Xa uxolo lomtshato lusongelwa

“Umfazi makangahlukani nendoda . . . indoda mayingamali umfazi wayo.”—1 KORINTE 7:10, 11.

1. Yayiyintoni injongo kaYehova ngomtshato?

UYEHOVA UTHIXO wamanyanisa isibini sokuqala esingabantu ngeqhina lomtshato ibe wayenenjongo yokuba oku kumanyana kunyama nye kwakufanele kuhlale kuhleli. Laliza kuba lumanyano olusikelelweyo olwaluya kuphumela ekubeni sonwabe size sivelise abantwana abangamalungisa, ukuze konke oko kuzukise uThixo.—Genesis 1:27, 28; 2:24.

2. Nguwuphi omnye uthunywashe okhokelela ekuqhawukeni kwamaqhina omtshato?

² Elo lungiselelo ligqibeleleyo lomtshato laphazanyiswa yingcinga yokuzilawula nesono. (Genesis 3:1-19; Roma 5:12) Enyanisweni, umoya wokuzilawula ungomnye woothunywashe abakhokelela ekuqhawukeni kwamaqhina omtshato. Ngaloo ndlela, eUnited States ebudeni bowe-1985, kwabakho ukuqhawulwa kwemitshato emihlanu—xa kuthelekiswa nemitshato eli-10,2—kubantu abali-1 000. Ngowe-1986 ingxelo evela eMoscow yabonisa ukuba kuphela ngama-37 ekhulwini emitshato yaseRashiya ehlala kangangeminyaka emithathu ibe engama-70 ekhulwini iyaphela phakathi kweminyaka elishumi.

3. (a) Yintoni enokubangela ukutsala nzima emtshatweni? (b) Ngokuphathelele umtshato, ngubani umchithachithi woxolo oyintloko?

³ Umoya wokuzilawula unokubangela ukutsala nzima emtshatweni. Ukwathintela ukukhula ngokomoya, kuba “isiqhamo ke sobulungisa sihlwayelwa ngoxolo.” (Yakobi 3:18) Kodwa ngubani umchithachithi woxolo oyintloko? NguSathana. Ibe hayi indlela ekubuhlungu ngayo xa nawuphi na umkhonzi kaThixo ‘emkhwelela indawo uMtyholi’ aze ngaloo ndlela asilele ukuba nekhaya lokuphumla neloxolo!—Efese 4:26, 27.

4. Xa amaqabane angamaKristu eneengxaki zomtshato ezinzulu, yintoni afanele ayiqonde ibe yintoni afanele ayenze?

⁴ Xa amaqabane angamaKristu ekujonga ukwahlukana njengekuphela kwesicombululo kwiingxaki zawo zomtshato, asengozini yokuyekelela kumacebo kaSathana ibe kukho into ephosakele ngokunzulu ngokomoya. (2 Korinte 2:11) Omnye okanye bobabini abayisebenzisi ngokupheleleyo imigaqo kaThixo. (IMizekeliso 3:1-6) Ngoko bafanele ngokukhawuleza bathandazele ukusikelelwa kwemigudu abayenzayo yokucombulula ukungavisisani kwabo. Ukuba oku kubonakala kungenakuxoleleka, kunokudityanwa nabadala bebandla. (Mateyu 18:15-17) Nangona la madoda engenalo igunya lokuxelela amakholwa angoowawo oko kanye afanele akwenze ngeengxaki zawo zomtshato, anokwalathisela ingqalelo koko kuthethwa ziZibhalo.—Galati 6:5.

5. Kungokwasiphi isizinzi oluthi uqhawulo-mtshato apho ubani kunokwenzeka ukuba atshate kwakhona lwamkeleke ngokweZibhalo?

⁵ Ukuba imeko yomtshato imbi ngokokude isibini esingamaKristu sicinge ngokuqhawula umtshato, abadala banokubonisa ukuba uqhawulo-mtshato nokutshata kwakhona kwamkeleka ngokweZibhalo kuphela xa iqabane likabani ‘lihenyuzile.’ Eli gama liquka ukukrexeza nezinye iintlobo zokuziphatha kakubi ngokwesini nezesini esigqwethekileyo. (Mateyu 19:9; Roma 7:2, 3; bona IMboniselo kaSeptemba 1, 1983, iphepha 29.) Kanti, kuthekani ukuba uxolo lomtshato lusongelwa ngokunzulu kodwa kungakhange ‘kuhenyuzwe’? Zithini iZibhalo ngokwahlukana okusemthethweni?

