunywa ngaba boyisi bathanjisiweyo. Ngoba? Kuba emhlabeni bavakalise imigwebo ekwiingqayi ezazizele ngumsindo kaThixo. Kodwa ukuphalazwa kwezi ngqayi akuquki kuphela nje abantu, njengoko uYohane ehlabela mgama esithi: “Emva koko ndabona ingcwele yentente yobungqina ivulekile ezulwini, kwaza kwathi gqi iingelosi ezisixhenxe ezinezibetho ezisixhenxe zivela engcweleni leyo, zambethe ilinen ecocekileyo, eqaqambileyo yaye zibhinqe imibhinqo yegolide ezifubeni zazo. Saza esinye sezidalwa eziphilayo ezine sanika iingelosi ezisixhenxe izitya zegolide ezisixhenxe ezazizele ngumsindo kaThixo, ophila ngonaphakade kanaphakade.”—ISityhilelo 15:5-7.

15. Kutheni kungamangalisi nje ukuba iingelosi ezisixhenxe ziphuma engcweleni?

¹⁵ Ngokubhekisele kwitempile kaSirayeli, eyayinemifuziselo yezinto zasezulwini, ngumbingeleli omkhulu kuphela owayenokungena kweYona Ngcwele, apha ebizwa ngokuba ‘yingcwele.’ (Hebhere 9:3, 7) Imela indawo enoYehova ezulwini. Noko ke, ezulwini, uMbingeleli Omkhulu onguYesu Kristu asinguye nje kuphela onelungelo lokungena phambi koYehova kodwa neengelosi zinalo. (Mateyu 18:10; Hebhere 9:24-26) Ngoko, akumangalisi ukuba iingelosi ezisixhenxe zibonwa ziphuma engcweleni ezulwini. Zinothumo oluvela kuYehova uThixo ngokwakhe: ukuphalaza izitya ezizele ngumsindo kaThixo.—ISityhilelo 16:1.

16. (a) Yintoni ebonisa ukuba iingelosi ezisixhenxe ziwufanelekele kakuhle umsebenzi wazo? (b) Yintoni ebonisa ukuba nezinye zibandakanyekile kumsebenzi omkhulu wokuphalaza izitya zokomfuziselo?

¹⁶ Ezi ngelosi ziwufanelekele kakuhle lo msebenzi. Zambethe ilinen ecocekileyo neqaqambileyo, nto leyo ebonisa ukuba zicocekile yaye zingcwele ngokomoya, zingamalungisa emehlweni kaYehova. Kwakhona, zinemibhinqo yegolide. Imibhinqo idla ngokusetyenziswa xa umntu elungiselela umsebenzi oza kufezwa. (Levitikus 8:7, 13; 1 Samuweli 2:18; Luka 12:37; Yohane 13:4, 5) Ngoko iingelosi zilungele ukuphumeza isabelo. Ngaphezu koko, imibhinqo yazo yeyegolide. Kumnquba wamandulo, igolide yayisetyenziswa ukufuzisela izinto zobuthixo, zasezulwini. (Hebhere 9:4, 11, 12) Oko kuthetha ukuba ezi ngelosi zinothumo lwenkonzo oluxabisekileyo nolobuthixo ezimele ziluphumeze. Kwanezinye zibandakanyekile kulo msebenzi mkhulu. Esinye sezidalwa eziphilayo ezine sidlulisela izitya kwiingelosi. Ngokungathandabuzekiyo, esi sisidalwa esiphilayo sokuqala, esasifana nengonyama, efuzisela ukungafihlisi nenkalipho epheleleyo efunekayo ukuze kuvakaliswe imigwebo kaYehova.—ISityhilelo 4:7.

UYehova Kwingcwele Yakhe

17. Yintoni uYohane asixelela yona ngengcwele, yaye oko kusikhumbuza ntoni ngengcwele eyayikho kuSirayeli wamandulo?

¹⁷ Ekugqibeleni, egqibezela le nxalenye yombono, uYohane usixelela oku: “Nengcwele yazaliswa ngumsi ngenxa yozuko lukaThixo nangenxa yamandla akhe, yaye akukho bani wakwaziyo ukungena engcweleni zada zaphela izibetho ezisixhenxe zeengelosi ezisixhenxe.” (ISityhilelo 15:8) Kwimbali kaSirayeli kwakukho izihlandlo zaxa ilifu laligubungela ingcwele yokoqobo, ibe le mbonakaliso yobuqaqawuli bukaYehova yayithintela ababingeleli ukuba bangangeni apho. (1 Kumkani 8:10, 11; 2 Kronike 5:13, 14; thelekisa uIsaya 6:4, 5.) La yayingamaxesha axa uYehova wayebandakanyeke ngokupheleleyo kwiziganeko ezisemhlabeni.

