Imibuzo Edla Ngokubuzwa Ngabantu Abanomdla
Ukuba uThixo uluthando, kutheni evumele ubungendawo?
UTHIXO ubuvumele ubungendawo, yaye izigidi ezisemhlabeni zibuqhelisela ngabom. Ngokomzekelo, ziqalisa iimfazwe, ziphosa iziqhushumbisi ebantwaneni, zitshabalalisa umhlaba zibangele nendlala. Izigidi ziyatshaya zize zifumane umhlaza wemiphunga, ziyakrexeza zize zifumane izifo ezidluliselwa ngeentlobano zesini, zisebenzisa utywala ngokugqithiseleyo zize zidunjelwe sisibindi, njalo njalo. Abantu abanjalo abafuni ngokwenene ukuba ubungendawo bupheliswe. Bafuna nje kupheliswe izohlwayo abazifumana ngenxa yabo. Xa bevuna oko bakuhlwayelayo, bayakhala besithi, “Kutheni kusenzeka kum nje oku?” Yaye bambek’ ityala uThixo, njengoko IMizekeliso 19:3 isitsho: “Ngobuyatha umntu wonakalisa ubomi bakhe, andule ke abe nenzondo nxamnye neNKOSI.” (The New English Bible) Yaye ukuba uThixo ebekuphelisa ukwenza kwabo ububi, bebeya kuqhankqalaza ngenxa yokulahlekelwa kwabo yinkululeko yokwenjenjalo!
Esona sizathu sokuba uYehova avumele ubungendawo kukuze aphendule ucelomngeni lukaSathana. USathana uMtyholi wathi akukho bantu uThixo wayenokubabeka emhlabeni ababeya kunyaniseka Kuye xa bevavanywa. (Yobhi 1:6-12; 2:1-10) UYehova uvumela uSathana ukuba aphile ukuze abe nethuba lokungqina ucelomngeni awalenzayo. (Eksodus 9:16) USathana ngoku uqhubeka esizisa ooyeha, esenza abantu ukuba bamchase uThixo, njengoko ezama ukungqina ucelomngeni alwenzileyo. (ISityhilelo 12:12) Noko ke, uYobhi wagcina ingqibelelo. NoYesu wenjenjalo. AmaKristu okwenyaniso enjenjalo ngoku.—Yobhi 27:5; 31:6; Mateyu 4:1-11; 1 Petros 1:6, 7.
Ndiyakunqwenela ukuphila kumhlaba oyiparadesi apho abantu baya kuphila ngonaphakade, kodwa ngaba akuyontsomi oko?
Akunjalo ngokutsho kweBhayibhile. Oku kubonakala kuyintsomi ngenxa yokuba uluntu sele luneenkulungwane ezininzi lubona okubi. UYehova wadala umhlaba waza waxelela abantu ukuba bawuzalise ngamadoda nabafazi abalungileyo ababeya kunyamekela izityalo nezilwanyana baze balondoloze ubuhle bawo kunokuwutshabalalisa. (Bona iphepha 12 nele-17.) Kunokuba loo Paradesi ithenjisiweyo ibe yintsomi, imeko ekhoyo ebuhlungu imbi gqitha ukuba ingaqhubeka ikho. Iya kuthatyathelwa indawo yiParadesi.
Ndinokubaphendula njani abantu abagxekayo baze bathi iBhayibhile iyintsomi yaye ayingqinelani nenzululwazi?
Ukuba nokholo kula madinga asingombandela wokuba nguvuma-zonke. “Ukholo lulandela oko kuviweyo.” Ngokufundisisa iLizwi likaThixo, ubulumko balo buyacaca, nto leyo ekhulisa ukholo.—Roma 10:17; Hebhere 11:1.
Ukwembiwa kwezinto zakudala zamaxesha okubhalwa kweBhayibhile kukuqinisekisa ngeyona ndlela ukuchana kwembali yeBhayibhile. Inzululwazi echanileyo ivumelana neBhayibhile. Ezi zibakala zilandelayo beziseBhayibhileni kudala ngaphambi kokuba zifunyaniswe ngabaphengululi behlabathi: ukulungelelana kwamanqanaba owadlula kuwo umhlaba ekudalweni kwawo, into yokuba umhlaba ungqukuva, nokuba uyajinga awuxhonywanga phezu kwanto nokuba iintaka ziyafuduka.—IGenesis, isahluko 1; Isaya 40:22; Yobhi 26:7; Yeremiya 8:7.
