Ukusasaza Inyaniso YeBhayibhile EPortugal

UKUSUKA eCaminha emantla ukuza kuthi xhaxhe ngeVila Real de Santo Antônio kumazantsi, amawaka amaphenyane okuloba amibalabala athe saa kwiikhilomitha ezingama-800 ukusuka kuNxweme lweAtlantic lwasePortugal. Kangangeenkulungwane abalobi baye benjenjeya ‘ukusinga elwandle ngeenqanawa,’ besenza intlanzi ibe kokona kudla kuphambili kuninzi lwabantu abangamaPhuthukezi.—INdumiso 107:23.

Kule minyaka ingama-70 idluleyo, kukho nolunye uhlobo lokuloba obeluqhutywa ePortugal. AmaNgqina kaYehova ebexakekile esisa iindaba ezilungileyo kumashumi amawaka eentlanzi zokomfuziselo. (Mateyu 4:19) NgoMeyi 1995 kubekho incopho yabavakalisi boBukumkani abangama-44 650—umlinganiselo womvakalisi omnye kubemi abangama-210. Kanti ke kwezinye izixeko umlinganiselo usisiqingatha soko.

Ekubeni kukho inkungu nelanga yabasebenzi, intsimi ekunikelwa ubungqina kuyo igutyungelwa ngazo zonke iiveki. Ngenxa yoko amaNgqina asePortugal anomdla kakhulu ekusebenziseni iintshayelelo ezahlukeneyo ekuxeleleni abanye ngethemba lawo eliseBhayibhileni. Ewe, ayakuqonda ukubaluleka kokwazisa inyaniso yeBhayibhile esebenzisa zonke iindlela ezinokufumaneka.—1 Korinte 9:20-23.

Ukunceda Abantu Abanomdla Kunqulo

Ngokobalo lowe-1991, ngama-70 ekhulwini abo baneminyaka eli-18 ubudala nabangaphezulu abathi bona bangamaRoma Katolika ePortugal. Nangona kunjalo, ulwazi abanalo abantu ngeBhayibhile luncinane kakhulu. Iphephandaba iJornal de Notícias lathi: “Le yeyona nto ilusizi ngabantu abangamaKatolika: Ukungabi nalo nofifana ngeBhayibhile!” Yintoni unobangela woku? Iphephandaba lasePortugal iExpresso linikela impendulo. Lisenza ingxelo ngentlanganiso yabafundisi abangama-500 eFátima, eli phepha lithi: “Ngokutsho kukabhishophu, kufuneka umfundisi akhe athi xhaa kwimisebenzi esoloko imenza abe sisinxadanxada aze awuqale phantsi umsebenzi wakhe ‘njengomvakalisi.’ . . . Ukuba umfundisi unokuwunikela ekushumayeleni iVangeli wonke umphefumlo wakhe, akayi kuba nalo kwaphela ixesha lokwenza ezinye izinto.”

Ngokwahlukileyo koko, amaNgqina kaYehova asePortugal axakekile ekwenzeni inyaniso yeBhayibhile yaziwe esebenzisa zonke iindlela ezinokufumaneka. Ngenxa yoko, uninzi lwamaKatolika anyanisekileyo luzuza ulwazi lweBhayibhile.

UCarlota wayengumKatolika ozinikeleyo nokwalilungu lombutho wolutsha kwinkqubo yonqulo. Ukanti wayekwangumfundisi-ntsapho kwisikolo sabantwana abancinane apho kwakusebenza khona uAntônio, oliNgqina. Njengovulindlela othe ngxi, okanye umlungiseleli wexesha elizeleyo, uAntônio wayesoloko esenza iinzame zokuthetha ngeBhayibhile nabo asebenza nabo ngethuba lesidlo sasemini. Ngaminazana ithile uCarlota wambuza ukuba uyakholelwa na kwisihogo somlilo nasekunquleni uMariya. UAntônio wambonisa oko kufundiswa yiBhayibhile ngale mibandela, ibe eso yayisisiqalo seengxubusho ezininzi zeBhayibhile. Xa uCarlota waya kwiintlanganiso okokuqala kwiHolo yoBukumkani yasekuhlaleni, wemka engawuval’ umlomo. Noko ke, amaxesha eentlanganiso ayengqubana nalawo enkqubo yonqulo awayesiya kuyo. Wayiqonda into yokuba umele enze isigqibo. Wayeza kuthini?

