Taratasy voanalohany handeha amindrô Tesalônianin̈y aby io
3 Efa tsy din̈inay haharen̈y vaovao momba anarô ke zahay nanapa-kevitry hidôko a Atena, 2 fa Timoty ndraiky nalefanay taminarô tan̈y. Izy rahalahinay sady mpanompon’ny* Zan̈ahary man̈ambara vaovao tsara momba Kristy. Izy nirahanay hankahery anarô ndreky hankafatatra finoan̈anarô, 3 amy zen̈y tsisy ndray araiky aminarô ho voahozongozon̈o natà iô raha sarotro aby zen̈y. Hainarô tsarabe bakà fa atsika tsy maintsy miaritry raha sarotro aby zen̈y. 4 Fôtony tamy zahay taminarô tan̈y, matetiky zahay nivolan̈a taminarô fa atsika tsy maintsy miaritry raha sarotro, ary hainarô fa zen̈y ankitin̈y raha nandalo. 5 Ke izikoa fa tsy din̈iko haharen̈y vaovao momba anarô, zaho nan̈iraka Timoty handeha aminarô an̈y misy hahaizako izikoa anarô tsy mivadiky. Tsao bakà Devoly nitsapa jery anarô ke nahavy anarô hanota. Izikoa zen̈y, very bôriny asa mare nataonay.
6 Fa Timoty ziô vo navy baka taminarô tan̈y, ke izy nitondra vaovao tsara. Nambarany zahay fa anarô zen̈y tsy mivadiky salakady be fitiavan̈a, aviô anarô mahatsiaro zahay fo sady tihahita zahay mare, karaha ataonay aminarô. 7 Ke zen̈y mahavy zahay, rahalahy aby, mahazo fankahirezan̈a ndray mandalo raha sarotro* ndreky mijaly mare, fôtony ren̈inay raha momba anarô aviô hainay fa anarô tsy mivadiky. 8 Ia, zahay mahatsiaro velombelon̈o ndraiky koa*, fôtony anarô tsy mivadiky amy Tômpo. 9 Zahay mankasitraka Zan̈ahary, fôtony baka aminarô mahavy zahay ravoravo mare.* 10 Matsan̈a alin̈y, zahay miangavy Zan̈ahary angôvo jiaby misy hahitanay anarô* ndreky haminoanay raha tsy ampy amy finoan̈anarô.
11 Ke irarian̈a Zan̈ahary Babantsika ndreky Jesosy Tômpontsika han̈ampy* zahay ho avy aminarô an̈y. 12 Aviô irarian̈a Tômpo han̈ano raha hahavy anarô hahaihifankatia fo ndreky han̈ampy anarô hampitombo fitiavanarô olo jiaby, karaha ataonay aminarô; 13 amy zen̈y izy hankafatatra fônarô ndreky han̈ano raha hahavy anarô ho masin̈y ndreky tsisy tsin̈y man̈oloan̈a Zan̈ahary Babantsika, an̈atin’ny fotoan̈a himpodianan’i Jesosy Tômpontsika miaraka amin’olonany masin̈y jiaby.