Isiluleko SikaPawulos Esiphefumlelweyo

6. (a) Uyintoni umongo wesiluleko sikaPawulos esikweyoku-1 yabaseKorinte 7:10, 11? (b) Amaqabane angamaKristu afanele azicombulule njani iingxaki zomtshato?

⁶ Ekuzamemi ukunceda isibini esingamaKristu esimaqhina aso omtshato asongelwayo, abadala banokwalathisela ingqalelo kumazwi ompostile uPawulos athi: “Ke kwabatshatileyo ndinomyalelo, ongenguwo owam, ongoweNkosi. Lo myalelo ke ngowokuba umfazi otshatileyo makangahlukani nendoda yakhe. Kambe ke ukuba uthe wahlukana nayo, makahlale angatshati okanye makaxolelaniswe nendoda yakhe. Indoda ke yona mayingamali umkayo.” (1 Korinte 7:10, 11, TE) Amaqabane angamaKristu afanele akwazi ukuzinzisa iingxaki zawo, ekuvuma ukungafezeki kwawo njengabantu. Akukho ngxaki efanele ibe nkulu ngokokude ingabi nakuconjululwa ngokuthandaza ngokunyanisekileyo, ngokusebenzisa imigaqo yeBhayibhile nangokubonakalisa uthando olusisiqhamo somoya kaThixo.—Galati 5:22; 1 Korinte 13:4-8.

7. (a) Ukuba amaqabane angamaKristu ayahlukana, siba yintoni isimo sawo ngokweZibhalo? (b) Ukwahlukana kwamaKristu amabini atshatileyo kunokuwachaphazela njani amalungelo enkonzo?

⁷ Kodwa kuthekani ukuba amaqabane angamaKristu ayahlukana? Amele ‘ahlale angatshati, okanye axolelaniswe.’ Akukho namnye kuwo okhululekileyo ngokweZibhalo ukuba atshate kwakhona ngaphandle kokuba umtshato uqhawulwe ngenxa ‘yokuhenyuza.’ Ngenxa yoku ‘nangenxa yoomibulo,’ kuya kuba kokubalungeleyo ukuba ‘baxolelaniswe’ ngaphandle kokulibazisa. (1 Korinte 7:1, 2) Asingomcimbi wabadala ukufuna ukuba indoda nomfazi baphelise ukwahlukana kwabo, kodwa basenokungawafanelekeli amalungelo athile enkonzo ngenxa yeengxaki zomtshato. Ngokomzekelo, ukuba indoda “ayikwazi ukuyongamela eyayo indlu,” ngokucacileyo ayinabo ubuchule ‘bokuphatha ibandla likaThixo’ njengomveleli.—1 Timoti 3:1-5, 12.

8. Uyintoni umongo wesiluleko sikaPawulos esikweyoku-1 yabaseKorinte 7:12-16?

⁸ Kugxininiswa ingongoma yokukhusela umtshato kwanaxa iliqabane elinye kuphela elikholwayo. UPawulos wabhala oku: “Ukuba kukho mzalwana uthile unomfazi ongakholiweyo, aze umfazi lowo athande ukuhlala naye, makangamali. Nomfazi onendoda engakholiweyo, ize yona ithande ukuhlala naye, makangayali. . . . Kodwa ke ukuba lowo ungakholiweyo uyahluka, makahluke; umzalwana nokuba ngudade akabotshelelwe, xa kunjalo; ke uThixo usibizele eluxolweni. Kuba, wazi ngani na, mfazi, ukuba woyisindisa indoda yakho? Wazi ngani na, ndoda, ukuba womsindisa umfazi wakho?” (1 Korinte 7:12-16) Ukuba ongakholiweyo ukhetha ukumshiya, umKristu uya kumvumela ahambe. Kodwa okholiweyo, enethemba lokuba lowo ungakholiweyo usenokuguqukela kubuKristu, akayi kukuqalisa ngokwakhe ukwahlukana. Ngokucacileyo unina kaTimoti, uYunike, wahlala nendoda yakhe engakholiweyo kodwa wadlulisela imfundiso engokomoya kunyana wakhe.—2 Timoti 1:5; 3:14, 15.

Izizathu Zokwahlukana

9, 10. (a) Ngenxa yoko kuthethwa kweyoku-1 kuTimoti 5:8, siyintoni esinye isizinzi sokwahlukana kwamaqabane omtshato? (b) Yintoni abafanele bayenze abadala abamiselweyo ukuba indoda engumKristu ityholwa ngokwala ukondla umfazi nabantwana bayo?