UCarlota wahlanganisa lonke ulutsha lwalo mbutho waza walucacisela ngokusuka eBhayibhileni isizathu sokuba azibeke phantsi iintambo. Lonke lwasigxeka isigqibo sakhe, ngaphandle nje kwentwazana egama linguStela, eyaphulaphula ngenyameko. Xa uCarlota wathetha naye kamva, uStela wambuza imibuzo emininzi ngemvelaphi nangenjongo yobomi. UCarlota wamnika incwadi ethi Life—How Did It Get Here? By Evolution or by Creation?a waza waqalisa isifundo seBhayibhile naye.

Ngelo xesha ke uCarlota wenza inkqubela entle ngokomoya, wabhaptizwa ngoJuni 1991 waza waqalisa ukukhonza njengovulindlela othe ngxi kwiinyanga ezintandathu kamva. NgoMeyi 1992, yena noAntônio batshata, baqhubeka bekwinkonzo yobuvulindlela kunye kwibandla elikufuphi apho kukho imfuneko enkulu khona. Kuthekani ngoStela? Yena wabhaptizwa ngoMeyi 1993 ibe sithetha nje ukhonza njengovulindlela othe ngxi.

Umfana onguFrancisco naye wayeluthanda unqulo. Ngazo zonke iiCawa kusasa wayesiya kuMthendeleko aze ngenjikalanga aye kwenza izicengcelezo zeRosari. Wayeligosa, encedisa umfundisi ebudeni boMthendeleko. Wayede athandazele ukuba ngaminazana ithile uThixo amenze “ingcwele”!

UFrancisco wayeyifuna ngokwenene iBhayibhile, yaye ngenye imini umhlobo wakhe wamboleka. Yammangalisa into yokuba kanti uThixo unegama, elinguYehova. (Eksodus 6:3; INdumiso 83:18) Wada wanochatha ukumangaliswa akufunda kwiEksodus 20:4, 5 ukuba uThixo akakufuni ukusetyenziswa kwemifanekiso elunqulweni! Ekubeni wayesazi ukuba icawa izele imifanekiso, wathandaza kuThixo ngokunyanisekileyo ukuba amncede aqonde esi sintsompothi sento. Kwiintsuku eziliqela kamva wadibana nalowo wayefunda naye waza wabuza isizathu sokuba ayeke ukuya kwisikolo sasebusuku.

“Ndihamba kwisikolo sasebusuku esibhetele ngoku,” waphendula ngelitshoyo umhlobo wakhe.

“Sisiphi eso sikolo, iyintoni oyifundayo apho?” wabuza uFrancisco. Ayizange ithi qatha nokuthi qatha engqondweni yakhe into yokuba umhlobo wakhe angaphendula ngale ndlela.

“Ndifundisisa iBhayibhile kwiHolo yoBukumkani yamaNgqina kaYehova,” watsho umhlobo wakhe. “Ubungethandi na wena ukuza?”

UFrancisco akazange akukholelwe oko wayekubona kwintlanganiso yokuqala—abantu abonwabileyo nabazele luncumo; abantu abancokola ngendlela efudumeleyo neyobuhlobo; abantwana behleli nabazali babo benikele ingqalelo koko kwakuthethwa.

“Ndandingaziwa nokwaziwa apha, kwaye ndaziva ngathi nam ndiyinxalenye yale ntsapho!” watsho uFrancisco. Ebesiya rhoqo kwiintlanganiso ukususela ngoko. Ngoku uFrancisco ukhonza njengomdala webandla, kwaye yena nomkakhe nabantwana bakhe ababini, bavuyiswa ngamadinga azukileyo oBukumkani aseLizwini likaThixo.

