Lutsha—Yintoni Eniyisukelayo?

“Zibaleke iinkanuko zobutsha; phuthuma ke ubulungisa, ukholo, uthando, uxolo nabo bayinqulayo iNkosi ngokwasentliziyweni ehlambulukileyo.”—2 TIMOTI 2:22.

1. Liliphi ithemba esinalo ngabantu abaselula abaphakathi kwethu?

IPHEPHANDABA laseSweden lamaPentekoste iDagen (Usuku), lathi: “AmaNgqina kaYehova aliqela elizuza awona malungu matsha maninzi nyaka ngamnye yaye anesona sihlwele sikhulu solutsha.” Mhlawumbi ungomnye wesi sihlwele solutsha sicocekileyo nesoyik’ uThixo. Usenokuba ukhuliswe ngendlela yobuKristu ukususela ebusaneni, okanye usenokuba uye wazivela waza wasabela ngokwakho kwisigidimi soBukumkani. Nokuba imeko iyintoni na, siyavuya kuba uphakathi kwethu. Yaye sinethemba lokuba uya kusukela ikhondo lobulungisa, njengoko lwenzayo ulutsha olunyanisekileyo lwamaKristu kwinkulungwane yokuqala. Amazwi ompostile uYohane asenokukuchaza kakuhle: ‘Womelele, laye ilizwi likaThixo lihleli kuwe, umoyisile ke ongendawo.’—1 Yohane 2:14.

2. Ngabaphi oothunywashe abanokwenza kubenzima ukusukela ikhondo lobulungisa ebudeni bokuba ‘sentlahleni’?

² Uninzi lolutsha olungamaKristu namhlanje lujamelana ngenkalipho neengcinezelo zehlabathi. Noko ke, usenokufumanisa ukuba ukulondoloza ikhondo elinjalo akulula. Xa ‘usentlahleni,’ usenokuziva ucinezelekile ziimvakalelo ezintsha nezinamandla. (1 Korinte 7:36) Kwangaxeshanye, usenokuba nomthwalo owandayo weembopheleleko esikolweni, ekhaya nasebandleni. Kukho nengcinezelo evela kuSathana uMtyholi. Ezimisele ukulahlekisa abaninzi kangangoko kunokwenzeka, uhlasela abo basenokubonakala besesichengeni—njengoko wenzayo kumyezo wase-Eden. Apho, akazange akhohlise uAdam, owayemdala yaye enolwazi ngakumbi, kodwa wakhohlisa ibhinqa eliselula kunaye nelingenamava kangako, uEva. (Genesis 3:1-5) Kwiinkulungwane kamva, uSathana wasebenzisa amaqhinga afanayo kwibandla lamaKristu laseKorinte elaliselitsha. Umpostile uPawulos wathi: “Ndiyoyika ke, hleze kuthi, njengokuba inyoka yamlukuhlayo uEva ngobuqhetseba bayo, zonakaliswe ngokunjalo nani iingqiqo zenu, zimke ekunyaniseni kuye uKristu.”—2 Korinte 11:3.

3, 4. Ziziphi ezinye izixhobo uSathana uMtyholi azisebenzisayo ukuze alahlekise abantu abaselula, yaye nguwuphi umphumo osenokubakho?

