Isepha—“Isithinteli-kugula Onokusisebenzisa Ngokwakho”

‘ISIFO esikwindawo yesibini kwezona zifo zinkqenkqeza phambili ekubulaleni abantwana asiyomalariya, ayisosifo sephepha ingenguye noGawulayo. Sisisu esihambisayo,’ latsho njalo iphephancwadi i-The Economist. Ukanti, abaninzi kula maxhoba ngebesaphila nanamhlanje ukuba bona kunye neentsapho zabo babehlamba izandla rhoqo ngesepha.

Abaphandi be-London School of Hygiene and Tropical Medicine bafumanisa ukuba “ukuhlamba izandla kakuhle kunokuzinciphisa izifo ezinokuthanani nokuhambisa kwesisu ngama-43%,” yatsho njalo i-The Economist. “Kunokuba luncedo kakhulu nasekunciphiseni izifo ezinokuthanani namalungu okuphefumla, zifo ezo zibagqibileyo abantwana. Uphando olwenziwa kumkhosi waseMerika lwabonisa ukuba athi amajoni akuhlamba izandla kahlanu ngosuku yehla ngama-45% imfuxane nokhohlokhohlo.” Nakumazwe asakhasayo inkoliso yeentsapho iyakwazi ukuthenga isepha. Ngenxa yoko, kufanelekile ukuchaza isepha “njengohlobo oluthile lwesithinteli-kugula onokusisebenzisa ngokwakho.” Yaye akukho ntlungu uzivayo xa uyisebenzisa!

NeBhayibhile ikhuthaza ucoceko. “Masizicoce kuyo yonke into enokungcolisa umzimba okanye umoya,” itsho njalo eyesi-2 kwabaseKorinte 7:1. (iThe New English Bible) Nangona uThixo enomdla wokuba sicoceke ngokomoya, ukugqala njengento ebalulekileyo nokucoceka emzimbeni. (ILevitikus, isahluko 12-15) Kakade ke, akalindelanga ukuba senze okungaphaya kwamandla ethu. Sekunjalo, simele sihlambe izandla rhoqo xa siphuma kwindlu yangasese, xa sigqiba kuhlamba okanye ukutshintsha umntwana, ngaphambi kokuba silungise ukutya okanye ngaphambi kokuba sitye, simele sihlambe izandla nanini na xa sicinga ukuba sisenokudlulisela iintsholongwane eziyingozi kwabanye. Xa sihlamba izandla rhoqo, sibonisa uthando lobuKristu kwintsapho yethu nakubo bonke esinokudibana nabo.—Marko 12:31.