Ngaba Ukunyaniseka Kuphelelwe Lixesha?
UKUPHAKAMISA ukunyaniseka njengendlela yobomi—ngaba oku kuphelelwe lixesha kwihlabathi lanamhlanje, kulahlelwe kwesinomhlwa njengento engaseloncedo nengasaxabisekanga konke konke? Kubonakala kunjalo. Khawuqwalasele nje imizekelo embalwa yendlela okwande ngayo ukunganyaniseki, iindlela okubonakala ngazo, imilinganiselo ekuye kwatyhutyha kwaya kufikelela kuyo, nendlela okuye kwayindleko ngayo.
Kwiminyaka yakutshanje, iindleko ezibangelwa kukungahlawulwa kweerhafu kwelaseNtshona Jamani ziye zaqikelelwa zingama-20 000 ezigidi zeerandi ngonyaka, yaye eSweden iindleko zili-R1 440 ngonyaka kumntu ngamnye. Ngoko ukuba uhlala kwelinye lala mazwe, ukunganyaniseki kuyakuchaphazela oko ukuhlawulayo kwiirhafu. Ukuqhatha xa kuhlawulwa irhafu yengeniso kwande kakhulu kwelaseUnited States kangangokuba urhulumente ulahlekelwa yingeniso eqikelelwa ikuma-200 000 ezigidi zeerandi ngonyaka. Khawucinge nje ngoncedo ebinokuba lulo loo mali ekuhlawuleni esi sityhwentywe semali silityala elijingayo kuqingqo-mali lweli lizwe! Ngaphezu koko, amashishini angabhaliswanga ngokwasemthethweni abangela ukuba urhulumente waseUnited States alahlekelwe ngamanye ama-20 000 ezigidi zeerandi. KwelaseUnited States ukubiwa kwempahla yeevenkile nokushinta kuye kwabangela ukuba iivenkile zilahlekelwe ngama-8 000 ezigidi zeerandi ngonyaka, nto leyo ebangele ukunyuka kwamaxabiso eempahla. Ubuqhetseba bokubalela kwinombolo yomnye iindleko zokutsalela umnxeba kwindawo ekude kuwadla amaMerika izigidi ezi-2 zeerandi ngonyaka.
KwelaseKhanada “izikrelemnqa zexesha,” ezo zichitha ixesha emsebenzini, zibadla abaqeshi bazo ama-22 000 ezigidi zeerandi ngonyaka, “okuzizihlandlo ezithathu ngaphezulu kwesimbuku sayo yonke le lahleko ebangelwa ngabaqeshwa abangamatutu, ukuba izinto zabanye abantu ngobumenemene, ngobuqhinga beeinshorensi, ubundlobongela bokonakalisa izinto zabanye, ukunyoba, ukutshiswa kwempahla nezinye izenzo zolwaphulo-mthetho nxamnye nezoshishino.” Ngokohlolisiso olwenziwe ngowe-1986, ukubiwa kwexesha kwelaseUnited States kubangela ilahleko engama-340 000 ezigidi zeerandi ngonyaka.
Amashishini amveliso yawo ikwizigidi ngezigidi zeerandi ngokubawa ayeba koorhulumente bamazwe akuwo. Njani? Ngokubathengisela izixhobo zokusebenza neentsimbi zokuzilungisa ngamaxabiso aphakame ngokugqithiseleyo: izipanelana ezincinane ezimacala mane zama-24 eesenti zithengiswa nge-R19 212; izixhobo ezisebenzisa amaza omoya ukuvelisa isandi ezibiza i-R1,34 zithengiswa nge-R1 628; izicikwana zeplastiki zemilenze yezitulo ezixabisa ama-34 eesenti zithengiswa ngama-R2 236. “Xa uthetha ngoku uthetha ngezigidi zezigidi zeedola” eziyilahleko kurhulumente, latsho njalo elinye ilungu lendlu yowiso-mthetho laseUnited States.
Ukongezelela koku kungasentla, kukho abantu ababalaseleyo abayimizekelo emibi kuyo yonke indawo abangakukhuthaziyo ukunyaniseka. Njengokuba usenokuba uphawulile, kumazwe athile iinkokeli ziyaxoka, zinikela inkcazelo engeyonyaniso ukuze zikhohlise, ziyaziquma ezinye izinto, zize ziyiphephe imbopheleleko yazo—ewe, zide zibabulale abo basukuzana nazo kwezobupolitika zize zenze ngathi ngomnye umntu obekeka ityala.
Ngoko ngaba ukunyaniseka kuphelelwe lixesha? Ngaba akuseyiyo indlela elungileyo yobomi? Ngaba ukunyaniseka kuyeyona ndlela ilungileyo kuphela kuba iLizwi likaThixo lisixelela ukuba simele sinyaniseke? Inqaku elilandelayo libalulekile kuwe ukuba ufuna iimpendulo kule mibuzo.