18. Ziya kubuya nini iingelosi ezisixhenxe ukuze zinikele ingxelo kuYehova?

¹⁸ UYehova ukwanomdla onzulu kwizinto ezenzeka emhlabeni ngoku. Ufuna ukuba iingelosi ezisixhenxe zisigqibe isabelo sazo. Eli lixesha eliyincopho lomgwebo, njengoko lichazwe kwiNdumiso 11:4-6: “UYehova usetempileni yakhe engcwele. UYehova—isemazulwini itrone yakhe. Amehlo akhe ayabona, amehlo akhe aqaqambileyo ahlolisisa oonyana babantu. UYehova uhlolisisa lowo ulilungisa kwanalowo ungendawo, yaye umphefumlo Wakhe umthiyile ngokuqinisekileyo nabani na othanda ugonyamelo. Uya kunisela phezu kwabangendawo izabatha, umlilo nesalfure nomoya onolophu, njengesahlulo sendebe yabo.” Iingelosi ezisixhenxe aziyi kubuyela kwindawo ephakamileyo enoYehova de izibetho ezisixhenxe ziphalazelwe kwabangendawo.

19. (a) Nguwuphi umyalelo okhutshwayo, yaye ukhutshwa ngubani? (b) Ukuphalazwa kwezitya zokomfuziselo kumele ukuba kwaqala nini?

¹⁹ Kuvakala umyalelo onjengendudumo nowoyikekayo othi: “Ndeva ilizwi elikhulu liphuma engcweleni lisithi kwiingelosi ezisixhenxe: ‘Hambani nize niziphalaze izitya ezisixhenxe zomsindo kaThixo emhlabeni.’” (ISityhilelo 16:1) Ngubani lo ukhupha lo myalelo? Kumele ukuba nguYehova ngokwakhe, ekubeni ubuqaqawuli bakhe obubengezelayo namandla zazithintela nabani na ongomnye ukuba angene engcweleni. Ngowe-1918 uYehova weza kwitempile yakhe yokomoya ukuze agwebe. (Malaki 3:1-5) Ngoko, lo myalelo wokuphalazwa kwezitya zomsindo kaThixo umele ukuba wawunikela emva nje kwaloo nyaka. Enyanisweni, imigwebo ekwizitya zokomfuziselo yaqalisa ukuvakaliswa ngamandla ngowe-1922. Yaye ukuvakaliswa kwayo kuthabath’ unyawo ngamandla namhlanje.

Izitya Nokuvuthelwa Kwamaxilongo

20. Izitya zomsindo kaYehova zityhila ntoni yaye zilumkisa ngantoni, ibe ziphalazwa njani?

²⁰ Izitya zomsindo kaYehova zityhila indlela uYehova azijonga ngayo iimeko zehlabathi yaye zilumkisa ngemigwebo yakhe. Iingelosi ziphalaza izitya ngokusebenzisa ibandla lamaKristu athanjisiweyo emhlabeni, lawo avuma ingoma kaMoses nengoma yeMvana. Ngoxa luvakalisa uBukumkani njengeendaba ezilungileyo, udidi lukaYohane ngokungafihlisiyo lwatyhila izinto ezikwezi zitya zomsindo. (Mateyu 24:14; ISityhilelo 14:6, 7) Ngaloo ndlela, isigidimi salo esintlu-mbini ibisesoxolo ekuvakaliseni inkululeko kuluntu kodwa besifana nemfazwe ekulumkiseni ‘ngomhla wempindezelo kaThixo wethu.’—Isaya 61:1, 2.

21. Izinto eziphalazelwa kuzo izitya ezine zokuqala zomsindo kaThixo zifana njani nezo kwavuthelwa kuzo amaxilongo amane okuqala, yaye zahluka phi?

²¹ Izinto eziphalazelwa kuzo izitya ezine zokuqala zomsindo kaThixo ziyafana nezo kwavuthelwa kuzo amaxilongo amane okuqala, oko kukuthi, umhlaba, ulwandle, imilambo, imithombo yamanzi nezikhanyiso ezisezulwini. (ISityhilelo 8:1-12) Kodwa ukuvuthelwa kwamaxilongo kwavakaliswa ngezibetho ‘kwisinye kwisithathu,’ ngoxa kuhlaselwa yonke indawo xa kuphalazwa izitya zomsindo kaThixo. Ngaloo ndlela, ngoxa iNgqobhoko, ‘njengesinye kwisithathu,’ ifumene ingqalelo yokuqala ebudeni bemini yeNkosi, akukho nxalenye yenkqubo kaSathana eye yakhutshelwa ecaleni ekufumaneni isibetho esikwizigidimi zikaYehova zenkathazo nezomgwebo neentlungu eziziswa zizo.

22. Ukuvuthelwa kwamaxilongo amathathu okugqibela kwakwahluke njani, yaye kuhlobene njani nezitya ezithathu zokugqibela zomsindo kaYehova?

²² Ukuvuthelwa kwamaxilongo amathathu okugqibela kwakwahlukile, kuba kwakubizwa ngokuba ngooyeha. (ISityhilelo 8:13; 9:12) Awokuqala amabini kula maxilongo ngokukhethekileyo ayequka iinkumbi nemikhosi yamahashe, ngoxa elesithathu lalivakalisa ngokusekwa koBukumkani bukaYehova. (ISityhilelo 9:1-21; 11:15-19) Njengoko siza kubona, izitya ezithathu zokugqibela zengqumbo yakhe zikwagubungela ezinye zezi nkalo, kodwa ngandlel’ ithile zahlukile kooyeha abathathu. Ngoku masinikele ingqalelo epheleleyo kwizinto eziphawulekayo ezenzeka ngenxa yokuphalazwa kwezitya zomsindo kaYehova.

[Umbhalo osemazantsi]