⁹ Amazwi kaPawulos akweyoku-1 yabaseKorinte 7:10-16 akhuthaza amaqabane omtshato ukuba ahlale kunye. Kanti, bambi baye bathi, emva kokuzama nzima ukukhusela ulwalamano lomtshato wabo, ekugqibeleni bagqiba kwelokuba, ngokuvunyelwa zizazela, akukho ndlela mbini ngaphandle kokuba bahlukane. Zinokuba yintoni izizathu zokuthabatha inyathelo elinjalo?

¹⁰ Ukungondli okwenziwa ngabom kusesinye isizinzi sokwahlukana. Xa indoda itshata, iyayiqonda imbopheleleko yokondla umfazi wayo nabo nabaphi na abantwana abasenokuba nabo. Indoda engawondliyo amalungu entsapho yayo ‘ilukhanyele ukholo, inobubi ngaphezu kongakholwayo.’ (1 Timoti 5:8) Ngoko ukwahlukana kunokwenzeka ukuba kukho ukungondli okwenziwa ngabom. Kakade ke, abadala abamiselweyo bafanele basiqwalasele ngenyameko isityholo sokuba umKristu uyakutyeshela ukondla umfazi nentsapho yakhe. Ukwala kukabani okunempembelelo yokuqaqadeka ukuxhasa iintsapho kusenokuphumela ekususweni kubudlelane.

11. Siyintoni esinye isizinzi sokwahlukana, kodwa yintoni enokwenza imeko inyamezeleke?

¹¹ Ukuphathwa kakubi okugqithiseleyo ngokoqobo kusesinye isizinzi sokwahlukana. Masithi iqabane elingakholwayo lisoloko linxila, lilugcwabevu ngumsindo, lize limenzakalise ngokoqobo lowo ukholwayo. (IMizekeliso 23:29-35) Ngomthandazo nangokubonakalisa isiqhamo somoya kaYehova, lowo ukholwayo unokukwazi ukuthintela ukudubuleka komsindo okunjalo aze enze imeko inyamezeleke. Kodwa ukuba kufikelela kwinqanaba apho ngokwenene impilo nobomi beqabane eliphethwe kakubi busengozini, ukwahlukana kunokwamkeleka ngokweZibhalo. Kwakhona, ukuba ngamaKristu omabini abandakanyeke kumtshato oneengxaki abadala bebandla bafanele bahlole izityholo zokuphathwa kakubi, yaye kusenokufuneka ukuba kuthatyathwe inyathelo lokususa kubudlelane.—Thelekisa eyabaseGalati 5:19-21; Tito 1:7.

12. (a) Bunokuchaphazeleka njani ubumoya balowo ukholwayo kumbandela wokwahlukana? (b) Yintoni ecetyiswayo ukuba kukho imeko embi yokungabikho mpilweni ngokomoya kwikhaya lomKristu?

¹² Kwakhona ukuba sengozini ngokupheleleyo kobumoya kusesinye isizinzi sokwahlukana. Lowo ukholwayo okwikhaya elahluleleneyo ngonqulo ufanele enze nantoni na anokuyenza ukuba azisebenzise kakuhle izinto zokomoya ezilungiselelwe nguThixo. Kodwa ukwahlukana kwamkelekile ukuba ukuchasa kweqabane elingakholwayo (mhlawumbi kuquka nokubeka imiqathango yokoqobo) kwenza kungabi nakwenzeka ngenene ukuqhubeka nonqulo oluyinyaniso ibe ngokwenene kububeka engozini ubumoya balowo ukholwayo. Kanti, kuthekani ukuba kukho imeko yokungabikho mpilweni ngokomoya apho amaqabane omabini engamakholwa? Abadala bafanele banikele uncedo, kodwa ngokungakumbi indoda ebhaptiziweyo ifanele isebenze ngokukhutheleyo ukuba ilungise imeko. Kakade ke, ukuba iqabane lomtshato elibhaptiziweyo lenza izinto njengomwexuki ibe lizama ukuthintela iqabane lalo ekukhonzeni uYehova, abadala bafanele bawusingathe umcimbi ngokuvisisana neZibhalo. Ukuba ukususwa kubudlelane kuyenzeka kwimeko ebandakanya ukuba sengozini ngokupheleleyo kobumoya, ukungondli okwenziwa ngabom, okanye ukuphathwa kakubi okugqithiseleyo ngokoqobo, umKristu othembekileyo ofuna ukwahlukana okungokwasemthethweni akayi kuba wenza ngokunxamnye nesiluleko sikaPawulos esingokumangalela umntu olikholwa.—1 Korinte 6:1-8.

