Okwenzeka Ehlabathini
Uphando oluye lwakhutshwa yiArab Road Safety Organization yaseTunisia, luthi kumazwe ama-Arabhu kwenzeka iingozi zemoto ezingaphezu kwama-500 000 nyaka ngamnye, ezibangela ukufa kwabantu abangaphezu kwama-36 000.—IREUTERS NEWS SERVICE, YASETUNISIA.
“Ngokutsho kolunye uphando, i-Internet yeyona ndawo luyifumana kuyo inkcazelo ephathelele isini ulutsha lwaseTshayina kuba esikolweni nasekhaya akufane kuthethwe ngalo mba.”—ICHINA DAILY, YASETSHAYINA.
Intlola Esebenzisa Ikhamera Esekhompyutheni
Kutshanje, amapolisa aseJamani aye abamba aza avalela indoda etyholwa ngokukroba amagumbi amantombazana isebenzisa iikhamera ezikwikhompyutha yala mantombazana. Kuthiwa le ndoda iye yafumana inombolo eyimfihlo yewebhusayithi yenye yala mantombozana, nto leyo eye yayenza yakwazi ukufumana inkcazelo yabanye abantu. Kuthiwa lo mgewu uye wasebenzisa le khompyutha yale ntombazana ukuze aqhagamshelane nabahlobo bale ntwazana abangamantombazana. Loo nto iye yambangela wakwazi ukulawula iikhompyutha zala mantombazana nokusebenzisa iikhamera zazo naninina efuna. Ngokutsho kweAachener Zeitung, xa abaphandi begqogqa umzi wale ndoda bafumana iifoto ezizigidi ezintathu yaye “ikhompyutha yayo yayiqhagamshelane neekhompyutha ezingama-80 zamantombazana ngaphandle kolwazi lwawo.”
Iilwimi Ezingaziwayo Zezenzululwazi
Abaphandi ngeelwimi ababefunda ngolwimi lwesiAka nesiMiji ezithethwa kumntla-mpuma weArunachal Pradesh eIndiya, ekumda weBhutan neTshayina, bafumanisa ukuba kukho ulwimi lwesithathu oluthethwa apho nolubizwa ngokuba sisiKoro. Umphandi uGregory Anderson, ongumphathi weLiving Tongues Institute for Endangered Languages uthi: “Olu lwimi belukade lungaziwa yaye lungabhalwanga ndawo.” Ulwimi lwesiKoro belungaziwa kuba luthethwa ngabantu abangama-800 kuphela abahlala kwindawo ekunzima ukufikelela kuyo. Ebudeni bowama-2009, kuye kwafunyanwa iilwimi ezingama-24 kwindawo yaseTshayina ebekukade kucingelwa ukuba kuthethwa ulwimi olunye kuyo.
Iinkunzi Zehagu Zasendle Ezinemitha Yeathom
ISpiegel Online ithi “Ukususela ngowama-2007 [eJamani] imali urhulumente ayihlawula abazingeli ngenxa yokulahlekelwa ngumvuzo okubangelwa kukubambisa iinkunzi zehagu ezinemitha yeathom iye yaphindaphindeka kane.” Abazingeli abaninzi bathengisela abantu kodwa imithetho karhulumente iyakwalela ukuthengiswa kwenyama enecesium eli-137, imitha yeathom eyasasazeka kwingozi eyenzeka eChernobyl kwiminyaka engama-25 eyadlulayo. ISpiegel sithi, into ebangela ukuba zibe ninzi ezi athom kwinyama yehagu kukuba ezi zilwanyana zitya amakhowa neenkowane. Kodwa ke eyona nto ibangela ukuba urhulumente ahlawule imali eninzi kukwanda kwenani leenkunzi zehagu zasendle kungekhona ukwanda kweeathom.” Iingcali zithi le ngxaki iseza kubakho kangangeminyaka engama-50.