Taratasy voanalohany nisoratin’i Jaona
3 Be ankitin̈y fitiavan’ny Baba atsika. Asa efa niritriretinarô raha zen̈y? Zanany* lastiô nikahiany atsika, ary zen̈y ankitin̈y atsika. Zen̈y mahavy donia ty tsy mahay atsika, fôtony donia ty tsy mahay izy. 2 Rahalahy ndreky ranabavy tiako aby, ndray atsika iziô efa zanakan’ny Zan̈ahary, mbala tsendriky nambara* tamintsika han̈ano akôry atsika. Kanefa haintsika fa atsika hitovy aminany lera izy habaribary, fôtony ho hitantsika karakôry marin̈y izy. 3 Izy madio, ke mila mifen̈y hadio karaha izy koa lan̈iany olo man̈anten̈a izy.
4 Lan̈iany olo zatra manota zatra mandika lalàn̈a, fôtony mandika lalàn̈a lan̈iany olo manota. 5 Hainarô koa fa Jesosy navy han̈adoso fahotan̈antsika. Ary izy tsiary ndraiky nanota. 6 Lan̈iany olo tafikamban̈a aminany tsy zatra manota, fa lan̈iany olo zatra manota ndraiky tsy basiny tsy mahay izy* fo fa mbala tsy mino izy koa. 7 Zanako tiako aby, anarô aza man̈eky fitahin’olo. Lan̈iany olo man̈ano ny marin̈y, izy olo marin̈y, fôtony Jesosy koa mba marin̈y. 8 Baka amy Devoly lan̈iany olo zatra manota, fôtony Devoly io efa nanota rango tamy voanalohany tan̈y.* Handravan̈a asan’ny Devoly antony navian’ny* Zanakan’ny Zan̈ahary.
9 Tsy zatra manota lan̈iany olo naterakan’ny Zan̈ahary, fôtony fan̈ahy masin̈in’ny Zan̈ahary an̈atin’olo karaha zen̈y.* Izy tsy ho zatra manota, fôtony izy naterakan’ny Zan̈ahary. 10 Ty raha mampiavaka zanakan’ny Zan̈ahary amy zanakan’ny Devoly: Tsy baka amy Zan̈ahary lan̈iany olo tsy man̈ano ny marin̈y, aviô tsy baka aminany koa lan̈iany olo tsy tia rahalahiny. 11 Ty bakà hafatra efa ren̈inarô rango tamy voanalohany tan̈y: Atsika mila mifankatia, 12 fa tsy han̈ano karaha i Kaina. Izy bakà zanakan’ny Devoly* sady namono rahalahiny. Nan̈ino izy nan̈ano zen̈y? Fôtony ratsy raha nataony, fa rahalahiny ndraiky nan̈ano ny marin̈y.
13 Rahalahy aby, anarô aza gaga izikoa anarô halan’ny donia ty. 14 Haintsika fa atsika taloha efa kôntiny maty, fa atsika ziô ndraiky velon̈o, fôtony atsika tia irô rahalahintsika aby io. Fa izikoa ndraiky olo araiky tsy tia rahalahiny, izy efa kôntiny maty. 15 Izikoa olo araiky mankahala rahalahiny, izy mpamono olo, ary hainarô fa olo mpamono olo zen̈y tsy hahazo fiainan̈a tsisy farany. 16 Nanjary haintsika dikan’ny fitiavan̈a zen̈y, fôtony Jesosy Kristy nahafoe ain̈inany han̈avaotan̈a atsika. Ke atsika koa mba tsy maintsy mahafoe ain̈intsika amindrô rahalahintsika aby io. 17 Izikoa misy olo araiky manan-draha, fa izy tsy man̈ampy rahalahiny an̈atin’ny fahasahiran̈ana, kanefa izy afaka man̈ano zen̈y, akôry ivolan̈any fa izy tia Zan̈ahary? 18 Zanako tiako aby, tsy tôkony am-bava* fo anarô tia olo, fa raha zen̈y tôkony haboakanarô amy fô madio amy raha hataonarô koa.*
19 Zen̈y hahaizantsika fa atsika baka amy fahamarin̈ana, aviô baka amy zen̈y koa han̈amezantsika toky fôntsika fa atsika tiany,* 20 ndray ino ndray ino antony mahavy fôntsika io man̈ameloko atsika. Zan̈ahary bakà bebe tozay fôntsika, aviô izy mahay raha jiaby. 21 Rahalahy ndreky ranabavy tiako aby, izikoa fôntsika tsy man̈ameloko atsika, atsika tsy havozovozo foeky hikoran̈a amy Zan̈ahary. 22 Aviô ndray ino ndray ino raha angatahantsika aminany, amezany atsika raha zen̈y, fôtony atsika man̈araka didinany ndreky man̈ano raha mamparavoravo izy. 23 Ty bakà didinany: Atsika mila mino an̈aran̈an’i Jesosy Kristy Zanany ndreky mifankatia, eraka raha nan̈irahany atsika. 24 Fan̈ampin’izen̈y koa, ho tafikamban̈a aminany fo lan̈iany olo man̈araka didinany, baka iô izy ho tafikamban̈a amin’olo zen̈y. Ary baka amy fan̈ahy masin̈y amezany atsika hahaizantsika fa izy tafikamban̈a amintsika fo.