Uloliwe Ongenamavili
NGUMBHALI KAVUKANI EHONG KONG
NGAPHAMBI kokuba bangene kuloliwe waseShanghai, eTshayina, abakhweli bayaqonda ukuba baza kuhamba ngololiwe ongaqhelekanga. Bayiqonda nangakumbi indlela okhetheke ngayo lo loliwe xa eqalisa ukuhamba ngaphandle kwengxolo, esuka kwisikhululo sikaloliwe sezi mini, aze abaleke iikhilomitha ezingama-430 ngeyure, nto leyo emenza abe ngoyena loliwe ubaleka kakhulu emhlabeni. Lo loliwe uhamba iikhilomitha ezingama-30 ukuya ePudong International Airport ngemizuzu nje esibhozo. Kodwa kukho into engaqhelekanga ngalo loliwe—akanamavili!
IShanghai-Pudong yiyo yodwa enololiwe ohamba ngemagnethi. Kunokuba ahambe ngamavili entsimbi, lo loliwe uhamba ngemagnethi. Yaye kunokuba aqhutywe ngumntu, uhanjiswa ngekhompyutha ngabantu abakwiziko elithile.
Umahluko Phakathi Kwesiporo Semaganethi Nesiqhelekileyo
Ukwakhiwa kwalo loliwe ukhethekileyo nesiporo sakhe kwavelisa iingxaki ezininzi. Ngokomzekelo, lo loliwe kufuneka athi nca esiporweni. Ngenxa yoko, kuba umhlaba waseShanghai uthambile, oononjineli kwafuneka benze iintsimbi ezikhethekileyo ezinokukwazi ukutshintshwa xa kuyimfuneko. Enye ingxaki kukuba iintsika zekhonkrithi ekwenziwe ngazo isiporo ziyarhwaqela xa kubanda ziphinde zitshintshe xa kushushu.
Sekunjalo zikho iingenelo zokusebenzisa lo loliwe uhamba ngemagnethi. Ngokomzekelo, akananjini namavili enza ingxolo yaye akakhuphi moya onetyhefu. Ukunyamekela lo loliwe nesiporo sakhe akubizi mali ininzi. Lo loliwe unamandla ngaphezu kwemoto nangaphezu kwenqwelo-moya. Enyanisweni, xa ehamba usebenzisa amandla angaphantsi kunalawo awasebenzisayo ekupholiseni umoya. Ngaphezu koko, lo loliwe unyuka lula kwiminqantsa yaye ujika lula emagopheni kunololiwe oqhelekileyo, nto leyo ethetha ukuba akukho mfuneko yokulungisa indlela.
Ekubeni kukho iingenelo ezingako, iyamangalisa into yokuba kube akukakhiwa oololiwe abangakumbi. Esinye isizathu sesokuba kuziindleko ukwenza lo loliwe. Eneneni urhulumente waseTshayina uye wakumisa ukwakhiwa kwesiporo phakathi kweShanghai neBeijing kuba iindleko zokusakha bezinokuziphinda kabini ezo zokwakha isiporo esiqhelekileyo. Kwakhona isiporo semagnethi asidibani nezinye iziporo eziqhelekileyo zaseTshayina.
Isiporo saseShanghai semagnethi sakhiwe ngobugcisa baseJamani, yaye kusenziwa uphando ngaso eJamani, eJapan nakwezinye iindawo. NgoDisemba 2003, eJapan kwenziwa uloliwe wemagnethi obaleka iikhilomitha ezingama-581 ngeyure, ongoyena loliwe ubaleka kakhulu ehlabathini lonke. Ngoko uloliwe waseShanghai usengoyena ubalaseleyo.
Njengoko lo loliwe esuka ePudong ebuyela eShanghai, abakhweli bajonga amanani akwimitha yesantya ekwikhareji ngalinye, ukuze babone xa efikelela kwisantya esiphezulu. Eneneni, xa umntu eqala ukukhwela lo loliwe uye aphoswe kukubuka iindawo, ngenxa yoko uye afune ukuphinda akhwele. Xa ubona lo loliwe uhamba ngesona santya siphakamileyo, uye usiqonde isizathu sokuba ebizwa ngokuba “yinqwelo-moya engenamaphiko.”
[Ibhokisi/Imizobo ekwiphepha 24]
USEBENZA NJANI ULOLIWE WEMAGNETHI?
Iimagnethi ezisebenza nge-elektroniki (1) ezisezantsi kwikhareji ngalinye, kunye neemagnethi ezisesiporweni (2), ziyadibana ukuze zinyuse uloliwe. Ezinye iimagnethi (3) zigcina lo loliwe esesiporweni. Iingcingo ezisesiporweni (4) ezinemagnethi zokuhambisa uloliwe.
Ukuze kongiwe umbane, amandla ombane afakwa esiporweni kuloo nxalenye (5) kuza kudlula uloliwe kuyo. Kufakwa umbane omninzi xa uloliwe efanele abaleke okanye anyuke umnqantsa. Xa kufuneka athobe isantya okanye ajike, nesiporo siyatshintsha.
NGABA AKUYONGOZI UKUHAMBA NGAYE?
Nangona uloliwe wemagnethi ehamba ngesantya esiphakamileyo, inxalenye esezantsi (6) ithi nca esiporweni, yaye ngenxa yoko akunakwenzeka ukuba aphume esiporweni. Akuyomfuneko ukuqhobosha amabhanti, yaye abakhweli bahambahamba ngokukhululekileyo xa bengaphakathi. Xa kunokucima umbane, iziqhoboshi ezikhethekileyo, ezisebenza ngebhetri, zinemagnethi eyenza uloliwe ahlise isantya, ahambe iikhilomitha ezili-10 ngeyure. Emva koko uhamba kancinane ade ame.
Ngaba ezi magnethi zikulo loliwe zingayingozi empilweni yomntu—ngokomzekelo kubakhweli abaneepacemaker? Iziphumo zohlolisiso ziye zabonisa ukuba akukho mfuneko yakuxhalaba. Amandla ezi magnethi angaphantsi kunalawo woololiwe abaqhelekileyo.
[Imifanekiso ekwiphepha 24, 25]
Uhamba iikhilomitha ezingama-430 ngeyure!
[Inkcazelo Ngomfanekiso okwiphepha 24]
Pages 24 and 25: All photos and diagrams: © Fritz Stoiber Productions/Courtesy Transrapid International GmbH & Co. KG