Taratasy Handeha Amindrô Efesianin̈y aby Io
3 Zen̈y mahavy zaho, Paoly, araiky migadra fôtony zaho nin’i Kristy Jesosy sady man̈ampy anarô hafa firenena… 2 Efa ren̈inarô ankitin̈y bakà fa zaho namezan̈a andraikitry han̈ampy anarô hahazo hatsaran̈a baka amin’ny hatsaram-pan̈ahy miavaka aboakan’ny Zan̈ahary. 3 Nambarany zaho ndreky nabaribariny taminaka sekire masin̈y, eraka raha efa nisoratiko fôhipôhiky taminarô talohaloha tao. 4 Ke lera anarô mamaky izy ty, ho hitanarô fa haiko tsarabe sekire masin̈y momba* Kristy. 5 Tamy taranaka taloha, sekire io mbala tsy natao hain’ny zanakan’olombelon̈o karaha ataony izy ziô efa nabaribary baka tamy fan̈ahy tamindrô apôstôlinany masin̈y ndreky mpaminan̈inany aby io. 6 Ty sekire zen̈y: Fôtony irô olo hafa firenena aby io tafikamban̈a amy Kristy Jesosy ndreky nan̈eky vaovao tsara, irô tôkony ho lova araiky aminay sady an̈isan’ny vatan̈a araiky fo, aviô irô hahazo raha nampan̈antinain’ny Zan̈ahary zahay koa. 7 Zaho nanjary mpanompo niandraikitry raha zen̈y, eraka hatsaram-pan̈ahy miavaka naboakan’ny Zan̈ahary taminaka tamin’izy nan̈aboaka angôvonany taminaka, ary raha zen̈y kadô tsy vangaim-bola.
8 Zaho, araiky mbala helihelin’ny araiky farany hely amin’olo masin̈y jiaby, nan̈aboahan̈a hatsaram-pan̈ahy miavaka zen̈y, amy zen̈y zaho han̈ambara vaovao tsara momba harian̈an’i Kristy tsisy limitiny io amin’olo hafa firenena, 9 ndreky han̈ampy olo jiaby hahita karakôry ataon’ny Zan̈ahary, araiky namôron̈o raha jiaby, man̈abaribary* sekire masin̈y nasitriny rango efa ela be tan̈y. 10 Niboaka raha zen̈y ziôty, baka Zan̈ahary han̈aboaka fahendrenanazy amy fanjakan̈a ndreky manam-pahifan̈a amy faritrin’ny lan̈itry an̈y, baka amy lamin̈y misy an̈ivon’ny fiangonan̈a, ary fahendrenanazy io miboaka amy fomba isan-karazany. 11 Raha zen̈y mifan̈araka amy fikasan̈anany letry zay* momba Kristy, tsy azôvy zen̈y fa Jesosy Tômpontsika. 12 Baka aminany mahavy atsika masaky mivolan̈a ndreky mahavy atsika afaka man̈aton̈o Zan̈ahary nohon’ny atsika mino Kristy. 13 Ke zaho miangavy anarô tsy ho kivy ndray zaho miaritry fahorian̈a nohon’ny aminarô, fôtony voninahitry ninarô raha zen̈y.
14 Zen̈y mahavy zaho mandohaliky man̈oloan̈a Baba. 15 Baka aminany bakà nazahoan’ny fianakavian̈a jiaby an-dan̈itry an̈y ndreky ambony tany eto an̈aran̈a. 16 Zaho mivavaka baka izy hampiasa angôvo baka amy fan̈ahinany, misy hankafataran̈a fônarô ndreky jerinarô, fôtony izy ten̈a be voninahitry ankitin̈y;* 17 aviô koa, mivavaka zaho baka Kristy hapetrakanarô an̈atin’ny fônarô ao miaraka amy fitiavan̈a, nohon’ny anarô mino izy. Irarian̈a anarô hamahatra tsarabe ndreky hiôrin̈y mare amy fôtotro io, 18 amy zen̈y hazava tsarabe aminarô ndreky amin’olo masin̈y jiaby fahamarin̈ana io, na amin’ny ampôhony zen̈y na amin’ny halavasany na amin’ny habaosany na amin’ny halalin̈any, 19 aviô ho hainarô koa fitiavan̈an’i Kristy; izio mbala be mandilatra fahaizan̈a jiaby, amy zen̈y anarô ho feno toetry jiaby baka amy Zan̈ahary.
20 Zan̈ahary, araiky afaka man̈ano mihoatra lavitrin’ny raha angatahantsika na iritriretintsika, eraka angôvo miasa an̈atintsika ao, 21 man̈eva hamezan̈a voninahitry baka tamy raha nataony tamy fiangonan̈a ndreky tamy Kristy Jesosy, firaka amy taranaka jiaby mandrakizay mandrakizay! Ameny.