Imbono YeBhayibhile

Ngaba Umanyano LwamaKristu Luyakuvumela Ukwahlukahluka?

UMANYANO kwibandla lamaKristu lubalulekile. Ukungavisisani ngeemfundiso ezisisiseko kusenokukhokelela kwiimpikiswano ezikrakra, ukungavumelani, kwanobutshaba. (IZenzo 23:6-10) IBhayibhile ithi “uThixo unguThixo, kungekhona owesidubedube, kodwa owoxolo.” (1 Korinte 14:33) Ngenxa yoko, amaKristu ayabongozwa ukuba athethe ngokuvumelanayo kwaye amanyane ngokufanelekileyo engqondweni enye nasengcamangweni enye.—1 Korinte 1:10.

Ngaba la mazwi kwanezinye izicatshulwa zeBhayibhile ezifanayo akhuthaza ukufana kwamaKristu kuzo zonke iinkalo? (Yohane 17:20-23; Galati 3:28) Ngaba ubuKristu bokwenyaniso njengokuba kucacisiwe eBhayibhileni abukukhuthazi ukwahlukahluka kobuntu bomntu ngamnye? Ngaba onke amaKristu alindeleke ukuba abe luhlobo olunye?

UThixo Usitsala Singabantu Abahlukahlukeneyo

Abanye abantu bakholelwa ngamandla ukuba iBhayibhile sesinye isixhobo nje abantu abazenzele sona sokulawula izihlwele. Kuyavunywa ukuba, ngokufuthi iye yasetyenziswa ngokungafanelekanga ngaloo ndlela ngamanye amahlelo. Noko ke, uYesu wayenembono eyahlukileyo ngeZibhalo kwanangoMbhali wazo uThixo. Wamchaza uThixo njengonomdla kakhulu kwisidalwa sakhe ngasinye.

KuYohane 6:44, uYesu wacacisa esithi: “Akukho mntu unako ukuza kum ngaphandle kokuba uBawo, owandithumayo, amtsale.” Isenzi esisetyenziswe apha asibonisi ukuba uThixo utsala abantu, bengafuni. Kunoko, uThixo utsala ngokuthantamisayo, ngokuthi achukumise intliziyo. Njengokuba omnye umphengululi weBhayibhile ebonisa, kukho ‘impembelelo esuka kuThixo yokutyekela kwengqondo ekukholweni.’ UMdali akayijongi intsapho yoluntu njengesihlwele nje sabantu. Uhlolisisa umntu ngamnye aze ngobubele atsalele kuye abo banotyekelo olufanelekileyo.—INdumiso 11:5; IMizekeliso 21:2; IZenzo 13:48.

Phawula indlela awayebhetyebhetye ngayo umpostile uPawulos. Wayezigqala iimfuno ezikhethekileyo zabantu ngabanye waza wavuma ukuba iimbono ezithile zaziqhelekile kwizizwe okanye kwiimvelaphi ezithile. Aze azivumelanise neemeko. Wabhala: “KumaYuda ndaba njengomYuda, ukuze ndizuze amaYuda . . . Kwababuthathaka ndaba buthathaka, ukuze ndizuze ababuthathaka. Ndiye ndaba zizinto zonke kubantu bazo zonke iintlobo, ukuze ngandlela zonke ndisindise abathile.”—1 Korinte 9:20-22.

Licacile elokuba, uPawulos akazange abajonge ngokufanayo okanye abaphathe bonke abantu ngendlela efanayo. Wabakhuthaza esithi: “Amazwi enu makasoloko ekholekile, enongwe ngetyuwa, khon’ ukuze niyazi indlela enifanele ninikele ngayo impendulo kuye ngamnye.” (Kolose 4:6) Ewe, uPawulos kwanamanye amaKristu ayemele akugqale aze akuhlonele ukungafani kwabantu ukuze babancede.

