UYesu Ubonakala Kubalobi

Emva kwexeshana uYesu ebonakele kubapostile bakhe, uPetros waya kuloba kuLwandle LwaseGalili. UTomas, uYakobi, uYohane nabanye abafundi bahamba naye. Baloba ubusuku bonke, kodwa abazange babambise nto.

Ngentsasa elandelayo babona indoda imi ngaselunxwemeni. Yathi kubo: ‘Zikho iintlanzi enizibambisileyo?’ Bathi: “Hayi!” Yathi le ndoda: “Phosani umnatha ngasekunene kwesikhephe.” Bawuphosa, emva koko wagcwala ziintlanzi de abakwazi nokuwutsala. Ngoko nangoko uYohane waqonda ukuba le ndoda nguYesu waza wathi: “YiNkosi!” Ngoko nangoko uPetros waziphosa emanzini waza wadada esiya ngaselunxwemeni. Abanye abapostile balandela ngesikhephe.

Xa befika elunxwemeni, babona intlanzi nesonka emlilweni. UYesu wathi mabaze nezinye iintlanzi ukuze bongeze kwesi sidlo. Waza wathi: ‘Mabatye isidlo sakusasa.’

Bakugqiba ukutya, uYesu wabuza uPetros: ‘Ngaba undithanda ngaphezu kokuloba?’ UPetros wathi: ‘Ewe Nkosi, uyazi ukuba ndiyakuthanda.’ UYesu wathi: ‘Yondla amatakane am.’ UYesu waphinda wambuza: ‘Petros, uyandithanda?’ Wathi uPetros: ‘Nkosi, uyazi ukuba ndiyakuthanda.’ UYesu wathi: “Yalusa amatakane am.” UYesu wambuza okwesithathu. UPetros yamhlupha le nto. Wathi: ‘Nkosi, wazi yonke into. Uyazi nokuba ndiyakuthanda.’ UYesu wathi: “Yondla amatakane am.” Waza wathi: “Qhubeka undilandela.”