Iintsikelelo Zobulungiseleli Bobuvulindlela
“Intsikelelo kaYehova, yiyo etyebisayo, imbulaleko ayongezi nento kuyo.”—IMIZEKELISO 10:22.
1, 2. (a) Wazichaza njani omnye uvulindlela iimvakalelo zakhe ngobulungiseleli bexesha elizeleyo? (b) Kutheni oovulindlela besoloko bekwazi ukuluxhamla ngakumbi uvuyo lokwenza abafundi?
“NGABA lunokubakho uvuyo olodlula olokubona umntu omfundelayo esiba ngumdumisi kaYehova? Kubangel’ imincili yaye komeleza ukholo ukubona indlela elinamandla ngayo iLizwi likaThixo ekushukumiseleni abantu ukuba benze iinguqulelo kubomi babo ukuze bakholise uYehova.” Wabhala watsho omnye uvulindlela waseKhanada obekwinkonzo yexesha elizeleyo kangangeminyaka engama-32. Ehlomla ngobulungiseleli bobuvulindlela akubo, uhambisa enjenje: “Andiziboni ndisenza eny’ into. Andiyiboni tu eny’ into enokundivuyisa ngolu hlobo.”
2 Ngaba uyavumelana nelokuba alukho uvuyo olodlula olokunceda umntu ahambe kwindlela esa ebomini? Kambe ke, asingoovulindlela kuphela abaxhamla olo vuyo. Bonke abakhonzi bakaYehova bathunywe ukuba ‘benze abantu babe ngabafundi,’ yaye bazabalazela ukwenza oko. (Mateyu 28:19) Noko ke, ekubeni oovulindlela bekwazi ukuchitha iiyure ezithe xhaxhe kwinkonzo yasentsimini, ngabo abasoloko bekwazi ukuluxhamla ngakumbi olo vuyo lokwenza abafundi. Kodwa ubuvulindlela bunayo neminye imivuzo. Khawuthethe noovulindlela, baya kukuxelela ukuba ubuvulindlela buyindlela ebalaseleyo yokuxhamla le ‘ntsikelelo kaYehova ityebisayo.’—IMizekeliso 10:22.
3. Yintoni esenokusikhuthaza njengokuba siqhubeka sikhonza uYehova?
3 Kutshanje, oovulindlela abakwiindawo ngeendawo ehlabathini baye bacelwa ukuba bachaze iintsikelelo abaye bazixhamla kubulungiseleli bexesha elizeleyo. Makhe sizivele kubo. Noko ke, ungatyhafi ukuba inkonzo yakho ilinganiselwe ngenxa yempilo enkenenkene, ukuhamba kweminyaka, okanye ezinye iimeko. Khumbula kaloku, eyona nto ibalulekileyo kukukhonza uYehova ngomphefumlo uphela, nokuba sikoluphi na uluhlu. Sekunjalo, ukuva amagqabaza abanye oovulindlela kuya kuwandisa umdla onawo wokungenela lo msebenzi unomvuzo ukuba iimeko ziyakuvumela.
Ulwaneliseko Olunzulu Novuyo
4, 5. (a) Kutheni ukushumayela iindaba ezilungileyo kwabanye kungamava anomvuzo? (b) Oovulindlela bavakalelwa njani ngokuba nesabelo kubulungiseleli bexesha elizeleyo?
4 UYesu wathi: “Kukho uyolo olungakumbi ekupheni kunokuba lukho ekwamkeleni.” (IZenzo 20:35) Ewe, ukupha ungaqhutywa kukuzingca kunemivuzo yako. (IMizekeliso 11:25) Ukubona kakuhle oku xa ushumayela iindaba ezilungileyo kwabanye. Eneneni, ngaba sikho esinye isipho esinokusinika omnye umntu esingaphezu kokumnceda afumane ulwazi olungoThixo, lwazi olo olukhokelela kubomi obungunaphakade?—Yohane 17:3.