Injongo KaThixo Yantlandlolo

Ukuba nentlonelo ngomntu ngamnye kuyaqhubeka emva kokuba ubani esiba yinxalenye yebandla lamaKristu. Abantu bakaThixo abazilibali ukuba bangoobani na xa bephakathi kwezinye iintlanga ukuze bavumelane nabo baphetheyo. Kunoko, banandipha ubuntu obahlukeneyo kwanobuchule, izimbo, kwaneembono ezahlukeneyo. Ubuntu bomntu ngamnye abujongwa njengobuyindinisa okanye obukruqulayo. Buyinxalenye yenjongo kaThixo yantlandlolo.

Ngenxa yoko, kwihlabathi elitsha elithenjiswe abalungileyo eBhayibhileni, ukufezeka kwabantu kuya kuvumela ukungafani okukhulu. (2 Petros 3:13) Phantsi komxholo othi “Perfection [Imfezeko],” intyilalwazi yeBhayibhile i-Insight on the Scripturesa ngokufanelekileyo yenza amagqabaza athi: “Noko ke, imfezeko ayithethi ukuba ukungafani kuza kuphela, njengokuba abantu becinga. Izilwanyana, ezizizinto ‘zomsebenzi ogqibeleleyo’ kaYehova (Gen[esis] 1:20-24; Dut[eronomi] 32:4), ziziindidi ngeendidi.”

I-Insight yongezelela isithi: “Imfezeko kwisijikelezi-langa uMhlaba ngokufanayo ayingqubani nezinto ezizintlobo ntlobo, inguquko, okanye umahluko; iya kuvumela ukuntsokotha nokungantsokothi, ukungabi yokoyoko nobuyokoyoko, ubumuncu nobumnandi, uburhabaxa nobumpuluswa, amadlelo namahlathi, iintaba kwaneentlambo. Ikwaquka ukuqala kwentwasahlobo ehlaziyayo, ubushushu behlobo obunesibhakabhaka esiluhlaza, ukuthandeka kwemibala yekwindla, ubuhle bekhephu elisandul’ ukuwa. (Gen[esis] 8:22) Abantu abafezekileyo abasoze babe nobuntu, ubugcisa, kwanobuchule obufanayo.”

Inkathalo Ngabanye

Noko ke, ubuKristu bokwenyaniso abukukhuthazi ukungabagqali abo basingqongileyo. Umpostile uPawulos wayeyilumkele ngokupheleleyo nto nganye yobomi bakhe kwanendlela yakhe yokuziphatha ukuze akuphephe ukukhubekisa abanye. Wathi kwincwadi yakhe eya kwibandla laseKorinte: “Akukho ndlela esithi ngayo sinikele nawuphi na unobangela wesikhubekiso, ukuze kungafunyanwa siphoso kubulungiseleli bethu.” (2 Korinte 6:3) Maxa wambi, simele siyilawule iminqweno yethu yobuqu size sibeke iimfuno zabanye ngaphezu kokhetho lwethu. Ngokomzekelo, uPawulos wabhalela amaKristu aseRoma esithi: “Kuhle ukuba ungadli nyama okanye ungaseli wayini okanye ungenzi nantoni na akhubeka yiyo umzalwana wakho.”—Roma 14:21.

Ngokufanayo namhlanje, umntu usenokukhetha ukuzibamba ekuseleni utywala xa ephakathi kwalowo unengxaki yokusela. (1 Korinte 10:23, 24) Oku kwenziwa, kungengakunyanzelwa, kodwa ngenxa yesenzo sobuqu sobubele nesothando. “KwanoKristu akazange azikholise yena ngokwakhe.” UYesu wayengumntu okhethekileyo, kodwa akazange agxininise kwindlela yakhe yokwenza izinto aze angazikhathaleli iimvakalelo zabanye.—Roma 15:3.

Sekunjalo, enye inkalo ehlaziyayo ngobuKristu bokwenyaniso yintlonelo ngenkululeko yomntu ngamnye kwanokhetho oluvumelekileyo ngokwemigaqo yeBhayibhile. Isifundisa ukuba uThixo wasenza ukuba sahluke singafani nabanye. Kweyoku-1 kwabaseKorinte 2:11, sifunda oku: “Ngubani na phakathi kwabantu ozaziyo izinto zomntu ngaphandle komoya womntu okuye?” Siyazama ukubaqonda abanye kangangoko kunokwenzeka. Kodwa le ndinyana isibonisa ukuba ngumntu siqu ozaziyo kwanoMdali wethu kuphela. ‘Sinomntu ofihlakeleyo wentliziyo’ obonakaliswa lukhetho lwethu.—1 Petros 3:4.

