Qeqesha Amandla Akho Engqiqo
1 Imihla yokugqibela ecinezelayo, esizifumana sikuyo, iye yezisa ingcinezelo engakumbi neemvavanyo eziqatha ezahlukeneyo kubantu bakaThixo kuzo zonke iindawo. (2 Tim. 3:1-5) Sonke siyakufuna ukukhuthazwa ukuze sime siqinile elukholweni. (1 Kor. 16:13) Singenjenjalo ngoncedo lukaYehova njengokuba siqhubeka sizondla ngokuqhubekayo ngeLizwi lakhe, sikholosa ngomoya wakhe, yaye sibambelela ngokusondeleyo kwintlangano yakhe.—INdu. 37:28; Roma 8:38, 39; ISityhi. 2:10.
2 Ngesizathu esivakalayo, kucwangciso lonyaka ophelileyo lwendibano ekhethekileyo yosuku olunye kwaxutyushwa umxholo othi “Yibani Ngabakhule Ngokupheleleyo Emandleni Okuqonda.” Loo mxholo wawusekelwe kweyoku-1 kwabaseKorinte 14:20, apho sifunda amazwi kampostile uPawulos athi: “Bazalwana, musani ukuba ngabantwana abaselula emandleni okuqonda, kodwa yibani ziintsana ebubini; kanti yibani ngabakhule ngokupheleleyo emandleni okuqonda.” Lwalunjani olo cwangciso?
3 “Hayi indlela olwalukhuthaza ngayo!” “Oku koko besikufuna!” La yayingamagqabaza angephi. Kwanomntu ongelilo iNgqina owayeze endibanweni ekhethekileyo yosuku olunye ukuze abone intombazana yakhe eneminyaka eli-12 ubudala xa ibhaptizwa wathi wayechukumiseke gqitha lucwangciso yaye wayeyibona indlela eyayiza kungenelwa ngayo intsapho yakhe. Ngaba leyo yindlela ovakalelwa ngayo? Makhe sizikhumbuze ngezinye zeembalasane zocwangciso.
4 Ulwazi Oluchanileyo Luyafuneka Ukuze Kukhuliswe Amandla Engqiqo: Kwintetho yokugabula izigcawu eyayisithi, “Khulisa Amandla Akho Okuqonda Ngoku,” oko kwakugxininiswa sisithethi kuyinto efunekayo ukuze sihlangabezane nocelomngeni lwanamhlanje? Sifuna okungaphezu kokuba krelekrele. Kufuneka siwakhulise amandla ethu okuqonda iBhayibhile, kungenjalo siya koyiswa bubo bonke ububi esihlangabezana nabo. Oku kuqonda kufuna ulwalathiso lobuthixo. Njengomdumisi, simele sicele uYehova ngomthandazo ukuba asenze siqonde imithetho nezikhumbuzo zakhe ukuze simkhonze ngentliziyo epheleleyo.—INdu. 119:1, 2, 34.
5 Kwintetho elandelayo, umveleli wesiphaluka wabonisa ukuba uYehova, ngeLizwi lakhe nentlangano yakhe, usilungiselela “Iindlela Zokusinceda Sikhule Ngokupheleleyo Ekuqondeni IBhayibhile.” Ukuqonda kwachazwa “njengamandla okubona into uze uqonde oko ikuko ngokufumanisa amandla ezinto ezibandakanyekileyo kuyo, ngaloo ndlela ufumana ingqiqo yayo.” Ngubani onokusinceda sikhulise la mandla? UYehova ulungiselele izipho ezingabantu ukuze zisincede senze inkqubela ngokomoya. (Efe. 4:11, 12) Intlangano yakhe yasemhlabeni isibongoza ukuba sifundisise iLizwi likaThixo yonke imihla nokuba siye rhoqo kuzo zonke iintlanganiso zebandla. (INdu. 1:2) Kuzo sifundiswa ukusebenzisa iBhayibhile neempapasho zethu zamaKristu kwisifundo sentsapho naxa silungiselela iintlanganiso nenkonzo yasentsimini. Ngaba ubuwasebenzisa onke la malungiselelo? Ngaba unocwangciso oluthe rhoqo, lofundisiso lobuqu lweBhayibhile? Oku kubalulekile ukuba siza kukhuseleka singabi ngamaxhoba ezimo zengqondo zehlabathi, izimbo, iintanda-bulumko neempembelelo ezonakalisayo.—Kol. 2:6-8.