5 Alimangalisi elokuba abo banesabelo kubulungiseleli bexesha elizeleyo bedla ngokuthetha ngovuyo nangolwaneliseko abalufumana kubulungiseleli babo. “Ndazi mhlophe ukuba awukho omnye umsebenzi obunokundinika ulwaneliseko endilufumana ngokushumayela inyaniso kwabanye,” utsho njalo omnye uvulindlela waseBritani oneminyaka engama-64 ubudala. Omnye umhlolokazi waseZaire wachaza oko kuye kwathethwa bubuvulindlela kuye: “Inkonzo yobuvulindlela indithuthuzele ngokwenene emva kokushiywa kwam ngumyeni endimthandayo. Xa ndisiya entsimini ndiye kunceda abanye, iya incipha ngokuncipha loo lahleko. Ndixhoma ukholo lwam kwizithembiso zikaYehova ndize ndimilisele ingqondo yam kwindlela endinokubanceda ngayo abantu endibafundelayo benze iinguqulelo ebomini babo. Ekupheleni kosuku ngalunye, ndilala ubuthongo obumyoli, yaye intliziyo yam ibetha kamnandi luvuyo.”
6. Luluphi uvuyo olukhethekileyo bambi oovulindlela abaye banalo?
6 Bambi ekuqengqeleke amashumi eminyaka bengoovulindlela baye banovuyo olukhethekileyo lokukhonza kwiindawo ezisemagqagaleni, bemisa amabandla, nathe ekugqibeleni akhula aba ziziphaluka. Ngokomzekelo, eAbashiri, eHokkaido (isiqithi esikumantla elaseJapan), kukho udade obenguvulindlela kangangeminyaka engama-33. Ukhumbula ukuba kwindibano yesiphaluka yokuqala awaya kuyo—eyayilungiselelwe lonke elaseHokkaido—babengama-70 kuphela abantu ababelapho. Bangaphi ngoku? Kukho iziphaluka ezili-12 kweso siqithi, kunye nesimbuku sabavakalisi abangaphezu kwe-12 000. Khawucinge nje indlela exhumaxhuma ngayo luvuyo intliziyo yakhe xa eye kwiindibano zesiphaluka nezesithili ekunye nendimbane yabanye abavakalisi boBukumkani abakweso siqithi!
7, 8. Luluphi uvuyo oluye lwafunyanwa ngoovulindlela abanexesha elide?
7 Abanye oovulindlela abanexesha elide baye bavuyiswa kukuba izifundo zabo zeBhayibhile zibhaptizwa zize emva koko zizabalazele amalungelo enkonzo angakumbi. KwelaseJapan omnye udade obekhonza kwizabelo zobuvulindlela ezisithoba ezahlukeneyo ukususela ngowe-1957 ukhumbula ehambisa iphephancwadi uVukani! kwelinye ibhinqa eliselula elalisebenza ebhankini. Kwadlula iinyanga zasithoba elo bhinqa labhaptizwa. Kwamva latshata, ibe lona nomyeni walo baba ngoovulindlela abakhethekileyo. Olunjani lona uvuyo awaba nalo lo dade unguvulindlela xa, wayekwisabelo sesithathu, ibandla lakhe latyelelwa ngumveleli wesiphaluka omtsha ehamba nowakwakhe—owayesakuba sisifundo sakhe seBhayibhile!
8 Asingomnqa ke into yokuba abo bakhetha ubulungiseleli bobuvulindlela bewujonga ‘njengelungelo elingenambaliso,’ njengokuba omnye uvulindlela oneminyaka engama-22 ubudala watshoyo!
Ubungqina Benyameko KaYehova
9. NjengoMniki Omkhulu, uYehova ubathembisa ntoni abakhonzi bakhe, yaye oku kuthetha ntoni kuthi?
9 UYehova, uMniki Omkhulu, uthembisa ukubalondoloza abakhonzi bakhe, ebanyamekela ngokomoya nangokwenyama. Wayechan’ ucwethe uKumkani wamandulo uDavide xa wathi: “Ndaka ndamtsha, kungokunje ndimdala; ukanti andizanga ndilibone ilungisa lishiywa, nembewu yalo ivukela ukutya.” (INdumiso 37:25) Kambe ke, esi siqinisekiso sobuthixo asinakusenza ityholo lokubaleka imbopheleleko yokulungiselela iintsapho zethu izinto eziphathekayo, ibe asinakusenza isebe lenkawu lokuxhaphaza ububele babazalwana bethu abangamaKristu. (1 Tesalonika 4:11, 12; 1 Timoti 5:8) Ukanti, ukuba sithi ngomzimba okhululekileyo sincame izinto ezithile ukuze sikhonze uYehova ngakumbi, akanakuze asishiye enyanyeni.—Mateyu 6:33.
