Ngaba Umthandazo Uwufanele Umgudu?
NGOLWESIHLANU, ngoMeyi 31, 1985, inkanyamba yadlavula icandelo elisemazantsi eOntario, eKhanada. Umfundisi owayehlala kwidolophana encinane eyiGrand Valley wabukela engenakunceda ngoxa umoya owawunamandla wancothula uphahla lwegumbi lakhe. Njengoko kwathi kwabikwa ezindabeni, “wabona imimangaliso neentlekele zisenzeka macal’ onke njengoko wayebona ukungalawuleki komsindo wendalo.”
Ngokuqinisekileyo, abathandekayo nezihlobo zabantu ababini ababulawa yile nkanyamba oku bakujonga njengentlekele eyoyikekayo. Kwaba njalo nakubantu abangaphezu kwewaka abasala bengenamakhaya ngenxa yentlekele eyayitshabalalisa. Kwelinye icala, abaninzi babo basinda cebetshu ekufeni okanye ekwenzakaleni ngokumanyumnyezi ukusinda kwabo bakuchaza ‘njengommangaliso.’ URon nomfo asebenza naye ngabanye ababini kwaba bantu. Bafikelela kwindawo ekhuselekileyo neyomeleleyo kwisakhiwo sabo seeofisi ngemizuzwana nje emine kuphela yesilumkiso. Emva kokuchaza indlela abasinda ngayo ngokumangalisayo ekufeni, uRon wathi: “Bendikholelwa kuThixo ngaphambili yaye ngokuqinisekileyo ndiyakholelwa kuThixo ngoku.”
Kuye kwathiwa ‘bambalwa, ukuba bakho kwaukubakho, abantu abangakholelwayo kuThixo’ ngethuba lentlekele yequbuliso okanye engalindelekanga. Yaye kuye kwenziwe imithandazo emininzi enyanisekileyo yokucela ukukhuselwa nokusindiswa ukuba likho ixesha elaneleyo lokuyenza kwizihlandlo ezinjalo.
NgeCawa, ngoJulayi 21, 1985, amadoda, abafazi nabantwana abangaphezu kwekhulu babehlanganisene ngenjongo yokunqula kwiHolo yoBukumkani eseSydney, eOstreliya. Emva kokuvunywa kwengoma yokudumisa uThixo, kwenziwa umthandazo egameni lebandla. Xa umlungiseleli wayesele enemizuzu eli-15 enikela intetho yakhe yeBhayibhile ngaloo ntsasa yangeCawa, kwadubula ibhombu eyaluphelisa ngequbuliso olo xolo, imenzakalisa ngokumanyumnyezi loo mlungiseleli, yabulala indoda eyayihleli kwizihlalo ezingaphambili eholweni yaza yabangela ukuba abantu abangaphezu kwama-40 balale ngandletyana-nye esibhedlele.
[Ibhokisi/Umfanekiso okwiphepha 3]
Ngaba Umthandazo Wenza Nawuphi Na Umahluko?
Zozibini ezi ziganeko zisandul’ ukubaliswa—esinye esichazwa ‘njengomsindo wendalo ongalawulekiyo’ nesinye esichazwa njengesenzo solwaphulo-mthetho—zabangela ukuba kuphakanyiswe imibuzo mayela nokuxabiseka komthandazo. Kuxabiseke ngantoni ukuthandaza? Ngaba ngenene umthandazo uyasebenza? Ngaba ukuthandaza kuwufanele umgudu?