13. Kuphantsi kwaziphi iimeko apho kunokuthi ukwahlukana kwamaqabane omtshato kuthetheleleke?

¹³ Ngoko, ukuba iimeko zimbi ngokugqithiseleyo ukwahlukana kunokuthetheleleka. Kodwa ngokucacileyo iingxabano ezingenamsebenzi azifanele zenziwe unobangela wokwahlukana. Nawaphi na amaKristu athi ahlukane amele anyamezele iimbopheleleko zobuqu ezibangelwa seso senzo ibe afanele aqonde ukuba sonke siya kuphendula kuYehova.—Hebhere 4:13.

Ngaba Kulinyathelo Lobulumko?

14. (a) Yiyiphi ingxaki ekunokwenzeka ukuba ukwahlukana kuyibangele? (b) Ukwahlukana kunokubachaphazela njani abantwana?

¹⁴ Iingxaki ekunokwenzeka zibangelwe kukwahlukana zifanele zicingisiswe ngomthandazo. Ngokomzekelo, kunqabile ukuba intsapho enomzali omnye yenze oko iintsapho ezinabazali ababini zinokukwenza ngokubhekisele kulungelelwano nakuqeqesho. Yaye ukwahlukana kunokuba nempembelelo ebantwaneni efana naleyo yoqhawulo-mtshato, mpembelelo leyo awathi ngayo ulindixesha i-India Today wanikela le ngxelo: “USheena, otsho ngeengqanda zamehlo, uneminyaka emithandathu. Abazali bakhe baqhawula umtshato kwiminyaka emibini edlulileyo emva kokuxabana ngokufuthi bade basana enkundleni. Kungekudala emva koko, uyise watshata nomnye umfazi. Kangangonyaka ebesoloko ehlaselwa liphika ibe usoloko encanca usithupha wakhe. Uhlala nonina eSouth Delhi. Unina uthi: ‘Ukuba kubuhlungu kwam kuye kwadlulela kuSheena. . . . Uyamkhumbula uyise. . . . Ukhule ngakumbi kunabantwana abaninzi abaziintanga zakhe. Kodwa usuka adanduluke ngokungenakuzibamba ekhala, ngokungathi ufuna ukukhupha into ethile kuye. Isikolo sasiyingxaki. Abantwana bathanda ukuqhayiselana. Ngokufuthi, wayesoloko ezithelekelela izinto: wayebalisela abahlobo bakhe ngathi sonke sibethwa ngumoya kunye.’”

15. Ukwahlukana kunokuba nawuphi umphumo kwindoda okanye kumfazi ongumKristu?

¹⁵ Ngokufuthi, ukwahlukana kuzenza zibe mbi iimeko kwindoda nakumfazi ongumKristu. Ngokukhawuleza bafumanisa ukuba ngaphandle kweqabane okanye kwabantwana ubomi bukrakra. Izinto ezingamele zibethwe ngoyaba ziingcinezelo eziba ngumphumo wokwahlukana. Ngaba kuya kwenzeka ukunyamekela imicimbi ngokwemali okanye ngezinye iindlela? Ibe kuthekani ukuba ingcinezelo yokwahlukana iphumela ekuweleni ekuziphatheni okubi? UYesu wathi: “Ubulumko bubonakala buyinyaniso ngemisebenzi yabo.” (Mateyu 11:19, NW) Maxa wambi oko kuba ngumphumo wokwahlukana kuye kwabonakala kungebobulumko kwaphela, ngokungakumbi xa amaqabane omabini engamaKristu.

Sebenzela Ukucombulula Iingxaki

16. Amele enze ntoni amaqabane angamaKristu afumanisa ukuba uxolo lomtshato wawo luyasongelwa?

¹⁶ Amaqabane angamaKristu afumanisa ukuba uxolo lomtshato wawo lusongelwa ngokunzulu afanele akuxubushe ukungavisisani kwawo ngendlela efanele abo bakhonza uThixo. Yaye ngokuqinisekileyo amele azivume iimpazamo zokungafezeki. (Filipi 2:1-4) Kodwa yintoni enye enokwenziwa?