³ Namhlanje, ngokufanayo abazali bakho abangamaKristu basenokuba banexhala ngawe. Kungekhona ukuba bacinga ukuba utyekele kubungendawo, kodwa ngokusuka kumava bayazi ukuba abantu abaselula basesichengeni ngokukhethekileyo ‘kumaqhinga’ kaSathana. (Efese 6:11) Kunokuba ibonakale inobubi, imigibe kaSathana yenzelwe ukuba ikhangeleke inomtsalane, inqweneleka kakhulu. Ngobuchule umabonwakude ubonisa ukuthanda izinto eziphathekayo, isini esingafanelekanga, ugonyamelo olothusayo nokukhafula njengokuzonwabisa. Iingqondo zabaselula zisenokuzaliswa zizinto ezingezizo kwaphela ‘eziyinene, ezindilekileyo, ezibubulungisa, ezinyulu, ezithandekayo.’ (Filipi 4:8) Ingcinezelo yoontanga sesinye isixhobo esinamandla sikaSathana. Oontanga bakho basenokukucinezelela ekubeni uphile, unxibe uze uzilungise njengabo. (1 Petros 4:3, 4) Omnye umbhali wemihlathi kumaphephandaba uWilliam Brown wathi: “Ukuba kukho nawuphi na uThixo wehlabathi womntu okwishumi elivisayo lowo nguThixo wokufuna ukufana nabanye. . . . Kubantu abakwishumi elivisayo ukwahluka koontanga babo yeyona nto imbi inokubehlela ngaphezu kokufa.” Enye intombazana eliNgqina yaseItali yavuma: “Ndandisoyika ukuxelela abantwana endandifunda nabo ukuba ndandiliNgqina. Yaye kuba ndandisazi ukuba ndandingamvuyisi uYehova, ndandikhathazekile yaye ndandingonwabanga.”

⁴ Ungakhohliswa—uSathana ufuna ukuba utshabalale. Abantu abaselula abaninzi abasehlabathini baya kulahlekelwa bubomi babo ebudeni bembandezelo enkulu kuba baye bavuma ukulahlekiswa. (Hezekile 9:6) Ekuphela kwendlela yokusinda kukusukela okulungileyo.

Lulumkele Unxulumano Olubi

5, 6. (a) Umfana oselula uTimoti wayejamelene naluphi ucelomngeni ngoxa wayehlala e-Efese? (b) Sisiphi isiluleko uPawulos awasinika uTimoti?

⁵ Leyo yayiyingongoma eyintloko yecebiso umpostile uPawulos awalinika umfana oselula uTimoti. Kangangeminyaka engaphezu kwelishumi, uTimoti wayehamba nompostile uPawulos kuhambo lwakhe lobuvangeli basemazweni. Ngexesha uTimoti awayekhonza ngalo kwisixeko sabahedeni sase-Efese, uPawulos wayesentolongweni yaseRoma elindele ukubulawa. Njengoko ixesha lokufa kwakhe lalisondela, ngokungathandabuzekiyo uPawulos wayekhathazekile ngendlela uTimoti awayeya kuqhuba ngayo. IEfese yayisisixeko esasidume ngobutyebi, ukuziphatha okubi nendlela yokuzonwabisa eyonakeleyo, yaye uTimoti wayengayi kuphinda axhaswe ngumluleki wakhe othembekileyo nothandekayo.

⁶ Ngoko ke uPawulos wabhalela “umntwana wakhe oyintanda” oku kulandelayo: “Ke endlwini enkulu akubikho zitya zagolide nazasilivere zodwa; kubakho nezomthi nezomdongwe. Inxenye ke zezembeko, inxenye azizambeko. Ukuba ngoko umntu uthe wazikhuphulula kwezo zinto, woba sisitya sembeko, singcwalisiwe, simlungele kakuhle umninindlu, silungiselwe wonke umsebenzi olungileyo. Ke zibaleke iinkanuko zobutsha; phuthuma ke ubulungisa, ukholo, uthando, uxolo nabo bayinqulayo iNkosi ngokwasentliziyweni ehlambulukileyo.”—2 Timoti 1:2; 2:20-22.

7. (a) Zaziyintoni ‘izitya ezingezozambeko’ uPawulos awalumkisa ngazo? (b) Namhlanje ulutsha lunokuwasebenzisa njani amazwi kaPawulos?