10, 11. Ngokusuka kumava, yintoni oovulindlela abaninzi abayaziyo ngamandla kaYehova okubalungiselela?
10 Mbombo zone zehlabathi oovulindlela bazi ngokusuka kumava ukuba uYehova uyabalungiselela bonke abo baziphosa kwizandla zakhe ezinenyameko. Khawucinge nje ngesinye isibini esingoovulindlela esafudukela kwenye idolophana ekwakukho imfuneko enkulu yabavakalisi boBukumkani. Emva kweenyanga ezimbalwa, umsebenzi waqalisa ukunqongophala, yaye sasingasenayo nepeni eselugcinweni. Sisajonge leyo safikelwa liphepha letyala leinshorensi yesithuthi elizii-R359. Lo mzalwana usichazela oku: “Sasingenayo kwaphela indlela yokulihlawula. Sathandaza ngamandla ngobo busuku.” Ngosuku olulandelayo, safumana ikhadi elivela kwenye intsapho eyayiboph’ amaxonya njengaso. Le ntsapho yayifumene imbuyekezo yerhafu, ngokutsho kwelo khadi, yaye ekubeni yayithe kratya kunemali eyayiyilindele, yayinqwenela ukwabelana ngayo neso sibini singoovulindlela. Itsheke ekwelo khadi yayizii-R359! Lo mzalwana unguvulindlela uthi: “Andisokuze ndiyilibale loo mini—ndasuka ndaba yinkuku esikw’ umlomo! Sasibuxabise gqitha ububele baloo ntsapho.” Kwakhona uYehova ubuxabisile ububele obulolo hlobo, kuba lowo ngumoya wobubele akhuthaza abakhonzi bakhe babe nawo.—IMizekeliso 19:17; Hebhere 13:16.
11 Oovulindlela abaninzi bangasibalisela okufanayo. Dlan’ indlebe nabo, ibe baya kukuxelela ukuba abazange ‘bashiywe.’ Ekhumbula emva kwiminyaka engama-55 ekwinkonzo yexesha elizeleyo, omnye uvulindlela oneminyaka engama-72 ubudala uthi, “uYehova akazange andidanise.”—Hebhere 13:5, 6.
‘Eyona Ndlela Isemagqabini Yokusondela KuYehova’
12. Kutheni umsebenzi wokuvakalisa iindaba ezilungileyo ulilungelo elikhulu?
12 Isibakala sokuba uYehova esicela ukuba sivakalise iindaba ezilungileyo zoBukumkani sililungelo nje sisodwa. Thina—nangona singafezekanga—usijonga ‘njengabasebenzi naye’ kumsebenzi wokusindisa ubomi. (1 Korinte 3:9; 1 Timoti 4:16) Njengokuba sishumayela ngoBukumkani bukaThixo kwabanye, njengokuba sivakalisa isiphelo sobungendawo, njengokuba sicacisela abantu ngothando lwakhe olungummangaliso lokulungiselela intlawulelo, njengokuba sisebenzisa iLizwi lakhe eliphilayo size sifundise abantu abantliziyo zinyanisekileyo oko likuquletheyo, ngokuzenzekelayo sisondela ngakumbi kuMdali wethu, uYehova.—INdumiso 145:11; Yohane 3:16; Hebhere 4:12.
