Vaovao Tsara Nisoratin’i Matio
8 Jesosy koa fa nijotso baka tamy bongo io, nisy olo marobe nan̈araka izy. 2 Nisy lelahy boka araiky nan̈aton̈o izy, baka iô nankôhoko nan̈oloan̈a izy. Ho lelahy io taminany: “A Tômpo, izikoa tianao hampadio zaho, ho vitanao raha zen̈y.” 3 Ke namparin’i Jesosy tan̈anany, baka iô izy nikasihiny. Ho izy tamy lelahy io: “Ia, tiako han̈ano zen̈y! Hadio anao.” Niaraka tamin’in̈y, nafaka habokan̈an’ny lelahy io, ke nadio izy. 4 Karaha ty koa ho Jesosy: “Aza volan̈iny amin’olo raha nataoko in̈y, fa mindao anao mandeha amy mpisôron̈o an̈y, aviô mitondrasa fan̈atitry eraka raha nan̈irahan’ny lalàn̈an’i Mosesy, amy zen̈y ho hitandrô fa anao efa janga.”
5 Jesosy koa fa niditry ta Kapernaomy, nisy lelahy manamboninahitry araiky nan̈aton̈o izy ke niangavy izy 6 karaha ty: “Mafadiana tômpoko anao! Misy mpanomponaka milopaka be an-tran̈o an̈y, tsy afaka mihetsiky foeky. Mijaly mare izy. Ke mba tahà kony izy e!” 7 Ho Jesosy taminany: “Handeha an̈y zaho hampajanga izy.” 8 Manamboninahitry io nivolan̈a taminany: “Zaho tsy man̈eva han̈ano karibo an-tran̈o anao, tômpoko anao ô! Fa ndray baka atỳ fo anao mivolan̈a: ‘Ho janga mpanomponao’, ho janga edy izy. 9 Fôtony zaho io koa mba ambany fahifan̈an’olo, sady manan̈a maramila ambany fahifan̈anaka koa. Ke zaho koa fa mivolan̈a amin’ny araiky amindrô io: ‘Mindao!’, izy efa lôso edy; zaho koa mivolan̈a amin’ny araiky hafa: ‘Mavia!’, izy efa avy edy; zaho koa mivolan̈a amy mpanomponaka: ‘Ataova ty!’, izy efa man̈ano edy.” 10 Jesosy koa fa naharen̈y zen̈y, lany fan̈ahy izy, ke ho izy tamin’olo nan̈araka izy aby io: “Ambarako anarô ny marin̈y: Zaho mbala tsiary nahita olo nanan̈a finoan̈a maventy be ambaka ninazy io tan Israely. 11 Tiako ho hainarô fa maro olo baka amy tany farany lavitry* ho avy hangala* plasindrô amy Fanjakan̈an’ny lan̈itry, ke irô ho latabatra araiky amin’i Abrahama, ndreky Isàka, aviô Jakoba. 12 Fa zanakan’ny Fanjakan̈an’ny lan̈itry io ndraiky hatsipy amin’ny hiziky ambelan̈a an̈y. An̈y irô hitomoan̈y aviô ho meloko ndreky ho diso fan̈antinan̈a.”* 13 Baka iô ho Jesosy tamy manamboninahitry io: “Mindao mody. Ho tanteraka raha nangatahanao, fôtony naboakanao tsarabe fa anao manan̈a finoan̈a.” Niaraka tamy zen̈y, nahivan̈a mpanompon’ny manamboninahitry io.