17. Ukubonakalisa ubulumko ngokuphathelele izinto eziphathekayo kunokufak’ isandla njani kuxolo lomtshato?

¹⁷ Ukubonakalisa ubulumko ngokuphathelele izinto eziphathekayo kunokufak’ isandla kuxolo lomtshato. Ngokomzekelo: Emva kokuqwalasela isimo sengqondo esilandulayo somkayo, indoda inokuthi, sekunjalo, ikubone kububulumko ukuba intsapho yayo ifudukele kwenye indawo. Oku kunokubonakala kucebiseka ngezizathu zezoqoqosho, kodwa kwakhona kunokuyenza intsapho ikwazi ukuhambisela phambili izilangazelelo zoBukumkani ngokukhonza apho imfuneko inkulu khona. (Mateyu 6:33) Umfazi wayo ongumKristu usenokungakuxhasi ukufuduka kuba eza kube eshiya abazali okanye indawo abesele eyiqhelile. Kodwa uya kuba ulumkile ukuba usebenzisana ngokuzeleyo nendoda yakhe, eyintloko yekhaya nenembopheleleko yokugqiba ngendawo intsapho eya kuhlala kuyo. Ngaphezu koko, ukuthobela kwakhe nentsebenziswano yakhe enothando iya kufak’ isandla ekubeni nekhaya elinoxolo.—Efese 5:21-24.

18. Ngawaphi amathuba okwenza izinto kunye anawo amaqabane angamaKristu?

¹⁸ Xa amaqabane omtshato esenza izinto kunye uxolo lwentsapho luyesamela yaye neengxaki zithi zibonakale zingenzulu kangako. Ngokomzekelo, amaqabane angamaKristu anamathuba amahle okusebenza kunye kubulungiseleli basentsimini. Ukuba ayakwenza oku rhoqo ibe ekwenza nabantwana bawo, intsapho iphela iya kungenelwa. Kwakhona kusenokubakho amathuba awahlukahlukeneyo okomeleza umanyano lomtshato ngokuba nesabelo kwezinye izinto zokuzihlaziya ezinanditshwa ngokungakumbi lelinye iqabane.

19. Luhlobo luni lobuntloko oluya kukhulisa uxolo lwentsapho?

¹⁹ Ubuntloko obusetyenziswa ngokufanelekileyo buya kuwomeleza amaqhina omtshato. Kakade ke, indoda engumKristu okhulileyo ayiyi kuba nguzwilakhe. Kunoko, ‘iya kumthanda umfazi wayo, ingabi bukhali kuye.’ UYehova uyilindele ukuba isebenzise ubuntloko obunothando. (Kolose 3:18, 19) Umphumo wobuntloko obunjalo uthi ube kukukhula koxolo lwentsapho.

Kumakhaya Awahluleleneyo

20, 21. Ukuba ngonengqiqo kunokungqineka kuyingenelo njani xa uxolo lusongelwa kwikhaya elahluleleneyo ngokonqulo?

²⁰ Ukuba ngonengqiqo kuluncedo ekucombululeni iingxaki zomtshato phakathi kwamaqabane angamaKristu. (Filipi 4:5, NW) Kodwa ukuba nengqiqo kukwabalulekile ukuba uxolo luyasongelwa kwikhaya elahluleleneyo ngokonqulo. Ukuba indoda engakholwayo izama ukuthintela umfazi wayo ongumKristu ekukhonzeni uYehova, usenokuzama ukuqiqa nayo, ngobuchule eyibonisa ukuba yena uyayinika inkululeko yonqulo yaye ngokusengqiqweni ufanele afumane impatho efanayo. (Mateyu 7:12) Nangona efanele ayithobele ngokulinganiselweyo indoda yakhe engakholwayo, kumele kwenziwe ukuthanda kukaThixo apho kukho ukungqubana okuthile. (1 Korinte 11:3; IZenzo 5:29) Ngokuqinisekileyo, ukuya kwiintlanganiso zamaKristu kathathu ngeveki akuyonto igqith’ emgceni. Kodwa umfazi okholwayo unokukufumanisa kububulumko ukuba sekhaya ngamanye amarhatya nokucwangcisa ixesha elingakumbi lobulungiseleli bakhe basentsimini ebudeni beeyure zaxa indoda yakhe isemsebenzini nabantwana besesikolweni. Ngokusebenzisa ingqiqo nangokuceba kakuhle, akufuneki ‘ethe amandla ekwenzeni okulungileyo.’—Galati 6:9.

