Taratasy handeha amy Titosy
3 Ampahatsiaraova fo irô rahalahy aby io han̈araka volan̈andrô mpitondra fanjakan̈a ndreky manam-pahifan̈a aby io, ndreky han̈eky fahifan̈andrô. Ampahatsiaraova koa irô, fa irô tôkony ho vôn̈ono han̈ano asa tsara jiaby, 2 tsy hankaratsy olo, tsy hitady ady amin’olo, hahay hipezipezy,* aviô ho tsara fan̈ahy fo amin’olo jiaby.* 3 Atsika taloha bakà mba tsy nandiniky tsara, tsy nan̈araka volan̈a, voafitaka, nandivôzin’ny fan̈irian̈a ndreky plezira* isan-karazany, zatra nan̈ano raha tsy manjary sady be fô olo, olo tsy nanjary, aviô atsika tsy nifankatia foeky.
4 Kanefa, naboakan’ny Zan̈ahary Mpan̈avotro atsika fa izy tsara fan̈ahy ndreky tia olombelon̈o. 5 Ke izy nan̈avotro atsika tamin’izy nan̈adio* atsika amy zen̈y atsika ho velon̈o, ndreky tamin’izy nan̈amia atsika fan̈ahy masin̈y amy zen̈y atsika hanjary olo vaovao. Tsy baka tamy raha tsara nataontsika nahavy izy namonjy atsika, fa baka tamin’izy namindra fô tamintsika. 6 Jesosy Kristy Mpan̈avotro atsika nampiasainy handatsaka fan̈ahy masin̈y amintsika, ary tsy hely fo fa marobe. 7 Amy zen̈y atsika koa fa baka nan̈aboahan̈a hatsaram-pan̈ahy miavaka ke atsika nambara fa marin̈y, atsika handova fiainan̈a tsisy farany, eraka raha nampan̈antinain̈a atsika.
8 Marin̈y raha aby zen̈y, ke tiako izikoa anao tsy vôly mikoran̈a momba irô io, amy zen̈y zay olo mino Zan̈ahary hifantoko amy fan̈anaovan̈a raha* tsara sady tsy vôly han̈ano zen̈y. Raha aby zen̈y bakà tsy basiny tsara fo fa mahatsara olo koa.
9 Fa anao, aza midrikidriky* amin’ny adihevitry adaladala, na koran̈a momba tetirazan̈a, na adihevitry momba Lalàn̈a, fôtony raha aby zen̈y tsisy dikany sady mandany lera.* 10 Izikoa misy olo mampianatra raha diso,* anàra izy. Fa izikoa izy efa baka nanarin̈y fan̈indroeny kanefa izy tsy nitandren̈y, adosoa tsy ho an̈isan’ny fiangonan̈a izy. 11 Fôtony hainao fa olo io efa niala tamy lalan̈an’ny fahamarin̈ana, aviô izy nanota sady efa nitsarain̈a baka tamy raha nataony.
12 Zaho koa fa handefa Artemasy na Tykiko aminao an̈y, ataova zay vitanao misy havianao a Nikôpôlisy, fôtony zaho io tapa-kevitry hidôko an̈y amy ririn̈iny. 13 Ataova zay vitanao han̈ampian̈a Zenasy, araiky mahay Lalàn̈a in̈y, ndreky Apôlôsy, amy zen̈y tsisy raha hijaliandrô lera irô man̈ano diandrô. 14 Fa irô rahalahintsika aby a Kreta ao koa mba mila mianatra man̈ano asa tsara, amy zen̈y irô hahavita han̈ampy izikoa fa misy raha ilàn̈a fan̈ampian̈a meky. Izikoa irô tsy man̈ano zen̈y, irô tsy hahavita han̈ano asa tsara.
15 Sambitsara zen̈y anao, ho irô jiaby aminaka atỳ. Sambitsara amindrô rahalahy tia zahay mare, tsy azôvy zen̈y fa irô rahalahy jiaby an̈y.
Irarian̈a anarô jiaby han̈aboahan’ny Zan̈ahary hatsaram-pan̈ahy miavaka.