Ukuphefumlelwa kweBhayibhile kuboniswa ziziprofeto ezizalisekileyo. UDaniyeli waxela kwangaphambili ngokuvela nokuwa kwamagunya ehlabathi, kwanexesha awayeza kufika aze abulawe ngalo uMesiya. (Daniyeli, isahluko 2, nesesi-8; 9:24-27) Namhlanje, kusekho ezinye iziprofeto ezizalisekayo, zifanisa le mihla ‘nemihla yokugqibela.’ (2 Timoti 3:1-5; Mateyu isahluko 24) Umntu akanawo amandla okuzazi izinto kusengaphambili. (Isaya 41:23) Ukuze ufumane isiqinisekiso esingakumbi, bona incwadi ethi IBhayibhile—Ngaba Ililizwi LikaThixo Okanye Lomntu? nethi Is There a Creator Who Cares About You?, ezipapashwe yiWatchtower Bible and Tract Society.
Ndingakwazi njani ukuphendula imibuzo ngeBhayibhile?
Ufanele ufundisise iBhayibhile yaye ucamngce ngayo, kwangaxeshanye ucele umoya kaThixo ukuba ukwalathise. (IMizekeliso 15:28; Luka 11:9-13) IBhayibhile ithi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa, engangcikivi; yaye uya kubunikwa.” (Yakobi 1:5) Kwakhona, kukho uncedo lwesifundo seBhayibhile ekuya kuba luncedo ukuba usifumane. Ngokuqhelekileyo kudla ngokufuneka uncedo oluvela kwabanye, njengaxa uFilipu wafundisisa nomTiyopiya. (IZenzo 8:26-35) AmaNgqina kaYehova aqhuba izifundo zeBhayibhile ngesisa kunye nabantu abanomdla emakhayeni abo. Zive ukhululekile ukucela olu ncedo.
Kutheni abantu abaninzi bewachasa amaNgqina kaYehova baze bandixelele ukuba ndingafundisisi nawo?
Kwakukho inkcaso ekushumayeleni kukaYesu, yaye wathi nabalandeli bakhe babeya kuchaswa. Xa abanye bachukunyiswa yimfundiso kaYesu, abachasi bonqulo babanyemba besithi: “Anilahlekiswanga nani, akunjalo? Akukho namnye kubalawuli okanye kubaFarisi okholiweyo kuye, akunjalo?” (Yohane 7:46-48; 15:20) Abaninzi abakucebisa ukuba ungafundisisi namaNgqina kusenokwenzeka ukuba banolwazi oluphosakeleyo ngawo okanye banentiyo. Fundisisa namaNgqina ukuze uzibonele ngokwakho enoba ukuqonda kwakho iBhayibhile kuya kukhula okanye akunjalo.—Mateyu 7:17-20.
Kutheni amaNgqina etyelela abantu abanonqulo lwabo?
Ngokwenza oku alandela umzekelo kaYesu. Waya kumaYuda. AmaYuda ayenonqulo lwawo, kodwa ngeendlela ezininzi lwaluphambukile kwiLizwi likaThixo. (Mateyu 15:1-9) Zonke iintlanga zinonqulo oluthile, enoba lolo lufane lubizwe ngokuba bubuKristu okanye asilolwabuKristu. Kubaluleke ngokwenene ukuba abantu babambelele kwiinkolelo ezivisisana neLizwi likaThixo, yaye imigudu yamaNgqina yokubanceda benze oku ibonisa uthando lommelwane.
Ngaba amaNgqina akholelwa ukuba lunqulo lwawo kuphela oluchanileyo?
Nabani na oluthabatha nzulu unqulo lwakhe ufanele aqiniseke ukuba lolona lufanelekileyo. Kungenjalo, yintoni enokumenza abe yinxalenye yalo? AmaKristu ayabongozwa: “Qinisekani ngezinto zonke; nibambelele nkqi koko kuhle.” (1 Tesalonika 5:21) Umntu ufanele aqinisekise ukuba iinkolelo zakhe zinokuxhaswa ziZibhalo, kuba lunye kuphela ukholo lokwenyaniso. Eyabase-Efese 4:5 iyakungqina oku ikhankanya ukuba, “inye iNkosi, lunye ukholo, lunye ubhaptizo.” UYesu akazange avumelane nembono yanamhlanje etenxileyo ethi kukho iindlela ezininzi, iinkonzo ezininzi, zonke zikhokelela kusindiso. Kunoko, wathi: “Limxinwa isango kwaye imxinwa indlela esa ebomini, yaye bambalwa abayifumanayo.” AmaNgqina kaYehova akholelwa ukuba ayifumene. Kungenjalo, ebeya kukhangela olunye unqulo.—Mateyu 7:14.
Ngaba akholelwa ukuba ngawo kuphela aya kusindiswa?