⁷ Ngaloo ndlela uPawulos wamlumkisa uTimoti ngelokuba kwanaphakathi kwamanye amaKristu kwakusenokubakho ‘izitya ezingezozambeko’—abantu ababengaziphethanga kakuhle. Ngoko ukuba ukunxulumana namaKristu athile athanjisiweyo kwakunokuba yingozi kuTimoti, hayi indlela ebekunokumonakalisa ngakumbi ngayo namhlanje umntu oselula ongumKristu ukunxulumana nabantu behlabathi! (1 Korinte 15:33) Oku akuthethi ukuba ungabi nabuhlobo kubantwana ofunda nabo. Kodwa kufuneka ulumke ungabandakanyeki kakhulu kwizinto zabo, nokuba oko maxa wambi kukwenza ubonakale ulikheswa. Oku kunokuba nzima gqitha. Enye intombazana yaseBrazil ithi: “Kunzima. Abantwana endifunda nabo basoloko bendimemela kumatheko nakwiindawo ezingafanelekanga kulutsha olungamaKristu. Bathi: ‘Intoni! Ngaba akuyi? Usisibhanxa!’”

8, 9. (a) Ukunxulumana, kwanabona bantu behlabathi ababonakala belungile, kunokumbeka engozini njani umKristu? (b) Unokubafumana phi abahlobo abalungileyo?

⁸ Olunye ulutsha lwehlabathi lusenokubonakala lulungile kuba nje lungatshayi, lungasebenzisi intetho embi, okanye lungaziphethanga kakubi ngokwesini. Noko ke, ukuba alusukeli ubulungisa, indlela yalo yokucinga nesimo sengqondo salo sokwenyama sisenokukuphembelela ngokulula. Ngapha koko, yintoni onokufana ngayo nabangakholwayo? (2 Korinte 6:14-16) Kaloku, imilinganiselo yokomoya oyixabisileyo ‘ibubudenge’ kubo! (1 Korinte 2:14) Ngaba unokuqhubeka ungumhlobo wabo ngaphandle kokulalanisa kwimigaqo ophila ngayo?

⁹ Ngoko ziphephe izinxulumani ezibi. Nxulumana kuphela namaKristu athanda izinto zokomoya namthanda ngokwenene uYehova. Lulumkele kwanolutsha olusebandleni olungakhiyo okanye olugxekayo. Njengoko ukhula ngokomoya, indlela okhetha ngayo abahlobo kusenokwenzeka iguquke. Enye intombazana eliNgqina ekwishumi elivisayo ithi: “Bendisiba nabahlobo abatsha kumabandla ahlukahlukeneyo. Oku kuye kwandenza ndabona indlela abangeyomfuneko ngayo abahlobo behlabathi.”

Ukubaleka Iinkanuko Ezingalunganga

10, 11. (a) Kuthetha ukuthini ‘ukubaleka iinkanuko zobutsha’? (b) Ubani ‘unokulubaleka njani uhenyuzo’?

¹⁰ Kwakhona uPawulos wabongoza uTimoti ukuba ‘azibaleke iinkanuko zobutsha.’ Xa uselula, umnqweno wokuba ngodumileyo, wokuzonwabisa, okanye wokwanelisa iinkanuko zesini usenokuba namandla. Ukuba ayilunyukelwa, iminqweno enjalo inokukukhokelela esonweni. Ngoko ke uPawulos wathi mazibalekwe iinkanuko eziyingozi—zibalekwe ngokungathi ubomi bukabani busengozini.a

¹¹ Ngokomzekelo, inkanuko yesini, iye yakhokelela ulutsha oluninzi olungamaKristu kwintlekele yokomoya. Ngoko, ngesizathu esilungileyo, iBhayibhile isixelela ukuba “silubaleke uhenyuzo.” (1 Korinte 6:18, NW) Ukuba isibini siyathandana, senza amadinga, sinokuwusebenzisa lo mgaqo ngokuphepha iimeko ezilingayo—njengokuba sibe sodwa endlwini okanye kwinqwelo-mafutha emileyo. Ukuba nomntu wesithathu kusenokubonakala kuphelelwe lixesha, kodwa kunokukhusela ngokwenene. Yaye ngoxa amanye amazwi nezenzo zokubonakalisa uthando zisenokuba zezifanelekileyo, kufanele kubekwe imida esengqiqweni ukuze kuphetshwe ihambo engacocekanga. (1 Tesalonika 4:7) Kwakhona ukubaleka uhenyuzo bekuya kuquka ukuphepha imifanekiso eshukumayo okanye imiboniso kamabonwakude esenokuvuselela inkanuko engalunganga. (Yakobi 1:14, 15) Ukuba iingcinga zokuziphatha okubi ziyazingenela engqondweni yakho, cinga ngenye into. Phuma uhambahambe; funda okuthile; yenza umsetyenzana othile wasekhaya. Umthandazo ulolona ncedo lunamandla kule nkalo.—INdumiso 62:8.b

