Taratasy handeha amindrô Hebreo aby io
1 Taloha ela be tan̈y, tsy indraiky tsy indroe Zan̈ahary nampiasa irô mpaminan̈y aby io hikoran̈ana tamindrô dadilahibentsika aby io, sady tamy fomba isan-karazany. 2 Fa amy ziôty ndraiky,* Zan̈ahary nampiasa Zanany hikoran̈ana amintsika. Zanany io nifidiny handova raha jiaby, ndreky nampiasainy hampisy raha ambony tany eto ndreky raha an-dan̈itry an̈y.* 3 Izy taratran’ny voninahitrin’ny Zan̈ahary aviô tsisy ny hafa amy toetrin’ny Zan̈ahary toetrinany.* Baka amin’ny angôvo namezan’ny Zan̈ahary izy mbala mampisy raha jiaby io. Izy koa fa baka nan̈adio atsika ho afaka amy fahotan̈antsika, izy nipetraka tankavanan̈an’ny araiky Farany An̈abo, tsy azôvy zen̈y fa Zan̈ahary an-dan̈itry an̈y. 4 Ke izy nanjary an̈abon̈abondrô anjely aby io, fôtony fahifan̈a* nazony* mbala an̈abo mandilatran’ny nindrô.
5 Azôvy tamindrô anjely aby io ma ziôty efa nivolan̈an’ny Zan̈ahary karaha ty: “Anao zanako; niany zaho manjary babanao”? Na nivolan̈any karaha ty: “Zaho hanjary babany, aviô izy hanjary zanako”? 6 Fa Zanany Talan̈olo koa fa himpody hirahiny ambony tany atỳ, izy hivolan̈a: “Anjely jiaby niasain’ny Zan̈ahary tsy maintsy mankôhoko man̈oloan̈a izy.”
7 Karaha ty koa ho izy momba irô anjely aby io: “Ataony matanjaka mare* irô anjelinany aby io, aviô mpanomponany* ataony karaha lelan’ny môtro.” 8 Fa karaha ty ndraiky ho izy momba Zanaka io: “Zan̈ahary maharitry mandrakizay mandrakizay, ary izy man̈amia anao fahifan̈a hanjaka;* aviô Fanjakan̈anao koa fa mitondra, hanjaka ny rariny. 9 Anao tia fahamarin̈ana fa halanao ndraiky fandikan-dalàn̈a. Zen̈y mahavy Zan̈ahary, tsy azôvy zen̈y fa Zan̈aharinao, nifidy anao ke nan̈ôsotro menaka taminao, amy zen̈y anao ho ravoravo mandilatra mpanjaka hafa.”* 10 Aviô koa ho izy: “Tômpo, tamy voanalohany, anao nan̈apetraka fôtotron’ny tany, baka iô baka tamin’ny angôvonao niasanao lan̈itry.” 11 Irô raha aby io ho ravan̈a, fa anao ndraiky haharitry; aviô karaha ataon’ny lamba in̈y, irô io mbala ho robaka, 12 baka iô irô io haholon̈onao karaha atao man̈olon̈o lamba* in̈y, aviô irô io hisoloanao karaha atao misolo lamba in̈y. Fa anao ndraiky tsy hiova foeky, baka iô andra iain̈anao* tsy ho hisy farany.
13 Aviô, azôvy tamindrô anjely aby io koa ma efa navy nivolan̈an’ny Zan̈ahary karaha ty: “Anao mipitraha ankavanan̈anaka eto parapan̈anaovako fahavalonao hanjary raha fipitrahan’ny vitinao”? 14 Irô anjely jiaby io ma tsy* man̈ano fanompoan̈a masin̈y* ke nirahin̈y hikarakara lan̈iany olo hivonjen̈a?*