Taratasy Handeha Amindrô Romanin̈y aby Io

5 Ke fôtony atsika ziô nambara fa marin̈y baka amy finoan̈antsika, alô atsika hihavan̈a amy Zan̈ahary fo,* baka amy Jesosy Kristy Tômpontsika. 2 Baka tamy Jesosy nahavy atsika hahavita han̈aton̈o Zan̈ahary ndreky han̈aboahan̈a hatsaram-pan̈ahy miavaka. Ke alô atsika hiravoravo* fôtony atsika man̈anten̈a hahazo voninahitry baka amy Zan̈ahary. 3 Aviô tsy zen̈y fo, fa alô atsika hiravoravo* ndray an̈atin’ny fahorian̈a, fôtony haintsika fa fahorian̈a io mahavy atsika hanan̈a fiaretan̈a, 4 baka iô fiaretan̈a mahavy atsika ankasitrahan’ny Zan̈ahary, aviô fankasitrahan̈an’ny Zan̈ahary mahavy atsika hanan̈a fan̈antinan̈a. 5 Sady fan̈antinan̈a tsy mandiso fan̈antinan̈a, fôtony efa natao an̈atin’ny fôntsika ao fitiavan̈an’ny Zan̈ahary, baka tamy fan̈ahy masin̈y namian̈a atsika.

6 Fa rango tamin’ny atsika mbala nalemy, Kristy naty han̈avaotan̈a olo ratsy fan̈ahy, tamy fotoan̈a voatôndro. 7 Mahalan̈a baka vo misy olo man̈eky ho foaty han̈avaotan̈a olo marin̈y; fa ndray zen̈y, mety misy olo fo vôn̈ono ho foaty han̈avaotan̈a olo tsara fan̈ahy. 8 Kanefa, naboakan’ny Zan̈ahary fa atsika tiany, fôtony tamin’ny atsika mbala mpanota, Kristy naty han̈avaotan̈a atsika. 9 Sôsoko zen̈y, atsika ziô efa nambara fa marin̈y baka tamy lion’i Kristy, ke atsika afaka matoky tsarabe fa baka aminany hahavy atsika ho avotro lera Zan̈ahary han̈ampatra helokonany. 10 Fôtony tamin’ny atsika mbala fahavalo, atsika nampihavanin̈y tamy Zan̈ahary baka tamy nifatesan’ny Zanany. Ke nohon’ny atsika ziô efa mihavan̈a aminany, mahaimatoky fo atsika fa atsika hivonjen̈a fôtony Jesosy velon̈o. 11 Aviô tsy basin’izen̈y fa, atsika ravoravo fôtony baka amy Jesosy Kristy Tômpontsika mahavy atsika mifandray amy Zan̈ahary ndreky mahavy atsika ziô mihavan̈a aminany.

12 Baka tamin’olo araiky nidiran’ny fahotan̈a tamy donia ty, baka iô fahotan̈a nahavy fahafatesan̈a, ke fahafatesan̈a io niparitaka tamin’olo jiaby fôtony samby efa nanota aby irô jiaby. 13 Talohan’ny nisian’ny Lalàn̈a baka, fahotan̈a efa tamy donia ty. Kanefa, tsisy olo ampangain̈a fa nanota izikoa tsisy lalàn̈a. 14 Fa ndray zen̈y, fahafatesan̈a io nanjaka rango tamin’i Adama firaka tamy Mosesy. Ary firaka olo tsy nan̈ano fahotan̈a karaha nin’i Adama in̈y mbala nanjakan’ny fahafatesan̈a fo. Adama io misy itovizan̈a amin’ny araiky ho avy afara.

15 Kanefa tsy mitovy kadô* ndreky hadisovan̈a.* Maro olo naty fôtony olo araiky nanota. Fa hatsaram-pan̈ahy miavakan’ny Zan̈ahary ndreky kadô tsy vangaim-bola naboakany baka tamin’ny hatsaram-pan̈ahin’ny lelahy araiky, tsy azôvy zen̈y fa Jesosy Kristy, mbala be lavitry. Baka amy kadô zen̈y baka mahavy Zan̈ahary han̈amia hatsaran̈a olo maro. 16 Ty koa raha tsy mampitovy kadô tsy vangaim-bola ndreky fahotan̈a nataon’ny lelahy araiky: Baka tamy fahotan̈a nataon’olo araiky nahavy olo jiaby nambara fa diso. Fa kadô namezan̈a nohon’ny fahotan̈a maro ndraiky nahavy olo maro hambara fa marin̈y. 17 Baka tamin’ny hadisovan̈an’olo* araiky nahavy fahafatesan̈a hanjaka. Kanefa mahaimatoky fo atsika fa zay olo nahazo marobe tamin’ny hatsaram-pan̈ahy miavaka ndreky tamy kadô tsy vangaim-bola baka tamy raha nataon’olo araiky, tsy azôvy zen̈y fa Jesosy Kristy, ho velon̈o ndreky hitondra amy maha mpanjaka. Tsy ino kadô zen̈y fa fan̈ambaran̈a fa irô io olo marin̈y.

18 Ke, karaha ataony baka tamin’ny hadisovan̈a* araiky nahavy karazan̈an’olo jiaby ho voaheloko, karaha zen̈y koa fa, baka tamy raha marin̈y araiky* nataon’olo araiky nahavy karazan̈an’olo jiaby hambara fa olo marin̈y ke hahazo fiainan̈a. 19 Karaha ataony baka tamin’olo araiky tsy nan̈araka volan̈a nahavy olo jiaby mpanota, karaha zen̈y koa fa, baka tamin’olo araiky nan̈araka volan̈a nahavy olo maro hanjary olo marin̈y. 20 Lalàn̈a io namezan̈a misy han̈aboahan̈a fa mpanota ankitin̈y olo. Kanefa arakaraka mampamaro fahotan̈a, mahaibe fo koa hatsaram-pan̈ahy miavaka. 21 Ino tanjon̈o? Amy zen̈y karaha ataon’ny fahotan̈a ndreky fahafatesan̈a manjaka, hanjaka koa hatsaram-pan̈ahy miavaka, baka olo hambara fa olo marin̈y ke hahazo fiainan̈a tsisy farany baka amy Jesosy Kristy Tômpontsika.