12. Ukufunda njani ukukuthiya okubi? Zekelisa.

¹² Ngaphezu koko, ufanele ufunde ukuyithiya, ukuyicekisa, nokuyenyanya into embi. (INdumiso 97:10) Uyithiya njani into ekuqaleni esenokuba kukuzonwabisa okanye ibe yinto emnandi? Ngokucinga ngemiphumo! “Musani ukulahlekiswa; uThixo yena asingowokuhlekisa. Kuba into athe wahlwayela yona umntu, wovuna kwayona; ngokuba lowo uhlwayelela eyakhe inyama, wovuna ukonakala ngokwasenyameni.” (Galati 6:7, 8) Xa uhendelwa ukuba unikezele kwinkanuko, cinga ngeyona nto ibalulekileyo—indlela oku okunokumenza buhlungu ngayo uYehova uThixo. (Thelekisa INdumiso 78:41.) Kwakhona, cinga ngokumitha okungafunwayo okusenokwenzeka okanye ukufumana isifo, esinjengoGawulayo. Cinga ngokuphazamiseka kweemvakalelo nokuphelelwa kukuzihlonela oya kuba nako. Kusenokubakho nemiphumo ehlala ixesha elide. Elinye ibhinqa elingumKristu liyavuma: “Mna nomyeni wam saba neentlobano zesini nabanye abantu ngaphambi kokuba sidibane. Nangona namhlanje sobabini singamaKristu, indlela esasiziphethe ngayo ngokwesini ngaphambili iyeyona nto ibangela ingxabano nomona emtshatweni wethu.” Enye into efanele ingalityalwa kukuphulukana namalungelo akho obuthixo okanye isibakala sokuba usenokugxothwa kwibandla lamaKristu! (1 Korinte 5:9-13) Ngaba naluphi na ulonwabo lokwexeshana luyifanele imiphumo enjalo ukuba yintlekele?

Ukusukela Ulwalamano Olusondeleyo NoYehova

13, 14. (a) Kutheni kunganele ukukubaleka okubi? (b) Ubani ‘unokukusukela njani ukumazi uYehova’?

¹³ Noko ke, akwanele ukukubaleka okubi. Kwakhona uTimoti wabongozwa ukuba ‘aphuthume ubulungisa, ukholo, uthando, uxolo.’ Oku kubonisa imfuneko yokuzibhokoxa. Umprofeti uHoseya walubongoza ngendlela efanayo uhlanga lwakwaSirayeli olwalungathembekanga: “Yizani sibuyele kuYehova . . . masikusukele ukumazi uYehova.” (Hoseya 6:1-3) Ngaba uye wazibekela usukelo olunjalo? Lubandakanya okungakumbi kunokuya nje ezintlanganisweni nokuhamba nabazali bakho kubulungiseleli basentsimini. Elinye ibhinqa elingumKristu lavuma: “Abazali bam bandikhulisela enyanisweni, yaye ndabhaptizwa ndisemncinane. . . . Ndandingafane ndingayi kwiintlanganiso yaye akukho nyanga endingazange ndiye ngayo entsimini, kodwa andizange ndibe nolwalamano olusondeleyo lobuqu noYehova.”