13. Bambi bathi ubulungiseleli bobuvulindlela bube nawuphi umphumo kulwalamano lwabo noYehova?
13 Oovulindlela bayakwazi ukuchitha ixesha nyanga nganye befunda yaye befundisa abanye ngoYehova. Luthini uluvo lwabo ngendlela oku okuluchaphazela ngayo ulwalamano lwabo noThixo? Omnye umdala waseFransi obenguvulindlela ngaphezu kweminyaka elishumi uphendula enjenje: “Ubuvulindlela yeyona ndlela isemagqabini yokusondela kuYehova.” Omnye uvulindlela okwakwelo lizwe, noye wachitha iminyaka eli-18 ekwinkonzo yexesha elizeleyo, uthi: “Inkonzo yobuvulindlela isinika ithuba lokuba ‘sive size sibone ukuba ulungile uYehova,’ mihla le ilomeleza ngakumbi ulwalamano lwethu noMdali wethu.” (INdumiso 34:8) Omnye udade waseBritani oneminyaka engama-30 enguvulindlela naye uvakalelwa ngolo hlobo. Uthi: “Ukuxhomekeka kukhokelo lomoya kaYehova kubulungiseleli bam kundisondeza ngakumbi kuye. Amaxesha amaninzi ndiye ndivakalelwe kukuba ngumoya kaYehova ondithumele kwikhaya elithile kanye ngexesha elifanelekileyo.”—Thelekisa IZenzo 16:6-10.
14. Oovulindlela bangenelwa njani ngokusebenzisa iBhayibhile neempapasho ezisekelwe eBhayibhileni mihla le befundisa abanye?
14 Oovulindlela abaninzi bafumanisa ukuba ukusebenzisa iBhayibhile neempapasho ezisekelwe eBhayibhileni mihla le becacisa yaye befundisa iinyaniso ezingokweZibhalo kuyabanceda bakhule kulwazi lweLizwi likaThixo. Omnye umzalwana waseSpeyin oneminyaka engama-85 ubudala nobenguvulindlela kangangeminyaka engama-31 utyatyadula athi: “Ubuvulindlela bundincede ndanolwazi olunzulu ngeBhayibhile, lwazi olo endiye ndalusebenzisa ukunceda abanye bazi uYehova neenjongo zakhe.” Omnye udade waseBritani obenguvulindlela kangangeminyaka engama-23 uthi: “Ubulungiseleli bexesha elizeleyo bundincede ndanomdla ongummangaliso kukutya kokomoya.” Ukucacisela abanye ‘ngesizathu sethemba elikuwe’ kunokuzibethelela zitshone izinto okholelwa kuzo. (1 Petros 3:15) Uvulindlela waseOstreliya yena uthi: “Ubuvulindlela buluphucula ngokuluphucula ukholo lwam njengokuba ndithetha ngalo kwabanye.”
15. Yintoni abanye abaye bayenza ngomzimba ongenaxhala ukuze bangenele ubulungiseleli bobuvulindlela baze bangaze babuyeke, yaye kutheni?
15 Licace nakuthathatha elokuba, aba balungiseleli bangoovulindlela beyisekile ukuba bakhethe olona hlobo lwenkonzo olubashiya bexhakazela ziintsikelelo ezivela kuYehova. Yiloo nto ke abaninzi beye ngomzimba ongenaxhala benza uhlengahlengiso kubomi babo, bede bancame imisebenzi nobunewunewu bezinto eziphathekayo, baze bangenele ubulungiseleli bobuvulindlela yaye bangaze babuyeke!—IMizekeliso 28:20.
Ngaba Intliziyo Yakho Ilangazelela Ukwenza Okungakumbi?
16, 17. (a) Ukuba uyazibuza enoba ubuvulindlela bungakulungela kusini na, yintoni osenokuyenza? (b) Bavakalelwa njani abanye kuba bengakwazi ukuba ngoovulindlela?
16 Emva kokuva oovulindlela bethetha ngeentsikelelo zobulungiseleli bobuvulindlela, mhlawumbi uyazibuza enoba ubuvulindlela bungakulungela kusini na. Ukuba kunjalo, kutheni ungakhe uthethe novulindlela oye wanempumelelo kubulungiseleli bexesha elizeleyo? Kwakhona usenokuncedakala xa unokuthetha nomnye wabadala ebandleni, umntu okwazi kakuhle—owazi imeko yempilo yakho, ubuthathaka bakho neembopheleleko zentsapho onazo. (IMizekeliso 15:22) Amagqabaza awakhayo avela kwabanye anokukunceda uhlolisise ngenyameko enoba ungakwazi kusini na ukuba nguvulindlela. (Thelekisa uLuka 14:28.) Ukuba uyakwazi ukuba nguvulindlela, ziya kuthululeka iintsikelelo phezu kwakho.—Malaki 3:10.