Umanyano Nokwahlukahluka—Ukulungelelana Okungelula

Umpostile uPawulos wamisela umzekelo omhle ngokulungelelana kobuKristu. Nangona weyenegunya njengompostile kaKristu, wayekulumkele ukunyanzela iimbono zakhe kwabanye.

Ngokomzekelo, uPawulos wayenoluvo olunzulu ngeengenelo zokungatshati kweli hlabathi lingafezekanga. Yena ngokwakhe wayengatshatanga ngexesha awabhala ngalo esithi: “Abo bathi benjenjalo [batshate] baya kuba nembandezelo enyameni yabo,” kwanokuthi, “[umhlolokazi] unoyolo ngakumbi ukuba uhlala enjengoko anjalo, ngokoluvo lwam.” Into yokuba amazwi akhe aba yinxalenye yeLizwi likaThixo eliphefumlelweyo ibonisa ukuba akukho nto iphosakeleyo ngoluvo lwakhe. Sekunjalo, kwakhona wacacisa esithi: “Kwanokuba ubuthe watshata, ubungayi kuba wenza sono.”—1 Korinte 7:28, 40.

Kuyabonakala ukuba, inkoliso yabapostile yayingamadoda atshatileyo, njengoko uPawulos wakuvumayo oku ngala mazwi: “Sinegunya lokuthabatha udade njengomfazi, kwanjengabanye abapostile nabantakwab’ eNkosi noKefas, akunjalo?” (1 Korinte 9:5) AmaKristu ayesazi ukuba kulo mbandela ayenokwenza ukhetho olwahlukileyo kolukaPawulos yaye wayeza kuluhlonela.

Abakhonzi bakaThixo bebesoloko bevumelekile ukuba baluvakalise ukholo lwabo ngokuvisisana nobuntu babo obahlukileyo. Enyanisweni, uThixo wabavumela kwanababhali beBhayibhile ukuba basebenzise indlela yokubhala yobuqu. Ngokomzekelo, uNehemiya ngokuthobekileyo wabhala ingxelo yakhe ebhekisela kuye siqu. (Nehemiya 5:6, 19) Kwelinye icala, ngenxa yokuthozama umpostile uYohane akazange nakanye asebenzise igama lakhe kwingxelo yakhe yeVangeli yaye akazange abhekise kuye siqu. UThixo wazamkela zombini ezi ndlela zokubhala yaye wazigcina eBhayibhileni.

Imizekelo efanayo yokulungelelana neyokuba sengqiqweni iyafumaneka eZibhalweni. Ngokucacileyo, umanyano lobuKristu luya kusivumela ukuba sahlukahluke. Kakade ke, ukungafani kweemvelaphi nangezimvo kusenokukhokelela kukungavisisani xa iimpawu zokomoya zisilela. (Roma 16:17, 18) Kodwa xa ‘sisambatha uthando, umxokelelwane ogqibeleleyo womanyano,’ sifunda ukwamkela size sibunandiphe ubuntu obahlukileyo babanye.—Kolose 3:14.

IBhayibhile ithi: “Ngoko ke yamkelanani, kanye njengokuba noKristu wasamkelayo kwanathi, ngokubhekisele kuzuko lukaThixo.” (Roma 15:7) Ngoncedo lomoya kaThixo, amaKristu anokukufikelela ukulungelelana okungelula kokugcina umanyano ngoxa enandipha ukwahlukahluka kobuntu ebandleni.

[Umbhalo osemazantsi]

[Amagama acatshulweyo akwiphepha 14]

UMdali akayijongi intsapho yoluntu njengesihlwele nje sabantu

[Amagama acatshulweyo akwiphepha 15]

Ngumntu siqu ozaziyo kwanoMdali wethu kuphela