ILizwi LikaThixo Linamandla

1. Uthini umxholo wendibano elungiselelwe unyaka wenkonzo ka-2014?

¹ Ngokwahlukileyo kuyo nantoni na evela ebantwini abangafezekanga, iBhayibhile inamandla okusiguqula, yenze iingcinga nendlela esenza ngayo izinto ivisisane nokuthanda kukaYehova. Linamandla kangakanani iLizwi likaThixo? Singawasebenzisa njani ngokupheleleyo amandla alo ebomini bethu? Singalisebenzisa njani ngakumbi ukuze sincede abanye? Siqinisekile ukuba siya kwakheka sonke ngokomoya njengoko ezi ngongoma zixutyushwa ebudeni bocwangciso lwendibano elulungiselelwe unyaka wenkonzo ka-2014. Umxholo wayo uthi “ILizwi LikaThixo Linamandla,” usekelwe kumaHebhere 4:12.

2. Yiyiphi imibuzo esifanele siphulaphule iimpendulo zayo?

² Fumana Iimpendulo Zale Mibuzo: Njengoko uphulaphule ucwangciso, bhala iimpendulo zale mibuzo idweliswe ngezantsi.

• Kutheni sifanele silithembe iLizwi likaYehova? (INdu. 29:4)

• Singawabona njani amandla eLizwi likaThixo ebomini bethu? (INdu. 34:8)

• Ungawasebenzisa njani amandla eLizwi likaThixo xa ushumayela? (2 Tim. 3:16, 17)

• Singakulumkela njani ukuba ngamaxhoba ehlabathi likaSathana elikhohlisayo? (1 Yoh. 5:19)

• Njengomntu oselula ungaphumelela njani ngokomoya? (Yer. 17:7)

• Singaba nawo njani amandla kwanaxa sibuthathaka? (2 Kor. 12:10)

• Yintoni ekufuneka siyenze ukuze sikwazi ukutshintsha, nangona sisenokuba nemikhwa nezimo zengqondo ezendeleyo? (Efe. 4:23)

3. Ngaphandle kokuphulaphula ucwangciso, ziziphi ezinye indlela esinokungenelwa ngazo kule ndibano?

³ Siyakungenelwa kakhulu ngokufumana le nkcazelo ibalulekileyo! Ngaphezu koko, le ndibano, njengendibano yesiphaluka neyesithili, iza kusinika amathuba okuphangalala size sikwazi ukunxulumana kunye nabazalwana noodade bamanye amabandla. (INdu. 133:1-3; 2 Kor. 6:11-13) Ziphe ixesha lokuncokola nabahlobo abadala uze wenze nabatsha. Ukuba kukho isithethi esityeleleyo njengomveleli wesithili okanye umzalwana waseBheteli, kungakuhle xa uzipha ithuba lokuncokola naye nenkosikazi yakhe. Ngokwenene, sinezizathu ezininzi zokukhangela phambili kule ndibano!