Ukwabelana Ngenyaniso Nezizalwana

UManuela, onguvulindlela othe ngxi kummandla waseLisbon, uye wabambisa intaphane yeentlanzi zokomoya ngenxa yokuthi gqolo enikela ubungqina ngobubele kubo bonke, kuquka izalamane. Phakathi kwazo yayingumntakwabo, uJosé Eduardo, owayeqeqeshelwa ikarati nokusebenzisa izixhobo. Umthetho wayewaphula umhla nezolo kangangokuba ekugqibeleni wasiwa enkundleni ngezityholo ezingama-22 waza wagwetywa iminyaka engama-20 enkolonkoloza ngaphaya kwezitshixo. Wayeyindlobongela kangangokuba nabo wayevalelwe nabo babemoyika, yaye wavalelwa yedwa esiseleni waza wabekw’ esweni.

Kangangeminyaka esixhenxe uManuela wayemtyelela uJosé Eduardo engadinwa, kodwa wayengafuni nokuva ngesigidimi sakhe seBhayibhile. Kuthe ekugqibeleni, kwakupapashwa incwadi ethi Life—How Did It Get Here? By Evolution or by Creation?, wayamkela, kwaza kwaqaliswa isifundo seBhayibhile. Zisuka nje wenza iinguqulelo ezinkulu kwihambo yakhe. Kwiveki enye emva koko wanikela ubungqina kumabanjwa angama-200, waza kwiveki elandelayo wanikela ubungqina kwamanye angama-600. Wada wanikwa nkqu nemvume yokutyelela abo wayevalelwe nabo abakwezinye izisele. Kuthe ngenxa yotshintsho olukhulu kwisimilo sakhe, isigwebo sathotywa saya kutsho kwi-15 leminyaka. Emva kokuthothoza iminyaka eli-10, wakhululwa yaza eminye iminyaka yaxhonywa. Sele kudlule iminyaka emihlanu ukususela ngoko, yaye sithetha nje uJosé Eduardo liNgqina likaYehova elibhaptiziweyo, ukhonza njengesicaka solungiselelo kwibandla lasekuhlaleni. Liyinene elokuba ‘ingcuka ihlala nemvana’!—Isaya 11:6.

Ngenxa yokuqhubeka esenza umgudu wokunikela ubungqina kwintsapho yakhe, uManuela uye wafumana uvuyo lokunceda umyeni wakhe namanye amalungu amane entsapho yakhe ukuba akhuthale enkonzweni kaYehova. Kungokunje umyeni wakhe sisicaka solungiselelo.

“Ndiya Kuze Ndiwakhuphe Ngesihlangu Ndiwafake Isabhokhwe”

UMaria do Carmo wayehlala kwihlomela ledolophu yaseLisbon xa watyelelwa ngamaNgqina. Wayithanda into awayivayo waza wacela imvume yokuqhutyelwa isifundo seBhayibhile ekhaya kumyeni wakhe, uAntônio. “Yikhuphe tu engqondweni yakho loo nto!” yatsho impendulo. “Ukuba nje ndinokuze ndiwabone loo maNgqina kaYehova kweli khaya, ndiya kuze ndiwakhuphe ngesihlangu ndiwafake isabhokhwe.” UAntônio lo, wayengumqeqeshi wekarati yaye enebhanti elimnyama kudidi lwesithathu. Ngenxa yoko ke uMaria do Carmo wagqiba ekubeni isifundo sakhe seBhayibhile siqhutyelwe kwenye indawo.

Kamva, uAntônio wanyanzeleka ukuba akhe athi tsi eNgilani kwizifundo zekarati zeentsuku ezisibhozo, ibe uMaria do Carmo wafaka ngobunono kwisutkheyisi yakhe impapasho ethi Incwadi Yam Yamabali EBhayibhile.b Ekubeni uAntônio wayenexesha elininzi kuhambo lwakhe, wayifunda le ncwadi. Kwathi kuhambo olubuyayo, isivondoviya sesaqhwithi sayidlokovisa ngamandla inqwelo-moya, ibe kwaba nzima ukuba yehlele emhlabeni. Okokuqala ngqa ebomini bakhe, uAntônio wathandaza kuYehova.