6 Amandla Ethu Engqiqo Amele Aqeqeshwe: Kwintetho yokuqala, eyayinomxholo othi “Khusela Ubumoya Bakho Ngokuqeqesha Amandla Akho Okuqonda,” isithethi esityeleleyo sachaza ukuba abo basehlabathini abakwazi ukwahlula okulungileyo kokubi. (Isa. 5:20, 21) Oku kungenxa yokwala kwalo ukwamkela nokugcina imilinganiselo kaThixo yobulungisa. Ngokwahlukileyo koko, thina bafumana uqeqesho lokomoya kwintlangano kaYehova siyayiqonda imilinganiselo kaThixo, esikhokelayo kwihambo yethu nakwizinto esizenzayo. Ngaloo ndlela, sinokukwazi ukuzibonela oko kuhle nokwamkelekileyo emehlweni kaYehova noko kuvisisana nokuthanda kwakhe okugqibeleleyo.—Roma 12:2.
7 Ukuze siphephe indlela yehlabathi yokucinga engenangqiqo neziqhamo zayo ezibi, simele siwaqeqeshe ngokuqhubekayo amandla ethu okucinga. Kwenziwa njani oku? Njengokuba kubhalwe kweyamaHebhere 5:12-14, umpostile uPawulos wagxininisa imfuneko yokuzondla ngokutya okuqine ngaphezu ‘kobisi’ lwelizwi. Sifuna ukutya okuqinileyo kokomoya, okunjengoko sikufumana ngokufundisisa isiprofeto sencwadi kaIsaya kwiSifundo Sencwadi Sebandla. Sinokwandula ke silungele ukukusebenzisa ebomini bethu oko sikufundayo. Xa sisenjenjalo, siqinisekile ngokulunga kwemigaqo nemilinganiselo kaYehova. Oku kuqeqesha amandla ethu okuqonda ukuze sikwahlule ngokucacileyo okubi kokuhle.
8 Kubuhlungu ukuthi, bambi baye boyisakala ngokomoya. Ngoba? Abakhange banikele ingqalelo koko kulungileyo nokuthe tye emehlweni kaYehova. Ngenxa yoko, baye bangamaxhoba eengxubusho zikanomathotholo nomabonwakude ezinemibandela ethandabuzekayo ngokweZibhalo, umculo ongandilisekanga okanye iimpembelelo ezimbi kwiingxubusho zekhompyutha. Ngokwenza ngobulumko, siya kukuphepha ukuphenjelelwa ngabantu abanemilinganiselo ephantsi yokuziphatha, izidenge nangabantu abangendawo.—IMize. 13:20; Gal. 5:7; 1 Tim. 6:20, 21.
9 Ulutsha Lumele ‘Lube Ziintsana Ebubini’: Olu cwangciso lwaluneenxalenye ezimbini ezakhuthaza ulutsha ngokukhethekileyo ukuba lukhulise amandla alo engqiqo. Isithethi sabonisa ukuba, ukuba “ziintsana ebubini” kuthetha ukungabi namava, oko kukuthi, ukungazi nto njengabantwana, ngokuphathelele izinto ezingacocekanga emehlweni kaYehova. (1 Kor. 14:20) Sonke sakhuthazwa ukuba siyilinde ngokungqongqo indlela esilisebenzisa ngayo ixesha lethu ukuze sixhathise ukuchanabeka kuzo zonke iintlobo zobubi size siphephe ukuphenjelelwa zizo. (Efe. 5:15-17) Sakhuthazwa ukuba sihlole ixesha esilichitha sifunda imibandela engenagalelo ekuqondeni kwethu izinto zokomoya. Ngaba wakwenza oko? Imiphumo yabonisa ntoni? Ukongezelela ekufundisiseni iBhayibhile yonke imihla, kulungele ukufunda umbandela olungiselelwa yintlangano. Ukwenza oku kuya kusinceda sonke, kuquka nabaselula, ukuba ‘bazuze ukuqonda.’—IMize. 4:7-9.
