Abavakalisi BoBukumkani Bayabalisa
Iindaba Ezilungileyo ZoBukumkani Kwelinye Icala Lehlabathi
NJENGAKWAMANYE amazwe angama-211, iindaba ezilungileyo zoBukumkani zivakaliswa ngenzondelelo ngamaNgqina kaYehova eOstreliya. AmaNgqina kaYehova alapho, angaphezu kwama-49 000 anandipha iintsikelelo ezityebileyo. Kwiminyaka edlulileyo abantu abaninzi beentlanga ezahlukahlukeneyo bafudukele apho, kangangokuba ngoku ama-58 amabandla eentlanga ezahlukahlukeneyo anikela ingxelo yawo yenkonzo yasentsimini. Iofisi yesebe yeWatch Tower Society ibalisa amava akhuthazayo.
Imbacu yaseVietnam
Imbacu yaseVietnam, ngoku ehlala eOstreliya, yakhulela kunqulo-zinyanya, unqulo lwabalandeli bakaConfucius, ubuBhuda nakwintanda-bulumko yaseMpuma naseNtshona. Kude kwangowe-1975 ilijoni kumkhosi waseMzantsi Vietnam. Ngowe-1979 kwafuneka inqunyulwe ingalo yayo yasekhohlo ngenxa yelifa elalisesihlahleni sayo. Ilangazelela inkululeko, ngowe-1983, yona nabanye abantu abangama-24 yasaba eVietnam, ngephenyane elincinane. Emva kokuqubisana ngokoyikekayo nabaphangi, iphenyane labo lakhukulisekela kwicala ababengasingise kulo kuLwandle lwaseMzantsi Tshayina kangangeentsuku ezintandathu ezazitshisa zikhupha intlanzi emanzini, de ekugqibeleni bafika eMalaysia. Emva kokuchitha iinyanga ezintlanu kwiikampu zeembacu, yavunyelwa ukuba ingene eOstreliya. Kwiinyanga ezintathu kamva yadibana nenyaniso. Amazwi kaYesu akuYohane 8:32 aba sisicombululo kulangazelelo lwayo olunzulu lwenkululeko: “Naniya kuyazi inyaniso, yaye inyaniso iya kunikhulula.” Abazalwana bayiphatha ngothando olukhulu. Namhlanje iliNgqina likaYehova yaye isisixhobo esisebenzisekayo ekuncedeni abanye abantu abaninzi abathetha ulwimi lwaseVietnam ukufunda inyaniso ekhululayo.
Inzalelwane YaseOstreliya Iyasabela Kwinyaniso
Kumntla-ntshona weOstreliya umzalwana oselula onguvulindlela neqabane lakhe batyelela ibhinqa eliyinzalelwane yaseOstreliya kummandla walapho ngokwesizwe obizwa ngokuba yindawo yoboya. Emva kokuva isizathu sotyelelo lwabo, ibhinqa lathabatha isitshixo esasijinga entanyeni yalo lavula ityesi enkulu yentsimbi. Bemangalisiwe, babona ngaphakathi kuloo tyesi phakathi kwezinye izinto zalo iincwadana ezimbini ezinemifanekiso zeWatch Tower kunye nombhalo omdala weBhayibhile. Behleli phantsi, baba nako ukuqalisa isifundo besebenzisa enye yezo ncwadana zinemifanekiso. Nangona elo bhinqa lalingakwazi ukufunda nokubhala, lazixabisa ngokwenyaniso ezo ncwadana lalizifumene ngaphambili. Ngoku kuqhutywa isifundo esithe rhoqo, nto leyo eyonwabisa gqitha.
Ukutsalelwa Umnxeba Ngengozi
Kwisixeko saseSydney, esinabemi abazizigidi ezithathu, intombazana eneminyaka emithathu ubudala yayidlala ngomnxeba yaze yabetha nayiphi na inombolo ngokungakhethi. Kwathi kanti loo nombolo yeyeNgqina. Udade waphendula, yaye ekuqaleni wacinga ukuba lowo wayesemnxebeni yayingumzukulwana wakhe. Emva koko weva ilizwi lomntu omdala. Yayingumama wentombazana leyo, owayecelela uxolo intombazana yakhe. Kwalandela incoko, ekwathi kuyo udade wethu wanikela ubungqina. Inenekazi lacacisa: “Bendinethemba lokuba amaNgqina aza kundityelela kwakhona. Ndifuna ukuba ngomnye wamaNgqina kaYehova!” Laqhubela phambili lathi kwiinyanga nje ezimbini ngaphambi koko, lalityelele ePeru yaye lachukumiseka ngudadeboyise nentsapho yakhe abangamaNgqina kaYehova ngoku. Lathi: “Abantwana besalamane sam bebengabatyholi abancinane, kodwa ngoku bazizithunywa zezulu ezincinane!” Kwenziwa amalungiselelo esifundo seBhayibhile, yaye elo nenekazi linomdla liyaqhubeka lisenza inkqubela encomekayo—konke oku kwenzeka ngenxa yokutsala umnxeba ngengozi kwentombazana yakhe encinane.