Ngaba Uyalilangazelela Ixesha Laxa . . .

□ unokuziva ukhuselekile yaye unqabisekile ekhayeni lakho—kungakhathaliseki ukuba kungaliphi na ixesha lemini?

□ kuya kube kungekho mfuneko yazitshixo, imivalo yentsimbi, iialarm, imingxuma yokukroba, yakubiya ngeengcingo, abalindi, izinja zokulinda nezinye iindlela zonqabiseko?

□ unokuhamba wedwa ezitratweni ukhuseleke ngokupheleleyo, nasebusuku?

□ iziyobisi eziyingozi nazo zonke iingxaki ezinxulumene nazo ziya kuba zilibalekile?

□ zonke iimfazwe ziya kuba zingasekho, nezixhobo zingayi kuphinda zenziwe okanye zifunjwe?

□ ungasayi kuba naxhala lakutya, umoya namanzi angcolileyo?

□ ubugrogrisi, ukuthinjwa kwabantu, nezisongelo zebhombu ziya kuba zipheliswe ngokupheleleyo?

□ ubutyebi bendalo bomhlaba buya kukhuseleka, bungcinwe, buze busetyenziswe ngobulumko ukuze kulungelwe abantu ngokubanzi?

□ ukubawa nokuzingca kungayi kuphinda kube ngamandla aphembelelayo phakathi kwabantu?

□ abantwana beya kugcina ukunyaniseka kwabo yaye babahlonele abanye nezinto zabo?

□ amabhinqa engayi kucinezelwa aze axhatshazwe?

□ imithetho nemimiselo iya kuba nobulungisa yaye isetyenziselwe ukuba kulungelwe bonke?

□ urhulumente eya kwenza izigqibo ezisekelwe kwiintswelo zokwenene kungekhona kwezobupolitika?

□ inkululeko nokulingana izizinto ekungayi kuthethwa nje ngazo kodwa ziqheliselwe?

□ ubuhlwempu bungayi kuba sabakho, kodwa bonke beya kuba nayo nantoni na efunekayo kwimpilo, kwintlalo-ntle, nakulonwabo lwabo?

□ kuya kubakho umnqweno wokufumana abantwana baze banyanyekelwe yaye bangaze baphathwe kakubi okanye balahlwe?

□ isifo nokufa ziya kube zoyisiwe, yaye kungayi kubakho zibetho zoyikisayo?

□ wonke ubani odibana naye eya kuba nobubele, abe luncedo, aze abe ngonokuthenjwa?

□ ubomi bomntu wonke buya kuxabiseka ngokwenene, yaye bonke benokonwaba ngonaphakade?

□ unqulo lungasayi kuba ngumahlukanisi, lukhokelela abantu ekubeni babe neenkani kwimicimbi yonqulo, kwintiyo nakwiimfazwe?

□ bonke beya kuba neendawo zokuhlala ezaneleyo nezintle, nelaxa ukungabi namakhaya kuya kuba yinto yexesha elidluleyo?

Ukuba unokuthi ewe kuwo nawuphi na umbuzo ongasentla, uya kuba nomdla ekufundeni amanqaku alandelayo.