17 Noko ke, kuthekani ngenyambalala yabavakalisi boBukumkani abathembekileyo abangenakukwazi ukuba ngoovulindlela, nangona besenokuba bakunqwenela ngamandla ukwenza okungakumbi kubulungiseleli? Ngokomzekelo, khawuphulaphule amazwi omnye udade ongumKristu owa evuka ekhulisa abantwana abane eyedwa jwi. Uthi: “Intliziyo yam ilihlwili, kuba bendifudula ndinguvulindlela othe ngxi, kodwa ndithetha nje, ngenxa yeemeko endikuzo, andisakwazi ukuya entsimini njengokuba bendisenza ngaphambili.” Lo dade ubathanda ngentliziyo yakhe yonke abantwana bakhe yaye uzimisele ukubalungiselela izinto. Kwangaxeshanye, ukulangazelela ngomoya wakhe wonke ukwenza okungakumbi kumsebenzi wokushumayela. Usichazela oku: “Ndiyabuthanda ubulungiseleli.” Maninzi namanye amaKristu azinikeleyo avakalelwa ngolo hlobo nashukunyiswa kukuthanda kwawo uThixo ukuba akhonze uYehova ‘ngeentliziyo zawo zonke.’—INdumiso 86:12.
18. (a) Yintoni uYehova ayilindeleyo kuthi? (b) Kutheni singafanele sidimazeke xa iimeko zisithintela koko sinako ukukwenza?
18 Masikhumbule ukuba into ayilindeleyo kuthi uYehova yinkonzo yomphefumlo uphela. Umlinganiselo waloo nkonzo usenokushiyana ngokomphefumlo ngamnye. Bambi bayakwazi ukuhlengahlengisa iimeko zabo ukuze bakhonze njengoovulindlela abathe ngxi. Abanye abaninzi babhalisa njengoovulindlela abangabancedani ngamathub’ athile okanye ngokuqhubekayo, bechitha iiyure ezingama-60 nyanga nganye kubulungiseleli. Noko ke, uninzi lwabantu bakaYehova luzibhokoxa kumsebenzi wokushumayela nowokufundisa ngomphefumlo uphela njengabavakalisi bebandla. Ngoko ukuba ngokwenene ubanjwe yimpilo enkenenkene, ukuhamba kweminyaka, iimbopheleleko zentsapho, okanye ezinye iimeko, musa ukudimazeka. Lo gama nje usenza konke okusemandleni akho, inkonzo yakho ixabisekile emehlweni kaThixo, kanye njengaleyo yabo bakubulungiseleli bexesha elizeleyo!
Sonke Sinako Ukuwubonakalisa Umoya Wobuvulindlela
19. Uyintoni umoya wobuvulindlela?
19 Nangona usenokungakwazi ukubhalisa njengovulindlela, unako ukubonakalisa umoya wobuvulindlela. Uyintoni umoya wobuvulindlela? Inkupho yoBulungiseleli Bethu BoBukumkani kaJulayi 1988 yathi: “Unokuchazwa njengokuba nesimo sengqondo esikhuthazayo kumyalelo wokushumayela nowokwenza abafundi, ukuba ngozibophelele ngokupheleleyo ekuboniseni uthando nenkxalabo ngabantu, ukuba ngozincamayo, ufumana uvuyo ekuyilandeleni ngokusondeleyo iNkosi, ibe unandipha izinto zokomoya, kungekhona eziphathekayo.” Ungawubonakalisa njani umoya wobuvulindlela?