¹⁴ Omnye oselula uyavuma ukuba naye wasilela ukumazi uYehova njengoMhlobo noBawo, wayemgqala njengoMoya ongengomntu. Wawela ekuziphatheni okubi waza waba ngumama ongatshatanga kubudala beminyaka eli-18. Ungaze wenze impazamo enjalo! “Kusukele ukumazi uYehova,” njengoko wabongozayo uHoseya. Ngomthandazo nangokuhamba noYehova imihla ngemihla, usenokumenza umhlobo wakho osenyongweni. (Thelekisa uMika 6:8; Yeremiya 3:4.) ‘Akakude kuthi sonke ngabanye’ ukuba siyamfuna. (IZenzo 17:27) Ngaloo ndlela ucwangiso lokufundisisa iBhayibhile ngokobuqu rhoqo lubalulekile. Ucwangciso olunjalo akuyomfuneko ukuba lube neenkcukacha okanye kube nzima ukululandela. Enye intombazana eselula egama linguMelody ithi: “Ndifunda iBhayibhile yonke imihla kangangemizuzu eli-15.” Zibekele ixesha lokufunda inkupho nganye yeMboniselo noVukani! Zilungiselele iintlanganiso zebandla ukuze ‘ulole abanye eluthandweni nasemisebenzini emihle.’—Hebhere 10:24, 25.

Zityand’ Igila Kubazali Bakho

15. (a) Kutheni maxa wambi kunzima ukuthobela abazali bakabani? (b) Kutheni ukuthobela ngokuqhelekileyo kuyingenelo yomntu oselula?

¹⁵ Abazali aboyika uThixo banokukunceda baze bakuxhase ngokwenene. Kodwa phawula indima omele uyiphumeze: “Baveni abazali benu ngokwabaseNkosini; kuba oko kububulungisa. Beka uyihlo nonyoko; wona lowo ngumthetho wokuqala onedinga; ukuze kulunge kuwe, ube nexesha elide emhlabeni.” (Efese 6:1-3) Liyinyaniso elokuba uyakhula yaye ufuna inkululeko engakumbi. Kwakhona usenokuya uziqonda ngakumbi iintsilelo zabazali bakho. Umpostile uPawulos wavuma: “Oobawo bethu benyama babenokwenza kuphela oko babecinga ukuba kokona kulungileyo.” (Hebhere 12:10, The Jerusalem Bible) Sekunjalo, ekugqibeleni, nguwe ongenelwayo ngokubathobela. Abazali bakho bayakuthanda yaye bakwazi kakuhle ngaphezu kwakhe nabani na ongomnye. Ngoxa usenokungasoloko uvumelana nabo, ngokuqhelekileyo bakunqwenelela okona kulungileyo. Kutheni uyichasa imigudu yabo yokukukhulisa “ekuqeqesheni nasekululekeni kweNkosi”? (Efese 6:4) Eneneni, ‘sisimathane kuphela esigiba uqeqesho lukayise.’ (IMizekeliso 15:5) Umntu oselula osisilumko uya kuligqala igunya labazali bakhe aze abahlonele ngokufanelekileyo.—IMizekeliso 1:8.

16. (a) Kutheni kungebobulumko ukuba ulutsha lubafihlele iingxaki abazali balo? (b) Lunokwenza ntoni ulutsha ukuze luphucule ukuncokolisana nabazali balo?

¹⁶ Oko bekuya kuquka ukubaxelela inyaniso abazali bakho, ubazise ukuba uneengxaki, njengamathandabuzo angapheliyo ngenyaniso okanye ukuwela kwihambo ethandabuzekayo. (Efese 4:25) Ukubafihlela abazali iimeko ezinjalo eziphazamisa ingqondo kubangela iingxaki ezingakumbi. (INdumiso 26:4) Kuyavunywa ukuba abanye abazali abenzi mgudu ungako wokuncokola. Enye intombazana yakhalaza ngelithi: “Umama akaze ahlale phantsi athethe nam. Andize ndibe nenkalipho yokumchazela indlela endivakalelwa ngayo kuba ndoyika ukuba uya kundigxeka.” Ukuba ukwimeko enjalo, ngobulumko khetha ixesha elifanelekileyo lokwazisa abazali bakho indlela ovakalelwa ngayo. IMizekeliso 23:26 ibongoza ngelithi: “Ndinike intliziyo yakho, nyana wam.” Zama ukuxubusha nabo ngezinto ezikuxhalabisileyo rhoqo, ngaphambi kokuba kuvele iingxaki ezinzulu.