Akuba efikile ekhaya uAntônio, la maNgqina ayeqhubela umkakhe isifundo ammemela kwiintlanganiso. Wavuma yaye wafumanisa ukuba wonk’ umntu unobuhlobo. Kwenziwa amalungiselelo okumqhubela isifundo seBhayibhile, ibe kungadlulanga nexesha elininzi, uAntônio wayazi into yokuba umele enze izigqibo ezithile. Ngenxa yoko wayeka ukuqeqeshela ikarati waza waqalisa ukufundisa abo wayebaqeqesha indlela yokuphila ubomi boxolo ngoku nangonaphakade. Ngoku omnye wabo, naye onebhanti elimnyama, ungumKristu obhaptiziweyo.

UAntônio yena wabhaptizwa ngoAprili 1991. Emva kosuku nje ebhaptiziwe, waqalisa ukukhonza njengovulindlela ongumncedani. Kwiinyanga ezintandathu kamva waqalisa ukukhonza njengovulindlela othe ngxi, ibe kungekudala wayeqhuba izifundo zeBhayibhile ezili-12. NgoJulayi 1993 wamiselwa njengesicaka solungiselelo ebandleni.

Intsimi Esetyenzwa Ngokufuthi

Kwimimandla emininzi yeli lizwe, intsimi isetyenzwa iiveki zonke. AmaNgqina awuqhuba njani umsebenzi wawo ‘wokuloba’ ngokunempumelelo?

UJoão uzama ukudibana naye wonke umntu kuwo onke amakhaya. Xa wayetyelele elinye ibhinqa, walibuza enoba bakho na abanye abantu abahlala kwakwelo khaya. Eli bhinqa laphendula lathi kuhlala umyeni walo noonyana balo ababini, kodwa akanakufane adibane nabo kuba bayasebenza ibe babuyela ekhaya kuphela ngongcwalazi. Ngoko ke uJoão waqhubeka etyelela abanye abahlala kwakuloo ndawo. Malunga nje neyure enesiqingatha emva koko, kweza indoda kuye.

“Uthe ufuna ukuthetha nam,” yatsho le ndoda kuJoão. “Ndixelele le nto uyifunayo.”

“Uxolo, andikwazi,” waphendula uJoão emi nematha. “Ungubani na kanene?”

“NdinguAntônio, ndihlala kwesi sitrato. Uthe kumama ufuna ukuthetha nentsapho yonke, ndize kuqonda ke ukuba ubukhala ngantoni.”

UJoão wanikela ubungqina obucokisekileyo kuAntônio waza waqalisa isifundo seBhayibhile kunye naye. Emva kokufunda izihlandlo ezibini, uAntônio wacela ukuba isifundo siqhutywe kabini ngeveki. Kwiinyanga ezine, wathelela uJoão waza waqalisa ukushumayela kanye kwesi sitrato wayehlala kuso. Kwiinyanga ezintathu emva koko, wabhaptizwa. Kutshanje nonina uqalise ukufundisisa iBhayibhile. Hayi indlela ekubaluleke ngayo ukuzama ukuthetha nawo onke amalungu entsapho kubulungiseleli!

La mava achukumisayo abonisa ukuba usemninzi umsebenzi wokuloba ngokomoya omele wenziwe kumanzi asePortugal. UYehova uye wawasikelela amaNgqina azibhokoxayo anezifundo zeBhayibhile ezingamawaka nezinenkqubela. Njengoko eqhubeka efuna iindlela ezingakumbi zokwenza inyaniso yeBhayibhile yaziwe ngabo bonke, amazwi ompostile uPawulos aya kumaKristu aseFilipi azaliseka ngokwenene namhlanje ePortugal: “Ngeendlela zonke, . . . kwaziswa uKristu.”—Filipi 1:18.

[Imibhalo esemazantsi]

[Imaphu ekwiphepha 23]

(Ukuba ufuna inkcazelo ehlahlelwe kakuhle, yiya kwimpapasho)

SPAIN

PORTUGAL

[Imifanekiso ekwiphepha 24, 25]

AmaNgqina asePortugal asebenzisa onke amathuba okwenza inyaniso yeBhayibhile yaziwe