10 “Ngenelwa Ngokusebenzisa Imigaqo YeBhayibhile Ngokuqonda”: Lowo yayingumxholo wentetho yokuqukumbela yocwangciso lwendibano ekhethekileyo yosuku olunye. Isithethi esityeleleyo sachaza ukuba uYehova nguMthombo wokuqonda okunika ubomi, okungaphezu kwako konke ukuqonda koluntu. Khawufan’ ucinge, ukuba nethuba lokungenelwa ekuqondeni kukaYehova! Ubanika ngesisa abo bakufuna ngokunyanisekileyo baze bakucele beqhutywa lukholo. (IMize. 2:3-5, 9; 28:5) Ngaba ulixhakamfula ngokupheleleyo eli lungiselelo?
11 Sakhuthazwa ukuba sifunde ukubona imigaqo xa sifunda iBhayibhile. (2 Tim. 3:16, 17) Yifundisise ngenyameko ukuze ukuqonde ngokuchanileyo oko akuthethayo uYehova. Zinike ixesha ukuze ucamngce ngale migaqo uze uyitsolise engqondweni nasentliziyweni yakho. Oku kuya kuqeqesha amandla akho okuqonda ukuze ube nempumelelo xa usenza izigqibo ezichaphazela ubomi bakho. (Yosh. 1:8) Makhe sicinge ngeemeko ezimbalwa abahlangabezana nazo abaninzi size sibone indlela okunokusinceda ngayo ukusebenzisa imigaqo yeBhayibhile ukuze siphumelele .
12 ‘Ngaba ndifanele ndamkele isimbo esithile sokunxiba nokuzilungisa?’ Indlela yehlabathi yokunxiba nokuzilungisa idla ngokubonisa umoya wemvukelo. Umoya onjalo uphembelela abantu ukuba banxibe xazalala okanye baveze amalungu omzimba. Yiyiphi imigaqo yeBhayibhile eya kusinceda silwe naloo mikhwa? Ekubeni amandla ethu okuqonda eqeqeshiwe, siya kunikel’ ingqalelo kumgaqo ofumaneka kweyoku-1 kuTimoti 2:9, 10 wokunxiba “ngokuthozama nangengqondo ephilileyo . . . , ngendlela efanele [abantu] abazibanga behlonela uThixo.” Eminye imigaqo esebenzayo iquka leyo ikhankanywe kweyesi-2 yabaseKorinte 6:3 neyabaseKolose 3:18, 20.
13 ‘Yintoni endinokuyenza ukuze ndigcine amaqhina entsapho omelele?’ Unxibelelwano oluhle phakathi kwamalungu entsapho lubalulekile. Incwadi kaYakobi 1:19 isixelela ukuba: “Wonke umntu umele akhawuleze ukuva, acothe ukuthetha, acothe ukuqumba.” Amalungu entsapho kufuneka aphulaphule aze athethe elinye nelinye kuba unxibelelwano lwentsapho lufuna inxaxheba yabantu ababini. Kwanokuba oko sikuthethayo kuyinyaniso, ukuba kuthethwa ngendlela ekhohlakeleyo, enekratshi okanye engenalwazelelelo iya kwenzakalisa ngaphezu kokuba ibe luncedo. Ngoko ke enoba ungumyeni okanye umfazi, umzali okanye umntwana, intetho yakho ‘mayisoloko ikholekile, inongwe ngetyuwa.’—Kol. 4:6.
14 ‘Ngaba ndiphenjelelwa ngumoya wokuthanda izinto eziphathekayo?’ Ihlabathi licinezela ngezinto eziphathekayo ezenza ubomi bukabani bube nzima. Azikhokeleli elonwabeni olungakumbi. (INtshu. 5:10; Luka 12:15; 1 Tim. 6:9, 10) Ukuze asincede siphephe umgibe wokuthanda izinto eziphathekayo, uYesu wasifundisa lo mgaqo ubalulekileyo: Gcina iliso lakho lingenakumbi. Ukuphila ubomi obulungeleleneyo, ubomi obulula kubandakanya ukutsolisa iliso lethu kwizilangazelelo zoBukumkani, yonke enye into ibe kwindawo yesibini.—Mat. 6:22, 23, 33.
15 Ifanele Ibe Yintoni Injongo Yethu: ILizwi likaThixo lingumthombo onokuthenjwa wemigaqo yobulungisa ukuze isikhokele xa sisenza izigqibo. Kufuneka siyifunde le migaqo, sicamngce ngayo size siqonde indlela yokuyisebenzisa ebomini bethu. Ngaloo ndlela ‘ngokuqeqesha amandla ethu okuqonda ukuze sahlule okulungileyo kokubi,’ siya kungenelwa size sizukise uYehova.—Heb. 5:14.