Qhubeka Usukela Ubulungisa!

17, 18. Yintoni eya kunceda umntu oselula aqhubeke nokusukela ubulungisa?

¹⁷ Ngasekuqukumbeleni incwadi yakhe yesibini, uPawulos wabongoza uTimoti esithi: “Yima ezintweni owazifundayo, waqiniselwa kuzo.” (2 Timoti 3:14) Nawe umele wenjenjalo. Ungavumeli nabani na okanye nantoni na ikulukuhlele ekubeni uyeke ukusukela ubulungisa. Ihlabathi likaSathana—nezinto zalo zonke ezinomtsalane—lizaliswe bubungendawo. Kungekudala liza kutshabalala nabo bonke abayinxalenye yalo. (INdumiso 92:7) Zimisele ukungatshabalali nesihlwele sikaSathana.

¹⁸ Unale njongo, ngamaxesha onke umele uhlolisise usukelo lwakho, iminqweno yakho nezinto onomdla kuzo. Zibuze, ‘Ngaba ndilondoloza imilinganiselo ephakamileyo yentetho neyehambo xa abazali bam namalungu ebandla engenako ukundibona? Ndikhetha abahlobo abanjani? Ngaba oontanga bam behlabathi bandixelela indlela endifanele ndinxibe ndize ndizilungise ngayo? Luluphi usukelo endizibekele lona? Ngaba ndibunqwenela ngamandla ubulungiseleli bexesha elizeleyo—okanye ndinqwenela umsebenzi kwinkqubo yezinto kaSathana efayo?’

19, 20. (a) Kutheni umntu oselula kungafanele ukuba azive ethwaliswe uxanduva zizinto ezifunwa nguYehova? (b) Ngawaphi amalungiselelo olunokuwasebenzisa ulutsha?

¹⁹ Mhlawumbi ubona kukho imfuneko yokwenza uhlengahlengiso oluthile kwindlela ocinga ngayo. (2 Korinte 13:11) Musa ukuziva uthwaliswe uxanduva. Khumbula ukuba uYehova akafuni okungakumbi kuwe kunoko kusengqiqweni. Umprofeti uMika wathi: “Akubizayo uYehova kuwe, kukuthi wenze okusesikweni, uthande inceba, uhambe noThixo wakho ngokuthozamileyo” (Mika 6:8) Oku akuyi kuba nzima kakhulu ukuba uyawasebenzisa amalungiselelo kaYehova okukunceda. Hlala usondelelene nabazali bakho. Nxulumana rhoqo nebandla lamaKristu. Ngokukodwa, yenza umgudu wokwazi abadala bebandla. Bayixhalabele intlalo-ntle yakho yaye basenokukuxhasa baze bakuthuthuzele. (Isaya 32:2) Ngaphezu koko, hlakulela ulwalamano olusondeleyo nolusenyongweni noYehova uThixo. Uya kukunika amandla nomnqweno wokusukela okulungileyo!

²⁰ Noko ke, olunye ulutsha luyadodobala ekukhuleni ngokomoya ngenxa yokuphulaphula umculo ongakhiyo. Inqaku elilandelayo liza kunikela ingqalelo ekhethekileyo kulo mbandela.

[Imibhalo esemazantsi]

Uyakhumbula Na?

◻ Kutheni ulutsha lusesichengeni ngokukodwa ‘kumaqhinga’ kaSathana?

◻ Kutheni ukunxulumana ngokusondeleyo nolutsha lwehlabathi kuyingozi?

◻ Unokukubaleka njani ukuziphatha okubi ngokwesini?

◻ Unokulusukela njani ulwalamano olusondeleyo noYehova?

◻ Kutheni kubalulekile ukuncokolisana nabazali bakho?

[Umfanekiso okwiphepha 16]

Izibini ezithandanayo ngobulumko zifundana apho ziya kuba phakathi kwabanye abantu, njengokudlala emkhenkceni