Akunjalo. Izigidi zabo baye baphila kwiinkulungwane ezadlulayo ababengengawo amaNgqina kaYehova ziza kubuya eluvukweni zize zifumane ithuba lokuphila. Abaninzi abaphilayo ngoku basenokuyimela inyaniso nobulungisa ngaphambi ‘kwembandezelo enkulu,’ yaye baya kufumana usindiso. Ngaphezu koko, uYesu wathi asimele sigwebane. Thina sikhangela imbonakalo yangaphandle; uThixo ukhangela intliziyo. Ubona ngokuchanileyo aze agwebe ngenceba. Ukugweba uye wakunikela ezandleni zikaYesu, kungekhona ezethu.—Mateyu 7:1-5; 24:21; 25:31.
Yiyiphi iminikelo eyimali elindelweyo kwabo baya kwiintlanganiso zamaNgqina kaYehova?
Ngokuphathelele imali yeminikelo, umpostile uPawulos wathi: “Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.” (2 Korinte 9:7) KwiiHolo zoBukumkani nakwiindawo zendibano zamaNgqina kaYehova, akuqokelelwa nkongozelo. Kubekwa iibhokisi ekuhleni ukuze nabani na onqwenela ukunikela enjenjalo. Akukho bani ukwaziyo oko kunikelwa ngabanye okanye waziyo ukuba abanye bayanikela. Abanye bayakwazi ukunikela ngaphezu kwabanye; abanye basenokungakwazi kunikela nantoni na. UYesu wabonisa imbono efanelekileyo xa wayethetha ngezikhongozelo zobuncwane ezazikwitempile yaseYerusalem nangabo babenikela: ngamandla kabani okunikela nomoya wokunikela okubalulekileyo, kungekhona ubungakanani bemali.—Luka 21:1-4.
Ukuba ndiba ngomnye wamaNgqina kaYehova, ngaba kuya kulindelwa ukuba ndishumayele njengokuba esenza?
Xa ubani ezaliswa lulwazi ngeParadesi yasemhlabeni ethenjisiweyo phantsi koBukumkani bukaKristu, ufuna ukwabelana ngalo nabanye. Nawe uza kufuna ukwenjenjalo. Ezi ziindaba ezilungileyo!—IZenzo 5:41, 42.
Ukwenza oku kuyindlela ebalulekileyo yokubonisa ukuba ungumfundi kaYesu Kristu. EBhayibhileni uYesu ubizwa ngokuba ‘lingqina elithembekileyo neliyinyaniso.’ Xa wayesemhlabeni washumayela esithi: “Ubukumkani bamazulu busondele,” yaye wathumela abafundi bakhe ukuba benze okufanayo. (ISityhilelo 3:14; Mateyu 4:17; 10:7) Kamva uYesu wayalela abalandeli bakhe wathi: “Hambani ke ngoko niye kubenza abafundi abantu beentlanga zonke, . . . nibafundisa.” Kwakhona waxela kwangaphambili ukuba ngaphambi kokuba kufike ukuphela, “ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.”—Mateyu 24:14; 28:19, 20.
Zininzi iindlela zokuvakalisa ezi ndaba zilungileyo. Ukuncokola nabahlobo kunye nabantu esiqhelene nabo kusoloko kusivulela amathuba okwenjenjalo. Abanye oku bakwenza ngokubhala iileta okanye ngokusebenzisa umnxeba. Abanye bathumela uncwadi olunombandela abacinga ukuba loo mntu baqhelene naye uya kuba nomdla ngokukhethekileyo kuwo. Ngenxa yomnqweno wokuba kungabikho namnye ophoswayo, amaNgqina aya kwindlu ngendlu ephethe esi sigidimi.
IBhayibhile inesi simemo sifudumeleyo: “Umoya nomtshakazi bathi: ‘Yiza!’ Lowo uvayo makathi: ‘Yiza!’ Lowo unxaniweyo makeze; lowo uthandayo makawathabathe amanzi obomi ngesisa.” (ISityhilelo 22:17) Ukuxelela abanye ngomhlaba oyiParadesi neentsikelelo zawo kufanele kwenziwe ngokuzithandela, ngentliziyo ezaliswe ngumnqweno wokwabelana nabanye ngezi ndaba zilungileyo.
Siqinisekile ukuba uneminye imibuzo ngamaNgqina kaYehova neenkolelo zawo. Mhlawumbi ezinye zazo zifuna ukuxutyushwa. Singathanda ukuyiphendula imibuzo yakho. Asinasithuba singako kule ncwadana inemifanekiso, ngoko siyakumema ukuba uyibuze kumaNgqina asekuhlaleni. Unokukwenza oko mhlawumbi kwiintlanganiso zawo kwiHolo yoBukumkani okanye xa etyelele kwikhaya lakho. Okanye usenokuthumela imibuzo yakho kwiWatch Tower, usebenzisa idilesi efanelekileyo kwezi zingezantsi.