²¹ Ukuba ngonengqiqo kukwadlulela nakweminye imicimbi. Ngokomzekelo, umntu unelungelo lokuba nonqulo oluthile. Kodwa bekuya kuba sengqiqweni ibe bekuya kuba bubulumko ukuba umfazi ongumKristu angazibeki iiBhayibhile zakhe namancedo okufundisisa iBhayibhile kwindawo apho indoda yakhe echasa gqitha inokungathandi ukuba zibe kuyo. Ingxabano inokuphetshwa ukuba ezo mpapasho uzigcina kwizinto zakhe zobuqu ibe uzifunda ngasese. Kakade ke, akamele alalanise kwimigaqo yobulungisa.—Mateyu 10:16.

22. Kunokwenziwa ntoni ukuba isizekabani sokuphazamiseka koxolo lwasekhaya sikukufundiswa kwabantwana izinto zonqulo?

²² Ukuba isizekabani sokuphazamiseka koxolo lwasekhaya sikukufundiswa kwabantwana izinto zonqulo, umfazi okholwayo unokuthi akucwangcise ngobulumko ukuya nabo kwiintlanganiso nakubulungiseleli basentsimini. Kodwa ukuba indoda engakholwayo nekwangubawo iyakuthintela oku, unokubafundisa abantwana imigaqo yeBhayibhile ukuze bathi xa bekhulile baze balishiye ikhaya, batyekele ekulandeleni unqulo oluyinyaniso. Ukuba indoda iyakholwa, njengentloko-ntsapho, inembopheleleko engokweZibhalo yokukhulisa abantwana bayo njengamaKristu. Ngoko ifanele ifundisise nabo iBhayibhile, iye nabo kwiintlanganiso, ize ibafundise kubulungiseleli basentsimini. (Efese 6:4) Ngokuqhelekileyo, ifanele ibe nobubele, ibe nothando, ize ibe nolwazelelelo ekuqhubaneni nomfazi wayo ongakholwayo.

Londolozani Uxolo Njengentsapho Emanyeneyo

23. Ukuba uxolo lomtshato luyasongelwa, yintoni enokungqineka iluncedo?

²³ Ekubeni amaqabane omtshato ‘enyama-nye,’ afanele ahlalisane kunye ngoxolo ngokuvisisana nelungiselelo likaThixo labantu abatshatileyo, ingakumbi ukuba omabini amaqabane angamaKristu. (Mateyu 19:5; 1 Korinte 7:3-5) Kodwa ukuba kwimeko yakho uxolo lomtshato luyasongelwa, zihlolisise kwakhona ngomthandazo ezi ngongoma zingokweZibhalo zichazwe apha. Kwakhona kuya kuba luncedo ukucinga emva kwixesha laxa nanithandana ngaphambi komtshato. Hayi indlela enanisithi ngayo nobabini nizame ukwenza oko kwakulungile nize nibeke isiseko somanyano olonwabileyo! Ngaba nangoku niya kwenza imigudu efanayo yokugcina umtshato wenu umanyene?

24. Sisiphi isimo sengqondo amaKristu afanele abe naso ngomtshato?

²⁴ AmaKristu amanyeneyo emtshatweni anesipho esimangalisayo esivela kuThixo—umtshato wawo! Ukuba uphila ngokuvisisana nezifungo owazenza emtshatweni wakho uze ugcine ingqibelelo kuYehova, ngaphambi kwakho kukho ihlabathi elitsha lobulungisa apho uluntu lungayi kuba sathwaxwa kukwahlukana naluqhawulo-mtshato olubangela intliziyo ebuhlungu. Ngoko bonakalisa umbulelo ngomtshato ‘njengomsonto ontluntathu’ wokomfuziselo, onoYehova njengenxalenye ebalulekileyo yawo. (INtshumayeli 4:12) Yaye kwanga onke amalungu entsapho yakho emanyeneyo anganandipha intsikelelo yolonwabo lwentsapho kwikhaya lokuphumla neloxolo.

Unokuphendula Uthini?

◻ Ubunokusizekelisa njani isiluleko sikaPawulos esikweyoku-1 yabaseKorinte 7:10-16?

◻ Ziziphi izizathu ezivakalayo zokwahlukana kwamaqabane omtshato?

◻ AmaKristu anokuzicombulula njani iingxaki xa uxolo lomtshato lusongelwa?

◻ Kumakhaya awahluleleneyo ngokonqulo, ukuba ngonengqiqo kunokufak’ isandla njani eluxolweni?

[Umfanekiso okwiphepha 23]

Amaqabane angamaKristu lawo uxolo lwawo lomtshato lusongelwayo afanele azixubushe iingxaki zawo ngendlela efanele abo bakhonza uYehova