14 Jesosy koa fa niditry tan-tran̈on’i Petera, hitany nilopaka be tan̈abon’ny fandrian̈a rafozambavin’i Petera fôtony nazon’ny lafievra. 15 Nikasihin’i Jesosy tan̈an’ny man̈angy io ke nafaka lafievranany. Man̈angy io baka tiô nitsangana, aviô izy nandeha nandoky hanin̈indrô. 16 Izikoa fa tsôfotro andra, marobe olo nisaraon̈an’ny demony nindesin’olo tamy Jesosy. Zisty nivolan̈a fo izy, efa niboaka edy irô demony aby io. Janga aby zay olo narary nindesin̈y taminany tiô. 17 Ke tanteraka raha nambaran’ny mpaminan̈y Isaia ty: “Nitahàny aretin̈inay, baka iô nadosony tehotehokonay.”
18 Izikoa fa hitan’i Jesosy fa nisy olo marobe nan̈odidin̈y izy, irô mpianatranany aby io nirahiny nitsaka tandaforehy.* 19 Nisy mpanoratra lalàn̈a nan̈aton̈o izy sady nivolan̈a taminany karaha ty: “A Mpampianatra, han̈araka anao zaho ndray aia ndray aia tany himboanao.” 20 Kanefa Jesosy nivolan̈a: “Amboadỳ misy lavaka hisitrihan̈a, aviô vôron̈o* misy tran̈ony, fa Zanak’olo ndraiky tsisy tran̈o!”* 21 Baka iô nisy mpianatra hafa nivolan̈a karaha ty taminany: “A Tômpo, ambilà antsendriky zaho handeha handevin̈y babako.” 22 Ho Jesosy taminany: “Man̈araha zaho fo, fa ambilà olo maty handevin̈y olo maty.”
23 Jesosy ndreky mpianatranany baka tiô niondran̈a sambo. 24 Tiô fo nisy andra ratsy, ke nihetsiky mare ranomasin̈y. An̈abo be koa daroba, ke efa kalikaly ho fofo sambo io. Fa Jesosy tamin’io ndraiky nandry. 25 Ke irô nan̈aton̈o izy, sady namaoha izy karaha ty: “A Tômpo, vonjia atsika! Atsika kony ho foaty ay!” 26 Kanefa ho izy tamindrô: “Ino ma raha mampavozo* anarô? Anarô ty mba hely finoan̈a ay!” Baka iô izy nitsangana, ke nivolan̈iny mare tsiko ndreky ranomasin̈y. Nanjary kalma amizay andra. 27 Ke lany fan̈ahy irô mpianatranany aby io, salakady nivolan̈a karaha ty: “Mba olo karakôry loatra izity zalahy? Firaka amy tsiko ndreky ranomasin̈y mbala man̈araka volan̈anany fo!”
28 Irô koa fa tafitsaka tamy faritry Gadara, irô fanôjy lelahy aroe nisy demony. Irô io niboaka baka tam-pasan̈a. Faran-draha kafiry eky irô io, ke tsisy olo nasaky nandalo tamy lalan̈a io. 29 Irô nandronton̈o karaha ty: “Ino ma dianao atỳ Zanakan’ny Zan̈ahary? Handeha han̈asazy zahay alohan’ny fotoan̈a ma navianao atỳ?” 30 Nisy komankory marobe nihinan̈a tsy lavitry tiô. 31 Ke irô demony aby io niangavy izy karaha ty: “Izikoa anao han̈aboaka zahay, sitrany zahay alifasa amindrô komankory aby irỳ.” 32 Ho Jesosy tamindrô: “Mindao!” Irô demony aby io baka tiô niboaka, aviô irô niditry tamy komankory aby io. Ke irô komankory aby io amizay nilomoay namarantan̈a tamy fampan̈a, ndreky farany irô latsaka tan-dranomasin̈y ke naty. 33 Irô mpiambin̈y komankory aby in̈y ndraiky nilefa tan-tanàna, ke nitantaraindrô tamin’olo raha jiaby nandalo, an̈isan’izen̈y raha nandalo tamindrô lelahy nisy demony aby in̈y. 34 Ke olo jiaby tan-tanàna tao niboaka handeha hizaha Jesosy. Irô koa fa nahita izy, irô niangavy izy hiala tamy faritry nisy irô io.