20. Abazali banokuwubonisa njani umoya wobuvulindlela?
20 Ukuba ungumzali onabantwana abancinane, usenokubakhuthaza ngentliziyo yakho yonke ukuba babe nosukelo lokuba ngoovulindlela. Isimo sengqondo esihle onaso ngobu bulungiseleli singenza nabanye babone imfuneko yokwenza inkonzo kaYehova ibe yeyona nto ibalulekileyo ebomini babo. Usenokumema oovulindlela nabaveleli abahambahambayo nabafazi babo beze ekhayeni lakho ukuze abantwana bakho bazuze okuthile kwabo baye bafumana uvuyo kubulungiseleli bexesha elizeleyo. (Thelekisa amaHebhere 13:7.) Kwanakumakhaya awahluleleneyo ngonqulo, abazali abakholwayo, ngezwi nangomzekelo, banokunceda abantwana babo bazibekele usukelo lobulungiseleli bexesha elizeleyo ebomini babo.—2 Timoti 1:5; 3:15.
21. (a) Singabaxhasa njani sonke abo bangoovulindlela? (b) Yintoni enokwenziwa ngabadala ukukhuthaza oovulindlela?
21 Ebandleni, sonke singabaxhasa ngentliziyo iphela abo bakwaziyo ukuba ngoovulindlela. Ngokomzekelo, ngaba ungenza umgudu wokusebenza novulindlela othile kubulungiseleli, ngokukodwa xa loo vulindlela kusenokwenzeka ukuba asebenze yedwa ukuba akuhambanga naye? Usenokufumanisa nelokuba niya “kwabelana ngokhuthazo.” (Roma 1:11, 12) Ukuba ungumdala, ungafak’ igxalaba nangakumbi ekukhuthazeni oovulindlela. Xa iqumrhu labadala lidibana, lifanele lizihlolisise rhoqo iintswelo zoovulindlela. Xa uvulindlela edimazekile okanye esebunzimeni, musani ukukhawuleza nincomele ukuba abuyeke ubuvulindlela. Nangona kusenokufuneka nikuncomele oko maxa wambi, musani ukulibala ukuba ubuvulindlela lilungelo elixabiseke gqitha asenokuba loo mkhonzi ukwixesha elizeleyo ulixabise gqitha. Kusenokwenzeka ukuba into efunekayo kukumnika icebiso elisengqiqweni okanye uncedo nje kuphela. Isebe loMbutho eSpeyin libhala lenjenje: “Xa abadala bekhuthaza ubuvulindlela, bexhasa oovulindlela kubulungiseleli basentsimini, baze basoloko bebalusa, oovulindlela basenokuba novuyo oluthe chatha, bazive beluncedo ngokuthe chatha, baze bafune ukuqhubeka nokuba sekumnyam’ entla.”
22. Kweli xesha lamanqam kwimbali yoluntu, yintoni esifanele sizimisele ukuyenza?
22 Siphila kwelona xesha lamanqam kwimbali yoluntu. UYehova usithume ukuba sifeze umsebenzi wokusindisa ubomi. (Roma 10:13, 14) Enoba sinesabelo kulo msebenzi njengoovulindlela bexesha elizeleyo okanye asenzi njalo, masibonise umoya wobuvulindlela. Masibe nemvo yongxamiseko size sibe nomoya wokuzincama. Masizimisele ukunika uYehova oko akufunayo kuthi—inkonzo yomphefumlo uphela. Yaye masikhumbule ukuba xa simnika konke esinako, enoba kufana neengqekembe ezimbini ezincinane zomhlolokazi okanye neoli exabiso lixhomileyo kaMariya, inkonzo yethu yeyomphefumlo uphela, ibe uYehova uyixabisile inkonzo yethu yomphefumlo uphela!
Usakhumbula Na?
◻ Kutheni ubulungiseleli bexesha elizeleyo busanelisa yaye buvuyisa?
◻ Ngokusuka kumava, yintoni oovulindlela abaninzi abayaziyo ngamandla kaYehova okunyamekela abakhonzi bakhe?
◻ Oovulindlela bathi ubulungiseleli babo bube nawuphi umphumo kulwalamano lwabo noYehova?
◻ Unokuwubonakalisa njani umoya wobuvulindlela?
[Umfanekiso okwiphepha 23]
Oovulindlela bazuza uvuyo olukhulu ekwenzeni abafundi
[Umfanekiso okwiphepha 23]
Abantwana bakho banokungenelwa xa benxulumana nabavakalisi boBukumkani bexesha elizeleyo
[Umfanekiso okwiphepha 23]
Abadala bano- kubakhuthaza oovulindlela kwinkonzo yasentsimini