IVatican Ifuna Lingasetyenziswa Igama LikaThixo

ABEFUNDISI bamaKatolika bafuna lingasetyenziswa igama likaThixo xa kuqhutywa inkonzo. Kulo nyaka uphelileyo, iVatican Congregation for Divine Worship and the Discipline of the Sacraments yathumela lo myalelo kuzo zonke iinkomfa zoobhishophu bamaKatolika ehlabathini lonke. Ngupopu “owayalela” ukuba kwenziwe lento.

Olu xwebhu olwabhalwa ngoJuni 29, 2008, luthi nakuba abantu babeyalelwe ukuba bayeke, “mva nje kuye kwabuyelwa kwigama lamandulo loThixo kaSirayeli, elaziwa ngokuba yitetragrammaton, enonobumba abane besiHebhere u יהוה, YHWH.” Olu xwebhu luthi eli gama likaThixo libhalwa ngendlela ezahlukahlukeneyo “njengoYahweh,” “Yahwè,” “Jahweh,” “Jahwè,” “Jave,” “Yehovah,” namanye.a Noko ke, lo myalelo waseVatican ufuna amaKotolika abuyele kwindebe endala. Loo nto ithetha ukuba iTetragrammaton ifanele ikhutshwe kuze kubuyiselwe igama elithi “Nkosi.” Ngaphezu koko, kwinkonzo, amaculo nemithandazo yamaKatolika igama likaThixo “uYHWH alifanelanga lisetyenziswe okanye libizwe kwa ukubizwa.”

Ukuze luxhase esi sigqibo seVatican, olu xwebhu lubhenela “kwisithethe esidala” samaKatolika. Lo myalelo uthi nkqu nakwinguqulelo yeSeptuagint yeZibhalo zesiHebhere, yangaphambi kwexesha lamaKristu, igama likaThixo lalidla ngokuguqulelwa kuthiwe Kyʹri·os, igama lesiGrike elithetha “Nkosi.” Ngaloo ndlela, lo myalelo ume ngelokuba, “namaKristu, awazange ayisebenzise itetragrammaton kwasekuqaleni.” Noko ke, le ngxelo ibubetha ngoyaba ubungqina obuchasene noku. Imibhalo-ngqangi yokuqala yeSeptuagint yayingenaye uKyʹri·os, kodwa yayinegama likaThixo elinguיהוה. Abalandeli benkulungwane yokuqala bakaKristu babelazi igama likaThixo yaye babelisebenzisa. Naye uYesu xa wayethandaza kuYise wathi: “Ndilazisile igama lakho.” (Yohane 17:26) Kumthandazo wakhe ongumzekelo odumileyo uYesu wasifundisa ukuba sithandaze sithi: “Bawo wethu osemazulwini, malingcwaliswe igama lakho.”—Mateyu 6:9.

Onke amaKristu afanele afune ukubona igama likaThixo lingcwaliswa. Amalinge eVatican okuba lingasetyenziswa igama likaThixo amthoba isidima uYehova, lowo uthi: “Lilo elo igama lam lamaxesha onke, yaye ndiya kubizwa ngalo kwizizukulwana ngezizukulwana.”—Eksodus 3:15, The Jerusalem Bible

[Umbhalo osemazantsi]

[Amagama acatshulweyo akwiphepha 30]

“Lilo elo igama lam lamaxesha onke.”—Eksodus 3:15

[Umfanekiso okwiphepha 30]

Isiqwenga “seSeptuagint” senkulungwane yokuqala yeXesha Eliqhelekileyo. Igama likaThixo elimelwa ngonobumba abane besiHebhere,elidla ngokuguqulelwa kuthiwe YHWH, libiyelwe

[Inkcazelo]

Courtesy of the Egypt Exploration Society