Taratasy handeha amindrô Hebreo aby io
4 Zan̈ahary mampan̈anten̈a fa atsika mbala afaka midriky amy fitsaharan̈anany, ke alô atsika hitandrin̈y* tsao hisy amintsika ho hita fa tsy vain̈y fampan̈antinan̈a zen̈y. 2 Fôtony atsika koa mba nan̈ambaran̈a vaovao tsara karaha irô dadilahibentsika aby io, fa raha ren̈indrô tsy nahatsara irô, fôtony irô tsy nanan̈a finoan̈a matanjaka karaha nindrô olo nitandren̈y aby io. 3 Atsika hidriky amy fitsaharan̈anany, fôtony atsika nan̈aboaka fa atsika mino. Fa karaha ty ndraiky ho izy momba irô olo aby tsy nan̈araka volan̈anany in̈y: “Zaho neloko ke ty vava nataoko: ‘Irô tsy hidriky amy fitsaharan̈anaka.’” Nivolan̈a zen̈y izy ndray efa rango nan̈oren̈ana donia ty nivitàn’ny asanany. 4 Karaha ty bakà ho izy amin’ny andininy araiky, momba andra fahafito io: “Tamin’ny andra fahafito Zan̈ahary vôly tamin’ny asanany jiaby”,* 5 aviô karaha ty koa ho izy amin’ny andininy hafa: “Irô tsy hidriky amy fitsaharan̈anaka.”
6 Irô olo voanalohany nan̈ambaran̈a vaovao tsara io tsy tafidriky amy fitsaharan̈an’ny Zan̈ahary, fôtony irô tsy nan̈araka volan̈a. Fa fitsaharan̈anany io ziô mbala mety hidiran̈a. 7 Zen̈y nahavy izy nimpody nifidy andra araiky ndraiky, ela be tafara tatỳ, tamin’izy nivolan̈a “niany” amy salamon’i Davida ao in̈y; eraka raha efa voakoran̈a taloha tiô in̈y: “Izikoa anarô mitandren̈y feonany ankitin̈y niany, anarô* tsy mila be mokon-doha.” 8 Izikoa bakà Josoa nitondra irô tamy tany fitsaharan̈a, Zan̈ahary tsy nety ho nikoran̈a momba andra hafa eky tafaran’izen̈y. 9 Ke dikan’izen̈y, mbala hisy sabata fitsaharan̈a fo nataokan̈a nin’ny vahoakan’ny Zan̈ahary. 10 Fôtony lan̈iany olo midriky amy fitsaharan̈an’ny Zan̈ahary koa mba vôly amin’ny asanany, karaha nataon’ny Zan̈ahary vôly tamin’ny asanany.
11 Ke alô atsika han̈ano zay vitantsika baka atsika hidriky an̈atin’ny fitsaharan̈a io, amy zen̈y tsy ho hisy natà araiky amintsika hangala tahaka irô ke tsy han̈araka volan̈a. 12 Volan̈an’ny Zan̈ahary io velon̈o ndreky mahery. Izio mbala marangidrangitrin’ny sabatra marangitry mare,* sady mitrebiky lalin̈y ke mahavita man̈avaka ny mety ho fahitan̈a olo araiky amy ny ten̈a maha izy izy;* aviô izio koa mahavita mampisaraka taolan̈a* ndreky tsoka, ke mahay raha iritriretin’ny fô ndreky raha tian’izio hatao. 13 Tsisy raha* misitriky amy Zan̈ahary foeky fôtony mibolain̈y* ndreky mibaribary man̈oloan̈a izy aby raha jiaby, sady izy lastiô hitsara atsika eraka raha nataontsika.
14 Miavaka mpisôron̈obentsika, tsy azôvy zen̈y fa Jesosy zanakan’ny Zan̈ahary. Izy efa nanonga an-dan̈itry an̈y, ke alô atsika tsy ho vôly han̈ambara raha inoantsika momba izy. 15 Fôtony mpisôron̈obentsika io tsy vitany mahay mahinakinaka atsika nohon’ny atsika tsy lavorary fo fa, izy koa mba efa niaritry raha isan-karazany, karaha atsika, fa izy fo tsy nanota. 16 Ke alô atsika hivavaka amy* Zan̈ahary, araiky man̈aboaka hatsaram-pan̈ahy miavaka, sady tsy havozovozo foeky izikoa fa man̈ano zen̈y, amy zen̈y atsika hamindrany fô sady han̈aboahany hatsaram-pan̈ahy miavaka, ke izy han̈ampy atsika amy fotoan̈a mety.